第二條片
五百多萬的觀看數，四百多萬的轉發，三百多萬的讚好，防空洞的影片瞬間令到全城人再次「電視汁撈飯」，狂熱的程度令各大傳媒也要轉發及做專題報導。而其中最大的爭議莫過於軍隊介入調查，此舉若非本地政府主動要求，便會有破壞一國兩制的嫌疑。
而此片的出現，更直接影響到了劉sir一伙。
「處長話嘅精英竟然係軍隊？佢個腦係咪裝草？」劉sir對阿頂發火道：「咁咪即係直接同市民大眾講警隊無用，咁我哋以後仲點執法？」
「冷靜啲，可能一哥都係被上面焗呢，我相信佢點都唔會主動請軍隊幫手嘅，佢咁要面。」阿頂試圖為處長開脫，但顯然劉sir不吃這一套。
阿頂的房間外，阿查一眾人亦在討論這條新的影片。
言談間，鐘仔提出了一個假設：「假如班軍隊真係介入去查呢單case，咁之前我哋警署被人搗亂、我唔見咗隻手指，好有可能就係佢哋做。」
「吓？」一旁的阿查聽得一頭霧水。
老大一聽便恍然大悟：「所以佢哋可以自出自入。」
飛機也說：「所以cctv條片無咗。」
四眼又道：「所以偷你隻手指。」
田雞亦參一腳：「所以我哋冤枉好人。」
阿查不明所以地問：「你哋講乜？點解我一句都聽唔明嘅？我哋局被人搗亂？鐘仔隻手指唔見咗？點解唔同我講？」
「係我嘅決定。」劉sir不知何時已經站在他們身後，他說：「阿頂已經承認咗係軍隊嘅人摷亂我哋嘅嘢。」
「咁係處長揾佢哋幫手，定佢哋主動插手？」鐘仔單刀直入地問。
阿查發揮他的推理能力，快速消化剛剛接收的資訊，分析道：「我認為係佢哋不請自來，如果唔係都唔駛嚟摷嘢揾料，同埋唔駛扮警察封山搜查。」
「點都好，國家插得手，即係佢哋都重視，我哋更加要快啲破案，今次係last chance。」劉sir不希望大家的情緒再發酵，當機立斷作出總結，並借此為契機激勵眾人。
「呢兩條片都幾百萬views，兇手都應該睇咗，今次一定要捉到佢，唔可以再畀佢走甩。」阿查鬥志旺盛。
鐘仔亦拿出地圖，標注了數處地方，然後逐一解釋：「圈住嘅係藍海會所在，附近打咗交叉嘅係有可能行兇嘅地點。不過留意返附近係有座山，兇手有可能好似上次咁逃上山然後消失，今次我哋要重點睇實，務求喺現場就拘捕佢。」
「咪住！」阿查突然想起一直忽略的一點：「頭幾單案，我哋調查完都認為第一案發現場唔係後巷，咁我哋喺後巷埋伏，迎接嘅除咗兇手，都只係得條屍，無意思㗎喎。」
「不過最近兩次案發現場的確就係後巷，唔通係模仿犯？」鐘仔疑惑了。
作為老差骨的劉sir見狀，一錘定音道：「係唔係模仿犯捉到就知，今次我哋廿四小時睇實，唔好驚動教會，都唔駛扮鬼扮馬，直接喺車度監視。」
「我有個建議。」阿查舉手道，最終這個建議獲得了全組人一致同意。
+x+x+x+x+x+x+x+x+x+x
第二段影片的出現，除了劉sir有反應外，處長也感到驚訝。驚訝的是竟然有傳媒能進到被封鎖的山拍攝，還直接與軍隊扛上，居然還可以平安無事全身而退，並順利將影片發布。
「呢個channel都幾夠膽，而家無人敢報呢啲事實，真係令人懷念以前，可惜佢哋好快就唔可以再喺度立足。」處長感到頭痛道：「呢條片一出，之前打算用嚟冚住教會嘅富豪死訊就變咗無用，好惡！」
「咁又唔係呀處長，都仲有好多敢講真話嘅傳媒㗎。」副處長笑呵呵地說，完美誤解了處長的反話。
「無你咁好氣。」處長立即轉換話題道：「你幫我睇住班軍隊有咩動靜，隨時同我匯報，我要搶先佢哋一步行動，唔可以畀佢哋領晒功。」
副處長一面疑惑望向處長，處長不耐煩地說：「咩呀？我唔可以親自出馬咩而家？你快啲去，有無得升睇呢鋪。」
副處長離開後，處長反覆觀看那段防空洞的影片，單單是他自己一個都已經貢獻了三十多次的觀看數。憑藉當差數十年的經驗和直覺，影片中所有的訊息他都已經完整掌握。
「消失嘅兇手就係經呢度走，條梯下面嘅草係好好嘅證據，好彩個記者影得夠仔細。」處長擬定了捉拿計劃，胸有成竹地說：「只要逼到兇手上山，理得佢係人定怪物，都走唔出我嘅手指罅。」接着，他撥了一通電話，接聽的是一把熟悉的聲音。
+x+x+x+x+x+x+x+x+x+x
Fact Check方面，三人已經取得了共識，認為此次抱怒舜一定會出現，決定全天候二十四小時輪流守在藍海會門前等待抱怒舜出現，作出頻度第一次的直播。
「就咁安排，首先我先，之後到OK，最後到Faith，八個鐘一更，咁安排有無問題？」詹爺問。
Faith聽罷也發表意見：「根據之前嘅case，抱怒只會喺凌晨出現，我覺得我哋只要喺凌晨捕就得，即係十二點到六點左右，大家可以精神啲，一定跑到好新聞。」
「有道理。」OK哥立即附和。
「好，就咁話，今晚我先，之後到OK，最後到Faith，就咁loop。」詹爺最後總結道。
於是，詹爺便身先士卒，率先守夜。
+x+x+x+x+x+x+x+x+x+x
「報告！發現疑似目標。」軍人說。
司令看了一眼螢光幕，以標誌性的捲舌北京腔責問：「這是啥？你眼睛瞎了嗎？這只是普通禽獸！」
軍人連忙道歉，然後再聚精會神盯着螢光幕。
之前軍隊在封鎖的山上安裝了上千個動態捕捉攝影機，無死角、無盲點，整座山的裏裏外外沒有一處遺漏，為的就是想找到抱怒舜並生擒牠，軍人們現在看的正正就是這些鏡頭的實時畫面。
「那該死的畜牲到底躲哪兒去了？難道不是這座山？」司令心急如焚，但在過千個鏡頭，二十四小時無間斷運作之下，依然看不到抱怒舜的影蹤。
「報告！」另一軍人立正說：「六十七號攝影機畫面中斷。」
「報告！一百五十一號攝影機畫面中斷。」又一位軍人說。
「報告！」、「報告！」、「報告！」……一下子，數十個攝影機的畫面連續中斷，分布毫無規律，唯一的共通點是只錄到沙沙的樹葉聲，沒有攝影機拍到事發經過。
「怎麼可能？無一個攝錄機拍到發生啥事？」司令既忿怒又難以置信，立即下令：「快去調查和修復！」
+x+x+x+x+x+x+x+x+x+x
當夜，藍海會外，有兩輛車在附近停泊，一輛是詹爺，另一輛是劉sir。兩人的車雖相隔十數米，但依然一眼便能認出對方，雙雙下車走向對方。
「咁多年，別來無恙呀嘛？」詹爺先問。
「托賴，未死得。」劉sir答：「原來個channel係你嘅，點解我會諗唔到。」
詹爺笑了一下，從口袋掏出香煙遞給劉sir，劉sir揮手拒絕，詹爺也識趣地把香煙放回口袋，然後道：「估唔到又係藍海會將我哋拉埋一齊，收到你份禮物嘅時候我應該要估到。」
「當年明知佢有罪都煮佢唔死，估唔到而家要調轉頭保護返佢，世界真係諷刺。」劉sir淡然地說。
「又或者係個天畀機會你報仇呢。」詹爺輕鬆地說。
「老詹，老實講，你係咪嚟殺人？」劉sir突然話鋒一轉，嚴肅地問。
詹爺眼神也變得凌厲，不客氣地反擊：「劉sir，乜唔係你先嚟殺人咩？」
「睇嚟當年單嘢對我哋嘅影響真係好深遠，到今時今日我哋都仲有殺人嘅動機。」劉sir半認真半開玩笑說。
「今次有咩部署，打算點挽回顏面？你哋而家嘅對手唔只自己人PTU，仲有國家軍隊，無計仔你唔會行動。」詹爺嘗試在劉sir身上套取資訊，盡記者的本份。
劉sir與詹爺交手多年，已經知道並體會過他的厲害，唯有一個答案才能全身而退：「無可奉告。」
詹爺轉身離開，拋下最後一句話：「咁多年都係無變。咁就好似當年咁，你做你，我做我，互不相干。」
+x+x+x+x+x+x+x+x+x+x
在莊嚴的教會內，鋪了雪白雲石的禮拜堂中，教主正透過網絡跟教徒傳「福音」。
「今次曝晒光，教主你有咩對策？一陣燒埋我哋嗰疊你點負責？」其中一位教友憤怒地問。
「以我今時今日嘅社會地位，一出事世界會冧，你快啲同我搞掂佢。」另一位教友也毫不客氣。
「崇拜」在世界各地教友不斷炮轟之下總算完結，然而被噴得一臉屁、吃了無數死貓的教主則對這些不懂感恩、只會怪責的教友討厭的嘴臉感到無比厭煩。
「成班着數攞到盡，出事就拍拍蘿柚走，無事之後又若無其事出現返嘅垃圾，佢哋一定會落地獄！」教主咒罵道。
Eve奉上一杯剛沖泡好的咖啡，對教主說：「教主，我相信你一定可以解決眼前難關，呢啲都係主畀我哋嘅考驗。」
教主喝了一口咖啡，將剛才主持「崇拜」的疲累一掃而空，然後走到窗邊，從馬賽克窗中望向馬路，厭惡地說：「都係呢兩隻跟尾狗做嘅好事，隔咗咁多年都仲要揾我麻煩，今次唔會再心軟放虎歸山。」
冰雪聰明的Eve立刻獻計：「一係我假扮教主引開佢哋，等教主可以去做正經嘢？」
「唔駛咁急住，而家係心理戰，等佢哋等多兩日先，佢哋心急先有機會做錯嘢，我哋先有把柄揸手。再講，我要出去嘅話，仲有條秘道可以行，根本唔駛你冒險，而且啲正經嘢上網都做到，唔一定要親身去。」教主冷靜地分析：「而家要防嘅根本唔係佢哋，而係佢哋想利用我引出嚟嘅連環殺人狂。某程度上嚟講，佢哋仲要保護返我轉頭㖭。」
教主口中所說的秘道，是一條直達附近現在極少行人的隧道、在任何官方文件上都不存在的通道，是教會第一代持有人為了預防異教徒的逼害而偷偷開鑿的地下隧道，這是只有藍海會教主知道、作為代代相傳的秘密而承傳下來的。
