巴士意外
「你兩個！同我入嚟。」一大早，總編便氣急敗壞地說。
「唉！成間報館得我哋三丁友，都唔知點解有咩唔可以喺度講，一定要入房講。」阿詹吐槽道。
「佢慣咗啫，行喇。」OK推着阿詹前進。
「我輸，上期好賣得，我哋又創新高。」總編說這句話的時候沒有半點高興，他倒抽一口涼氣後說：「我琴晚睇返上次影嘅相，點知乜都影唔到，我相信上次啲嘢係真，好彩你哋堅持有出篇報道。」
OK聽到後興奮地叫道：「嗱！我都話喇，我終於平反喇！」
總編繼續說：「原來你哋平時咁危險，不如我哋轉型，我唔想我啲員工出事。」
「老總，」阿詹語氣很重地說：「多謝你關心，但我同OK當初同意行呢個方向，就已經有晒心理準備，而家咁難得儲到班捧場客，我唔想半途而廢，我哋做傳媒嘅要對市民負責㗎嘛。」
OK也立場堅定地說：「無錯，我同阿詹共同進退，會繼續做落去。」
總編眼見不能勸退他倆，只好退而求其次：「好，但千祈唔可以有意外，一有意外就要即刻停。」
兩人點頭同意，總編又問：「咁嚟緊打算做邊單？」
「之前有單拖頭切線撞到巴士墮橋嘅意外，」阿詹沉重地說：「呢單係開埠以嚟最嚴重嘅車禍，死咗廿一人。」
「當中有一個傳聞最令我哋在意，有個巴士員工受訪時話事發當日，拖頭司機見到有交通警指揮佢切左線，懷疑係撞鬼，同拖頭司機自己所講有貨van cut線令佢要急切線唔同，所以我哋要揾出真相。」OK說。
「一個自己親口講，一個轉述，都好明顯無嘢好拗，仲有咩報嘅價值？我哋唔係為報而報，而係真係有隱情先去報。」總編意思很明顯，就是認為無新聞價值。
阿詹搖頭道：「呢條公路出名多鬼，每年都唔少交通意外，個司機真係撞鬼都唔奇，至於點解要隱暪，就係我哋想揾出嚟嘅答案。」
「好，但記住，記者係報道真相，而唔係作故仔，唔好有任何bias同前設。」總編簡單地便被說服了，或許是因為公屋一役的緣故。
得到總編開綠燈支持，阿詹和OK像打了強心針，幹勁十足，翌日便動身前往採訪。他們首先乘坐同路線的巴士體驗一次那奪命彎路，然後再到橋下的村從下望向上查看橋的構造。
「你哋好生面口，又嚟睇意外現場？已經過咗好多年，無嘢好睇，啲樹都生返晒。」村民已經見怪不怪。
「你好，我哋係〈敢報〉嘅記者，我哋嚟……」阿詹說到一半便被打斷
「〈敢報〉我識呀，我係fans嚟，上次密封公屋個故仔好堅，睇到我唔敢熄燈瞓，今次你哋想寫巴士墮橋？我可以畀第一手資料你哋喎，當時我喺現場。」一位目測五十多歲的女村民高興地說。
「首先多謝支持，請問點稱呼？」OK伸出右手準備握手。
「呢度人人都叫我強媽。」強媽立即伸出雙手與OK握手。
「強媽你好，我叫OK，佢叫阿詹。」OK簡單介紹後便澄清：「我哋嘅報道都係真，唔係亂作嘅故仔，所以我哋先嚟採訪攞料。可唔可以麻煩你講我哋知事發當日係點？」
「當日我同平時一樣都係一早起身去晨運，晨運完返屋企突然就聽到上面天橋好大聲，之後仲跌咗啲欄杆同石屎落嚟，當時我行多兩步嘅話，今日都同唔到你哋傾偈。」強媽心有餘悸地憶述，兩秒後又再手舞足蹈地說下去：「我即刻就望上條橋，見到架巴士車頭衝咗出嚟，我拎起電話打算報警，點知都未打，架巴士就跌落嚟，我邊叫邊向後跑，幾驚架車砸到我，好彩無事，但都嚇到我魂飛魄散咁滯。」
「咁你記唔記得架巴士跌落嚟之前，有無啲咩奇怪嘅嘢發生？」阿詹問。
「我知你哋想聽咩，不過又好似無，況且日光日白，邊度會有鬼㗎。」強媽半開玩笑地說。
「強媽，我哋唔係淨係揾鬼㗎，我哋係揾真相。」OK糾正道。
阿詹揚手叫停OK，續問：「咁事發之後，條村有無啲奇怪事發生？」
「咁就有啊！」強媽提起勁地說：「成日都聽村民話夜晚嗰度有好多鬼影，有啲頭破血流，有啲斷手斷腳，有啲甩頭甩髻，有啲無頭東宮，但我就時運高睇唔到喇。」
「咁你有無親身經歷過啲咩？」阿詹又問。
強媽努力回想，想起了一件小事：「單車禍一年忌日嗰時，我夢到有個巴士司機同我講佢死得好慘，之後我就好似第一身視角咁揸巴士再被撞墮橋，跌落嚟嗰下嚇醒咗我，之後我都無再發過呢個惡夢。」
「記唔記得個司機咩樣？」阿詹着急地問。
「唔記得嚕，發夢嘅嘢，成日一醒就唔記得㗎喇，不過直覺就係嗰個巴士司機囉。」強媽皺起眉頭回答。
「咁第一身揸巴士，有無見到有咩特別嘢？」OK也加把口問。
「唔係咁記得嚕，好似有個人企喺度指揮交通，之後就有架貨van轉線，再有架貨櫃車轉線，之後我就衝咗出橋。我唔知有無記錯㗎，可能同事實混埋咗一齊講。」強媽努力回想，但始終不確定。
「唔緊要，都已經幫到我哋好多，唔該你。」阿詹禮貌道謝後，便與OK前往巴士墜落的位置查看。
巴士墜落在山坡上，由村走過去很快便到，由於已經事隔幾年，當年意外的痕跡都已經被大自然所修補，唯一還能看到與意外有關的只有不定期拜祭所留下的祭品。
「啲橙都仲好新鮮，應該係呢一、兩日嘅事。」OK對拜祭場地拍了張照片。
「而家可以做嘅都做完，其餘就等今晚再算，我哋喺村度再逛逛睇吓。」阿詹轉身離去。
「等陣先，」OK卻喊停阿詹道：「你見唔見到橋上面有人？」語畢，他拿起相機便按下快門。
「有人？」阿詹立即抬起頭望向天橋，這條高速公路理應沒有行人，但他的確看到有三個人倚着欄杆在談天。
接着，兩人最不想看到但又意料之內的事發生了，那三個人竟一起踏出欄杆跳橋，阿詹和OK喊也喊不住，整個過程不超過三秒，三人便落在他們面前，還揚起了很大的泥土和灰塵。
「快啲報警！」OK焦急地說。
「等等，睇定啲先，無血濺出嚟，有啲怪。」阿詹冷靜地說。
泥土和灰塵很快便被風吹散，出現在兩人面前的是完好無缺的泥地，不只屍體消失，連泥土也沒有些微的凹陷。
「果然無錯，」阿詹分析道：「如果真係有人企喺度，肯定會引起騷動，但橋上面啲車連減速都無，證明呢三個人未必人人見到；另外我啱啱都話，佢哋跌到落嚟連血都無滴，好唔尋常。卒之最後證明我無估錯，佢哋唔係人，而係之前喺度跳橋自殺嘅人，佢哋要每日重複死一次，直到陽壽盡先可以投胎。」
「但好似無聽過有人喺度自殺。」OK回憶與這裏相關的意外，除了他們打算報道的巴士墮橋意外之外，根本無發生過其他墮橋的意外。
「咁會唔會係巴士上面咁啱有三個人打算自殺，所以佢哋先仲喺度？」阿詹假設道。
「咁唔通係佢哋令到巴士炒落橋？」OK大膽猜想。
「咁我又唔清楚，」阿詹十分肯定地說：「但如果真係咁，巴士上面嘅倖存者一定會講出嚟，但事實係無人講，即係佢哋有咁嘅諗法，而又咁啱有呢次意外，所以係相輔相成得出嚟嘅結果。」
「即係咩？吸引力法則？意念成就事實？」OK不解。
阿詹模稜兩可地答：「可能係啩，又或者唔係。可能佢哋先係元兇，拖頭司機只係契機。」
「即係點？好亂呀！」OK被阿詹弄得頭昏腦脹。
「訪問佢哋咪知真相。」阿詹笑說：「自殺嘅人每日都要喺同樣時間地點重複一次自殺過程，我哋聽朝同樣時間過嚟等佢哋就得。雖然我哋唔可以喺公路上面落車，但喺下面呢度等就無問題。」
「但係佢哋一落地就消失，點問？」OK想起剛才的畫面。
「真係咁咩？」阿詹露出一個充滿信心的笑容。
「既然有目標，咁我哋點解仲要喺度等到今晚？」OK想不到原因。
「因為我哋今晚要訪問嘅係枉死嘅人，唔係自殺嘅人。」阿詹邊走邊說：「起行，我哋唔駛再喺度逛，去探監。」
OK不需問也知道阿詹要探的人是誰，於是乎兩人便往監獄碰一碰運氣。
在探監制度之下，一般只有囚犯提交的准許探訪名單上的人才能探望，幸運地，貨櫃車司機在他倆表明來意後同意會面。
甫見面，司機便十分着緊地問：「你哋係咪可以幫到我澄清？」
「只要係事實，我哋一定會報道。」阿詹官腔地回答，沒有多餘的承諾。
「不過我講出嚟都無人信，都係算，無人會信個殺人犯講嘢，何況仲係咁離奇嘅嘢，只會以為係我揾藉口。」司機失落地自我矮化。
「唔緊要，你照講先。」OK嘗試鼓勵司機，但好像並沒有甚麼說服力。
司機拿着電話筒，看着兩人信念堅定、滿腔熱誠的眼神，最後屈服道：「好，我就照講。嗰日我之所以會咁急cut線，係因為後面架貨van好趕時間咁爬我頭。本身爬頭好常見，但好死唔死前面唔遠有個交通警要啲車靠左線，van仔司機就急急腳cut，我唔夠位所以局住都cut，點知就撞到架巴士……」
「咁點解喺庭上面你又唔講？」OK問。
「玩嘢咩哥仔，講出嚟邊有人信？連我個大狀都叫我唔好咁講，因為當時根本就無警察喺度，我講咗個官印象唔好判得仲重吖。」司機沒好氣地說。
「如果我無估錯，嗰個警察應該係比你宗車禍再早幾年，喺執勤嗰時被架van仔意外撞死嘅。」阿詹邊說邊寫下重點。
「咁我就唔知，但個警察睇落就好後生。」司機憶述：「總之就運滯係喇，我唔求咩，只係求可以有人將個真相講出嚟，有無人信都唔緊要。」
「放心，我聽完之後覺得啲嘢都對得上，我認為係真，我一定會寫，記得睇下期〈敢報〉。」阿詹拍心口保證。
兩人探訪完後便離開，吃過晚飯後阿詹去文具店買了些少東西便回到村，等待那些枉死的鬼出現。
「其實點解你咁肯定佢哋會出現？」OK在等待時問了一個一直在心底的問題，可是阿詹的答案卻令他氣得差點原地斷氣。
「我唔知㗎喎，估咋，之前我哋咁多次都喺夜晚遇到，今次應該都唔例外。」阿詹搭着OK肩膀道：「信者得救，ready定部機隨時影相。」
兩人一直等到凌晨三時，月光無預警地被雲層遮蓋，在缺乏燈光的山坡上，黑夜變得更黑；風使樹葉沙沙作響，偶然傳來公路上飛馳疾走的汽車引擎聲，陰森的氛圍幾何級數上升；植物搖曳的身姿配合時現時滅的車燈，映照出約隱約現的黑影，恐怖程度衝破天際，心臟弱一點也會即時猝死。
然而，枉死的鬼始終沒有出現，但兩人絕非空手而回。在等待期間，有一個奇特的現象令他們靈光一閃。
一片大樹葉落在石頭上，本身平平無奇，但泥土沙石逐少逐少平均地滑落到樹葉上。由於樹葉重量分配平均，所以依舊四平八穩地在石頭上。就在此時，情況起了變化，有極少量本身在中間的泥土沙石不知為何向前滾動，造成了頭重尾輕的情況。雖然只是很輕微，但樹葉最終還是承受不住失衡的重量，向前傾側滑落，樹葉上的泥土沙石也一併被拋出樹葉，最終塵歸塵、土歸土。
「我估到嗰三個人點自殺喇！」兩人同時說出，對望一眼後便大笑起來。
接着兩人猜想了各種可能的情境，再分析其可能性，正所謂「真理越辯越明」，兩人提出又反駁、反駁又辯解，最終得出一個最有可能的答案，但這答案只有問每日跳下來的三人才能知道是否正確。
「去唔去廁所？有啲急。」OK問阿詹。
「驚自己一個去吖？陪你囉。」阿詹半開玩笑半嘲笑道。
「不過邊度有廁所？」OK尷尬地問。
「唔知喎，就地解決淋吓花囉。」阿詹帶點開玩笑的意味，同時指向遠處一棵大樹。
「都無計，唯有係咁……」OK二話不說便衝去大樹下解決生理需要。
然而，世事就是如此巧合，兩人在樹下解手後，竟將一張記憶卡沖了出來。
「張卡……睇吓？」OK疑惑地問。
「但全部都係你啲……」阿詹故意扮作為難。
「你都有份㗎！沖返乾淨咪得。」OK立即反擊。
沖洗和抹乾後，兩人才想起自己根本無能讀卡的機器，只好暫時將記憶卡收好，待回到報館才看。
一輪忙活後，東面的天空終於泛起魚肚白，鳥兒吱吱的叫聲象徵着新一天的來臨，天橋的車亦漸漸密集起來。
「哎喲！乜你哋兩個仲喺度。」準備前往晨運的強媽遠遠便看見兩人。
「係啊，有一樣嘢我哋一定要親口問清楚。」阿詹目不轉睛地盯着天橋。
「係呢，強媽，你知唔知邊個喺度拜祭？我哋見啲橙都仲好新。」OK問道。
「哦，咪我囉，始終死咗人，初一、十五拜一拜我心安理得啲。」強媽不忘合上雙手對斜坡拜了三下。
「咁你有無見到每日跳落嚟嗰三個人？」OK試探道。
「吓？唔好嚇我喎，我心血少唔嚇得㗎！」強媽驚慌地說，同時抬頭望向橋，然後又迅速低頭盯着腳下，以免看到不想看到的東西。
阿詹立即打圓場道：「同你開個玩笑啫，邊有人跳落嚟，有嘅話仲唔上新聞咩，你又點會唔知先，係咪？你繼續去晨運喇。」語畢輕輕踢了OK一下，OK也立即附和。
強媽離開後，阿詹沒有責怪OK，反而對他說：「Good try嚟，就係咁樣先問到啲料返嚟，雖然佢口講無見過，但逢初一、十五都仲會拜祭，肯定無咁簡單。」
「咁我哋係咪要到時再嚟？」OK問。
「咁又唔駛，我哋都見到嗰三個自殺嘅仲跳緊，即係證明佢拜嚟係無用，除非佢唔係拜緊呢單意外嘅死者喇。」阿詹分析道。
「咁唔係更加要嚟睇吓咩？可能係大單嘢喎！」OK想一想也興奮起來。
豈料阿詹卻澆冷水說：「我哋只係記者唔係警察，查案唔係我哋做，做返本份就夠。況且好現實咁講，我哋都無資源去做呢啲嘢。」
阿詹口裏說得豁達，但雙拳握得指甲都差點劃破手心的皮，可以看得出他多想去查明真相，只不過理性要他捨棄這個想法而已。那種不甘心及無奈，身為拍檔、同樣想出人頭地的OK身同感受。
「咁我明喇。」OK無奈地答，然後即時收拾心情，問阿詹：「我哋專注返眼前呢單報道先，時間應該差唔多，我哋一陣要點做？」
阿詹一臉認真地說：「接住佢哋。」
「吓？接住？點接？佢哋係鬼，得兩個情況：一，佢哋無實體，會穿過我哋；二，佢哋有實體，我哋接到，但佢哋太高跳落嚟有重量有速度，會壓死我哋。兩個情況都行唔通喎。」OK對阿詹提出的方法不敢苟同。
「冷靜啲，我幾時有講過我哋自己接，我哋整個緩衝，減少佢哋嘅衝力，跌落嚟都死唔去，跳降傘嗰啲跌落樹林都可以奇蹟生還喇，我哋都可以整個咁嘅設計，快啲幫手堆樹枝。」阿詹看似不像開玩笑。
OK即時反駁：「嗰啲係跌落樹林，啲樹枝幫佢減速，唔係直墮鋪咗樹枝嘅地下喎。」
「咁信仰之躍，跳落乾草堆得啦啩？高度都差唔多。」阿詹立即轉換口吻。
「嗰啲係打機喎巴打，而且啲人做好晒卸力，唔同嘅。」OK又駁回阿詹的說法。
「咁你有無其他更好嘅方法？」阿詹反問，可是OK卻沉默以對，於是他再說：「諗唔到就幫咗我手先，唔試過點知呢？」
「但你點解咁firm我哋可以接得住佢哋，而唔係直接穿過呢堆嘢？」OK邊堆砌樹枝邊問。
「你記唔記得佢哋琴日跌落嚟之後揚起咗幾大塵？如果無實體又點會有塵呢？」阿詹又拿了一大紮樹枝。
「又係喎！點解我會諗唔到？」OK被阿詹一言驚醒，之後問：「咁我哋要鋪幾多先夠？呢度啲樹枝樹葉我怕唔夠。」
「所以我啱啱買咗呢樣嘢。」語畢，阿詹在腰包內拿出了一袋汽球，拿了一個後拋給OK道：「吹脹啲汽球放喺堆樹枝入面，之後鋪樹葉同樹枝，然後又鋪汽球，咁樣整幾層，好似氣墊咁，應該有用。」
「原來你啱啱係買汽球，但點解你唔買埋泵？點吹呀大佬……」OK叫苦連天。
如是者，兩人忙了個多小時，差不多氣絕，終於完成了這個臨時氣墊，準備迎接每日自殺的三隻鬼。
等待的時間特別艱難，兩人望天打卦，好不容易終於盼到那三個鬼影出現。
「準備喇，我哋要穩住呢個氣墊，如果散咗就無用。」阿詹指揮道，然後和OK一同張開手抱緊它。
OK盯着頭上的橋，三隻鬼同步站起，一起向前傾，同時掉下。
「捉緊！」OK大喊，下一秒便聽到汽球「劈裡啪啦」的爆破聲、樹枝「喀嚓喀嚓」的斷裂聲，以及感受到三隻鬼掉下來的衝擊力。
「鬆手，做嘢！」阿詹一聲號令，OK立即從汽球堆裏尋找三隻鬼的蹤影，然而，甚麼都沒有。
汽球，沒有一個爆破。
樹枝，沒有一根斷裂。
泥地，沒有一絲凹痕。
三隻鬼確實跳了下來，亦肯定掉到地上，而且阿詹和OK更有視覺、聽覺和觸覺的第一身感受，但最終結果卻是白忙一場、徒勞無功。
「乜結果同你講嘅完全唔同嘅，咁我哋搞咁多嘢做乜？」OK累得坐在地上，雙手撐着地問。
阿詹深深呼出一口氣，然後大剌剌地說：「而家試完咪知係無用，下次唔駛重複犯錯囉！」
「真係被你吹脹！」OK其實也沒有很生氣，只是純粹想發洩一下，之後他沒好氣地問：「咁篇報道點寫落去？只係我哋推斷，唔係真正答案。」
「都唔係嘅，我哋仲可以問返當時巴士上嘅乘客。」阿詹又提出另一個方法：「不過要好花時間同睇彩數，因為我哋要喺巴士站等啲人落車。」
「咁都要照做㗎，最緊要揾到真相。」OK爬起來，拿起行裝準備出發。
阿詹亦起身準備離去，豈料才走一步便被絆倒，整個人重重摔在汽球堆中，OK見狀立即拉起他，並趁機調侃道：「你唔想嘥咗個氣墊都唔駛自己親身仆一次啩？」
可是，阿詹並沒有用開玩笑的語氣回話，亦沒有即時站起來以自嘲解圍，他氣若游絲，沉重的身軀像斷線木偶般靜靜地躺在汽球堆中，而且還慢慢沉下去，樹枝就像無數的手，不斷將他往變成流沙的泥土裏拉下去，OK費盡九牛二虎之力也拉不上來，仔細一看，阿詹遭絆倒的腳好像還有一個手印。
突然，阿詹一下大力的吸氣，整個人醒了，立刻坐起來，同時，「樹枝」變回樹枝，「泥土」變回泥土。他瞪大雙眼，受驚過度般望着OK，緩緩地說：「我啱啱同三隻鬼傾完，佢哋仲帶我穿過地下，之後我見到有光，但我屋企人拉返我上嚟，我諗我差啲死。」
「咁驚！係咪即係瀕死體驗？好彩你無事咋。」OK被阿詹嚇倒，但仍然不忘問：「話時話，你同三隻鬼傾完，佢哋點講？」
「同我哋諗嘅差唔多。當時架巴士車頭懸空，所有乘客都唔敢郁，其實好安全，甚至如果大家一齊聚喺車尾嘅話會無事㖭。而佢哋三個雖然都有自殺呢個念頭好耐，但始終無付諸行動，本身亦都無諗過利用呢次車禍。直到其中一個人由車尾走咗去車頭指揮大局，其餘兩個人先意識到呢個係一個好機會，就一齊走去車頭，架巴士就由本身平衡慢慢變成頭重尾輕。由於佢哋三個好自然咁行動、好熱心咁指揮大家，根本就無人認為佢哋係故意，當乘客都未意識到有問題嘅時候問題就已經出現──架巴士開始唔穩，乘客就開始慌，一慌就亂郁，亂郁架巴士就越唔穩，惡性循環之下，最後架巴士就墮橋，佢哋三個就奸計得逞。最諷刺嘅係啲人死咗都唔知呢個其實係佢哋三個設嘅計，仲以為佢哋只係熱心想救人。」阿詹一輪嘴將剛剛斷氣幾秒所得知的事實用數分鐘說出來。
「如果真係咁，佢哋都演得好真，呃晒全世界。」OK聽完只有讚嘆，同時又提出另一問題：「但你咁樣得返嚟嘅資訊係咪真係用得？係日有所思，夜有所夢，抑或真係瀕死體驗同報夢？但呢兩種途徑讀者係咪真係接受到？」
阿詹想也沒想便說：「呢次好明顯係報夢，絕對用得，我哋嘅讀者都會信。」他硬生生把自己最不願承認的潛台詞吃下肚，認為不說出來便不算事實。
「咁又係嘅，始終我哋轉咗型。」OK大概也想到背後原因，只是看破不說破。
兩人達成共識後，因為阿詹剛經歷完瀕死體驗而元氣大傷，決定放棄尋找乘客計劃，各自回家休養，翌日才回報館交差。
