題二：學校講早晨講再見
有無發覺每次老師講：「各位同學早晨/各位同學再見/Good morning, class/Goodbye, class」嘅時候，明明語速音調係正常，但啲學生總會喺唔駛人教、無夾過、好似刻咗喺DNA入面咁，會用平鋪直敘、拖慢嚟講嘅速度答：「X老師早晨/X老師再見/Good morning, Mr or Miss X/Goodbye, Mr or Miss X」，無論幼稚園、小學、中學都係咁。
幼稚園同小學都仲講得通，畢竟幼稚園仲細，講嘢未清楚，肌肉未控制好，而小學都未發展好，好多時其實都未知自己做緊乜咁。
但中學呢？聲帶口腔說話系統發展完成、講嘢成型、知自己做緊乜，講嘢已經有自己節奏，點解一到呢個時候大家都會變返幼稚園咁？唔可以用返正常語速同音調？
究竟點解會咁？係咪幼稚園教要咁答，而時代久遠所以我忘記咗？但好似世界各地都有咁嘅情況，唔通全世界嘅幼稚園都咁教？
定其實真係刻咗喺DNA入面，只要係集體回答一個指定、唔會有第二個答案嘅回覆時，都一定會咁？
又好似唔係，出嚟做嘢，老闆開會叫早晨，大家都係答早晨，但語速音調又正常㗎喎，究竟讀書時期嘅我哋係發生咗咩事，有無嘢可以解釋到？
因為要齊整咁答，所以要拖慢嚟就其他人？但其實人人都已經可以用正常語速，無必要特登拖慢，況且學習語言係模仿嘅過程，唔係應該模仿最日常嘅一面先係好咩？
你覺得呢？
