報館以後靠晒你哋
「買到喇、買到喇！」阿詹興奮地拿着一份〈敢報〉。
OK付錢給報販，也拿走了一份。兩人定睛望着報紙，滿懷希望開始新的一天。
「今日要努力開工，我哋個專題一定會令到〈敢報〉成為出紙量number one嘅報紙。」阿詹摟着OK的頸咧嘴而笑，OK則內斂地點頭，但雙眼充滿鬥志。
兩人回到報館，一一跟同事打過招呼後，便回到座位埋頭苦幹，一做便做到傍晚。
「阿詹、OK，我有啲嘢想同你哋講，入一入我房。」總編走到兩人面前小聲說。
阿詹爽快地回答：「好啊，我哋都啱啱搞掂聽日份稿，順便畀你睇埋。」說畢跟旁邊的OK高興地擊掌。
「唔駛喇，你哋入嚟先講。」語畢，總編轉身便回房，阿詹和OK還處於亢奮的狀態，猜測是否要加印、是否會加薪。
「咯、咯」，阿詹敲門後便進內，興高采烈地問：「老總，我知嘅，你懶凝重咁，係咪今日份報紙好搶手，要加印再加印呢？放心，嚟緊呢個禮拜都係咁，你會慣。」
總編沒有回答，微笑着請兩人坐下，OK隱約感到氣氛有點詭異，連忙用肘頂了阿詹一下，讓他冷靜一點。
「你知唔知我哋今日賣咗幾多紙？」總編呼一口氣，心平氣和地問，兩人均搖頭，總編續說：「兩張，其餘嘅七十九萬九千九百九十八份全數退晒返嚟，你哋可唔可以解釋到係咩事？」
聽到這裏，兩人的眼都凸了出來，說與美式動畫般誇張也不為過。
總編始終很平靜，沒有動怒，但這感覺其實更糟糕。他對兩人說：「雖然我都唔知點解，不過應該係同你哋篇報道有關。行內有個都市傳說，就係千祈唔好得罪藍海會，我本身都唔信，但今次唔到我唔信，仲諗住證據確鑿實掂，點知都係打破唔到呢個宿命。」
「老總，對唔住，我哋……」阿詹和OK知道事態嚴重，連忙道歉，但卻被總編阻止。
「唔駛道歉，報事實係我哋報紙佬嘅責任，你哋無錯，再講，要錯嘅話我都有錯，明知唔得都仲畀你哋出呢篇報道。」總編苦笑着說：「啲同事都辭晒職，報館以後靠晒你哋喇。」
「辭晒職？」兩人同時驚訝，亦回想起剛才進房途中的確看不到幾個同事。
「只不過係一次啫，有必要辭職咩？」阿詹不解地問。
總編依舊微笑着說：「大家都知我哋得罪咗藍海會無得翻生，我都唔好意思阻人開飯。」
「老總，你同我定，我哋唔係二五仔，唔會就咁走咗去，我哋實會幫你搞返起，放心！」阿詹義憤填膺地說。
OK在旁嘰咕道：「就算我哋想走，都無人會請。」
「總之，靠三個人無可能做到一份日報，我打算轉型，」總編樂觀地說：「我哋要做主題報，唔駛多，每日專攻一單新聞，發掘入面不為人知嘅故事。咁樣成本低啲之餘，仲可以吸引市場上被忽略嘅讀者。除咗撐得住開支，仲可以有機會畀你哋發揮。」
聽到有機會發揮，阿詹立即雙眼發光，未知是甚麼主題便已經答應，還拉着OK擅自替他應承。
「我就知你哋一定肯，所以嚟緊嘅主題都好貼合我哋報館嘅宗旨──乜都敢報。」總編搭着兩人的肩膀說：「我哋以後會用另一個角度去報新聞，會係一個好引人入勝嘅角度，去尋求事件嘅真相。」
「即係？」兩人興奮又好奇。
「靈異角度！」總編為自己的點子感到自豪。
阿詹和OK聽到後同時「擘大個口得個窿」，異口同聲道：「吓？」
總編沾沾自喜道：「係咪好掂先？報館以後就靠晒你哋喇，首席記者同首席攝影師。」說罷，他便離開了，留下阿詹和OK兩人。
事情發展至此，兩人才知自己挖了陷阱給自己，但既然已經泥足深陷，只能硬着頭皮去做。首席之名雖然動聽，但靈異之事，真的會說遇就遇到嗎？會害怕嗎？會安全嗎？
正所謂「馬死落地行」，自己誇下海口，自己便要承受後果。
「既然要做，就一定要做到最好最爆，唔理係報乜，都要做最賣紙嗰份報紙，逆襲令到全行都識我哋。」阿詹就像沒事發生一樣，逆來順受，依然活力十足。
OK則與阿詹相反，他心裏不想，但「被答應」了，只能硬着頭皮認真做，他冷靜地想：「點先會遇到靈異嘢？我從來未遇過，會無啦啦遇到？遇到時係咩feel？有咩新聞會有機會有？」
「『讀萬卷書不如食萬寶路』，諗唔到㗎喇，出去行吓揾靈感仲好。」阿詹背上斜孭袋整裝待發，OK見狀也背上背包一起出發。
兩人漫無目的地尋找，始終沒有甚麼頭緒，憋了一整天的OK終於開口道：「我覺得我哋咁行完全無用，做即日或者突發唔係我哋方向，應該係做之前大單、轟動嗰啲，多啲人記得。其實啲人當故仔睇，真假佢哋都唔會知唔會理，我哋是但影啲假相，故仔寫得煽情啲就得。」
阿詹聽到後停下腳步，轉身對OK說：「我哋做傳媒，唔理報啲乜，都一定要真，唔可以造假，呢個係我哋嘅底線，唔好因為而家報靈異主題無你知就拋棄咗，一定要對得住自己對得住人。」
OK滿意地對阿詹笑說：「好彩你無忘記初心，咁我就放心晒。有單新聞我諗起，好啱畀我哋打響頭炮。」
OK帶阿詹去到圖書館，翻開了一篇舊新聞，是關於香港仔隧道的一宗車禍。
「零七年五月十九號，香港仔隧道呢度發生咗一單車禍，雖然無人死，但就發生咗一啲怪事，而呢單怪事只會喺呢條隧道發生，因為全港只有佢先有一間粒子物理實驗室喺入面。我以前喺論壇睇過一篇嘢係講呢單車禍，係關於穿越，我諗都算靈異嘢啩。」OK解釋說。
阿詹聽得皺眉，OK再補充：「嗰時好轟動㗎，我日日追post，好多人分析過都話係真，可惜主流媒體都唔報，但我哋而家好啱報呢啲。」
阿詹摸着下巴，不確定地說：「靈異應該……唔係咁，應該係鬼鬼怪怪嗰啲，你呢單似科幻多啲喎……」
OK立即再翻開另一宗舊新聞，是一宗關於大廈升降機急墮，導致一人死亡的新聞，然後說：「關於lift急墮死人嘅case唔多，嗰時都好多人關注，話唔定背後係鬼作怪。」
「只但係得一個人死，唔吸引喎。」阿詹思考道：「應該要揾多啲人死嘅新聞，咁先多故仔。」
「咁不如屯公，大把車禍，大把傳聞，每年特定時間仲實會出事㖭。」OK再提議。
阿詹立即耍手擰頭：「人人都知，仲點會有人想睇？計我話，要揾啲無乜人講嘅，咁先引得起讀者興趣。」
「但有個問題，都幾道德，」OK突然拋出一個嚴肅的話題：「如果單嘢係國殤level，一提就勾起集體傷痛，想像到一出就會被天下圍攻話抽水，咁仲報唔報？」
阿詹低頭想了一會，肯定地答：「報！但要隔咗一段時間，等完成調查先報，咁樣大家會願意接受啲，我認為。」
「咁就掂，我哋就揀呢單，七一年十月，有間即將竣工嘅海上餐廳大火，死咗三十幾人。」OK邊尋找舊報紙邊說。
「掂喎！唔駛揾，就呢單！」阿詹興致勃勃地離開圖書館，往該餐廳出發。
