棋差一着
「風箏組未見到人，over。」飛機及老大在阿查對面的大廈走廊把風。
「放狗組都未發現可疑人物，over。」四眼和田雞在附近公園裝成喝酒聊天的居民。
「阿查，仲有五分鐘，定啲嚟，兇手今次實走唔甩。」鐘仔在附近的車上盯着。
劉sir也在車上，他鼓勵阿查道：「今次我哋咁多人，佢唔會再好似上次咁走得甩。」
阿查深呼吸，步出電梯大堂，在大廈外獨自等候，腦內模擬了千百種情況的應對方法。
五十七分、五十八分、五十九分，時間逐漸逼近，但凌晨的街上仍然空無一人。
「成五十九分啦喂，仲未見人喎，會唔會放飛機㗎？」飛機問。
「等多陣，可能塞車呢。」田雞答。
「一點正喇，鬼影都無隻。」四眼說。
「耐心等多幾分鐘，邊有話一定準時㗎。」老大繼續金睛火眼盯着街角。
零一分、零二分、零三分……兇始終未現身。
「阿查，你會唔會聽錯，其實係講聽日晏晝一點？」鐘仔也抱有懷疑。
正當阿查想回答的時候，大廈有一位男子鬼祟地四處張望，然後走近阿查。
「大家ready。」劉sir輕聲地說。
男子從口袋拿出了甚麼遞到阿查面前，但由於光線不足及阿查遮擋了視線，無人知道是甚麼，只知道阿查想都沒想便跟他走了。
「Action！」鐘仔一聲令下，四眼和田雞從公園撲出，飛機和老大也從大廈下來支援，劉sir和鐘仔亦都趕到形成六人包圍網。
「警察，咪郁！放低你手上嘅嘢慢慢舉高雙手，我要見到你雙手！」鐘仔大叫，那男子嚇得跌坐在地，褲襠濕了一片。
「冷靜啲，佢係我新鄰居，啱啱同老婆嘈完落嚟想唞啖氣咋。」阿查解釋：「不過我無火，所以先教佢點去附近便利店。」
「真係？」劉sir警剔地問。
阿查吞一吞口水，鎮定地答：「梗係。」
同時，為免劉sir再糾纏下去，阿查抓緊了鐘仔數次查看智能手錶的機會，故意問：「你真係唔聽吓個電話？揾咗你幾次啦喎。」
「On緊duty點聽電話？」鐘仔嚴肅地答。
「但你屋企揾得你咁急，應該係好重要嘅事。」阿查再度游說，劉sir也加入勸說，鐘仔只好就範接聽，而阿查亦鬆了一口氣，對男子打了一個眼色。
這通電話只維持了十數秒，鐘仔沒有說話，但他的表情變化卻極度豐富──煩厭、質疑、憤怒。一通電話，心情就像坐上了火箭，在場的人都不敢惹他。
可是鐘仔十分專業，迅速整理好情緒，繼續工作。
「你去處理咗先，今日我哋收隊，而家都過咗成十分鐘，佢唔會出現。」劉sir看得出鐘仔強裝堅強，故讓他先行離去。
「No，sir！Sorry，sir！」鐘仔拒絕，並說出隱藏很久、這次行動的秘密。
+x+x+x+x+x+x+x+x+x+x
另一邊廂，在城中一個佔地五千呎的豪宅內，馬姐們因為老爺失了蹤而亂作一團。她們全屋上下地墊式搜查，但始終找不到老爺的身影，慌亂的舉動驚動了管家，管家最後決定先跟少爺聯絡，然後再決定下一步行動。
「少爺，你終於聽電話喇。」管家冷靜地說：「你聽我講，老爺唔見咗。我知你哋關係唔好，但佢始終係你爸爸，而且呢幾年你咁對佢佢都毫無怨言，咩都還晒。我覺得佢嘅失蹤同你而家做緊嘅嘢有關，唔理你會點做，我都會報警。」
管家說完便掛線，然後撥通了九九九。
+x+x+x+x+x+x+x+x+x+x
凌晨一點的大街，出現了兩個身影，一個瘦削，一個嬌小。
「計劃成功。」嬌小的身影冷酷地說：「鍾生果然錫個仔，你準時出得嚟，即係已經做好心理準備要還，跟我過嚟。」
語畢，嬌小的身影便消失在轉角，鍾先生拖着年邁的身軀急步趕上，以免跟丟。
「欸！等埋我，」鍾先生老態龍鍾地說：「我無你咁靈活，行唔到咁快。」
兩人最終停在不遠的後巷，鍾先生氣喘如牛地問：「你究竟有我個仔咩把柄？你想點？」
嬌小的身影遞上一樽檸檬茶說：「鍾生，索晒氣咁好攰喎，飲啖嘢唞順條氣再慢慢傾。」
鍾先生接過飲料，沒有立即喝，反而厲聲問：「唔駛扮好人，講，你想對我個仔點？」
「鍾生，我請你飲你都唔飲咁唔畀面？仲要咁惡鬧人，唔怪得之你個仔要咁對你。」嬌小的身影裝作委屈道：「而且我無話過有你個仔嘅把柄，我淨係話有啲關於佢嘅秘密，講咗出嚟可以毀佢一生啫，你咁屈我點得㗎？定其實你唔想傾，由得佢身敗名裂？」
「唔好唔好，冷靜啲，萬事有商量。」鍾先生秒速變臉，搖尾乞憐問：「你係咪想要錢？想要幾多？我畀，你唔好搞我個仔。」
「呢個世界唔係下下講錢！就係你呢啲滿身銅臭嘅人，以為有錢大晒，乜都用錢解決，先搞到班唯利是圖嘅大人收聲同幫你美化修飾你嘅罪行！你要記住，我同嗰班人唔同，我係呢個地球嘅朋友！」嬌小的身影因為鍾先生的言論而忿怒起來，大聲怒吼。
此時，附近大廈上出現了另一個嬌小的身影，正悄悄地接近兩人。
「就係你不斷破壞生態，用瀕臨絕種嘅動植物去入藥做美容原料，下一代只可以睇紀錄片先知道世界上存在過呢啲無價嘅動植物，你實在罪無可恕！」嬌小的身影厲聲叱責：「你個仔只係誘餌，你先係我嘅目標！法律唔制裁你唔緊要，我制裁你！」
然而，奇怪的是，嬌小的身影說完這句後，動作便定住了，下一秒更轉身拔腿就跑，鍾先生看到後也不明所以，但想追亦力不從心，不過最少確認了自己的兒子安全。放下警戒心、緊張感亦得以紓緩，取而代之的是喉嚨的乾涸感，他打開飲料大口喝下，酸酸的味道令他越喝越多。
或許是太放心的緣故，鍾先生完全察覺不到背後有另一個嬌小的身影正無聲無息地接近他。
「啪！」鍾先生手中的飲料被打翻，把他的心也嚇得差點停頓，在微弱燈光的照射下，他赫然發現原兇是一隻綠色的手，無錯，正是抱怒舜！
鍾先生嚇得大叫並跌坐在地上，抱怒舜乘勢撲在他身上，血盆大口立即向他襲去。一吸一吮、一吸一吮，獸性大發的牠每一下都仿佛想把鍾先生的內臟從口裏吸出來一樣，還滋味得發出咿咿哦哦、嘰嘰咕咕的叫聲。
「原來……阿仔……」鍾先生盡最大努力，吐出最後一口氣，但連一句完整句子也說不出來。
「天有眼，抵死。」嬌小的身影在遠處一直看着，待親眼看見鍾先生沒反應才離開。
至於抱怒舜，牠這套吸吮動作不知重複了多少次，未有放慢，絲毫沒有倦意，直到一聲尖叫劃破長空，牠才又一次在夜幕之中退場。
+x+x+x+x+x+x+x+x+x+x
「蓮姐，係你發現阿爸嘅？」在警察的封鎖線內，鐘仔問發現屍體的馬姐。
蓮姐點點頭，心有餘悸地說：「我見到兇手，一定係抱怒舜，佢吸緊老爺啲內臟，好恐怖……」
「得，蓮姐，你休息陣先，一陣返警署落份詳細口供。」鐘仔安撫道。
「鐘仔，過嚟傾兩句。」劉sir呼喚。
「Sorry，sir！」鐘仔走到劉sir身旁立即道歉：「我個計劃衰咗，被個兇手擺咗一道。」
「鐘仔！」劉sir厲聲喝止了鐘仔，發自真心地對他訓示：「鍾生係你阿爸嚟㗎，而家佢死咗你叫我哋成班手足點面對你？」
鐘仔先是愣住，然後笑笑口說：「無嘢喎，佢都嗰頭近，本身都死有餘辜，而家咁死仲好，叫做有返啲貢獻，幫佢積返啲陰德。」
「就算普通人三唔識七都好，都唔會講呢啲風涼話，何況嗰個係你老竇？我相信佢肯冒生命危險去配合警方，都係因為你係佢個寶貝仔咋！」劉sir被鐘仔的說話惹得怒火中燒。
「清官難審家庭事，劉sir，呢啲係我家事，請你唔好插手。」鐘仔收起笑容，冷漠地說，然後便轉身離開。
「鐘仔知點做㗎喇，只係佢傷心我哋見唔到啫。」阿查在旁調和氣氛並報告：「另外附近揾唔到可疑人物，現場淨係有枝檸茶，都帶咗返去化驗。同埋今次現場唔見有腐蝕過嘅痕跡。」
一向不支持怪物說的劉sir也終於開始動搖：「死者個肚好似洩氣汽球咁，同之前嗰啲一樣，估計都係無晒內臟。而且今次目擊證人咁清楚睇到係抱怒舜做，唔通呢一連串case真係怪物所為？」
阿查報告完後便去找鐘仔，因為有些說話他必需要跟鐘仔說清楚。
「嗰個電話……其實我有啲嘢無講晒，因為嗰時我唔知點解佢會咁講，但而家終於清楚晒。」阿查本着被鐘仔毆打的覺悟，愧疚地說：「個電話話有你嘅秘密，可以令你身敗名裂，所以你阿爸先會出去見個兇手。」
鐘仔沒有像阿查預期般激動，平靜得有點令人吃驚，他說：「係咁喳？以為有啲咩。」
面對這異常的冷靜，要不就是極度悲痛而反常，要不就是真的沒有事，但鑑於剛剛劉sir的經驗，大概真的是覺得沒事吧。但有一個更重要的問題，為何致電到公司，但身在家的鍾先生會知道通話內容呢？而又為何兇手會知道鍾先生真正地址呢？
「答案只得一個，兇手已經知我係假扮，而且背後有一個好強大嘅情報網support。」阿查內心已經有了總結。
這一夜，警察們查看了附近所有的閉路電視，只有鍾先生豪宅外的閉路電視拍到他和一個嬌小的身影會面及離開，其餘的閉路電視皆捕捉不到兩人的身影。而根據蓮姐的描述，片段中的身影的確符合她目擊的兇手外形。種種證據顯示，兇手的而且確就是抱怒舜。
「劉sir，今次雖然佢咁就死咗，但好在現場無記者，成單嘢根本無外人知，佢平時又咁低調，我覺得可以對外講我哋成功保護到佢。一嚟可以建立返警隊威信，二嚟可以逼兇手放風話佢已經被殺。之後我哋只要揾到源頭，就捉到兇手。」鐘仔在現場繞了一圈後立即有新對策。
「鐘仔，站喺破案角度，你呢個提議好似唔錯；但站喺道德立場，咁樣唔係咁好。」劉sir猶疑了。
鐘仔此時笑說：「道德角度，作為受害家屬嘅我都完全唔介意；破案角度，呢個係難得機會。劉sir，我哋時間剩低唔多，又有一哥班精英做對手，而家唔兵行險着點得？」
的確，非常時期用非常手段，要成功破案，古時有屈打成招，近代有插贓嫁禍，而現在已經很文明，法律已經十分完善，全部有法可依，不必再以身犯險，只要是為了國家安全和顏面，再離譜的方法也情有可原。
「好，既然家屬都希望我哋盡快捉拿真兇，咁就遵循家屬意見，借鍾生嚟用多一次。」劉sir半推半就地說，但其實他心底也很想盡快破案，留多點時間陪伴稀愛。
「等陣，」對於劉sir的決定，阿查作為警務人員定必要遵從，但在這團隊卻另作別論：「呢個方法我覺得行唔通，我哋嘅一舉一動兇手都應該瞭如指掌，做任何小動作都係徒勞無功，堂堂正正咁同佢交手先係最好嘅辦法。」
「你話兇手知？無可能！呢個行動得我哋幾個知，除非真係有內鬼。」劉sir對阿查的說話持有懷疑。
「真係？即係劉sir你都有咁諗過？」阿查對劉sir的話即時有反應，然後再闡述自己的想法：「本身我都懷疑過有內鬼，甚至有懷疑嘅對象，但今日之後，我已經排除咗呢個可能。鐘仔用阿爸嚟較非，劉sir又鬧得鐘仔咁甘，我哋team根本無人會係內鬼。排除法之下，只得返一個可能，就係兇手背後有一個強大嘅boss，而佢嘅情報網係我哋想像唔到咁強大。」
「點解你會咁覺得？」鐘仔搭話。
阿查說出自己的推理：「你哋諗吓，點解鍾生會被兇手殺？即係兇手知我係假又知佢住邊，撇除自己人，仲有咩人會知？我真係諗唔到，只有背後有強大情報網先做到。」
「咁你覺得點做先好？」劉sir問。
「預測。」阿查只說了兩個字。
