頭版係我哋嘅
在未有網媒前，紙媒曾經盛極一時。雖然紙媒報道的是過去的事，但依然足夠與報道每日即時新聞的電台和電視台分庭抗禮。當時，市面上的紙媒多如繁星，大大小小的報紙及雜誌均想在市場上分一杯羹，於是部份出紙量低的紙媒為求生存，又演變成只報特定主題的報章刊物。這些報館規模雖小，但想報道真相的熾熱之心和強大的執念與其他大規模的無異，這就是當時傳媒的風骨，亦是他們一直引以為傲、被視作第四權的原因。
「阿詹，我哋咁做得唔得㗎？會唔會被人拉㗎？」瘦得像枯枝的OK擔心地問。
充滿鬥志的雙眼燃燒着熊熊大火，阿詹堅定地對OK說：「OK喎OK，我哋係揭露真相、為社會公義發聲嘅傳媒，做緊嘅係好事，問心無愧，唔會有問題。」語畢豎起大姆指對着OK。
「話係咁話，但我哋始終係偷拍……」OK還是有點擔心。
「OK，你記唔記得我哋同老總撐到行嗰時講過咩？難得佢畀一星期我哋證明自己能力，我真係好想同你一齊做到成績，證明到我哋有料，再一齊轉去方向做。你都唔想好似啲老屎忽咁喺度養老就一世㗎！我哋啱啱入行，幾時坐得到老？」阿詹滿腔熱誠地鼓勵道。
OK面有難色地點頭，他心裏的天使與魔鬼還在開會，未有共識。阿詹沒有再游說，因為他知道OK骨子裏都想出人頭地，所以會跟自己一起去闖。
「記住，我哋今日嘅身份係清潔工，我哋只係嚟『清潔』。」阿詹最後提醒OK。
阿詹和OK今次的目標是一個教會，這個教會是有名的富人教會，教友非富則貴，而且遍佈全球，雖然人數不多，但全都是有財有勢，據說影響力足以影響半個地球。
「呢個就係我哋事業嘅起點。」阿詹握緊掃帚站在教會門前，在馬賽克玻璃窗裝飾之下，教會透射出一絲絲莊嚴感。工頭大力叩門，厚實的木門隨即發出深沉的「咚」聲作回應。
「吱……」門骹發出刺耳的聲，大門徐徐打開，開門的是一個少女。
工頭有禮地鞠躬說：「教主，今日有兩個新仔，如果佢哋有做得唔好嘅地方，即管開口。」
教主露出極具親和力的笑容說：「無事，你幫咗我哋教會咁耐，我信你，你哋慢慢。」語畢便轉身回到自己的辦公室。
阿詹對OK打了一個眼色便開始工作。兩人勤勤懇懇地清潔禮拜堂，發現這裏異常乾淨，沒有任何垃圾；之後他們再清潔告解室，也是光潔如新，鮮有使用痕跡；接着到洗手間，也只有女洗手間有少許垃圾。
地下清潔完後便到一樓，亦即是教主的辦公室所在之地，是阿詹和OK這次調查的重點，可是教主只容許工頭親自打掃，其餘的人一概不能接近。
「好怪，真係好怪。」阿詹輕聲問OK：「邊會有教堂咁乾淨，基本上一啲垃圾都無。一係啲教友真係好有質素，一係就根本無咩人嚟崇拜、上主日學，你點睇？」
OK拍一拍胸口道：「我都覺得有啲奇怪，但聽講啲教友都係有錢人，可能真係有素養啲呢！不過我都影低晒。」
「Good job！」阿詹給了OK一個讚好的姆指，然後提出另一個問題：「另一個問題，點入去？入面先有我哋想要嘅答案。」
OK把耳朵貼上門，但只聽到吸塵機的聲音。聽了一會後，他對阿詹說：「我哋詐傻扮懵，直接入去，我懷疑入面無人，不過一定要靜同快。」
阿詹一臉難以置信，明明傳來嘈吵的吸塵機聲音，怎可能沒有人？不過既然已經來了，總不可能空手而回，況且誤闖可能只是捱一頓罵而已，退一萬步來說，最差的情況也只是被解僱，但這也沒問題，反正這只是假的工作，本來也打算取材後便辭職。衡量過得失後，他倆最後決定硬闖。
阿詹緊握門把，額角冒出了一滴豆大的汗珠，一扭，門沒有上鎖。他吞了一大口口水，轉頭對OK說：「準備定影相。」OK示意「OK」，也吞了一大口口水。
阿詹輕輕推開門，裏面正如OK所說空無一人，他倆快步走到辦公桌前翻找文件，全都拍過一遍，又把房間各處也拍下，然後便離開。
「你唔會走得甩！」一把女聲從阿詹和OK背後大喊，嚇得他們站在原地不敢動彈，連忙解釋，為自己闖進辦公室而開脫。
「我哋清潔完地下上嚟清潔咋，乜都唔知㗎……」阿詹說。
「係呀係呀，我哋都係普通清潔，無做啲乜。」OK也附和。
「今次我哋證據確鑿，你唔駛旨意好似之前咁走得甩，我返唔到去都一樣夠證據鋤得入你！」女聲又開口道。
阿詹和OK意識到這說話未必是針對他們，於是數三聲齊齊轉身，果然身後空無一人。
「機會嚟喇OK，我哋今次執到寶，有大單嘢。」阿詹興奮地說，然後朝音源走去。
OK拉着阿詹，擔心地說：「好危險，我哋走喇，一陣牽連埋我哋就死，我哋走出去再報警。」
阿詹搖搖地，雙眼發光地道：「今次係我哋發圍嘅機會，係獨家猛料呀，你諗吓聽日頭條，『邪教大魔頭被捕 藍海會末日 最大跨國犯罪集團遭瓦解』，幾咁型，普立茲獎都有得我哋拎呀！」
「都啱嘅……啱啱入行做到記者，廿幾歲仔就拎普立茲，係型嘅。」OK被阿詹說服，但心底還是害怕，一步一驚心地跟在阿詹身後。
聲音是從一個豎立的巨大十字架下面傳來的，阿詹上下左右檢查十字架，就是找不到任何機關，正一籌莫展之時，OK推開他，雙手抱着十字架，輕鬆抱起了它。
「其實佢好輕，裝假狗，唔係實木。」OK搶先輕描淡寫地解釋，阿詹張口造了一個「噢」的口型後，便沿着樓梯小心翼翼地往下走。
「你以為你一個PC仔就可以拉到我？你唔係唔知政府高層有幾多我嘅人啩？」教主趾高氣揚地說。
「你錯喇，我唔係PC，我係ICAC。同你有關連嘅人我哋都已經掌握晒證據，估計而家已經全部請晒返去飲緊咖啡，你今次走唔甩，投降喇！」工頭，不，是偽裝工頭的ICAC女探員以勝利者的姿態說，但諷刺的是她正被綁在十字架上。
阿詹對OK使了一個眼色，這珍貴的鏡頭立即儲存到OK的針孔攝錄機內，同時阿詹亦用錄音筆錄下了她們之間的對話。
「捉晒？咁……咁即係我呢鋪玩完？」教主大驚，跪在地上驚慌地喊：「唔好呀！代代相傳到我呢代，唔可以無㗎！」
女探員命令道：「你快啲放咗我，跟我返去接受法律制裁。只要十點，我班手足都仲未見到我出去，就會成隊人衝入嚟，你點都走唔甩。而家跟我走都仲可以體體面面。」
「唔好呀……唔好呀……」教主大喊，然後哭了，哭着哭着又笑了，越笑越狂妄，站起來對女探員說：「你唔係真係以為我驚呀？政府做嘢都要睇我頭，你區區一隻螻蟻，我駛驚？唔好笑大我個口，我而家捽死你都仲得。」
OK見事情已經超出他們能控制的範圍，拉着阿詹打算離開然後報警。然而阿詹卻不認同：「你同我都知呢個藍海會係幾咁無法無天，所以先會以佢作為我哋揚名立萬嘅起點。你都知報警無用㗎，我哋而家難得可以親手揭發呢度嘅黑幕成為英雄，唔係縮呀？」
在兩人僵持不下的時候，樓梯傳來清脆的「噠、噠、噠……」教主立即轉頭盯着樓梯，嘴角翹起，陰森地道：「原來仲有老鼠。」
教主走到樓梯前，阿詹和OK已經離開了，只餘下數粒散落在地的佛珠。教主沒有再追，她回到女探員前，拿着一粒佛珠說：「睇嚟你啲人都唔想救你。」
女探員沒有回應，因為她知道佛珠的擁有人並非她的同事，而是其他人。若果她說出真相，那佛珠擁有人便有危險，為免牽連到無辜人士，她選擇沉默。
教主看到女探員沒有回應，更得意地說：「我都講咗，成個政府都唔敢郁我，所以你已經成為咗棄子，認命啦。」語畢，教主拿出匕首，朝女探員的心臟刺去，女探員始終沒哼一聲，堅強地死了，而在死前的一刻，她的心也沒有動搖過，始終堅信同袍會前來。
至於阿詹和OK，此刻的他們已經身處教會外，驚惶失措、上氣不接下氣，但危機還未解除，很快便有一個自稱警察的人上前問話：「你哋兩個喺度做乜？喺藍海會出嚟，係咪藍海會教徒？拎身份證出嚟。」
OK嚇得連忙否認，拿出針孔攝錄機打算舉報，但阿詹及時制止了他，並問：「你話你係警察啫，我點知係咪真，有無委任證睇吓？」
該警察向阿詹和OK展示了委任證，然後再追問：「你哋咁急走出嚟，入面係咪發生咗咩事？」
OK想開口回答時，阿詹又制止了他，再問：「阿劉Sir，我點知你係咪藍海會啲人，我唔會中計。」
「你哋入去做清潔㗎嘛，係咪？個工頭係女人嚟，係我老婆，我哋條線放咗好耐，目的就係捉藍海會個教主，咁你話我會唔會係藍海會嘅人？」劉Sir氣急敗壞地解釋。
「哎呀，你唔好阻住，我哋本身潛入去係想揾藍海會啲官商勾結、販賣土地嘅罪證，」OK推開阿詹，交出針孔攝錄機並說：「點知影到仲爆嘅嘢，個Madam有危險，呢啲係證據，你哋快啲入去救佢。」
劉Sir一聽極為緊張，接過針孔攝錄機後立即帶隊衝進教會，然而卻找不到女探員，只有教主獨自坐在辦公室處理文件，教主看到劉Sir還裝作大吃一驚，問發生了甚麼事。
「你唔好扮嘢，你收埋咗藹文喺邊度？」劉Sir怒吼。
教主一臉迷茫，反問：「咩藹文？我呢度得經文。」
劉Sir一聽怒火中燒，單手揪住教主的衣領，同時拳頭已經拉弓準備好，幸好旁邊的警員及時拉住他，否則便一拳打在教主的臉上。
教主整理好衣服後，得戚地說：「阿Sir，我一向警民合作，你想要咩文都好，有嘅我一定會畀你，但你話藹文，我就真係無。」
就在此時，一個黑影在馬賽克窗外墮下，墮地一刻還清楚聽到一聲悶響。劉Sir下意識認為黑影就是女探員，亦即是他的妻子藹文，他失心瘋般狂奔出去，跑到黑影墮下的地點，熟悉的臉映入眼瞼，眼淚忍不住也停不住。他望向教會屋頂，那個她掉下來的地方，竟有一個黑衣人詭異地笑着，手拿匕首朝他揮手，然後一下信仰之躍，正正跌在劉Sir旁邊，頭先着地，血漿腦漿橫飛，濺得他滿身都是。
劉Sir親睹這一幕整個人都瘋了，雙眼佈滿血絲，不斷捶打兇手屍體的心臟，美其名是施行急救做心外壓，但更真實的原因是發洩自己的怒氣、渲洩自己的悲痛。然而，劉Sir心裏比任何人都清楚，這只是教主慣常的手法，這人只不過是代罪羔羊罷了，但由於兇手身上的自白書，加上上頭的施壓，這宗謀殺案又會是另一單草草了事、真相被埋沒的案件。
相比起警察，傳媒的作用更加大。那段作為重要證據的偷拍片段，劉Sir在同日已經複製好後交還給OK，還叮囑：「單case我估都好大機會同之前嘅case一樣象徵式查吓就close file，所以要靠你哋幫手製造輿論，逼政府逼警隊認真去查，記住一定要報。入面嘅嘢我copy咗，唔該晒你哋。」
以身犯險獲得「猛料」的阿詹和OK，不必劉Sir多說也決定向總編爭取頭版，將經過完整報道出來，還雄心壯志要製作一個為期數日的專題，將過往涉及藍海會的案件重新報道一次，並列出當中的疑點，務求令市民關注這一系列的案件，引發討論並產生輿論，逼使政府認真對待，將藍海會教主繩之於法。
「好！夠爆！今次最少都要出五十萬，唔係，應該八十萬紙先夠。我都話一向睇好你兩個，之前唔係我激起你哋鬥志，邊有咁嘅猛料？頭版一於交畀你哋，專題報道都交畀你哋，今個星期嘅頭版都係你哋！」總編爽快地答應，順利得令阿詹和OK懷疑是不是在作夢。
「雖然好快，但都係我哋爭取返嚟先有，我諗我哋破咗新聞界最快有頭版紀錄。」阿詹手臂輕輕撞了一下OK，興奮地道。
「係，第一份頭版，一定要裱起佢。」OK亦都滿心期待、雙眼發光。
兩人全日埋頭苦幹，原稿改完又改，終於在傍晚將稿件呈上去校對及排版。
「你哋返屋企唞吓先，今日都攰。」總編體諒地說。
兩人聽話下班，並相約明早於附近報攤買人生首次頭版報道的報紙。
