「王」

再次醒來，我在一間純白色的房內，穿着一套老套鬆身的睡衣，是天堂嗎？我最後還是難逃一死嗎？

「阿曉，你醒嗱？」媽媽拿着一壺湯，看到我慌張的性情不禁笑了。

「呢度係醫院，你吸入太多濃煙昏迷咗，好彩阿旻通知我哋先趕得切去救你喳。」媽媽邊說邊盛湯。

「嚟，趁熱飲，參蓮銀膠木瓜湯，養陰潤肺，健脾補氣，益胃生津，養心安神㗎。」媽媽把盛好的湯放在桌上，同時替我調較好病床。

我邊喝湯邊問︰「我昏迷咗幾耐？」

「一晚啫，醫生一陣檢查完就可以出院。」媽媽神情自若，沒有半點擔心和緊張，這說明我的情況非常樂觀，沒有大礙。

我大口喝着媽媽的湯，不知不覺把整壺都喝完了，然後才想起游瑞慈，於是問︰「咁嗰日跳樓嗰個人最後點？」

「跳樓？邊有人跳樓，你係咪發夢？」媽媽的答案令我驚訝。

「點可能係發夢？游瑞慈喎，我明明見住佢跨出條欄杆跳咗落去。」我憶述昨天發生的事，還歷歷在目。

「死囉，你現實同夢境都分唔清，一陣要問吓醫生先得。」媽媽擔心道。

為甚麼屍體會不留痕跡、憑空消失？游瑞慈真的跳了下去嗎？還是我被濃煙嗆得缺氧，因而產生了幻覺？如果是這樣的話，他人呢？這些疑問我一個都解答不了。而醫生的專業見解是我大腦缺氧意識迷糊時產生了幻覺，由於最近身邊經常發生跳樓事件，甚至在我面前也發生過，印象深刻，潛移默化進入了潛意識，所以跳樓的幻覺只是剛好而已。雖然我不太相信這解釋，但也沒有比它更好的解釋能解答我這個疑問，所以我也只能暫且接受，而游瑞慈則失為了失蹤人口。

醫生為我詳細檢查過，證實無大礙後，媽媽便辦理出院手續。回到家後我第一時間便跑到一七二八室，這裏理所當然也成為了警察封鎖的現場，大門和鐵閘也緊緊閉上，木門被燒黑。我透過氣窗窺探裏面情況，單位內部也被薰黑，滿地積水和灰，露台的天花燈也因為高温而變型。

既然火災是真事，那游瑞慈跳樓也不會是幻覺，我非常相信當刻眼睛看到以及耳朵聽到的畫面和聲音，只是他憑空消失實在是怎樣也想不通。

我帶着疑問回家，直接與阿旻討論當時的事。

「其實我都聽到，甚至跑緊返屋企嗰時眼尾睄到有嘢跌咗落嚟，但當我聽到嗰聲巨響望落井嘅時候，個井係乜都無，半滴血都無，其他樓層都唔見有殘肢，我而家都仲未搞清楚發生緊咩事。」阿旻回想時也想不出合理解釋。

阿旻解釋不了的事情加一，再進一步商量之前，我想起了一七二八室逃走事件，於是我責問道︰「喂，係喎！嗰時明明做哂手勢同你講一齊夾攻游瑞慈，你條粉腸竟然自己走咗去，剩低我一個被佢虐待？」

「吓？咩呀？」阿旻聽到後很是驚訝，理直氣壯的說︰「我跟足你吩咐，你話你一個人頂住，唔駛兩條友一齊送頭，叫我快啲乘機走喎。」

我無言以對，想不到跟她培養了十多年的默契是如此不堪一擊，但總算有驚無險。

「唔好講呢單，」我再次將話題轉回游瑞慈身上，我大膽猜測說︰「我懷疑游瑞慈喺跌緊落樓期間被『王』捉咗去鎮魂塔入面。」

阿旻做了一個厭煩的表情，仿似對我投訴︰「又嚟？」

我沒有理會她，繼續我的猜測︰「佢跳樓係我哋親眼見到嘅事，井底無屍亦都係事實，除咗咁我真係諗唔到點解。」

阿旻不屑的反駁︰「如果真係跌緊落去期間就被捉咗去你所講嘅鎮魂塔入面，姑勿論係咪真係有先，咁點解仲會聽到咁大聲『嘭』？同埋其實我都係眼尾睄到有嘢跌落去，嚴格嚟講，我係確定唔到嗰嚿『嘢』係咪真係游瑞慈。仲有，就當係真，點解要捉走佢？『王』都係想佢死啫，捉走佢為乜？」

其實我也沒有答案，只能猜想和狡辯︰「『嘭』一聲我都唔知點解，可能聲畫唔同步有延遲啦，就好似行雷同閃電咁，光速快過音速。但你都話見唔到有任何殘骸，最好最合理就只有呢個解釋，就算你話嚿『嘢』唔係游瑞慈，但咁大嚿『嘢』跌咗落井，你又點會喺井底見唔到？至於捉走佢，可能係想虐待佢發洩啩，想肉體同靈魂一齊虐待，以解被殺之恨。」

阿旻沉默了，罕有地她沒有再反駁，大概是默認了我的猜測。

「我要再入鎮魂塔查吓究竟係咩一回事。」我說完便離開，可是阿旻叫住了我，原來她不是認同我，只是在想其他合理的解釋。

「我覺得可能係游瑞慈嘅一場戲，目的就係為咗令自己甩身，佢咁狡滑，未必無可能。」阿旻試着解釋︰「首先，佢準備咗一個同佢一樣大細嘅人偶，趁我哋唔為意就換咗代佢跳樓，跌散咗之後就收返啲線回收，所以又有聲又無屍。」

「你咁講，又有可能。」我記起當他步出單位後的異常動作，猶如被人控制一樣。

「即係話我哋要刮佢出嚟，不過茫茫人海都幾難，佢又無哂親人，估唔到佢有可能去嘅地方。」阿旻洩氣道。

如是者，我們的討論到此無奈被逼結束，最後甚麼結論也沒有。

不過，只要我將第五狼是游瑞慈這答案告訴「王」，那樣我就能順利解除咀咒了。既然確保生存，那就要為人生繼續努力，考好DSE。

第一科是中文口試，沒有甚麼能温習，索性跳過它温習第二科好了。我收拾心情，埋首書堆，時間就像快轉般，一下子便到晚飯時間。看着齊齊整整的家庭，吃着有說有笑的晚飯，伴着公式劇情的電視劇，一個典型的香港家庭，雖然簡單但很滿足。

席間我們談到這段期間發生的不可思議事情，電視劇也寫不出的劇情，既驚險又難忘，幸好最後有驚無險，有一個大團圓結局。

這麼好的家，這麼好的家人，我能擁有實在是太幸福了。

晚飯過後，吃過水果，我又再次回到書中尋找那間黃金屋，不知不覺便去到深夜。夜闌人靜，家人都睡了，我也累了，打了個呵欠，關上枱燈正想上床睡覺，鐵閘又傳來動靜了。

「每次都咁識揀時間嘅。」我邊笑說邊開門迎接Tracy，然而這次出現在我面前的卻是刁太。

「刁太？咁夜仲唔瞓嘅，有咩事？」我好奇的問。

「哥哥仔，我個女叫我落嚟揾你，話有事要同你講，叫你而家即刻上去。」刁太以近乎命令的語氣說，這腔調似曾相識。

「但都已經咁夜，有咩留返聽日先講啦，我要瞓覺喇。」我拒絕道，畢竟她不是Tracy。

刁太聽到我拒絕後，便以威嚇的方式逼我就範︰「件事關乎『王』同埋你條命，你真係想拖到第二日？第二日我唔知我個女仲會唔會咁好心講你聽。」

好的，我承認我貪生怕死，所以我最終還是答應了。

「你終於嚟喇，我收到消息，『王』已經揾到第五隻狼，仲捉咗佢困咗喺鎮魂塔入面折磨佢。」刁小姐擔心的說︰「佢仲想捉埋你入去陪佢，因為你幫到手。」

我聽前半部份時沒有甚麼感覺，但一聽到後半部份時震驚得下巴也掉到地上碎了，我不解又不滿的抱怨︰「咩料？唔係應該放過我咩？點解要捉埋我入去？唔啱數喎！即係幫唔幫到佢都要死？」

「所以我就即刻叫你嚟話你知，等你可以走得甩。」刁小姐友善又着緊的說。

「真係唔該哂你，但係我可以走得去邊？呢間係公屋，唔係話搬就搬，退咗租就無屋住。」我面有難色的說。

「我梗係明，」刁小姐提議︰「所以我有個建議，我哋聯手，一齊消滅『王』。」

消滅「王」？有可能嗎？

「我老公已經集結哂一班不滿『王』嘅鬼，只要你肯幫手，就水到渠成。」刁小姐胸有成竹的說。

「點解要我幫手先水到渠成？佢哋人多都夠做㗎。」我不解的問。

「有你幫就百分百成功，因為『王』信你，所以唔會懷疑你，你就係最好嘅刺客！」刁小姐興奮的說。

「咁我要點做？同埋點解而家夜晚你又出現到嘅？」我順着問。

然而，刁小姐只是詳細向我說明刺殺計劃，並沒有回答我的第二個問題。不過既然計劃內容我已經清楚了，其他也不太重要，活命要緊。

「『王』個『宮殿』喺二四零四室，事不宜遲，而家就出發，殺佢一個措手不及。」刁小姐衷心的對我說，並着刁太將行刺的兇器──一條紅色的頸繩交給我，並教了我用法，之後便出發。

「我老公萬生會喺塔入面等你，你去到二四零四就自然會知點入去。」刁小姐最後叮囑道。

我袋着頸繩，乘升降機上到二十四樓。這是我人生第一次上來，正如阿旻之前所說，另一面井樓層更高，所以我住的井在二十四樓是沒有的，自然沒有路可通往我住的井，但透過欄杆可以看得到原來天台是一個花園般的地方，明顯還有人在打理，只是居民不能享用而已。

欣賞完美景，平伏了心情後，我一步一步的走到目標單位前，可能是因為要與最終魔王對決，來到門前時，心情又再緊張起來，心跳直逼每分鐘二百次。我連續深呼吸數次，強行使自己冷靜下來，接着便伸手敲門。

「吱」……未待我敲門，門便自己開了，開門的正是Tracy。

可能是因為她的出現令我從心底開心起來，本身漆黑寧靜的深夜都變成明亮熱鬧、充斥歡樂的白天，原來心情真的能影響視覺，一切看上去都是那麼漂亮柔和。

「阿曉？你點解會喺度嘅？」Tracy率先發問，態度有別於平時的命令式語氣，是温柔婉約兼有禮。

我被她的出現嚇了一跳，立即語塞，張開口久久說不出話來，尷尬非常。

看到此畫面的Tracy嫣然一笑，又再開口說︰「每次見到你都咁搞笑嘅，不過都多謝你，我知道哂成件事喇，之前為你添咗咁多麻煩，真係唔好意思，嚟緊DSE你要加油果心機考好啲。」

「哦……係，知道。」我只能斷續的回答簡單的答案。

「哈，傻瓜，我要走喇，你以後要好好生活，活埋我嗰份。」Tracy始終保持漂亮的笑容道別。

「走？」我反應很大︰「走去邊？住得好地地做咩要走？」

Tracy沒有回答我，只是向我報以最燦爛、最陽光的微笑，然後朝升降機大堂走去，直至慢慢消失在我的視線範圍，但我竟然呆了的站在原地，沒有追過去挽留她。

到我清醒過來的時候，升降機已經到達地下了，或許我已經錯失了與她的緣份。緣盡了，Tracy，希望你以後也可以活得快樂。

我收拾心情，再次回到二四零四室前，附近氛圍依舊是祥和喜悅，是我的心情還未平伏嗎？不，這種感覺我已經經歷過數次，不知從何時起，我已經進入了鎮魂塔內。

鎮魂塔內的二四零四室中門大開，裏面簡約整齊，裝潢時尚輕奢，而且香氣四溢，想像得到住戶是一個對生活有要求、懂享受、有品味的人。

「估唔到『王』咁識嘆，捉埋捉埋啲鬼做奴隸，就係奴役佢哋做呢啲嘢，等自己可以嘆世界，真係一隻可惡嘅鬼。」我對「王」的恨意隨着房子的美而不斷攀升。

可是我找遍全個單位，始終找不到「王」的蹤影。我納悶之際，門外傳來了擾攘聲，我走出去查看，赫然發現Tracy被萬先生等鬼押解，我見狀立即上前阻止，並把她搶過來。

「你唔係同我哋同一陣線咩？做乜阻住我哋？你快啲離佢遠啲！」萬先生生氣道，其他的鬼也跟着一起起鬨，當中更包括王先生和雲先生。

面對蠻不講理的他們，我也怒不可遏，當面喝叱︰「我係應承幫你哋對付『王』，但你哋而家捉個無辜嘅人入嚟鎮魂塔，我點可以坐視不理？呢個人仲要係Tracy，我點可以唔阻止？」

我拿出紅色的頸繩對着他們揮舞，好讓他們不敢接近，同時帶Tracy退入二四零四室並鎖上門。

「你無事呀嘛？無神神被佢哋捉入嚟鎮魂塔，你一定好驚，好彩有我喺度，我會安全帶返你出去。」我温柔的對Tracy說。

Tracy斯文禮貌的微笑着說︰「有你真係可靠，不過我唔想連累到你，你已經幫咗我好多，趁而家仲有轉圜餘地，你快啲交我出去自己走啦。」

我猛力搖頭，堅拒道︰「要走一齊走，我唔會留你一個喺度。」

「傻瓜，我知你擔心我有事，」Tracy指着我的鼻尖說︰「但係你同我根本就唔同世界，我唔值得你為我犧牲。」

「我覺得值就得。」我倔強的說。

「快啲離佢遠啲同交返佢出嚟，我哋仲可以當無事發生過，如果唔係就當你係佢同黨，無情講，一齊殺埋！」門外的萬先生不停叫喊，但我繼續無視。

「我哋一齊返正常世界，我會揾到路。」我拖着Tracy的手，她冷得像冰，顯然是受驚過度，所以才會雙手冰冷。

我回想之前數次往返鎮魂塔的經歷，要回正常世界，都是經原路回去，但我何時、如何進入也不清楚，可以怎樣回去？

外面的鬼由叫囂，逐漸演變成拍門，我也越發着急，但越急就越想不到辦法，面對這個惡性循環，最後還是Tracy把它解決。

「你見唔見到呢個logo？」Tracy指着門後的一個印記──那個在其他數隻狼的單位也看見過的組織印記，她續說︰「你只要手指沾啲血掂住佢，再合埋眼諗一個喺呢棟樓度你想去嘅單位，你再張開眼嘅時候就會去到。」

「咁神奇？」我對這印記的用處感到不可思議，同時亦驚訝為何她會知道，不過我也沒有懷疑，直接依照指示行動。

我咬破手指頭──電視那些道士輕易便能咬出血，但我怎咬也流不出半滴血來。

「你做咩？」Tracy看到我滑稽的舉動忍着笑問。

我尷尬非常，脹紅了臉說︰「我學電視咁咬穿手指咇啲血出嚟囉，不過都唔work嘅。」

「唔係咁㗎，」Tracy捉着我的手，把手指送進她的嘴，我緊張得緊閉上雙眼。

「哎呀……」我最終還是忍不住小聲叫了出來，她調皮的笑了，我張開眼看，原來不是咬，而是用刀在我手指頭上劃了一下。

深紅色的血在手指頭上剛好凝聚了一滴，我立即扼着Tracy的手，同時把沾了血的指頭按着印記，合上眼，心裏想着我認為最安全的目的地──二零零二室。

再次張開眼睛，眼前是熟悉的裝潢，雖然江叔已經過身一段時間，但不知為何房屋署還未為單位進行打拆工程。

「我哋安全喇，Tra……cy？」我轉個頭想跟Tracy說，但她根本不在我身後，這是甚麼原因？難道她沒有合上眼？還是這個傳送方法只限自身移動？抑或她想的地方是另一個，所以傳送到其他單位？

時間已經是黎明，我也不好大叫大嚷去尋找，但有一個人，不，應該說是一隻鬼要我去找她晦氣的。

我怒氣沖沖的走到一六二二室，一身紅衣的刁小姐已經預先在門前等着我的到來。之前說一到晚上就要躲藏「王」不能露面，現在卻肆無忌憚、大搖大擺的在迎接我，真的很令人懷疑。

「你壞咗大事！」刁小姐迎頭第一句就是責罵︰「『王』對你咁信任，你都唔好好把握機會，早知就聽老公講唔好對你抱咁大期望！」

「講起就嬲，『王』我就見唔到，我淨係見到你哋亂咁捉人屈人，我真係無辦法同你哋同流合污。」我反駁道。

「天真！事到如今，得返呢個辦法……」刁小姐憤怒了，對着我口中唸唸有詞，然後雙眼一瞪，接着我便眼前一黑，眩暈過去，再次醒來的時候，我已經被五花大綁，丟在熟悉的黑房內。