山洪暴發
「我哋喺度會唔會出事㗎？而家點睇都應該黑雨，我驚好似幾十年前咁案件重演。」OK雖然已經穿着雨衣和水鞋，但數萬呎高空自由落體的雨水打在身上也令他周身痠痛。
「叉住你把烏鴉口，嗰次意外之後已經改善咗好多，而且我哋仲喺條橋上面，好安全，當時班人出事係因為佢哋無上橋。」阿詹依在橋邊探頭查看河道續說：「況且今次我哋要揾出呢次意外背後嘅真相，一定要有返咁大雨先得。」
「欺山莫欺水，點解咁衝動受老總挑釁，而家諗返真係蠢咗。」OK抱怨道。
「唔好諗返轉頭喇，唔衝動都衝動咗，做好佢，唔好衰，要證明我哋係全能先可以跳去大報館。」阿詹始終未忘初衷。
兩人之所以身陷豪雨當中，是因為總編提出了一個特別的專題計劃──尋找海陸空意外真相。他從一系列的意外當中，憑直覺決定要報道這宗數十年前、造成二十八人死亡的山洪暴發意外。儘管當時兩人有嘗試反抗，但最終還是要屈服在總編的權術之下。
「你哋唔係話乜都全力去做咩？而家耍手擰頭好似與事實不乎喎。」總編對兩人使出激將法，最終結果就是兩人身在滂沱大雨中的橋上。
雨越下越大，橋下本身只是一條水流不多的小溪澗，但經暴雨加持後，水量爆發，已經變成一條水流急湍的河流，人站在其中絕對會被沖走。
「上期咁賣得，老總要乘勝追擊玩話題，要做齊海陸空嘅報道，其實都無可厚非，但佢偏偏揀呢個咁危險嘅嚟做……」OK的抱怨尚未結束：「佢係咪唔記得咗成間報館其實得我哋兩個員工，我哋其中一個出事嘅話，間報館都執得。」
「我哋小心啲，做足安全措施就得喇。」阿詹邊說邊從背包拿出一條登山用的繩，OK把它綁在身上再綁着欄杆，雙重保障，而另一端阿詹牢固地綁住自己的腰和胯。
「你行去河邊時小心啲，睇住啲石跣，跌咗落水神仙都救你唔到。」OK在阿詹出發前作出最後的囑咐。
阿詹繞過欄杆，小心翼翼地落到河岸邊，他隨手檢起一枝樹枝拋進河，嘗試計算河水有多急，然後再拿着另一枝樹枝伸進河內，感受河水的推力，之後再將結果大聲告訴OK讓他記下。
「雖然唔係好專業，但我覺得水入面嘅力仲大過水面幾倍，如果山洪突如其來，都真係會沖跌，然後企唔返起身直接沖走，期間仲會撞埋啲石頭度，嗰度力真係死得人。」阿詹將自己的想法告訴OK。
「唔只咁簡單，啲水夾埋啲沙石泥土變咗泥石流，令到個衝力再大咗，嗰班死者當時就係咁被沖走，最後浸死咗廿八個，入面仲有唔少係小學生。」OK補充道。
「OK，你扶穩，我而家要行去橋底。」阿詹呼喊後便行動，希望能進一步感受當時的情況。
阿詹步步為營，扶着牆壁，由於橋底已經全是澎湃洶湧的河水，他只好改以探頭查看橋底的情況，可是沒有甚麼特別發現。
「無料到，呢度仲話猛鬼，出過好多離奇車禍又剩，但完全無嗰種feel。」阿詹向橋上的OK大喊，然後往回走，同時緊盯腳下，以免「鬼掹腳」。
OK把阿詹拉上橋後，提議道：「不如試吓我落去，可能我會遇到呢。」
阿詹沒有異議，於是兩人角色互換，改由OK往河岸探索。OK從另一面落去，由於雨越落越大，他下去時水平線又再上漲了約五厘米，意味着水量已經與剛才不可同日而語，假若不小心滑落河中，有救命繩索也未必能輕易回到岸上。不過幸運的是，河水變清了，沙石泥土減少，不再怕落水「中頭獎」。
OK站穩陣腳後，拿出相機拍了很多照片，接着對阿詹喊道：「我試下伸隻腳落河邊淺水區親身感受，你捉實啲。」
阿詹做了一個「OK」手勢後，OK便伸腳試探，豈料才剛接觸水面，河水隨即增多，衝擊力大得撞開了他的腳，害他失去平衡跌坐地上。
「有無事？」阿詹見狀，立即拉緊繩索並着急地問。
OK爬起來，摸了摸屁股說：「無事，係有啲痛啫。啱啱水量突然增加，而家又好似正常返，我試多次。」
OK比之前更小心，找到穩固的踏腳位後，再嘗試伸出腳試探，而歷史再一次重演，水量又一次在他剛接觸到水面時突然增多，幸好這次他早有準備，立即收起腳站回岸上，水流隨即變回正常。
「你見唔見到？我好似發現到啲嘢。」OK大喊：「我想試多次。」
「我見到，應該唔係巧合，試多最後一次就好，如果真係有鬼揾替身，我驚真係會出事。」阿詹雖然擔心，但亦想找出真相，好證明他們的辦事能力。
拍檔也同意後，OK抓緊旁邊的樹，最後一次伸腳試探，這次他打算一直堅持，測試水量會不會不斷增多。他深深吸入一口氣，伸腳到水面，水流即時增多，由於已經有萬全準備，所以這次沒有被撞倒。他的腿用力與河水對抗，十秒、二十秒、三十秒，隨着對抗的時間越長，水流也變得越強，最終他力竭放棄，收腳站回安全的位置。
「點樣？」阿詹問：「上返嚟未？」
OK點頭示意，慢慢走回橋上，然後報告：「我唔知係因為肌耐力問題定真係水流大咗，我擺得越耐明顯阻力越強，但我一收腳，河水就變返原本咁，或者呢樣就係我哋想揾嘅嘢。」
「呢樣最多只可以證明係揾替身嘅現象，但唔係意外嘅起因，除非證明到意外發生嗰時都有咁嘅現象，但問題係我哋證明唔到呢個現象係幾時開始有。」阿詹頭痛道。
「不如去個亭度避避雨再傾。」OK指着附近的涼亭說。
「好，順手去影埋個碑。」阿詹指着涼亭前的石碑，上面記載了那次意外的經過和遇難者的名字。
「上面寫文言文文謅謅，以前啲人文學造詣真係高。」OK邊拍照邊讚嘆。
拍完照後，兩人三步併作兩步跑到涼亭避雨，到達涼亭時才驚覺有一個全身濕透的小女孩獨自坐在涼亭內。
「小妹妹，你做咩咁大雨都仲出嚟？你屋企人呢？」阿詹擔心地問，同時遞了一張紙巾給她。
小朋友女孩沒有回答也沒有拿紙巾，或者直接說是無視了兩人，只是以空洞的眼神看着橋後的豪宅，偏偏這個畫面OK覺得很有感覺，手很自然便抬起，捕捉了這個瞬間。
拍完照後，OK才留意到小女孩目光的終點，於是問：「你係咪住嗰度？等哥哥帶你返去。」
小女孩還是沒有理會兩人，一時間他們也束手無策，只好坐着等待雨勢轉弱才決定下一步行動。
然而，雨只有越下越大，完全沒有減弱的意思。
「我哥哥喺嗰度救咗好多人。」小女孩無預警地說，但眼睛並未離開那豪宅。
「你哥哥喺嗰度救咗好多人？佢係消防員嚟㗎？」OK和藹地問。
小女孩沒有回答，只自顧自地續說：「佢救咗我好多朋友，佢係英雄。」
「咁咪好，你又可以同你啲朋友玩。」OK也替小女孩高興。
「佢哋走咗，唔會再同我玩。」小女孩回答。
「佢哋咁衰？唔緊要，你一定會有其他新朋友。」OK鼓勵道。
「哥哥都走咗，唔會返嚟。」小女孩言語間沒有半點情緒。
聽到這裏，阿詹隱約感到事有蹊蹺，他拉走OK，小聲在他耳邊說：「睇嚟個妹妹有好大嘅創傷後遺症，佢阿哥同啲朋友應該死咗，而且就喺後面個豪宅度，但佢接受唔到，所以先冒住咁大雨都要嚟揾佢哋。」
「我見到都好心悒，睇住佢欲哭無淚咁，仲要面青口唇白，佢真係受咗好大打擊，但我哋又愛莫能助，唉！」OK慨嘆道。
「我哋最多都係帶佢返屋企，同返佢屋企人講，其餘嘅就睇佢屋企人點決定。」阿詹總結道。
兩人決定好後，OK便對小女孩說：「小妹妹，哥哥……咦？人呢？」
小女孩竟在兩人討論時偷偷離開了，他們立即舉頭四處張望，但卻看不到她的身影。嘩啦嘩啦的雨聲掩蓋了她的動靜，綿密的雨水使能見度大幅下降，兩人互望一眼，可能是人類上千年進化而得出來的危機意識，他們同時往最壞方向去想，得出最差的答案──小女孩為了尋找她的哥哥和朋友，奔向河流被沖走了。
兩人有共識後，二話不說狂奔到河邊，河水滂濞而至，撞上河中屹立千年的石頭，造成一波波的白浪。浪花越大，他們越焦急，四處張望也看不到小女孩的身影。就在此時，河流中有一隻小波鞋浮上水面，載浮載沉快速漂過，立即抓住了兩人的眼球。
「仆街！」兩人異口同聲地說，阿詹更立即拿出救命繩索綁在樹上和自己身上，準備落水搜救，OK也很配合地緊握繩子。
可是，在千鈞一髮間，OK拉住了阿詹，因為他記起了總編的叮囑：「過幾日就盂蘭節，而宗意外都係盂蘭節前夕發生，唔理你哋信唔信邪，小心啲鬼揾替身，附近條公路成日都有離奇交通意外，所以你哋千祈唔好逞英雄，小心駛得萬年船。」
「個妹妹會唔會？」OK遲疑了半刻，最後還是開口道：「我見佢成身濕淋淋，又面青口唇白，講埋啲嘢又怪怪地咁……」
「但如果你估錯呢？人命嚟喎，真係要見死不救？」阿詹將球拋給OK。
面對這個道德難題，OK快速理性地回答：「水流咁急，可能已經沖走咗，你落去好大機會只係令亡魂數加一。假如未沖走而你救到佢，有無把握兩個安全返上岸？一換一已經好好，最差係一齊沖走；而最壞係佢真係揾替身，你一落水就已經宣告玩完。五個情況四個都差，五份一機會，我覺得搏唔過。」
「救命……」河裏忽然傳出似有若無、非常微弱的求救聲。
「你都聽到喇，唔理咁多，你捉實，我落去救人。」阿詹沒有理會OK的勸阻，一意孤行下水救人。
阿詹先在岸邊循聲搜索，看到河中有一個身影勉強地抱着大石，他隨手拿了一枝樹枝當作拐杖便下水。他一下水水量便大增，錯估形勢的他差一點被沖走，幸好樹枝牢牢地插在河床卡住才倖免於難，不過這一幕已經看得OK心臟差點跳出來。
阿詹伸腳試探，找到一個有石頭卡住的位才踏出一步，然後再用樹枝卡住，再探步尋找下一個落腳點。距離河中大石雖然只有數步距離，但他花了快十分鐘才到達，冒險涉水而行換來的卻是一場空。
「OK你有無見到佢，佢係咪沖走咗？」阿詹問。
「我見唔到呀！我一直都睇唔到有人。」OK回答。
「唔通真係沖走咗？」阿詹猶疑了兩秒，決定放手一搏，他順着河水往下走，可惜未夠兩步便因水流太強而失去重心跌倒。OK雖然已經即時行動嘗試拉阿詹回岸邊，奈何狂怒的河水發瘋似的誓要將他帶走，任憑OK如何用力拉也起不了作用，甚至連他也一同被拉着走。
情急之下，OK決定甚麼也試試，他對着河大聲說：「阿詹冒住生命危險都要救你，同你阿哥當時想救人嘅心情係一樣，你真係要攞佢命？咁同攞走你阿哥條命有咩分別？你咁做你阿哥會開心咩？佢救人都係想做個好榜樣畀你睇，你而家殺人揾替身，佢實失望到爆！」
OK此話一出，河水量即時減少，水流的速度也減緩不少，阿詹終於能撐着樹枝再次站起來，想不到OK的說話竟然奏效。
可是開心不到一秒，OK察覺了異樣，阿詹竟然站在河中一動也不動，OK拉也拉不動他。未幾，他竟自己潛入水中，OK一見簡直快要瘋了，他立刻把繩索繞過欄杆作為固定點，然後綁在自己身上便衝落河。事與願違地，由於繩索長度有限，而阿詹又拉不動，剩餘的繩索根本不夠OK走到河邊，更枉論下水。
「阿詹！你等多陣，我嚟救你！」OK只能大叫。
此時彎腰潛水的阿詹其實正在為自己解套，他的腳陷入了淤泥中，本身很容易就能脫困，但不知為何，一塊大石精準地壓在他的腳掌上，然後其他大大小小的石頭也像被吸引般堆在他的腳旁，使得他的腿不能拔出來。
「你好快啲放開阿詹，佢係救你，點解你要害佢？做好心都有錯？你站喺你阿哥角度諗吓，佢都想你救人而唔係害人㗎！」無助的OK能做到的就只有在岸邊大吵大鬧。
阿詹已經在水底超過一分鐘，OK依然寸步難行，他已經分不清阿詹是遇溺還是頭被鬼壓着上不到來，他只知無經過訓練的話，在水中無可能閉氣這麼久，阿詹已經面臨缺氧的危機。
「OK！」此時阿詹的頭終於再次露出水面，他喘不過氣，用盡最後的氣力大叫：「快啲拉我上去。」
OK聽到阿詹的命令，即時全力向前衝，阿詹的腳總算從石頭堆和淤泥中拔出來，然後藉着OK的協助返回岸上。
「你有……有無事？」OK大氣也透不過來：「你做咩潛咁耐水？我以為你浸死咗。」
「哈哈，你咁關心我咩？」阿詹邊喘氣邊笑道：「我隻腳無啦啦被啲淤泥同石頭撠住，啲石頭精準到好似有人特登放上去咁，我搞咗勁耐都甩唔到身，喺我就嚟窒息嘅時候，耳邊聽到有兩把聲鬧交咁，最後有把妹妹聲話點都要救我，之後啲石就鬆動咗，我先甩到身。」
「即係有鬼想揾替身，而另一個想阻止，最後救返你。」OK很快便得出結論：「一定係我嘅說話令佢決定救你。」
「哥哥，你哋講咩？係咪揾我呢？」橋上突然傳來小女孩的聲音，嚇了兩人一跳。
小女孩全身濕透，不知是因為下雨還是下水，但她的表情與在涼亭時有很大的分別，現在笑容可掬，是一個人見人愛的開朗小女孩。
「哥哥，你哋跟我嚟，我畀啲嘢你哋睇。」小女孩向兩人招手，然後不等他們便轉身跑走，兩人狼狽地拿着自己的物品跟在她身後。
小女孩每跑一段路便停下來轉身催促兩人，兩人卻無論如何也追不上她，一直跑到那豪宅入口前。小女孩指着豪宅說：「你哋想揾嘅嘢喺度，嗰面唔會揾到。」
兩人望着豪宅，不太明白小女孩的意思，正想追問之時，小女孩已經消失無蹤，兩人只好膽粗粗向豪宅的保安問個明白。
「咩山洪暴發浸死廿幾人？無聽過，我唔知。」保安斬釘截鐵地表明立場。
「我就唔信佢會唔知，肯定係管理公司落咗order唔准講。」阿詹拉走OK悄悄地說。
「看更唔得，試吓問花王，睇佢都唔後生，好有機會知道。」OK偷偷指着冒雨修剪花叢的老花王說。
「先生，落咁大雨都做嘢咁辛苦，唞吓先喇，吊頸都要唞吓氣㗎嘛。」阿詹遞上香煙對老花王說。
老花王看了一眼兩人，再看了一眼香煙，沒有說甚麼，只是搖搖頭以示拒絕，繼續默默地工作。
「煙唔啱，咁汽水啱啦啩？」OK從附近的自動販賣機買了一罐冰凍的汽水遞給老花王，並說：「我哋有嘢想問吓你。」
老花王這次正眼都沒有望兩人，邊修剪草叢邊說：「有咩直接問，唔駛賄賂我。我鍾意植物所以唔會食煙破壞環境，我人老有糖尿，唔飲得汽水。」
阿詹聽後尷尬地說：「唔好意思，見怪喇。我哋係〈敢報〉記者，想問吓呢個豪宅同幾十年前單洪水意外有咩關係，你會唔會知？」
老花王一聽，剪刀定住了一秒，然後邊剪邊答：「哦，無關係㗎，都係啲山山水水，近郊全部都係咁上下。」
阿詹眼見老花王停頓了一秒，看得出事情並非這麼簡單，只是老花王刻意淡化，於是再追問：「你知我哋係想問咩嘅，幾十年前呢度山洪暴發浸兩咗廿幾人，我哋想知件事嘅經過，點解會發生。」
「咁耐之前嘅事，點解要重提？」老花王繼續帶兩人繞花園。
「因為我哋想報道真相，想市民知意外嘅真正原因，想枉死嘅人可以死得眼閉。」OK衝口而出。
「有用咩？咁做只係揭人傷疤，令到本身忘記呢件事嘅人再次傷心，造成二次傷害。」老花王字字鏗鏘，開始激動起來。
「無人會忘記到，只係自己呃自己。」阿詹眼神堅定地說：「啱啱我哋嚟之前，喺涼亭遇到個妹妹，佢同我哋講佢嘅哥哥同朋友都抌低咗佢，但佢仲記得佢哥哥救咗好多人，佢好自豪。佢仲帶咗我哋嚟呢度，話呢度先會揾到我哋想揾嘅嘢。本身我都唔明，但見到你，我就明晒。」
老花王眼框通紅，用力地將鼻涕往回吸，OK見狀，當下便明白了，他立即遞上紙巾，並安慰道：「唔駛嗦，擤晒出嚟會舒服啲。你阿妹最後都救咗我個friend，佢無忘記你，你做咗個好榜樣。呢啲唔係二次傷害，我認為係令死難者家人釋懷先啱，如果唔係你都唔會仲留喺度，邊悼念邊贖罪。自從嗰次意外之後，你唔發覺無再聽過有人浸死咩？就係因為佢一直記住同實踐你最後嘅身教。其他鬼都用唔同途徑揾咗替身投胎，得返少量留喺度，但係佢都依然堅持守護遊客，阻止其他鬼喺水度殺人，係因為有你呢個阿哥咋！」
此時老花王已經哭成淚人，阿詹乘勢再問：「其實當時發生咩事？」
老花王繼續剪草叢以分散自己注意力，同時說：「佢帶你哋嚟，唔係要見我，而係要帶你哋去正確嘅位置，呢度前身就係嗰個屍疊屍嘅石灘。」
「呢度？咁嗰塊石碑fake人㗎？」OK吃驚地問：「咁呢度咪好猛？」
「塊石碑本身立喺條橋隔籬，但係因為附近不斷嘅改建道路工程，原本條橋都無咗，塊石碑先搬過去，悼念又好，鎮魂又好，警告又好，總之就一直放喺度。至於呢度猛唔猛呢我就唔知，我只係知當時動工前拜神好隆重啫。」老花王憶述。
「咁當時單意外，真係因為落雨引致山洪暴發咁簡單？」阿詹轉換為記者模式，誓要為讀者找出真相。
「喺度咁多年，我聽到好多傳聞，雖然我無實際證據，但覺得唔係咁簡單……」老花王欲言又止。
「即係點？你查到啲咩？」OK着急地問。
「我淨係聽人講，因為年代太久遠，所以揾唔到實證，或者你哋做記者會揾到相關報道都唔定。」老花王將另一單年代更久遠的山洪暴發意外娓娓道來：「我聽附近村啲老人家講，戰前呢度有修過水壩，有一日又係落好大雨，班建築工人本身玩緊水消暑，啲洪水一下子就沖落嚟，佢哋根本反應唔切，一下子就浸死咗好多人，而兩單意外都喺同一個位置發生。」
「一班成年工人，有氣有力都頂唔住，洪水嘅威力真係好大……」OK在腦海中想像當時的畫面。
阿詹則直接指出重點：「你意思係幾十年前，死咗廿八人嘅洪水意外，係呢班枉死工人揾替身？」
「嗯……我覺得係，個情況係一模一樣，只不過我無證據戰前真係發生過咁嘅意外。」老花王握剪刀的雙手呈白色、青筋暴現，明顯是異常用力所致，這是對自己無能為力的直接表現。
「我哋會盡力查戰前單嘢堅定流，雖然未必揾到證據，但最少解釋到當時班小朋友點解會出事，無論係從物理層面抑或靈異角度。」阿詹一口答應老花王。
此時，下了一整個下午的雨終於停下，天空終於放晴，陽光穿透逐漸消散的烏雲，與空氣中的水份攜手築成了一條彩虹橋。
「我係咪眼花？你哋見唔見到彩虹上面有人影？」OK揉着眼睛問。
「邊會有可能？」阿詹完全不相信。
至於老花王，他默默地定睛看着彩虹，看着看着笑了，還向彩虹揮手，像是在作出道別一樣。
