遍地黃金
報館內，阿詹一人在挑燈夜讀，他正翻查戰前的舊報紙，嘗試找出老花王所說的洪水意外，可是查了快十年的報紙，始終找不到相關報道。
「食宵夜先，一陣再揾喇。」OK拿着一碗山菜魚肉和一碗魚蛋、燒賣、腸粉回到報館，放到空的座位上說：「混晒醬，夠重口味，趁熱食，食完再一齊揾。」
「正！」阿詹放下手頭工作，與OK大快朵頤。
「話時話，」OK對老花王口中的意外開始有質疑：「揾咗咁耐都揾唔到相關報道，死人咁大件事，如果係真嘅又點會無人報？究竟係咪啲人老作，純粹想為單洪水意外加啲前因後果，嚇吓啲遊人咋？」
阿詹「𠽌一聲」吞下一條腸粉，冷靜地說：「老花王求證咗幾十年都求證唔到，又點會咁易畀我哋揾到？但正正係咁先證明到我哋嘅價值。佢問附近啲老村民，嗰一輩都係口耳相傳，字都唔識多隻，又無相機，點會有證據。而我哋做報紙嘅就唔同喇，全部都有留底，雖然我哋報館無咁耐歷史，但行家有，我哋盡力睇晒現有嘅，就算真係無，都叫嘗試過，係咪？」
OK說不過阿詹，只好繼續與他一同努力翻查舊報紙，然而，一篇報道吸引了他的眼球。
「呢篇做『空』嘅報道你覺得點？」OK遞上一份報紙，上面有兩行字特別醒目──失事飛機殘骸已發現，黃金兩噸散佈荒山。
「正宗遍地黃金喎！咁你都發現到。」阿詹讚賞道。
「唔只咁簡單，內文仲有講話係因為濃霧而撞山。」OK說：「我直覺覺得無咁簡單。」
「巴閉喇，做咗呢個專題之後成長咗唔少。」阿詹不知為何感到欣慰，但很快又變臉說：「但我哋而家首先要揾到單新聞證實個傳聞係真先，快快快，一齊加油！」
兩人通宵達旦，一直翻查到早上，終於將所有的舊報紙都看過一遍──連明顯時間上不可能的都翻找了──始終都找不到相關的報道。
「睇嚟係作嘅機會都好大。」OK總結道。
「盡力揾唔到都無法，我哋唯有講村民口耳相傳喇。」阿詹下了最後決定。
報館大門在阿詹說話的同時打開，總編正好聽到他的話，於是調侃道：「蠱惑咗喎，識咁樣卸膊，有進步。」
「唔係呀老總，我哋揾咗成晚㗎喇，最後無辦法先咁講咋。」OK連忙解釋。
總編笑着說：「無相干，做呢行好多時都係咁吹，揾唔到證據又想有說服力，咪話消息人士透露、可靠人士表示、內部人士宣稱、相關人士表述、匿名人士聲稱咁囉，好常見，大家都明。」
「我哋真係問到呢個傳聞，但佢都係聽返嚟，我哋想firm啲啫，但真係揾唔到……」阿詹解釋完，靈光一閃便問總編：「老總，你喺呢行咁耐，仲有無辦法揾到啲舊聞？」
總編搖頭說：「邊有辦法，有留底嘅報紙你哋都揾晒，無留底嘅號外你哋又唔會揾到，所以都無辦法㗎喇，一於就『消息人士透露』喇！」
說完總編便回到自己的房間，而阿詹和OK只好抱着一絲遺憾去完成這篇報道。不過，完成報道是一回事，開總編玩笑又是另一回事。
「你估佢幾耐之後會叫我哋入房吖嗱？」OK調皮地問。
「我估過多幾分鐘喇。」阿詹專注在報道最後的校對。
「我就話一分鐘內，輸咗請嘢飲。」OK胸有成竹地說，果不其然，總編就在話音剛落的瞬間叫喚兩人，OK立即得意地做了一個喝東西的動作。
「對於最後嘅『空』，呢度幾單意外，你哋揀一單去做。」總編將五宗意外的報道攤開放在桌上讓兩人選擇。
OK看也沒看就從背後拿出剛才那篇報道，笑着對總編說：「我哋決定做呢單。」
總編看了一看，微笑地回憶道：「呢單嘢我細細個嗰時有聽屋企人提過，我阿爸阿媽就係去執金嗰時識，幾浪漫。」
「咁就掂，可以訪問令壽堂。」OK得意地說，阿詹一聽立即遮住他的口。
總編則開懷地笑道：「好喎！可以配合埋我哋主題，用靈異角度去揾真相，不過你哋要揾龍婆問米先採訪到佢哋。」
OK一聽便知闖禍，立即連忙道歉，阿詹也幫忙說：「老總唔好嬲，佢唔知先亂噏，你大人有大量。」
豈料總編非但沒有生氣，還興緻勃勃地說：「我講真㗎喎！」
「吓？」兩人齊聲說：「玩咁大？」
「我覺得work喎，交畀你哋喇。」總編說完，揚手示意兩人離開。
「問米喎，點揾？老總仲咁興奮，勢在必行咁款，都係我衰多口。」OK為自己的多言感到懊悔。
阿詹拍拍OK肩膀示意他不要自責並說：「最少我哋多咗個方向，可以更接近個真相。至於問米，直接問龍婆咪得。」
「戲嚟喎！」OK驚愕地說。
「都有個學習對象先做到戲㗎！」阿詹的說話不無道理。
於是，兩人左拜託右拜託，終於約到龍婆見面。
「你哋點解想問覡？」龍婆開宗明義問道。
「問覡？」OK聽得一頭霧水。
「即係問米嘅正確讀法。」阿詹在OK耳邊解釋後，一臉嚴肅地回答龍婆：「因為我哋想知道當年運金飛機撞山，全城尋金嘅事。」
「我有睇你哋嘅報道，我都好欣賞你哋，咁我就幫吓你哋。先人時辰八字同名？」龍婆意外地爽快答應，出乎兩人意料。
阿詹分別報上總編雙親的時辰八字及姓名，但刻意隱瞞兩者之間及兩人與兩者之間的關係，順道測試問米是否可信。至於OK則拿出錄音筆和相機隨時候命。
接着就是跟電視上看到的情況相似的操作。龍婆在桌上放了生果和金銀衣紙等祭品，然後燒香燒符，合上雙眼唸唸有詞，同時雙手不斷拍打桌子。大概一分鐘後，她停了下來，對兩人說先人已經來了，接着她全身像抽搐，手腳震動不停，突然一切驟然而止、回歸平靜。十數秒後她開口說話，聲音變了，語調變了，速度變了，用字變了，先人已經附體了。
「你兩個『靚ken』係乜水？揾我有咩樹？」說話的是一把男聲，即總編的爸爸。
「陳生，我哋係你個仔間報館嘅員工，有啲關於當年運金飛機失事，引發尋金熱嘅嘢想問你，過程入面我哋會錄音。」阿詹如實告知來意：「我哋想問當時尋金嘅情況係點？有無遇到咩古怪嘢？我哋翻查過當時嘅新聞，警察好快就封山，咁你有無揾到金？」
「我個仔啲員工？個衰仔揾員工嚟都唔自己嚟，作死佢！」總編父親陳先生生氣地說，但很快便平靜下來回答阿詹：「講揾金即係想知我嘅發迹史同情史喇，乜家陣啲新聞報埋啲咁嘅嘢都有嘅。簡單咁講，我嗰時好窮，成日都諗點樣發達，成日都想天降橫財。我仲記得嗰日，個天好大霧，我做警衛守水塘，照舊喺附近巡邏，突然就聽到好大嘅爆炸聲，座山就着晒火，我即刻就跑走，廢事拿屎上身。」
「你跑走點解之後會執到金？」OK衝口而出。
「金毛飛，聽故唔好駁故！」陳先生大喝一聲，OK變成了鵪鶉，接着他繼續說：「好死唔死，我收到order叫我去睇發生咩事，我唯有死死地氣過去睇。唔睇由自可，一睇不得了，啲火燒到光掁掁，離到遠一遠都見到，但神推鬼㧬我又唔知發咩神經行咗過去，一睇先知原來係啲黃金咁掁眼。我一見到黃金就知今鋪發達，上天有好生之德，佢憐憫我，我立即就回報話無事發生，之後就盡我所能，搬得幾多得幾多。又唔知發咩神經，嗰陣黐起條筋覺得要收埋佢，我就因利成便，全部沉晒落水塘底，等風聲無咁緊先起返上嚟，好彩嗰時閃過呢個諗法，唔係我就被大頭綠衣塔咗返去，嗰時佢哋都拉咗幾個。而家再諗返起，嗰時大霧都好緊要，因為啲霧我先無被人發現。」
「咁你真係好彩又醒目，嗰度成日都咁大霧㗎？」阿詹好奇地問。
「又唔係，係咁啱嗰日先咁大霧，所以真係天助我也。」陳先生哈哈大笑。
「衰佬！你懶咩叻？」突然，龍婆的聲變成一把沙啞的女聲：「如果唔係你洗腳唔抹腳亂咁使晒啲錢，我哋收尾嗰幾年駛乜咁辛苦？」
「陳太，究竟係發生咩事？」阿詹舉手發問：「你哋係點識？」
「我嗰時係童軍，幫手揾返啲金，不過講真，一塊塊金喺你面前，嗰時屋企又唔係富裕，點會唔貪先得㗎。」陳太憶述：「嗰時我每交兩塊金磚就自己收埋一個金幣，已經算好有道德。點知人在做，天在看，最後都係被旅長發現，我嚇到唔知點應付嘅時候，個衰佬出嚟救咗我，嗰下佢係幾型嘅。佢好快手喺個窿度拎走袋金幣，之後邊逃走邊話啲金幣係佢收埋，估唔到被人發現云云。」
「我記得，我嗰時返工經過，見到袋金諗都唔諗，揾隻手臂遮住個樣就衝過去搶，好彩我係地頭蛇，隻四眼龜先捉唔到我。」陳先生又搶回話語權。
「咁之後你又將袋金幣沉埋落水塘？」阿詹問。
「梗係喇！嗰時班大頭綠衣封咗山，我因為份工先上到山，但之後就再無機會接近意外現場，無得再執金，直到解除封鎖之後我都有去巡吓，但都再揾唔到。」陳先生失望地說：「金揾唔到，但就揾咗個老婆返嚟。」
「做咩咁失望嘅……」OK自言自語道。
「係我揾佢攞返袋金幣，之後個衰佬過份到話要同我平分，後尾貪戀我美色話將嗰一半當禮金，厚顏無恥。」陳太搶了發言權，雖然是投訴，但聽得出她心裏是甜絲絲的。
「女人仔咪阻住我做訪問。」陳先生很快又搶回發言權說：「等到件事丟淡咗，我就去起返啲金，然後四圍買地做生意，不知幾得戚，嗰時人人見到我都爺前爺後，好威水㗎。」
「最弊你無生意頭腦，做埋晒啲蝕本生意，全部都輸錢，最後損手爛腳呢。」陳太又出來投訴：「買條村想發展渡假區又做唔起，唔係個仔生性，我都唔知老嗰幾年點過。」
「咁當時有無話場意外有咩異常原因？」阿詹問。
「咁又無喎！嗰面成日都咁大霧，無霧先神奇，我都係搏大霧先執到咁多金。」陳先生再度回歸。
「照咁睇真係單純係意外。」OK總結。
「唔該晒兩位前輩，我哋問完。」阿詹雙手合十以表謝意。
「幫我哋同達仔講我哋過得好好，唔駛掛住我哋。」陳太最後補充。
接着龍婆整個人震了一下，逐漸恢復神智，重新拿回身體的控制權。
「唔該晒你，我哋已經得到我哋想要嘅答案。」阿詹遞上紅包道謝。
龍婆回絕了兩人的心意，再每人送了一道平安符，並贈了他們兩句：「濃霧唔係咁簡單，通常都係怨氣，所以呢場飛機意外唔係普通事故，而且個時間點仲係二戰啱啱完，你哋再挖深啲，應該會有意外收穫。呢兩道平安符畀你哋，等你哋可以心安理得啲。」
兩人再次道謝後便離開，決定聽龍婆所言，親身到發生意外的山頭調查。他們明查暗訪，很不容易鎖定了發生意外的那片區域，還帶同挖掘工具和金屬探測器，誓要聽龍婆所言，意識上和物理上也要挖深一點。
兩人下午抵達，天氣晴朗，萬里無雲，是登山的好日子。他們帶齊裝備，沿着行山徑一直走，沿途鳥語花香，令人心曠神怡。可是，當他們一步入飛機失事的範圍後，一切景像便即時變調。天色變得陰沉，霧氣漸重，偶然傳來令人心寒的鳥鳴，花草樹木像枯木般了無生氣，他們就像進入了亡者之地，只差未看到鬼魂。
「咔嚓！」OK連續拍了數張照片，雖然OK的膽因為經歷了很多不同的險景和奇怪的事情已經壯大不少，但看到眼前的景像仍不禁感到緊張和害怕。
「龍婆無講錯，好似真係唔簡單。」OK故作鎮定地說。
「如果照佢咁講，呢度怨氣肯定好大，究竟發生過咩事？」阿詹也茫無頭緒。
「會唔會好似啲中學鬼故咁？」OK說，但阿詹不明白其意思，他便解釋道：「你唔發覺間間中學嘅鬼故都係話做過敵軍集中營呀、亂葬崗㗎咩？可能呢座山都係呢。」
「又好似係，咁如果呢座山都係嘅話，背後個故仔實好多嘢發掘。」阿詹的雙眼在濃霧中發出閃爍的光芒。
「咁我哋就兩方面同時發掘喇。」OK拿出金屬探測器在附近踱步，很快便有反應。
「咁易揾到？」阿詹也感到神奇。
兩人拿着鐵鏟挖掘，很快便挖出了一件金黃色的鋁罐，他們同時「妖」了出來。
不過阿詹很快調整過來：「揾到金係bonus，我哋真正要挖嘅係真相，如果冤氣真係形成到咁濃嘅霧，咁枉死嘅鬼魂一定仲喺度，揾到佢哋出嚟訪問就會解開到真相。」
「咁我哋去呢片霧嘅中心，直覺話我知中心一定有答案。」OK不知哪來的直覺，但兩人還是朝着中心點進發。
越接近中心，霧便越大，兩人甚至只隔一步也快要看不見對方，為免走失引起意外，OK決定搭着阿詹的膊頭前進，就像小時候扮火車一樣。可是走着走着，OK感到有點不對勁，他聽到背後有聲音在叫他。
「OK！OK！你去咗邊？」是阿詹的聲音，但他明明就在OK的正前方，而且還搭着他的膊頭。
「OK，千祈唔好回應唔好擰轉頭，否則你會無命。」前面的阿詹說：「我哋繼續行。」
「OK！你應吓我，你係咪搭錯咗第二個？佢帶你去死做替身㗎！」後面的阿詹說。
聽到這句，OK嚇得立即放手後退數步，前面的阿詹雖然即時停下腳步，但濃霧的關係已經看不到他的身影，而最危險和靈異的事情就在此時此刻發生。
「OK！」、「OK！」、「OK！」四面八方不停傳來阿詹的聲音，他的身影同時在濃霧中不同的地方若隱若現，眼前的景像和環迴立體聲般的叫喊使得OK慌亂起來，他清楚知道不論回應還是選錯，結局都只會導向死亡。
面對死亡的壓力，OK逐漸崩潰，他雙眼無光，只剩下絕望；任何風吹草動，他也疑神疑鬼；恐懼感、無助感和無力感蠶食他的心，逼得他恐慌，甚至感到天旋地轉，最後只能雙手抱頭蹲下來逃避這一切。
此時，OK腦裏出現了一把聲音對他說：「信自己，信伙伴。」
這把聲音、這句說話，為OK重新注入了力量。他不知道聲音的主人是誰，也不知道為何會在他的腦內突然響起，他只感到很温暖、很有安全感。他重新站起來，無視圍繞着他的各種聲音和身影，邁開步伐，往濃霧的中心走去，他相信阿詹已經在那裏等待他。
終於，兩位好拍檔在霧的中心重遇。甫見面，阿詹便開OK玩笑：「咁慢嘅，係咪自己揾到金收埋咗？」
OK聽到這句，知道面前這位就是真正的阿詹，回想剛才的恐怖經歷，即時喜極而泣。阿詹看到這一幕，已經猜想到剛才OK遇到甚麼，因為他剛才也遇到同樣的事情，只是他對OK有絕對的信心，始終相信他會出現在中心，所以沒有花時間去沮喪、去尋找、去害怕。
阿詹想安慰OK，但兩個大男人實在尷尬，所以只能以開玩笑來紓緩他的恐懼，但萬萬沒想到他會哭，令到足智多謀的阿詹一時也束手無策，只好回應：「唔駛喊嘅，我信你無收埋啲金喇……」
梳理好情緒的OK反擊道：「唔係喎！我真係收埋咗啲金。」
OK伸手進褲袋翻找一輪後，手伸出來時舉起中指，阿詹立即作狀要打他，此時他第二隻手卻真的拿出了一塊金幣。
「我啱啱驚到痞喺地嗰時執。」OK認真地說：「我覺得越嚟越近我哋想要嘅真相。」
在OK拿出金幣後，霧不知不覺地消散，兩人發現不遠處有異常刺眼的強光，要瞇着眼才勉強能夠直視，而這強光不是甚麼，正是黃金！
「呢度咁大舊金，應該就係當年揾唔返嗰啲，拎呢啲走就發達。」OK雙眼已經被黃金霸佔，在旁的阿詹立刻大力敲他的頭殼才令他清醒過來。
「諗你都唔好諗，肯定係陷阱！」阿詹人間清醒地告誡OK：「拎咗就唔駛旨意走，明眼人一睇就知係典型嘅揾替身騙局。」
語畢，阿詹搶過OK手中的金幣，大力擲向黃金，兩金相撞竟沒有發出任何聲音，金幣只是憑空消失。
「果然，」阿詹已經看穿一切，對着黃金恭敬地說：「有怪莫怪，我哋唔係有心打擾各位先人，只係工作所需嚟調查一下，揾到答案就會走。」
阿詹從背包拿出金銀衣紙撒向天並說：「小小意思，唔成敬意。」
在阿詹撒完金銀衣紙後，霧非但沒有散去，反而還出現了重重鬼影逼近兩人，形勢比之前更險峻。
「嘢食！有無嘢食？佢哋有咁多金仲點會缺錢，嘢食缺啲。」OK已經急得方寸大亂，想到甚麼便說甚麼。
「又好似有啲道理。」想不到阿詹竟然認同，並立即從背包中拿出麵包和餅乾放在地上，奉獻給冤魂們。
神奇地，食物真的起到作用，鬼影逐個消失，最後只餘下一個站在兩人面前。
阿詹和OK與鬼影對峙了約一分鐘，在確保鬼影沒有惡意後，阿詹向前踏出一步，友善地問：「我哋係記者，係為咗四十年代運金飛機撞山事件嚟調查。我哋揾返資料，當時飛機因為濃霧而失去視野，最後撞山，黃金散落山頭，想問下你哋係咪就係濃霧嘅來源？」
鬼影沒有反應，OK也大膽地問：「除咗你哋，仲有無第二伙鬼會造成濃霧？」
不知是因為霧影響光的折射，還是因為鬼影本身的情緒，鬼影開始晃動，幅度雖然微小，但頻率卻很快。正當兩人不知如何進行下去的時候，霧又再變得更濃，而且還聽到步操聲，鬼影亦於此時消失。
步操聲越來越近，濃霧中慢慢出現一隊整齊的鬼影──說是鬼軍團應該更貼切。這隊鬼軍團手持步槍，正朝兩人走去。OK慌張了，想躲起來，卻發現附近的樹不知何時開始已經消失不見，整片區域被清空，只餘下無盡的濃霧。
「事到如今慌都無用，見步行步喇。」阿詹故作鎮定，但心裏已經幻想了無數個壞結局。
「呢班係咪就係當年戰敗唔肯接受現實，選擇自殺嘅敵軍？」OK偷偷問阿詹。
「我諗當初飛機失事就係佢哋搞嘅鬼，唔接受現實，妄想拎到啲金可以復興。」阿詹也推理道。
鬼軍團在兩人約三米前停了下來，走在最前的鬼影首令踏前一步對他們說：「你哋唔屬於呢度，入嚟係咪想偷金？」
鬼影首令竟用兩人熟知的語言提問，令他們有點愕然，但阿詹還是反應很快地答：「我哋係記者，主要目的係嚟調查運金飛機撞山真相。」他說話留了一手，沒有將尋金這個次要目的說出口。
鬼影首令初時半信半疑，直到兩人出示記者證才真的相信。接着鬼影首令禮貌地說：「我哋係民兵，生前死後都係負責保護附近居民免被襲擊同騷擾，你哋唔屬於呢度嘅話，我勸你哋快啲離開會好啲。」
「估錯晒。」OK手肘頂了阿詹一下。
「唔好意思，我哋無心打擾，只係誤闖咗入嚟。」阿詹再次誠懇道歉，然後問：「不過呢度點解會咁大霧？」
鬼影首令先頓了一頓，然後自責地說：「敵軍……佢哋當時亂殺啲村民，我哋乜都做唔到……大家都怨氣好大。」
「Sorry，我無心挑起你嘅傷心回憶。」阿詹再次道歉，後再又問：「咁對於架飛機遇大霧失事，你知唔知點解當時會咁大霧？」
「雖然係意外，但我哋責無旁貸。」鬼影首令滿是歉意地說：「當時呢度嘅鬼魂分咗幾派，大家為咗爭話事權而鬥過你死我活，大家嘅怨氣、怒氣令到啲霧前所未有咁大，最後造成呢件悲劇發生。」
「即係全部都有份導致場意外發生。」OK總結，然後又好奇地問：「咁最後邊派贏咗？」
鬼影首令沉默了沒有回話，氣氛逐漸變得詭異，阿詹意識到事態開始變得不受控，於是匆匆道別，拉着OK轉身試圖離開，但一切都已經為時已晚。
「太遲喇，」鬼影首令竊笑：「機會錯過咗就無，離開嘅大門已經關上。」
鬼軍團再次在濃霧中出現並且包圍着兩人，滴水不漏的包圍網一步一步向他們收窄，鬼軍團舉起手中的步槍，槍前的刺刀已經快要架在兩人的頸上，再不想辦法便會被刺死。
「龍婆道平安符應該可以頂到兩嘢。」OK拿出平安符向着鬼軍團自轉一圈，鬼軍團立刻後退數步，對平安符有所忌諱。
阿詹眼見平安符有用，立即照辦煮碗，也將平安符伸向鬼軍團，期望能殺出一條血路，而鬼軍團也很配合地節節後退。
「快啲走！」阿詹向OK揮手示意，一起跑走。
可是，事情又豈會真的如此簡單？
兩人無方向感地向着一個方向瘋狂奔跑，不知跑了多久、不知跑了多遠，沿途還是有鬼影在叫囂、大笑。很快兩人便氣力放盡，由奔跑變為緩步跑再變為走路，最後累得跌坐地上。
「唔跑喇咩？」鬼影首令氣定神閒地走到兩人面前，此刻他們才意識到剛才的大笑其實是恥笑，兩人就像孫悟空一樣，從來無逃離過如來佛祖的手掌。
「OK，講個笑話你聽，」阿詹自嘲道：「啱啱我哋去完做gym，玩完跑步機。」
OK吃吃地乾笑兩聲，開玩笑說：「部跑步機仲好似打機咁，會有畫面郁，有人打氣㖭。」
「死到臨頭仲有心情講笑，我應該要讚你哋豁達，定係要話你哋死蠢？」鬼影首令為了令兩人感到絕望，不掩飾地說：「講埋畀你哋知，你哋嗰兩道符廢㗎，只係兩張廢紙，一啲用都無。」
「所以話等我哋心安理得，原來係咁解。」OK想起跟龍婆道別時的對話。
鬼軍團再次包圍兩人，鬼影首令看了全場的鬼影，下令道：「奀妹、豆釘，你哋兩個咁細個就做鬼咁慘，呢兩個畀你哋，快啲去投胎做人。」
鬼影首令說完後，兩個小朋友身型的鬼影從霧中走出來，打算上阿詹和OK身後再自殺，以此換來投胎的機會。然而，時間一分一秒地過去，兩個小鬼影始終站在阿詹和OK面前，沒有進一步行動，連鬼影首令都感到不耐煩了。
「做咩仲唔上佢哋身，係咪唔想投胎？」鬼影首令語氣很重地問。
兩個小朋友鬼影指着阿詹和OK再搖頭，鬼影首令一看便明白其意思，於是從鬼軍團中隨便拿了一枝步槍指着阿詹的頭威脅道：「你哋快啲除咗佢，唔係我就唔客氣！」
「除？除啲乜？」兩人不明所以，同時回答。
「仲詐傻扮懵？唔好敬酒唔飲飲罰酒！」鬼影首令再喝叱。
兩人始終不知鬼影首令所指的是甚麼，但既然鬼影們有所忌憚，就說明他們有反擊的機會。
「哈！我哋係唔除，你咬我食呀？」阿詹打蛇隨棍上，站起來神氣地說。
OK雖然同樣一無所知，但他看穿阿詹的用意，也站起來得意地道：「你精就趁我哋未出手嘅時候好放我哋走，如果唔係到時就盞你哋傷亡慘重。」
鬼影首令定住了，放，不知如何向江東父老交代；不放，可能造成重大損失。兩條路也影響自己的管治威信，實在騎虎難下。
鬼影們屏息以待鬼影首令的決定，阿詹和OK同樣忐忑不安，不知下一步該如何走。
此時，兩個小朋友鬼影拉着鬼影首令耍手擰頭，鬼影首令有了下台階，阿詹和OK也看到了曙光。
「念在兩個小朋友為你哋兩個求情，今次就放過你哋，下次你哋無咁好彩！」鬼影首令說完後便帶着其他鬼影後退、消失在霧裏。
鬼影消失後，霧亦隨即散去，樹木重現在眼前，鬼影首令留下最後一句：「啲金係我屬於哋嘅，唔駛旨意嚟偷，否則後果自負！」
「畀我哋都唔攞呀！」OK回嗆，然後自言自語：「嫌命長咩……」
兩人始終都不清楚當時保護他們的是甚麼，只知有幸撿回一命就已經很好，其他的以後再算。
.jpg)
