抱怒舜的自述

「嗚咿嗚，吱嘶咩嘶，噶呠，喵唧咕嗚吽𠵱，哦噢呼，呀啊吖喔……」抱怒舜着緊地說。

我相信無人會明白抱怒舜的說話，所以以下內容是用最新AI翻譯軟件翻譯，請聽聽抱怒舜的自述。

「我唔係叫抱怒舜！我叫呼，係馬騮媽幫我改。我一出世，可能係因為我生得奇怪，人類媽媽就遺棄我喺山上。不過好在狼爸同馬騮媽佢哋發現咗我，無嫌棄我，養大我之餘仲教識我點樣喺大自然生存，同埋最重要嘅係教我唔好憎恨我嘅親生媽媽，所以我唔憎佢不特止，我仲好愛人類。

我一直以嚟都住喺山入面，同大家生活得優哉悠哉。我哋都明白人類生活圈會不斷擴展，一直以嚟都好忍讓，選擇不斷向上移就人類。但眼見大家嘅生活空間同食物因為人類活動而變少，大家生活得好艱辛我就好心痛，不過狼爸依然教我要適應同接受，避免衝突。

直到有次同季候鳥家族傾偈，先知世界各地嘅人類破壞地球環境已經去到忍無可忍嘅地步，温室氣體嘅無限制排放、無過濾嘅工業污水排放喺河流海洋、核實驗導致嘅核輻射超標、唔同程度同原因嘅核洩漏，仲有好多好多；而對動物嘅逼害同剝削更加令人髮指，基因實驗、胡亂混種配種、試藥、各式虐待……大自然率先以極端氣候反噬人類，世界範圍內嘅動物都開始反抗，熊、袋鼠、烏鴉更加擔任先鋒開始搶返原本應該屬於大家嘅大自然。

我同狼爸、馬騮媽講，我希望用我咁特殊嘅身份作為動物同人類之間嘅橋樑，為大家出力去爭取，避免北極熊或者野豬一家嘅悲劇發生喺大家身上。起初佢哋都唔同意，但經過我多番游說，最後都批准咗，不過佢哋千叮萬囑一樣嘢，就係唔可以同人類有衝突，有衝突就要走。

我記住呢條金科玉律開始喺人類城市度探索，但我知自己個樣會嚇親人，所以揀咗入夜凌晨無咩人嘅時候出動。我嘅目標係揾一個接受到我嘅人類然後同佢解釋，再揾佢幫手向全世界表達我哋嘅意願。可惜，成件事一開始就錯咗，我第一個遇到嘅係個瀕死嘅人，為咗證明我係帶住善意而嚟，我選擇去救人，見到佢手叉住頸、口吐鮮血，我知道佢食錯嘢，為咗救人，情急之下唯有用口吸返啲嘢出嚟，點知咁啱有人見到就大嗌話我食人，我被佢嚇親所以就逃走。

我根據嗰陣酸臭味揾到真兇嘅住所，但我入唔到去，確認唔到佢真正所在地，只好喺附近等。等咗幾日佢終於喺附近嘅後巷出現，可惜趕到去已經太遲，我嘗試去救人，但結果同第一次一樣，所以我只好再次逃走。

如是者去到第四次，我終於知道邊個係兇手，可惜都係慢咗一步，想同人類示好嘅我依然揀救人，點知又被人誤會，今次呢兩個人仲要對我窮追不捨，我一直跑，佢哋一直追，我只好跑返上山。喺主場諗住可以擺脫佢哋，點知天空嚟咗隻好奇怪嘅雀開始攻擊我，後來問返狼爸先知嗰個叫直升機，係人類嘅飛行器。好彩最後狼爸、馬騮媽，同埋成班動物朋友幫手，我先可以經地洞逃生。

呢次之後，狼爸同馬騮媽都唔准我再去人類嘅地方，但係我唔死心，我相信我嘅真誠一定可以打動到人類。為咗令人類知道我係佢哋嘅朋友，我決定幫佢哋捉呢個兇手。我偷偷行動，問啲動物朋友知道咗兇手位置，可惜趕到去嗰時兇手已經郁咗手，不過我相信個人仲有得救，但個兇手硬係要阻住我，我唯有先制服佢交畀人類，然後再救人。

點知班人類唔只唔領我情，仲以為我先係兇手，為咗唔好整傷人類，我只好又逃走，可惜今次佢哋人多勢眾，前後左右包抄，仲用我睇都睇唔到嘅武器令我勁頭痛，最後捉走我。雖然我無聽狼爸同馬騮媽話，但佢哋知道我有危險都仲肯趕嚟救我，只係今次無上次咁好運，我真係好對唔住你哋。

我，唔係怪物，只係被人類遺棄嘅棄嬰。不過怪物唔係天生，而係被創造出嚟。人類一直破壞環境，唔認為自己係萬物嘅一員，唔愛惜世界，好難保以後唔會有真正嘅pollution，aka抱怒舜出現，搶返地球主導權。我愛人類，我愛地球，人類只係地球一員，地球上仲有好多唔同種類嘅成員，希望人類識得環保，大家和平共存。」

以上，就是抱怒舜──即是呼的自述，亦是警告，大家共勉之。