巨星故居
「你兩個果然有料，連老闆去監工引致火燭都寫得出，仲準備埋煙頭，啲相又影得鬼死咁恐怖，啱晒鍾意靈異嘢嘅人嘅口味，成個報道寫到鬼故咁，我都睇到個心離一離。」總編鼓勵說：「再接再厲，下篇報道諗住寫邊度？都係唔好講我知，到時我直接睇仲刺激。」
「唔係呀老總……」阿詹想解釋，但電話另一端已經傳來絕望的「嘟、嘟……」。
OK拍了拍阿詹的肩膀安慰道：「唔緊要啦，最少我哋寫嘅嘢有人睇受歡迎，證明我哋嘅努力無白費先。」
「唯有向呢方面諗，等自己好過啲喇。」阿詹無奈地說：「咁下單報乜好？」
OK輕笑兩聲，拿出早已準備好的素材對阿詹說：「呢單我相信好多人都有興趣，雖然只係得一個人死咗，但就全世界關注，直到而家都仲有人認為未揾到真相，想用自己方法去揾答案。」
本想反駁的阿詹看到該死者的名字便立即改變立場，舉腳贊成：「一代傳奇國際武打巨星嘅死，淨係佢個名都已經吸引，呢次肯定賣爆要加印。但我哋要點揾？佢故居變咗時鐘酒店喎。」
「無錯，所以我哋今次唔駛好似上次咁偷渡入去，直接光明正大入去就得。」OK雙眼充滿期待。
「喂喂喂……你做乜咁期待？事先聲明，我直㗎，唔啱你㗎。」阿詹在座位上「彈」起來退避三舍，逗得OK哈哈大笑。
「咪黐線喇！」OK收起笑容，故作認真地說：「我係佢fans，我期待呢單報道咋，唔係期待同你去開房呀！我直過把間尺呀我同你講。」
兩人在打鬧聲中一同前往位於傳統豪宅地段，已被改建成時鐘酒店的巨星故居。這位國際武打巨星在七三年過身，故居之後被商人買下再改為現今用途。內部結構和外觀有部份改動，露台沒了，廚房和洗手間也沒了，全屋兩層除了前台接待處，其他都間成房間；外部的花園也變為租房客的停車場，還貼心地有捲簾遮擋；圍牆外掛了一個大大的招牌。雖然有內部有所改動，但巨星留下的部份裝飾依然保留下來，朝聖的人還能勉強去緬懷他。
「唔該，想開間房，兩個鐘。」OK對前台說。
接待員看了兩人一眼，語帶輕蔑地問：「兩個男人？」
「係呀，快喇！」阿詹單手掩面，急躁地說。
接待員施施然登記好資料後，遞了鎖匙給他倆，並說：「晏晝就已經咁心急咁緊火，樓上轉右十號尾房，要加鐘打嚟前枱，出入平安啊！」
阿詹白了接待員一眼便被OK拉走，兩人邊走邊查看四周，阿詹忍不住問：「因乜事要日光日白就嚟？有鬼會喺有太陽嗰時出現嘅咩？」
OK爽朗地回答：「無㗎，只不過日光日白嚟嘅話，一嚟可以睇清楚個環境，二嚟人少啲方便我哋行動揾料。」
「叻仔喎，原來你諗好晒。」阿詹稱讚道。
「報道話佢喺房猝死，只要我哋揾到佢間房，就可以遇到佢。」OK信心十足地說。
「咁點知邊間先係佢間房？入面而家咁多房。」阿詹疑惑地問。
OK滿懷自信地說：「我做足功課㗎喇，我哋入房再講。」
兩人不知不覺已經去到自己的房前，打開門，一張King size的床就在房的正中間，旁邊有一張梳妝枱和椅子，還貼心的放了兩枝水和一個避孕套，另一面有小衣櫃，門旁掛着電視，房間盡頭有洗手間。
OK拿出了故居的平面圖，然後說：「呢個有露台，肯定係主人房，所以佢一定喺呢度過身，呢度遇到佢嘅機會最大。」
阿詹一邊聽一邊點頭，OK續說：「而我哋而家喺呢度，喺正對面，即係呢間客房，所以我哋而家要偷偷過去主人房睇睇。」
「好，呢啲鎖，一張萬用門卡就開到，鎖匙都慳返，不過要確保入面無人先。」阿詹拿出身份證自豪地說。
OK笑說：「我就知你一定會咁做，所以我先話晏晝係最好時間。」
兩人放下行李，只帶必需的相機便鬼鬼祟祟走到原主人房、現一號房前。安全起見，兩人先隔着門聽裏面的動靜，沒有聲音；敲門再確認一次，沒有人應門。初步確認為吉房後，阿詹便拿出萬用門卡──身份證在門縫中一刷，門鎖輕易被打開，兩人迅速進內並關上門。
房間的擺設與他倆所租的房大同小異，只是昔日的露台已成為一面牆，房的面積也只有之前的一半。
「而家面目全非，佢係咪仲會返嚟？」阿詹問。
「唔知㗎，但都要做㗎。上次海鮮舫我哋都無諗過會遇到，都係打算實地考察吓交差，點知真係撞鬼，」OK頭向上微仰，期待地說：「但今次我就真係好想遇到喇。」
阿詹眉頭一皺，不敢苟同：「雖則我都好尊敬佢，但我驚畀佢三腳踢死，唔好搞我。」
「我相信佢唔會嘅。」OK幹勁十足地說：「呢間影完，過埋隔籬。」
兩人到旁邊的二號房重施故技，很快便拍完照片離開。回到自己的房後，阿詹問OK：「而家影啲相無鬼無剩，夜晚嗰時我哋又唔喺呢兩間房，其實有咩用？」
OK陰陰嘴笑道：「你以為我啱啱入去淨係影相？我已經set咗cam，聽日過嚟拎返就知佢會出現喺邊間房，然後我哋租嗰間就可以遇到佢。」
「Set cam？呢啲地方咁做犯法㗎喎，你幾時學到咁不擇手段㗎？」阿詹驚奇地問。
「你唔講，我唔講，無人知嘅。」說完，OK做了把嘴巴拉上拉鏈的動作。
「話時話，其實我哋撞到佢嘅話，都未必知佢真正死因，因為可能佢自己都唔知。」阿詹躺在床上說。
「嘩！你敢瞓上去呀？勇者。」OK站在床邊說：「其實就算佢唔知都唔緊要，我哋影到佢相同佢溝通到已經夠爆。有傳聞話佢畀人落毒，哪怕我哋淨係澄清到呢一點都夠做。」
如是者，兩人於翌日再次到來，租了一間房後，便偷偷進去一號和二號房取回影片再查看。可是，兩間房的片段看完又看，都看不到有鬼的出現，連丁點可疑的動靜也沒有。
「無鬼喎，連些少靈異嘢都無，作都作唔到，今個禮拜嘅報道咪泡湯？」阿詹責問OK。
「咁有無鬼都唔係我控制到㗎嘛，邊有得咁怪我㗎？」OK委屈道：「趁仲有時間，做過第二個主題囉……」
「哈哈哈哈……」阿詹突然大笑，捂着肚說：「講笑咋，邊有怪你，你唔駛驚青成咁。老實講，呢度無我預咗，佢都唔係喺呢度死，佢係喺個女星屋企死㗎嘛！枉死嘅都會留返喺過身嘅地點，所以去個女星屋企先有機會遇到。」
「喂！死仔，你知你又唔講嘅？」OK氣憤道。
「咁我都想睇佢會唔會返吓嚟，點知唔會啫。」阿詹攤開雙手說：「況且女星個屋企我哋都好難去到。」
「喺邊度？我有個friend做地產，應該可以幫到手。」OK拿出電話在聯絡人裏搜尋。
「都係附近，但如果有人住緊揾佢都無用㗎。」阿詹說完便將正確地址告訴OK，OK告知其朋友後，剛好發現單位已經空置，正在放售。
兩人相約地產朋友在大廈入口等，打算當面跟她說明情況並提出請求。
「過夜？黐線，梗係唔得喇！業主知道實投訴，公司炒咗我都似。唔得、唔得、唔得。」OK的朋友Ceci激動地拒絕兩人的請求。
「我哋唔會開燈、唔會出聲，無人知我哋喺入面，唔會要你難做嘅。」OK遊說道。
「你咪當我哋睇樓睇到咁夜囉。」阿詹插嘴說。
面對兩人連番請求，Ceci終於忍不住讓步：「最夜去到十一點，無得再夜。」
「十二點啦，please！我哋唔會要你白做，會畀返車馬費你。」OK再哀求，但Ceci心意已決，沒有動搖。
阿詹拉OK到一旁耳語：「應承咗佢先，上咗單位最重要，其他嘅嘢再見步行步，同埋我都想訪問吓佢。」
「十一點就十一點，而家六點幾，都有差唔多五個鐘，我哋快啲上去睇吓先。」OK催促道。
三人登記後，便上了單位視察。Ceci非常專業，又或者是職業病，上到單位便立即介紹，完全將兩人當作客人。
「單位實用面積九七六呎，原裝四房，L型廳，客飯廳分明，向北望馬路夠晒熱鬧，而且有晒隔音屏障，唔會嘈同大塵。」Ceci頓了一頓，明顯是思考了一下才說：「呢間係凶宅，你哋都知，邊個係度死咗我諗都唔駛多講。」
「就係知所以我哋先嚟。」阿詹淡定地說。
「咁就好，其他都無咩嘢要介紹，反正你哋都唔係真係買。」Ceci並沒有失落，反而略帶興奮地說：「我已經準備好一齊見證真相。」
「吓？」阿詹和OK均表現驚訝，相反，Ceci則若無其事地看着他們。
「好危險㗎，你都係行先好啲。」OK苦口婆心地勸說，奈何Ceci堅持要在場。
「Sorry，在公在私，我都無可能離開。」Ceci解釋道：「在公，我帶你哋睇樓，留你哋喺度我自己走先，單位有咩損壞點算？業主追究起上嚟我死硬。在私，其實我自己都想見吓，平時都無機會睇凶宅，而家有人陪，仲要係睇國際巨星，點都要留低。」
OK本想反駁，卻被阿詹制止，因為他認為作為女生的Ceci在這次調查上可以派上用場。
由於時間尚早，房子雖大也不需用數小時來看，所以三人便坐下來聊天。
「關於呢個單位嘅傳聞，想問下你有無聽過啲咩？」阿詹拿着錄音筆問Ceci。
「老實講，我入行咁耐都無聽過話有人遇到過，或者啲人好想遇到，遇到又唔講啩。總之呢間屋同一般凶宅唔同，係極受歡迎，一放盤就好多人排隊睇，好似朝聖咁。」Ceci認真回答，沒有誇張吹噓的成份。
「咁點解仲未賣出？」OK問。
Ceci一臉嫌棄地說：「咪好似你哋咁囉，個個都係嚟朝聖影相，都唔係真買家，枱枱客都白做。」
「Sorry……」OK不好意思地道歉，然後再問：「業主放咗盤幾耐？有無探過佢口風，問過間屋有無咩靈異嘢？」
「放咗個幾月喇，但就無問過呢啲嘢，廢事啦。」Ceci如實作答。
阿詹眼見時機成熟，於是問：「你話都想見吓，不如今晚我哋就成晚喺度留守，睇吓遇唔遇到，我相信之前啲人遇唔到都係因為無得留到咁夜。」
「唔得！」Ceci依然清醒，沒有中圈套：「座頭知道會投訴，到時我就死。」
「前提係座頭真係知道先會啫，如果佢唔知咪無事。」阿詹信心十足道：「我落去同個secure講兩句就得，放心交畀我。」
語畢，阿詹便離開，留下OK和Ceci兩人。OK為了再三確認，於是問：「座頭唔知嘅話，你會畀我哋留過夜㗎可？」
Ceci不置可否，OK知道她為免惹禍上身所以不會回答，於是直接進入採訪模式，不再有所顧忌：「呢個單位估唔估到價？過往成交價會唔會明顯比其他單位低？」
面對一連串的常見問題，作為專業的地產經紀，CeciI事先已經做足功課，胸有成竹地答：「雖然係凶宅，但估價都估得足，成交價係就係比其他單位略為偏低少少，只不過每次一放都好多人搶住睇，買家完全唔驚，仲有啲興奮，可能係因為過身嘅係大家心入面嘅英雄喇。」
OK打算再問的時候，Ceci再次開口道：「不過奇怪嘅係，呢個盤每年六至八月就會放賣，之後就會封盤，還價嘅人多但無一個簽得成。」
OK聽到後都感到不可思義，認為當中一定有未被發掘的故事。
與此同時，阿詹已到大堂，與保安員攀談起來：「辛苦你喇，我係二樓A三單位嘅，多多指教。我想認識定你哋先，除咗你之外仲有幾多個保安會坐呢座大廈？你哋係幾點換更？」
保安員冷不防阿詹一問，有點錯愕，但還是解答了他的提問。然而阿詹還未心息，順道問了關於單位的傳聞，保安員一般都不會回答，但由於阿詹的語言藝術令保安員誤會他成該單位的新業主，所以將自己的所知所聞和盤托出：「我喺度做咗幾十年，成件事我仲歷歷在目，直到個女明星搬走前，我晚晚巡樓都聽到入面有佢啲招牌叫聲，但佢一搬走就無晒，所以都唔知係電視定真係有鬼喇。」
得到新情報的阿詹道謝後便回到單位，除了報喜外，還將剛才保安員的見聞告訴兩人，而OK亦將與Ceci的對話覆述一次，最後一致認為事有蹺蹊，更加有留宿一宵的必要。
「九點再喺度集合，而家我要返去做嘢先。」計劃訂好後，Ceci先行離去，而阿詹和OK亦先去醫肚。
「你話我哋要唔要準備定啲咩銀仙、碟仙、筆仙？萬一真係好似個食蕉咁講，佢唔再出現咪嘥心機捱眼瞓。」OK問阿詹。
阿詹想了一想，拒絕道：「根據記者守則，我哋係唔可以自己造新聞，揾呢啲乜仙物仙，咪同自己造新聞一樣，我唔會用。」
阿詹拒絕的原因OK也明白，不過萬一真的遇不到，沒有稿交，報紙便會停刊，兩人也負擔不起這後果，經商量後決定採訪大廈居民以作備用，只不過這比想像中要困難得多。由於任何鬧鬼傳聞均會在樓價和成交量上直接反映出來，因此居民們都對此事絕口不提，訪問了個多小時都只問了個寂寞。
「時間差唔多，問唔到都無辦法，唯有寄望今晚會見到佢。」阿詹說，分不清他是無奈還是豁達。
晚上九時正，阿詹和OK準時抵達大廈前，Ceci卻不見蹤影。他倆等了十分鐘，她還未出現，阿詹開始懷疑她是否會爽約，着OK致電找她。
「唔好意思……遲咗。」Ceci由遠處跑來，氣喘吁吁地說：「呼……唞順條氣先，頭先睇樓同個客傾耐咗。」
「仲以為你打退堂鼓㖭。」阿詹小聲說。
OK連忙大聲掩蓋阿詹的說話道：「唔緊要！我哋而家一齊上去。」
進到屋內，温度比傍晚時候再低了點，或許是因為太陽已經下山數小時的緣故。OK在現場數個位置布置了攝影機，無死角地將廳和主人房都拍下，然後一起躲進其中一間房，靜待亡魂現身。
時間過得很慢，十點、十一點、十二點……三人熬了很久，時間才十二點多，但外面完全沒有動靜，只是覺得温度好像上升了點，而且呼吸越來越困難。
一陣清風在此時適時掠過，阿詹讚賞道：「做得好OK，開個窗舒服好多。」
「咩呀？我一直都喺度無行開過。」OK皺着眉說。
「咁一定係Ceci，thank you very much！」阿詹客氣地道謝。
只見Ceci全個人忍不住發抖，用氣若游絲的聲線說：「我乜都無做過……」
此刻三人心裏同時有同一個想法，大家都沒有作聲，躡手躡腳地走到大廳，沒有異樣；再靜悄悄地走到主人房前，同時探頭查看。
「哦！都無乜嘢，只不過係有個好fit嘅人喺度show肌啫。」Ceci舒一口氣道。
「哦！都無乜嘢，只不過係有人喺度耍緊雙截棍啫。」OK鬆一口氣道。
「哦！都無乜嘢，只不過係戲啫。」阿詹呼一口氣道。
下一秒，三人同時驚叫，爭相奪門而去。
「等等！」阿詹突然人間清醒，他制止了另外兩人，冷靜地說：「我哋留喺度唔係就係想咁咩？點解我哋要走？」
語畢，阿詹鼓起勇氣，走進空無一人的主人房，對着電視說：「我知你喺度，我哋係記者，無惡意嘅，只係想報道真相。雖然你過身超過三十年，但仲有好多人仰慕你，想揾出你嘅真正死因。世人對於你嘅驟逝有好多揣測，落毒、降頭、吸毒、中水毒、藥物敏感……有啲好荒謬，有啲好make sense，但我哋想知嘅係真相，而唔係揣測，好想你可以話我哋知究竟係咩原因。」
電視依然播放着巨星的成名作，現場也沒有甚麼動靜，電影亦沒有因為要解答阿詹的問題而改變劇情，一切都是那麼的平靜，平靜得有點可怕。
「會唔會……」Ceci膽顫心驚地問：「係我哋諗多咗？」
雖然害怕，但OK堅定地說：「一定唔會，唔係你點解釋啱啱陣風同埋無厘啦更部電視着咗？」
Ceci語窒，好一會才答：「時間掣，一定係時間掣。至於風……一定係唔知邊個窗有條罅。」
「好，就當你講得過去，但係而家個温度明顯低咗好多，凍到我想着件褸，又點解釋？」OK依舊咬着Ceci不放。
此時，電視的畫面變了，由電影變成電視劇，劇情講述當中的角色癲癇症發作，在地上抽搐，旁人嚇得不敢靠近，直到他停下來才上前查看及報警。
這一幕不停重複，阿詹看了第四次後便猜想是否與巨星之死有關：「呢幕係咁loop，你哋覺得係咪暗示緊啲咩？」
OK和Ceci一聽，立即瞪大雙眼且嘴巴呈「O」形，阿詹知道此刻三人的想法已經達成一致。
「你一直喺度唔走唔投胎，係咪有啲咩放唔低？係咪關於當時個女星事？」阿詹乘勝追擊。
電視立即轉為播放另一部電視劇，畫面是男主角在病床旁邊痛哭流涕，訴說着對昏迷不醒的女主角的愛意。
三人秒懂，接着阿詹再問：「你離開咗三十幾年，但世界各地都仲有好多你嘅fans，你有無啲咩想同佢哋講？」
電視畫面即時再轉，轉為播放不同電影和劇集的武打片段，全是硬橋硬馬的真功夫，最後以一幕經典的「我哋中國人唔係東亞病夫」作結。
「我諗你意思係叫我哋支持真功夫片，唔好被外國人睇死？」阿詹猜測，不過未待電視給出答案便又問：「最後想問，你走得咁突然，有無咩遺願？」
這次電視沒有即時反應，它的畫面先是靜止，就像正在思考般，隨後播出雪花。嘈吵的聲音加上電視不同的反應，使得眾人不寒而慄。
「係咪你問錯嘢？會唔會有事㗎？」Ceci害怕起來，盯着大門說：「我諗我都係行先，條匙留低畀你哋，記得鎖門閂窗熄燈，我聽日問你哋拎返條匙，係咁先。」
「咪住！」OK一手抓住Ceci的手，嚴肅地對她說：「雖然無開燈，但你睇清楚門口嗰面，我估你應該走唔到。」
OK並沒有唬爛，靠着高速公路的街燈和車燈的微光照射，隱約看到大門前面不知何時開始竟變得模糊，是一團煙？是一團水蒸氣？總之就像電影裏面有隱形人一樣，附近的景物看上去也經過不規則的折射而扭曲了，危險指數爆標，正常人絕不會貿然冒險衝過去。
「唔好意思，係我衝動咗，我留返低，咩事都無發生過，哈哈……哈哈……」Ceci已經嚇破了膽。
「OK，快啲影低，係佢現身！」阿詹立即下令，OK手起刀落，已經拍了數十張照片。
這「隱形人」走到廳中央，一秒踢出三腳──由扭曲的軌跡推測，估計是腳吧──三陣清風就像遊戲內的腿風般向三人吹去，極之涼快。接着它又從後腰間拿出了估計是雙截棍──無錯，都是從扭曲的軌跡推測──它熟悉的舞弄起來，然後又朝他們打出了三下，三陣清風又朝他們吹去，弄得髮型也亂了。這一連串的招式耍完後，隱形人朝他們走去，三人嚇得攬作一團，不斷後退，最後瑟縮在房的角落，無處可逃。
與此同時，電視的嘈雜聲停了，雪花畫面也變了，變為一張温馨的全家福，而「隱形人」也在離三人兩步的距離前停下。它沒有露出惡相，它沒有張牙舞爪，它沒有四處破壞，它只是恭敬地鞠了個躬，然後像被吹散般消失，電視亦隨着它的離去而關上。
三人看見它完全消失後立即軟攤在地、大力呼吸。阿詹望向OK，露出滿意的笑容，OK亦以「OK」手勢回應。至於Ceci，她單手按着心口為自己定驚，並發誓不會再參與這種靈異之事。
吱吱的鳥叫聲是大自然的鬧鐘，吵醒了在主人房不知何時睡着的三人。
阿詹是第一個受害者，他揉着惺忪的眼在主人房正中央醒來，OK和Ceci一個睡在窗下、一個睡在門旁。阿詹掃視了房間，寒意不其然由心底湧出。他冷靜地叫醒兩人，沒有多加解釋，匆匆拉着兩人頭也不回地離開。
