份報紙揾鬼睇

奪命K房

又是一個捱更抵夜的日常，總編從房內走出來，大聲對睡眼惺忪的阿詹和OK說：「我有一個好消息同一個壞消息，你哋想聽邊個先？」

OK有氣無力地答：「壞先，先苦後甜。」

「好，」總編凝重地說：「之前我哋篇尋金出咗之後，失蹤同精神失常嘅人我已經確認咗係真有其事，而唔係行家抹黑。」

「肯定係班人遇到鬼軍團走唔甩。」阿詹實牙實齒地說。

「咁即係我哋要停刊？」OK緊張地問：「你個好消息唔會係我哋可以退休啩？」

「OK，你幽默咗喎，有進步。」總編一臉老懷安慰，然後清一清喉嚨，換了一個聲調道：「好消息就係你哋巴士篇報道入咗普立茲調查報道類，我哋翻身喇！」

聽到「普立茲」三個字，阿詹和OK第一個反應不是總編預期般欣喜若狂，相反地，兩人的表現與剛才大相逕庭，冷靜得令人懷疑，就像聽到「歡迎光臨」一樣免疫了，絲毫沒有在他們的腦海中掀起一點波瀾。

「都只係入圍啫，又唔係攞獎，無咩需要高興。」阿詹正眼也沒有看過總編一眼。

「我哋認真做，入圍係意料中事，無咩值得興奮。」OK也木無表情地說：「我哋準備緊下篇報道，無乜嘢我哋繼續做資料搜集先。」

總編的熱情被兩人的冷淡「一盤冷水照頭淋」，無癮地回房。聽到總編關上門後，兩人發瘋般手舞足蹈地慶祝，不過全程靜音，只有動作沒有聲音。

「我哋竟然入圍到普立茲，黐線㗎！真係諗都無諗過，係咪發緊夢？」OK以口型道。

「我哋今鋪威威喇，對個履歷好有幫助，跳槽搲高啲人工就係睇呢啲！」阿詹也難掩興奮心情，以口型回答。

兩人一輪慶祝後，很快便回復工作模式，他們之所以不在總編面前表現興奮，是希望塑造一個成熟沉穩的形像，好讓總編認為他倆能擔大任。

「嗱，我覺得呢兩單可以做嘅，你覺得呢？」OK從資料中抽出兩份放到阿詹面前讓他選。

「卡拉OK縱火同渡假屋自殺？」阿詹想了想，果斷選了卡拉OK縱火，然後解釋：「呢樣好似唔係成日發生，一講大家有記憶點啲；相反，嗰間渡假屋出名係自殺勝地，已經好多人講過，我個人無咩特別意欲同興趣去做。」

決定了下期的主角後，兩人將能夠搜集到的資料全都看過一遍，整理了當中的重點後，便動身去實地取材。

肇事的卡拉OK位於其中一個年輕人經常去的娛樂地段，同時亦都是一個黑幫必爭之地。在那邊的所有娛樂場所背後都有黑幫參與或控制，無論該集團如何清流，只要想在那裏立足做生意，都必需選一個勢力靠攏，這是不成文的規定，雖然現在已經沒有這麼猖狂，但這一點還是沒變。

「不過間卡拉OK而家已經變咗做酒樓，我哋係咪又要好似之前咁潛入去？」OK想起了一開始時的情況，不禁打了一個哆嗦。

阿詹笑着說：「而家我哋報紙有啲名氣，可以試吓直接同酒樓負責人傾，話唔定會畀我哋名正言順咁守夜。」

阿詹撥了一通電話，與酒樓經理一番交涉後，竟然真的得到許可，獲准在酒樓通宵採訪。

兩人在晚上十時左右來到酒樓附近，四圍有很多年輕人三五成群地玩樂嬉戲，亦有數個外展社工與年青人攀談，還有警察在遠處巡邏。

「睇嚟呢度治安真係好咗好多。」OK放心地說，而阿詹則以一抹意味深長的微笑作回應。

兩人巡視完附近環境後便上酒樓，酒樓經理很快便上前迎接道：「兩位，我哋酒樓收工喇喎，你可能要揾樓下啲餐廳。」

「你係咪胡經理？我係今日晏晝打嚟話想做通宵採訪嘅〈敢報〉記者阿詹，呢個係我partner OK。」阿詹即時表明身份，但卻換來意想不到的答案。

「我姓李唔係姓胡，而且呢度都無人姓胡，莫講話經理，你係咪去錯酒樓？」李經理客氣地說。

「點會吖？我問得好清楚係呢度，而且呢度都係得你呢間酒樓無其他，所以肯定唔會錯㗎喎。」阿詹百份之百肯定地答。

「唔好意思，不過我哋真係無人姓胡，亦都無收過電話，或者你哋查清楚先。」李經理依然客氣地重申一次。

「唔緊要，其實我哋嚟係想寫篇報道，想喺度通宵取材，唔知可唔可以呢？」阿詹即場請求，但答案想當而然是不可以。

兩人被拒門外後，決定使出備用計劃──躲藏在酒樓。他們在走廊商量好計劃，之後探頭望向酒樓，發現酒樓的門面與剛才有那麼一點點不一樣，但始終說不出不同的點是哪裏。他們觀察了一會，確認安全後便潛行進內，豈料一進門便被一個男職員撞破，他們即時將一早已經預備好的理由、藉口和道歉說話一下子說出來，卻又換來一下笑聲。

「搞咩呀你兩位？係咪〈敢報〉嘅記者？我哋今日通過電話，我係胡經理，我喺度等咗你哋好耐喇，仲以為你哋唔嚟㖭。」胡經理熱烈地歡迎兩人，本想上前一步，後來卻打消這個念頭。

「啱啱個李經理又話無人姓胡嘅？」OK不解地問，兩位經理差天共地的表現弄得兩人都糊塗了。

「李經理？呢度得我一個經理，無其他經理㗎喎，而且其他人都收晒工，得我一個喺度。」胡經理皺起眉頭想了想說：「你哋係咪去錯地方？」

「無可能，呢度得你呢間酒樓，而且我哋啱啱都係由呢度行出去再行返嚟，唔會錯。」阿詹斬釘截鐵地說，同時心裏已經留有一個問號。

「唔緊要喇，今晚呢度就交畀你哋，呢度夜晚真係好猛㗎，如果見到有咩特別嘢記得走。我走先，你哋慢慢。」胡經理簡單交代後便離開，留下兩人在酒樓。

「你覺唔覺得好鬼？」OK劈頭第一句便問阿詹。

「可能嗰兩個人不和啩，唔理咁多，我哋做自己嘢要緊。」阿詹決定不把心中的問號告訴OK，以免他胡思亂想。

酒樓是傳統有龍有鳳的那種，大廈全層都屬於酒樓範圍，放眼望去，筵開百席不是夢，可以想像得到之前那間卡拉OK有多大、有多少間房、為何會有這麼多人喪生。

「我哋點開始好？」OK面對只有餐桌和餐椅的酒樓問。

「等。」阿詹拉開椅子坐下說：「等啲人傳嘅猛鬼異象出現。」

「咁會唔會等唔到㗎？」OK積極地提議：「或者我哋試吓用歌聲引佢哋出嚟。」

「你唱定我唱？」阿詹忍着笑說：「啲鬼聽到我哋唱仲出嚟咩，鬼都嚇走晒喇！」

「咁唔係點啫，白等好浪費時間。」OK洩氣地坐下。

「等喇，最好就係咁，我哋只係說書人，唔係寫書人，我哋負責轉述，而唔係介入創造。」阿詹說出一些需要深思的說話，成功令OK安靜下來。

然而，這地方猛鬼不是傳聞，而是事實，所以不用等太久，便開始聽到嘆息室和叫喊聲，叫喊聲還異常淒厲，聽得人心寒。

OK僵硬地轉向阿詹，指着裝飾着龍鳳呈祥的台說：「嗰面有『人』。」

阿詹興奮地說：「咁仲唔開工？」

OK拿出相機連忙拍下照片，阿詹則上前嘗試採訪正在唱歌的數隻鬼魂，可是奇怪地，只要他一走近，鬼魂便消失不見，站在遠處的話，鬼魂又再次現身，前後數次，屢試不爽。

「點解會咁？」阿詹心裏不解，於是改變方法，在遠處大喊：「各位唱得幾好，我係記者，想問你哋小小嘢。」

鬼魂沒有理會，繼續陶醉在歌聲中，完全旁若無人，但唱的卻是六、七十年代的舊歌，而鬼魂的衣着也符合當年的潮流。

「阿詹，唔對路喎，呢班應該唔係我哋想揾嘅鬼。」OK發現了。

的確，慘劇發生在九十年代尾，當時的衣着和流行曲兩人還歷歷在目，兩人就是在那個環境長大的，那麼，現在這班六、七十年代的鬼又為甚麼會在此出現呢？

「唔通喺更早之前，呢度都出過事而無人知？」阿詹變得更加興奮：「今次我哋可能有意外收穫。」

「不過我哋埋唔到佢哋身，佢哋又唔show我哋，搞唔掂喎。」OK為此而煩惱。

之後，兩人嘗試了不同的方法，依舊無法與鬼魂們取得聯繫，仿佛他們兩人是在不同時空，只是剛好時空交錯才看到有人在唱歌。

「其實有人講過，人同鬼本身生活喺唔同時空，只係咁啱大家同頻所以先見到。」阿詹想起了曾經聽過的理論：「之前我哋見到交流到係因為完全同頻，而家係單方面同頻，所以佢哋根本唔知我哋存在。」

「咁會唔會其實佢哋係人唔係鬼，只係時空錯亂咗，所以我哋行近就見唔到佢哋，行遠個頻率啱返又見得返佢哋，好似海市蜃樓咁。」OK根據這理論問道。

「我點知喎。」阿詹的答案其實是意料中事，這樣又令他心生第二個問號：「如果真係因為咁啱同頻，咁點解又可以同胡經理交流到，但同唔到唱歌呢班人交流？」

眼前之謎未解決，另一個難題又出現在眼前。酒樓內的氣温一點一點提升，兩人起初察覺時還以為是沒有冷氣的緣故，但隨着温度無限制地提升，到他們覺得異常時已經太遲了。

「你覺唔覺有啲似曾相識，好似上次山火喺火場入面咁。」OK抹了一下額角的汗水，但汗珠隨即再出現。

「係有唔妥，我哋快啲出去先。」阿詹環顧四周，邊走邊說。

兩人連跑帶跳，一下子便去到酒樓門口──應該說原本是酒樓門口的地方，發覺已經面目全非，數部大電視在牆身內播放不同歌曲的KTV，前台變了長長的接待處，上面寫着一個已經不再存在的名字。

「呢間卡拉OK咪係火燭嗰間？而家係時空交錯定時空錯亂？」OK想得頭也暈了。

「唔理咁多，走咗再講，越嚟越熱喇！」阿詹跑出店外，卻被一個無形的力場阻擋，怎樣也穿過不了。

「今次仆街了，我哋走唔到，睇嚟要喺度焗桑拿。」OK苦中作樂。

「走唔到即係佢哋想留住我哋，有嘢要我哋幫。」阿詹正面地想。

火舌很好便從裏面的房間冒出來，但歌聲並沒有停止，聲音大得掩蓋了火警鐘聲和職員拍門叫逃生的聲音；現場沒有灑水系統，火不能在最初便被撲滅；燈光亦昏暗，使濃煙變得不起眼，到發現時已經身處其中、為時已晚。

「黑幫爭女引起爭執再縱火當然係起火原因，但係現場預防火警嘅措施不足先係致命原因。」阿詹在現場冷靜分析。

「呢啲當時法庭已經講過，我諗仲有啲嘢係當時忽略咗，所以佢哋先會帶我哋嚟現場。」在危機中，OK腦筋突然變得靈光起來：「呢單意外入面，最多死傷者係慶生嗰班，我覺得最大機會要我哋幫手嘅就係佢哋，快啲揾佢哋出嚟先。」

兩人打算進入火光熊熊的走廊，卻發現那些火是真的，並不是幻覺或影像，是有温度可以燒傷人的真正火焰。

「咁我哋入唔到去又走唔到出去，啲煙又係咁攻過嚟，死硬㗎喎！」OK一下子又變回正常，面對眼前問題變得焦急起來。

阿詹一言不發，跑到前台查看房間使用狀況，很快便鎖定了慶生人士的房間。接着環顧四周，拿起接待處沙發的坐墊，用飲水機餘下的水弄濕坐墊遞給OK。

「我哋衝入去，你跟住我，閉氣三十秒左右就得。」阿詹對OK下了簡單指令，沒有解釋，沒有詢問意見。

阿詹舉起坐墊，朝目的地進發。濕透的坐墊勉強幫助兩人擋住火焰且避免着火，談到降温的話則毫無作用。兩人閉着氣、抵着高温，憑記憶左轉右轉，終於抵達慶生人士的房間。

「我哋係嚟救你哋，準備好逃生未？」阿詹上氣不接下氣說，身後的OK亦大口大口地吸氣。

然而，眼前的情況比阿詹所想嚴重。十多人內，有超過一半已經暈倒，餘下的也十分虛弱，阿詹和OK亦於此刻發現自己的呼吸並沒有減慢，相反還越來越急促、越來越沉重。

「阿……詹……呢度好似唔夠氧氣。」OK費盡氣力才吐出一句話，然後便昏倒。

「頂住，都要救佢哋先離開到。」阿詹用意志彌補氧氣的不足，但意志再強大也不能突破人體極限，他說完後便暈倒在地，兩人奄奄一息。

過了不知多久，兩人再次張開眼睛時已經身處卡拉OK接待處，氣温依然很高。

「係邊個救我哋出嚟？」OK左右搖一搖頭，令自己清醒一些。

「我暈咗都唔知，不過出得返嚟即係我哋已經成功咗，快啲走咗先講。」阿詹拍一拍額頭，起身往出口邁步，但只邁出半步便因眼角看到的餘光而停下來，他先吸一口氣冷靜下來，然後問：「嗰兩個坐墊係濕㗎可？」

OK望向沙發，發現剛才他倆用來開路的坐墊正整齊地放在沙發上，目測還是乾爽的。他走上前伸手摸一下，再用力捏，最後雙手大力抱着它，始終沒有半滴水滴下。

「我估係有人換咗新啫。」OK面容僵硬地說。

「黐線，火燭走佬都走唔切，邊度仲有人得閒理個咕𠱸？」阿詹急躁地說，語氣帶點忿怒，接着他再望向飲水機，還有水！

「發生咗咩事？好似打機load返save咁嘅？」阿詹對眼前發生的事一無所知。

「如果真係咁，咪即係我哋做得唔好，畀機會我哋重新做過？」OK拿起坐墊，用水將坐墊弄濕，遞給阿詹說：「嚟多次，今次我唔會再暈。」

阿詹拿起已經無水的水樽，遮蓋着出水口，然後衝進火場，再次去到慶生人士的房間。這次房間內所有人都清醒，只是害怕得摟作一團。阿詹先自己吸一口水樽內的氧氣，然後遞給OK，再逐一遞給房內的人，待所有人都準備好後便一起衝出房間。

然而，一打開房門，火焰立即攻入房內，眾人反應不及，被活活燒死。

再一次，兩人張開雙眼，又再在接待處醒來。

「咁樣唔係辦法，我哋救唔到佢哋就走唔出呢個循環，有無計？」阿詹決定先商量好對策才出發。

「其實，點解你認為一定要救到佢哋我哋先走到？」OK想不通為何阿詹會有這個想法。

「因為佢哋係最大班嘅死者，所以想生存嘅想法係最強烈。」阿詹解釋。

「除咗一心想死嘅人，每個人想生存嘅慾望都係一樣咁大，無得咁去計。」OK突破了阿詹的盲點：「如果用打機嘅經驗套落而家嘅狀況，我覺得我哋要救嘅未必係佢哋。」

這次到OK走去前台，但他看的不是房間使用情況，而是員工當值情況。

「如果講有怨念，我覺得班員工怨念會仲大。」OK闡述自己的想法：「明明可以第一個走，但因為職責所以要最遲先走，偏偏有啲人無視佢哋，搞到走到都變走唔到，咁唔係仲無辜咩？」

阿詹聽完後都覺得有道理，OK續說：「雖然唔知最後過身嘅十七人係邊個，但就咁睇個當值名單，最少有三個員工喺火場，我哋要救晒佢哋。」

「呢度三條走廊，我哋已經行過一條，唔見有職員，剩低兩條兵分兩路，一人行一條，快手帶晒佢哋出嚟，等我哋離開呢個死循環。」阿詹再度燃起鬥志。

「咪住！」OK叫停阿詹：「如果徒手就救到佢哋，咁佢哋就唔駛我哋救喇，一定唔係咁簡單。」

「唔怕喎，反正死唔去，我哋行咗先，睇吓係點，要咩下次再準備。」阿詹心口掛個勇字就衝進火場，OK把說到口唇邊的「會翻生但係都會痛呢」硬生生吞回肚內。

兩人備好行裝便衝進火場，一左一右去搜索卡拉OK職員的蹤影。兩人已經在高温之下進出多次，身體漸漸習慣了高温，而且恃着有重生的機會，行動變得事無忌憚，在火場內橫衝直撞，搜尋完直接等待死亡，懶得回到接待處。幾次過後，整間卡拉OK的結構已經摸熟了，卻始終發現不到半個員工。

「我哋間間房都去勻，但一個員工都見唔到，係咪其實唔係要救職員，而係有啲嘢我哋miss咗？」阿詹拋出各種可能性。

「我都唔知……」OK心灰意冷地道：「有啲房我見有唔同又入多次去，但都係無人，我都唔知咩事。」

「你係咪記錯咋？點會啲房有唔同？你係咪真係去晒咁多間房揾？」阿詹懷疑地問。

「真係有唔同㗎，不過分別好細，但我好肯定係同一間房，而所有房我都入晒去，我肯定！」OK眼神堅定，沒有半點遲疑。

阿詹還在懷疑，OK便指着牆上的海報說：「你睇吓，之前明明係阿Jan，而家變咗泥鯭。」

阿詹順着望過去，的確是泥鯭，但兩人樣貌相似度有百份之八十，一時認錯也絕不奇怪，他認為這不算是證據。

OK再指着前台上方的電視說：「一開始兩部着，之後三部，而家又兩部，咁又唔算？」

「仲有，我哋去救人嗰時，第一次有超過一半人都暈咗，第二次就全部人都無事，之後我哋無過過去就唔知，但都係有唔同。」OK繼續舉例。

「得，如果真係如你所講咁，咁又代表啲乜？」阿詹雖然勉強相信OK的說法，但還是不明所以。

「你記唔記得個胡經理講過，如果見到有咩特別就走，其實係唔係一個提示？」OK想起胡經理離開前的說話。

「咁點先係特別？」阿詹問。

「我諗呢個就係要我哋不斷復活嘅原因，就係要我哋去睇。」OK猜測。

「最衰你唔係用數碼相機，如果唔係就影晒佢唔駛記。」阿詹吐槽。

於是兩人便用紙筆和腦去記下看到的事物，嘗試找出特別的情況。然而，他們很快便發現一個關鍵的問題：走廊是火災最嚴重的地方，根本無可能一次過安全地走一圈再出來。

「咁樣我哋永遠無可能走到出去。」OK變得頹廢起來。

「一定會有bug嘅，我哋再諗吓。」阿詹努力支撐着，但其實他自己的鬥志也已經被每次的重生一點一點地磨滅，只是他知道若果連他也放棄，便真的逃不出去。

兩人在接待處待了一會，阿詹再也待不住，乾等是不會有答案的，一定要行動，不斷試錯，事情才會有進展。

「OK，你喺度等我，我入去揾，三分鐘之後唔見我出嚟，你就入去restart一次。」阿詹說完便拿着濕透的坐墊衝進走廊。

一分鐘、兩分鐘、三分鐘，時間過得很快，阿詹沒有出來。OK心裏清楚阿詹已經葬身火海，他也依照約定進火場自殺重來，但走到火場前，他停住了。

不是因為貪生怕死，也不是因為懼怕痛楚，更不是因為害怕這是最後一條命，而是因為阿詹叫住了他。

無錯，阿詹的確叫住了他，不過不是從火場內叫出來，而是從他身後呼喚他。

「你係咪未去restart，仲係之前條命？」阿詹急忙爬起身問。

OK點點頭，阿詹立即衝上前大力抱着他，失笑說：「我哋可能揾到個bug，不過要驗證多幾次先。啱先啲poster都燒晒，六間房，房門都係圓型窗，門柄都係圓型。你記住，同埋喺度千祈唔好走，等我返嚟，同埋留意吓呢度有無咩變化。」

阿詹說完後，便把另一個坐墊弄濕，再衝進走廊。數分鐘後，他又一次在OK的眼前憑空出現。

「點？呢度有無嘢變？」阿詹着急地問，OK搖頭。

「睇嚟真係咁。」阿詹的信心大增，對OK說：「啱啱嗰條走廊都係咁，十間房，圓型窗、圓型門柄，慶生人士有超過一半暈咗。我而家去埋第三條走廊。」

「但已經無咕𠱸同水……」OK帶點內疚地說，因為他看到阿詹一次又一次忍受痛苦，只為兩人一起安全離開，但自己卻因為害怕而不敢再進火場。

OK的內心戲作為多時拍檔的阿詹一眼便看穿，但他並沒有說破，反而鼓勵道：「其實你幫助好大，如果叫我喺度等同記嘢，肯定因為驚而記錯晒，所以多得你，我哋先有逃生機會，我拍檔係你真係好。」

阿詹沒有給機會OK回答，因為說完這番話後他自己也感到尷尬，為免這畫面出現，他二話不說、徒手跑進最後一條走廊。

數分鐘後，阿詹又再次出現在接待處，他高興地對OK說：「最後一條走廊，十間房，都係圓型窗同圓型門柄，無咩特別。」

「唔係，」OK敏銳地說：「其實一早就有特別，阿Jan變泥鯭已經係特別，有咩可能泥鯭會有個人poster？」

「你又好似有道理，點解你唔一早講？要我白白死咁多次，搞錯！我要收返啱啱嘅說話。」阿詹扮作生氣道。

OK連忙道歉，然後與阿詹一起走到卡拉OK門前，深吸一口氣後同步跨出一步，成功離開卡拉OK。

只不過，離開卡拉OK並不代表脫險，相反，是另一個謎題的開始。

兩人一離開卡拉OK便是樓下街道，四下無人，但卻傳來不同的歌聲：有男有女、有近有遠、有大聲有小聲、有流行曲有懷舊歌。

「今次又要玩啲咩？」阿詹已經有點不耐煩：「要分男女定聽佢有無唱錯？抑或係分年代？」

「靜啲先，仔細聽，好似嚟自同一個地方。」OK從眾多的歌聲中辨認出流行曲都是來自同一個方向。

阿詹驚訝道：「你係真唔係吖？咁都聽得出？」

「我聽開歌㗎嘛，梗係聽得出，啲流行曲喺呢面傳過嚟。」OK循着歌聲走，阿詹緊跟其後，去到附近另一間卡拉OK。

這是一間大型的連鎖店，亦是其旗艦店。

「歡迎光臨，兩位係咪？」職員純熟地招呼兩人。

「係，兩個，不過我哋唔係嚟唱K，我哋係記者。」OK拿出證件道：「我哋想問啲嘢。」

「我哋話唔到事，等我叫經理先，你哋等等。」職員反應迅速，跟足指引，拿起電話致電內線。

阿詹立即按着電話斷其線，並說：「唔駛咁煩，問你哋前線就得，經理坐房唔夠你哋清楚。」

職員一臉不知如何是好，只好露出尷尬的笑容道：「唔好要我哋難做喇記者先生，我哋唔想孭鑊。」

「唔會有鑊氣，放心。」阿詹肯定的語氣震懾着職員，使得她乖乖放下話筒，留心聽阿詹的問題：「呢度有無咩奇怪事發生？喺邊度發生？」

聽過問題後，職員先支吾以對，看得出她在找藉口打發阿詹和OK。然而兩人並非省油的燈，這些舉動又怎能逃得過他倆的法眼？OK即時補上一句：「啲歌聲，你都聽到㗎，係幾時開始有？」

職員知道藏不住，最終還是和盤托出，還幾近崩潰：「自從嗰間卡拉OK火燭之後，我哋就開始出現呢啲怪事。佢哋每日都好準時四點三就嚟，你哋知㗎，呢度明明係不夜天，但四點之後，蟻都唔多一隻，得返我哋啲職員面對呢啲靈異嘢。我哋同公司反映過好多次，但每次都無結果，好多人都頂唔順辭咗職，如果唔係因為我屋企問題，我都唔做。」

阿詹和OK得到他們最想聽到的答案，但還未得知火燭的真相。在追問之下，總算知道了發生怪事的房間，決定去發掘真相。

兩人去到房門前，本是無人的房內傳出很大的歌星和嬉笑聲，還有點點的燭光。兩人透過門上的圓窗望進去，正是剛才在那間卡拉OK慶祝生日的年輕人！

「不得了！睇嚟佢哋過晒嚟唱K慶生。」OK驚愕地說。

「咁咪啱晒，有機會可以問到我哋想知嘅真相。」阿詹露出笑容。

兩人悄悄地開門進內，找了一個不起眼的角落坐下，靜待時機的來臨。這班年輕人沒有留意到他倆，又或者是直接無視了他們，只顧自己玩樂。仔細看，這班年輕人都是半透明且沒有腳，連他們用的咪高峰和準備的生日蛋糕都是半透明。

「好彩佢哋都係白色唔係紅色，唔係就猛喇。」阿詹小聲對OK說。

此時，其中一個慶祝者突然衝到兩人面前盯着他們，其他的慶祝者也像收到訊號般停下動作，轉頭盯着他們，然後集體重複道：「你放火、你放火、你放火……」同時逐漸逼近，圍堵兩人。

「大家冷靜啲，我哋唔係放火嘅人，我哋係嚟揾真相幫你哋討公道。」阿詹連忙解釋，但慶祝者們根本聽不進耳，已經將兩人逼進死角。

「殺咗佢、殺咗佢、殺咗佢……」慶祝者們轉口說，但他們卻沒有再往前走一步，仿佛有一幅隱形的牆在前面擋着。

突然，全部慶祝者像斷線木偶般，頭和手都垂下，阿詹和OK除了感到詭異外，唯一想到要做的便是離開這間房。可是，當他們站起來打算偷偷離開的時候，那些慶祝者又再次醒過來，而且變了紅色，自殺式往兩人衝去。

「哇、哇、哇……」接連十數聲慘叫，慶祝者們全部變回白色在地上翻滾，阿詹和OK兩人則安然無恙。

「發生咩事？」說這句話的不是阿詹或OK，而是胡經理。