最黑的夜
警隊和Fact Check已經守在藍海會外兩天，但依然未有收穫，甚至連教主的臉也未目睹過。劉sir、鐘仔、詹爺及OK哥均失望而回，到第三晚值班的是阿查和Faith。
「阿sir，乜咁啱，」Faith主動跟阿查打招呼：「睇嚟我哋都幾有緣。」
阿查認得眼前這個記者就是幫他發佈藍海會影片的人，出於禮貌，同時亦開玩笑道：「咁啱係你，睇嚟今晚會有事發生，我要打醒十二分精神先得。」
+x+x+x+x+x+x+x+x+x+x
「Everybody，今晚就係約定嘅日子，準備好消滅你哋身邊唔環保嘅人，拯救地球未？」在反社會人格論壇內，開了一個新的鎖定帖子。
能查看及回覆這個帖子的人只得十位，這十人都是被發帖人挑選出來，有資格拿到溶液的反社會人格人士。
「今晚兩點，準時行動。」發帖人回覆帖子的半小時後，帖子便被刪除，沒有留下任何痕跡。
而這一夜，後世稱為「最黑的夜」。
+x+x+x+x+x+x+x+x+x+x
「M市發現屍體，同連環殺人案死狀相似。」、「T市發現屍體，請附近伙記去調查。」、「C市發現屍體，附近有無伙記？」
凌晨二時開始，報案中心陸續接獲市民報案，全城各處都發現屍體，而初步調查結果都是內臟被掏空。由於死狀與連環凶殺案相似，處長遵守承諾，全都交由劉sir跟進，使得全組人都疲於奔命，在全城九處地方的後巷都有他們的身影，徹底打亂了他們本身的部署。
「阿查，藍海會現場交畀你in charge，今晚我哋無人過到去支援。」劉sir急促的喘氣聲已經說明了一切。
「等等，劉sir，呢九單案好明顯係模仿犯做，隨時係真正兇手嘅計仔。我認為唔好亂，繼續留守會好啲，真正嘅兇手今晚一定會嚟殺教主。」阿查在電話中急忙勸告劉sir。
「模仿犯又好，真兇都好，犯法嘅人就要受法律制裁，我哋就要去捉。」劉sir話語中滿是氣魄，感染了電話另一頭的阿查。
與此同時，Faith亦收到詹爺的電話。
「Faith，我覺得今晚有事要發生。出面同時發生咗九單同類型凶殺案，我認為只係幌子，你嗰面先係重頭戲。出面嘅交畀我同OK，藍海會就交畀你。」詹爺在電話叮囑道：「呢單係我哋嘅獨家，一定要開live！」
分別收到上級指示的兩人，不約而同地走到藍海會門前，赫然聽到裏面傳來不尋常的騷動聲，由於已經重門深鎖加上防偷窺的馬賽克玻璃窗，外人無從得知裏面的情況，只能聽聲判斷。
阿查二話不說，立即叩門大叫：「警察，快啲開門！」
可是，裏面的騷動非但未有停止，反而變本加厲，越叫越淒厲。阿查認為事態嚴重，顧不上規矩，一定要進內救人捉兇手。
「等等我，我而家撞門，你哋行開！」阿查後退一段距離作助跑，卯足了勁以肩膀撞過去。
「咚！」厚實的實木大門紋絲未動，只發出深沉的哼聲回應阿查的撞擊。
「再嚟一次。」阿查再接再厲，屢戰屢敗，屢敗屢戰，但木門始終不肯讓步。
另一方面，Faith眼見阿查未能破門而入，迅速決定另尋他法。他圍繞教會走了一圈，嘗試尋找另一個入口。可是，整座教會除了正門，其餘三面全是牆壁，根本沒有其他出入口。
「你哋等等，我砸爛玻璃入嚟。」阿查撞門不果，便嘗試其他方法，Faith見狀立即阻止。
「阿sir，冷靜啲先，衝動係魔鬼。」Faith拉着阿查道：「你諗吓，教會出入口得一個，我哋成晚望實，根本就無人出入過，點解入面會有騷動？」
阿查定住了，為何一向冷靜的他這次會這麼衝動？他用雙手大力拍自己臉頰，疼痛使他重新冷靜、恢復理智。
「唔好意思，你講得啱，係我太心急想捉到兇手而自亂陣腳，仲諗住搶劉sir個位，原來都唔易做。」阿查不忘自嘲，然後再仔細分析：「而家有三個可能性：一，烽火戲諸侯，玩我哋取樂，但呢個可能性好低，佢哋咁大生意，點會做呢啲無聊嘢？二，籠裏雞作反，不過呢個都無咩可能，根據兩日觀察，入面係得教主同佢跟班兩個人，但個跟班同教主感情好好，唔似會咁做。」
Faith放下正在直播的電話說：「咁即係得返第三個可能。」
「係，」阿查望向教會道：「第三個可能性：有秘道，咁嘅話真係唔知佢連咗去邊，之前特登留返一條後巷唔封做陷阱嘅策略徹底失敗。」
「睇戲啲秘道都係連住地鐵隧道，唔通喺附近地鐵站？」Faith看着地圖推理。
可是阿查很快便推翻這推理：「無可能，一個普通人點可能入到地鐵隧道？呢個地方一定係普通人都可以去到，但又平凡到無人察覺到佢存在。畢竟如果有咩奇怪字眼嘅話，實有好事之徒去探險。」
阿查四處張望，腦袋沒有停下思考：「啱啱你話地面無其他出口，即係只有地底呢個選項。喺地底而又唔係地鐵，而且普通人都去到嘅話就只有──」
「行人隧道！」兩人異口同聲地說，然後很快便鎖定一條最近的行人隧道。
「唔睇地圖真係唔知呢度有條隧道。」阿查在隧道入口說。
「我估呢度都無乜人行，連清潔工都少，你睇吓張海報，十幾年前嘅。」Faith上氣不接下氣地道。
這條行人隧道雖未荒廢，但人跡罕至，照明的燈壞了近半，尚餘的也因為燈罩積塵太多及發黃而顯得格外昏暗。除此之外，隧道衛生也很差，垃圾隨處可見，老鼠和蟑螂更是多不勝數，根本不會有人願意和夠膽走這條隧道過馬路。
阿查和Faith──一個為了緝兇，一個為了獨家新聞──不顧這些外在因素，大無畏地進入隧道。他們拿出電話照明，Faith邊走邊說：「秘道入口喺度的話，真係無人會知。」阿查沒有搭理他，只顧全神貫注地尋找秘道入口和兇手。
前進十餘米後，地上出現了一堆磚塊，而這堆磚塊本身待着的牆身開了一個足足半個人高的洞，洞內的通道經過細心打磨，不像天然洞穴般粗糙。
「Bingo！秘道就喺度。」阿查暗爽了一下，但很快便回復平靜地對Faith說：「兇手同教主應該唔會再喺入面，但個跟班就難講，你入去睇吓，我去追佢哋。」
「唔得！」Faith斷然拒絕：「我要去追個兇手，全城幾百萬個市民都等睇兇手真面目，入面嘅傷者，你call上台揾人救啦！」語畢，他便一溜煙向前跑走。
「我係為你好，廢事你危險。」阿查從後追趕道。
兩人一直跑，跑出了隧道，可迎接他們的並不是兇手，而是一條杳無人煙的荒廢舊村，是那種陰森可怖，樹影像鬼影的廢村。
阿查一看便心知不妙，立即跟Faith說：「唔係呢度，呢度無後巷，我哋中咗計，兇手一直都喺教會入面，而家佢應該大搖大擺咁行正門走咗……」
「咁快啲返轉頭。」Faith轉身又跑入隧道，阿查再次在他身後跑。
+x+x+x+x+x+x+x+x+x+x
「一切都依照我預測進行，無人可以阻到我拯救世界，呢班垃圾警察都唔例外。」兇手拖着奄奄一息的教主由正門施施然走到事先為她準備好的墓地，並狂妄地說：「人形垃圾最啱喺污糟邋遢嘅後巷，好好享受人生最後嘅痛苦喇！」說罷，兇手補上一腳，滿口鮮血的教主摀着肚倒在地上，意識逐漸模糊，全身抽搐，混濁的鮮血不斷從口中湧出來。
就在兇手心滿意足地欣賞自己的傑作之時，後巷的另一面出現了一個瘦小的身影。
「又係你阻住晒想搶我嘅功勞！」兇手憤怒地說，但對方沒有回答，只發出「嗚嗚」的聲音。
瘦小的身影由兩腳蹣跚行走，到雙手支撐，像猩猩一樣蹦跳，最後直接四腳奔跑，全速朝兇手跑去。在昏暗的燈光下，綠色的身影若隱若現，只有血紅色的口始終清晰可見。
「今次我為你特製咗一枝，慢慢歎喇！抱！怒！舜！」兇手興奮地等待抱怒舜撲上來的一刻。
眼見兩個瘦小的身影正要撞上，電光火石間，抱怒舜停在了教主身上，牠嘴對嘴用力吸吮，完全無視兇手的存在，只專注於眼前的美食。
「吼！」兇手對於被無視感到莫名生氣，對着抱怒舜怒吼：「你呢隻怪物，憑乜無視我？憑乜搶我功勞？呢個世界上係唔會有怪物㗎！我要拆穿你！」
兇手撲上前打算與抱怒舜扭打，豈料專注於眼前美食的抱怒舜對於身邊的環境仍舊警剔，輕易地躲開了兇手的攻擊，繼而將目標由教主轉為兇手。
「嗚……」抱怒舜發出低沉的叫聲，就像野獸準備搏鬥前給對方的恫嚇，但兇手並未輕易嚇退。
「吼！」兇手也有樣學樣，對抱怒舜發出吼叫聲。
「砰」的一聲槍聲，打破了兩者的對峙，而向天開槍的正是阿查，他和Faith終於趕到現場。
「好彩最後呢條特別留低嘅後巷無嘥。」阿查舉槍指着兩者道：「警察，放低武器，舉高雙手，跪喺地。」
可是，阿查話音剛落，抱怒舜就乘着兇手一瞬間的分神，全力縱身一躍，打跌了兇手手上的針筒，同時劃傷了兇手的臉，兇手的兜帽也一併被打掉，在微弱燈光之下，露出了令阿查驚訝的臉。
可能是因為抱怒舜的舉動，又或者是因為這張臉，阿查自己一時間也未弄清楚原因，身體已經自動朝抱怒舜開了一槍，可是牠身手敏捷輕鬆躲開，然後再一次向山的方向逃竄。
「堅持咗咁耐，估唔到真兇真係隻怪物，今次果然都係向山跑，最衰大家唔喺度……」阿查不忿地自言自語後，對Faith下命令道：「你盡返個好市民責任，報警call救護車，喺度照顧佢兩個，教主仲有呼吸有得救㗎，我去追個兇手。」
未待Faith回話，阿查便轉身對那張令他驚訝的臉──稀愛說：「稀愛，多謝你見義勇為，不過之後危險，交畀警察去做就得，你喺度等劉sir嚟。」
交代完後，阿查便獨自追趕抱怒舜，留下不情願的Faith、連環殺人案真兇稀愛和等待死亡的教主三人在一起。
稀愛冷靜地站在一旁，冷眼看着教主的生命一點一滴地消逝；至於Faith，則在救與不救之間拉扯。
作為記者，根據專業操守守則，新聞攝影要以紀錄真實為首要任務，記者在新聞現場應據實拍攝，不得參與設計或導演新聞事件，作誇大和不實的報道。
「救人嘅話，係咪違反專業操守，變咗干預新聞事件？但救人係人性，無嘢比生命更重要，即使對方係十惡不赦，記者都無權定佢罪剝奪佢生存嘅權利。」Faith心裏天人交戰，救與不救的聲音各有道理，他無法下決定，而觀看直播的觀眾對於救或不救也各佔一半。
「點解呢個城市會無立好撒瑪利亞人法或者壞撒瑪利亞人法㗎，搞到我而家咁糾結……」Faith壓力大得將責任歸咎於法律制度，他找不到能替他下決定的理據。
眼見教主在地上痛苦呻吟，Faith決定豁出去：「唔理得咁多操唔操守，我係人唔係機械人，即使係普通人都會選擇救人，更何況我係有社會責任嘅記者？」
Faith撥通了電話，召了救護車，自己的良心好過了，但身後的稀愛的說話卻像箭一樣插在他的心上：「佢最多得返兩分鐘，就算白車嚟到都救唔返，唔好浪費納稅人嘅錢，直接叫黑箱車適合啲。」
「唔試過點知？」Faith不相信眼前這初中生的說話。
「你喜歡。」稀愛別過臉，沒有再說甚麼。
此時，教主緩慢地伸手抓住Faith的褲管，口一張一合，Faith意會到她有說話想說，便湊近她。
「兇手……」教主勉強吐出兩個字，接着又吐出一口血，最終被血嗆到，窒息斷氣了，而她臨終前雙眼始終死死地盯着稀愛，可是這一細節Faith卻留意不到。至於稀愛，既能親手手刃殺母仇人、親眼見證着她死亡，又能拯救地球，一箭雙雕，滿意得忍不住嘴角上揚。
「都係我猶疑咗……」Faith陷入了自責當中，認為是自己害死了教主，情緒頓時變得低落。
稀愛在旁，比起安慰，更似無情地陳述事件：「唔駛為呢種人傷心喎，佢做咁多衰嘢，好應該受懲罰。」
面對屍體，眼前的這位初中生表現出超越同齡人士的理性和冷靜，令Faith對稀愛的表現十分佩服，畢竟自己作為成人，第一次面對人在自己面前斷氣也感到恐懼和低落。她這晚的出現和表現，疑點有許多，不合理的也不少，但偏偏沒有人懷疑她。
一夜間十條人命被相同手法殺害，全城沉入悲痛之中，是開埠以來的最黑之夜。
