誘餌
早上九時，全組人也準時出現，而且對昨夜的事都守口如瓶，阿查是唯一不知道的人。
「大家早晨，琴日難得嘅半日假，有無好好利用先？」劉sir以開玩笑的語調提問，但沒有人有反應，於是他便即時換成認真模式：「好，大家都咁認真就好，我哋今次嘅計劃一定可以順利執行。我手上嘅係鐘仔拎返嚟嘅同意書，我正式宣布誘餌計劃可以落實執行！而家交畀鐘仔講解今次行動大家嘅崗位、負責任務同注意事項。」
「大家好，今次我哋要扮嘅係城中最神秘嘅富豪鍾生。由於網上基本無佢嘅資訊，變相方便咗我哋捏造。四眼同田雞，你哋幫手喺網上放風同做水軍，不斷爆料，務求令到全城都知呢個集團嘅負面新聞，同埋用偷拍mode曝光阿查個樣。」鐘仔指揮道，四眼和田雞不情不願地接受。
接着鐘仔對飛機及老大說：「飛機、老大，你哋喺阿查附近監視，留意有咩可疑人物，清道夫、報紙檔、secure、外賣仔，咩角色都好，任你哋揀，總之阿查喺你哋視線範圍之內就得，你哋係第一線嘅支援。」飛機與老大也敷衍地同意。
然後鐘仔便對劉sir說：「劉sir，你喺附近睇實，我要你發揮當差咁多年積落嘅經驗同直覺，截擊兇手。」劉sir爽快地答應。
最後，鐘仔對阿查說：「阿查，你係成個行動嘅主角，鍾生由你扮，低調貼地就得，同平時嘅你無咩分別。」阿查比了一個「OK」手勢。
「另外，根據我嘅整理，受害人由熱議到受害，最耐係三日，所以呢三日我哋唔可以有一刻鬆懈，唔係阿查就有危險。今次除咗為破案，仲係為劉sir面子而戰，只許成功不許失敗，大家加油！」鐘仔最後再作出鼓勵，然後便各自按計劃行事。
鐘仔首先幫阿查進行簡單的易容和換上預備好的衣服，然後再到外面拍了數張照片交給四眼和田雞。不足一小時，各大討論區便有大量相關的帖文；再一小時後，主要的短片網站都有相關的影片；再一小時後，已經有網媒大肆報導。阿查扮演的黑心美容集團主席鍾先生在三小時內已經成為網絡熱話，鐘仔的計劃進展得很順利。
第二步，阿查要走出警署，到辦公室「上班」。根據事先協商，他去到該集團位於核心商業區的總部，這是以該集團命名的大廈，樓高六十六層。正所謂「做戲做全套」，阿查要去的是真正老闆使用、獨佔全層、擁有無敵海景的頂層辦公室。
「真嘅老闆而家喺屋企匿埋，我同佢傾好咗，office入面嘅嘢你隨便用，唔駛怕整爛整壞整污糟，呢個係我幫你搲返嚟嘅福利，enjoy。」鐘仔在耳機的另一面說。
阿查上到辦公室，差點以為自己去錯了地方。他眼前的是一個高爾夫球練習場、保齡球場、藝術館、私人影院和酒館，誇張程度連電視也拍不出來，要不是在後面有辦公桌和大班椅，真的認不出這是一個辦公室。
「呢個真係office？有錢人想的果然和我不一樣。」阿查小心翼翼地往座位走去，拿出筆記簿，按照之前的思路，嘗試分析何者更大機會是真兇。
可是一分析下來，不論是稀愛、劉sir還是鐘仔，在不同的凶案中，都分別有不在場證明。
「如果我推理無錯，三個人都無可能係兇手，除非三個人都係兇手，即係只有佢哋三個係一個犯罪集團先有可能完成咁多單案。」阿查得出最後的結論。
但，有可能三人是一伙嗎？可是為何要這樣做？這次行動的意義又是甚麼？阿查越想越覺得可怕，最終只有一個答案──除掉他。
「如果真係要清除我呢個威脅嘅話，即係話佢哋已經察覺到我開始懷疑佢哋，亦即係證明咗我係無估錯。」阿查從害怕中又產生出了一點點興奮：「今次行動我要自己執生，可以靠嘅只有喺附近嘅飛機同老大。」
「只不過，如果兇手另有其人呢？畢竟我真係親眼見過隻綠色嘢，佢哋都係一伙？定其實得佢一個先係兇手，我錯怪咗好人？」阿查越想越亂，所有線索纏在一起，成了死結。
餘下的時間，阿查嘗試解開死結，但最終還是被自己的思緒困擾，甚麼也做不了，只好選擇養足精神，見步行步，等真兇出現時再跟他周旋到底。
等待是最耗費人生的一件事，時間過得特別慢，很不容易終於熬到六時下班，阿查離開大廈的一瞬間，有種重獲自由的感覺，可是一秒後，背後傳來涼意，一種被監視的感覺悄然接管了一切。
「係劉sir、鐘仔、稀愛定其他人？」阿查腦裏亂作一團，但又不能很明顯地搜尋，只能用眼尾餘光以及鏡面反光去觀察散發出這感覺的人。
可是，核心商業區的下班時間，不用想也知道人多如螻蟻，細心用雙眼搜索也很難找出一個本身認識的人，何況是透過餘光和反光去找並不確認的人？
「如果無論如何我都揾唔到人嘅話，咁就等人主動嚟揾我，反正兇手犯案手法同模式我都好清楚，而家根本唔駛怕。」阿查擺正心態，若無其事般去乘車回家。
回家？應該回哪裏？自己的家還是鍾先生的家？抑或是回警署？
「鐘仔，」阿查透過耳機問：「我而家應該去邊度？」
阿查在便利店閒逛，等待鐘仔的答覆。
「去一號安全屋，我哋喺嗰度集合，大家小心被人跟蹤。」鐘仔很快便回答。
所謂的一號安全屋，只是一個謔稱，並不是警隊用來保護證人的安全屋，而是他們平時經常去的餐廳，那裏人跡罕至，連附近居民也甚少知道其存在。由於客人偏少，所以老闆與他們關係甚好，亦很清楚他們的職業，甚至願意配合他們的工作而選擇性營業，是一個隱蔽性十足、私隱度極高、安全性超卓的好地方。
晚上七點，全員到達，鐘仔主持會議。
「今日第一日，網上發酵唔錯，兇手好大機會喺嚟緊兩日出現，大家要留意。飛機同老大，你哋今日完全投入咗角色，做得好好，嚟緊保護阿查都要靠你哋。阿查，你由離開大廈到呢度，期間有無咩特別嘢發生？」
阿查頓了一頓，權衡着說與不說的利弊，最後決定以大眾利益為先：「我一離開office就feel到有人監視我，不過我無打草驚蛇，淨係行過啲反光嘢時望多兩眼，暫時未見到可疑人物。劉sir，你有無發現？」
劉sir憶述：「我發現唔到啲咩可疑人物，會唔會係你錯覺？」
老大和飛機也搖頭道：「我哋都唔覺有。」
「連飛機同老大都咁講，唔通佢哋全部都係一伙？」阿查感到心寒，但依然不動聲色、維持冷靜道：「咁可能真係我多疑，嚟緊都要靠你哋暗中保護我。」
「既然係咁，即係今日大家都無咩特別嘢發生，聽日大家再努力。」鐘仔總結道：「不過阿查，你要小心啲，過往case都係凌晨發生，唔知兇手會點引你出去。」
阿查點頭回應，然後便率先離開，其他人隔一段時間後也先後各自離去。
+x+x+x+x+x+x+x+x+x+x
浴室內，熱水「嘩啦嘩啦」地撒在阿查身上，水蒸氣幾乎把他湮沒。
阿查還是相信他自己的感覺：「話唔定個監視嘅感覺就係佢哋三個畀我，唔會癲到成team除咗我之外都係一伙啩？如果係，我一個點對六個專業人士？最叻犯法、最識鑽漏洞嘅一定係執法嗰個，輸硬㗎喎。」
「叮！」電話收到訊息，阿查關上水喉，拿毛巾簡單抹了一下便查看電話。
「鐘仔？約我而家出去？」阿查疑惑，鐘仔剛才的說話還言猶在耳，於是他的手指在屏幕上動了數下，簡單地拒絕了。
怎料鐘仔很快便回覆：「你唔係覺得我係兇手啩？」
阿查頓時心虛，幸好只是文字交流，所以他裝作是太累才回絕，然而鐘仔並未放棄，堅持要與他見面，還提出到他樓下碰面，他眼見不能逃避，只好答應。
晚上十時半，阿查與鐘仔見面了。鐘仔第一句便問：「你係咪覺得我係兇手？我今日喺一號安全屋隱約覺得你係咁諗。」
阿查冷不防鐘仔當面再問一次，當下即時宕機，幸好鐘仔沒有介懷，接着更道出來意：「放心，我同你玩啫，唔係真係抽秤你，我嚟係想同你講嚟緊兩日嘅部署。」
阿查露出一副「點解啱啱唔講埋」的表情，鐘仔解釋說：「因為啱啱有我懷疑嘅人喺度，所以唔方便講。嚟緊兩日都同今日差唔多，唯一分別係聽日早一個鐘走，後日遲一個鐘走，同埋一日去前一個站搭車，一日去後一個站搭車。」
「你想篩晒呢兩日同我時間行徑都一致嘅人出嚟，因為佢哋好大機會係兇手！」阿查稍為動腦便猜到鐘仔的用意，然後反對：「咁唔work，連我都係咁意就估到，一個心思縝密嘅連環兇手又點會諗唔到？」
「咁先生有咩錦囊妙計啊？」鐘仔故意用大戲腔調問。
「你懷疑嘅係邊個？」阿查要先弄清楚對手是誰。
「劉sir。」鐘仔說出一個也在阿查懷疑之列的名字，然後加以解釋：「陳總嗰次行動，平時做足功課嘅劉sir無理由唔知間office內部結構，亦都無理由見唔到佢落車，仲特登車我哋去咗轉G市先返嚟，擺明就拖時間。」
「的確係有啲古怪，同平時嘅佢好唔同。」阿查也認同，畢竟劉sir也是他心目中的疑犯之一。他想了一下，說出了一個計劃：「要試劉sir呢種老差骨，唔好做到咁明顯，只要跟返原本計劃去做就得，佢一定已經諗好咗幾時同點落手，我哋只要等就得。」
「咁你咪會好危險？」鐘仔擔心地說。
阿查自信地拍了一下心口道：「你唔係唔信我嘅身手啩？我接呢個角色之前就已經衡量過。」
與此同時，阿查仍然未放下對鐘仔的懷疑，究竟是含血噴人還是掩人耳目，他還未有定案，只知道要萬事小心。
+x+x+x+x+x+x+x+x+x+x
距離死線尚有八日，阿查準時九時到達辦公室，開始一天的工作。
「雖然話等就得，但齋等唔係我嘅style，仲可以點做先釣到個兇手出嚟呢？」阿查邊思考邊查看電腦，他發現網絡上對他這位「鍾先生」的評價有逆轉的趨勢。
「係佢本人做嘢？但應該唔會，佢自願同我哋合作㗎喎。」阿查不明所以，只好請四眼和田雞去調查。
「我哋都發現呢個情況。」四眼的答覆不意外。
田雞的答案才令人詫異：「我哋追蹤啲ip，發現全部都係喺你嗰度嚟。」
「即係有員工幫佢洗白？」阿查問。
「一定唔係！」豈料鐘仔厲聲否認：「呢個人唔會有人幫佢講好說話！」
為何這麼肯定？阿查第一反應是這樣，但他還是硬生生把這個問題吞下肚，問了另一個更有用的問題：「咁點解會有大量呢啲評論？」
「係AI。」鐘仔說：「只有無感情無感覺嘅AI先會幫佢講說話。」
「你又知？」田雞問了阿查心裏的問題。
「一個辦公室成個迷你渡假村咁、只顧自己享受、唔理員工工作環境嘅人，點會有人肯幫佢洗白？」鐘仔情緒激動地說。
「聽你咁講又有啲道理。」四眼同意鐘仔的說法。
至於阿查，他的心底又多了一個疑問：「點解佢會知道呢啲嘢？佢有入過嚟睇過？」
「我會閂咗個AI，你哋繼續努力唱衰佢。」鐘仔指揮道：「阿查，你喺office入面扮被偷拍影幾張玩樂相，等四眼同田雞有新嘢post。」
經過鐘仔新一輪的運籌帷幄，成功令假鍾先生獲得更多仇恨值，甚至有人揚言要他償命。然而，阿查清楚知道這些人都不是真兇，從之前幾宗案件少之又少的物證可以推測得到，真兇遠比他們所想來得更小心謹慎，絕不會輕易暴露行蹤。
主動挑戰兇手的想法再次在阿查腦海浮現，但他始終想不到一個可以必定引出兇手的方法，不要說必定，連有一半機會能引出兇手的方法也想不到。
「留意返，我接咗個外賣係送上六十六樓。」突然間，耳機傳來老大的聲音：「我去緊拎，十分鐘後到，阿查準備一齊拆。」
「但我無叫外賣喎……」阿查驚訝地說。
「所以先叫你一齊開，肯定有古怪。」老大氣喘吁吁地說。
「阿查，有盒嘢都係寄上去六十六樓，」飛機此時也說：「我轉個彎就到，你ready定。」
「吓？我無上網買嘢喎……」阿查開始感到恐怖。
「我都唔覺得你買嘢會寄呢度。」飛機冷靜地答。
十分鐘後，老大和飛機都抵達了六十六樓。
「係咪兇手知道咗我係假扮，所以特登玩嘢？」阿查猜想。
「Ready嘅話我就開盒飯先。」老大膽戰心驚地說，阿查和飛機點頭示意。
老大解開膠袋，打開飯盒，撲鼻而來的是鑊氣十足的賽螃蟹。
「咩意思？賽螃蟹？」老大不解。
阿查一看便明白箇中玄機，解釋道：「賽螃蟹，其實係用蛋扮蟹，簡單嚟講即係假。我估點餐嗰個係想表達話我係假，我哋呢個行動好可能白費心機。」
「咩話？無可能！基本上除咗我哋幾個都唔會有人知，阿查，你過度解讀喇。」鐘仔反應很大，令眾人的耳均失聰了數十秒。
「係咪過度解讀，拆埋件貨就知。」飛機拿出鎅刀，着手處理那個小盒子。
盒子大小如一個鞋盒，飛機將膠紙逐一𠝹開，再慢慢打開盒子。率先映入眼簾的是鋪滿盒子的康乃馨，而康乃馨圍着的是數張相片。
「係相？咩料？」飛機不明就裏。
「呢啲都係呢個美容集團用嚟做美容嘅瀕危動植物。」阿查一看便明白：「呢盒似係普通hater寄，係唔同人。」
「咁會唔會其實盒飯都係普通hater嗌咋？」老大再次提出見解：「唔係點會咁啱同時送上嚟？同一個人做嘅機會好大。」
「或者係同一班人呢，大家夾埋同時行動，而真兇就混埋喺入面。」飛機也有自己的看法。
「有呢個可能都唔定，因為電梯大堂有最少三個人準備上去，人人手上都拎住嘢。」鐘仔看着閉路電視的畫面說。
「四眼、田雞，揾揾網上邊度有人發起呢個行動，兇手就喺入面。」阿查同時對飛機和老大說：「你兩個都走先，廢事惹人懷疑。」
送走兩人後，阿查最少收到了二十個外賣和三十件速遞，全都是到付，短短數小時戶口便蒸發了三千多元，可是半點線索也找不到。
「呢啲全部都係haters送嚟，無可疑。」阿查失望地報告。
「唔駛失望，我哋揾到個post。」四眼精神地說。
「仲篩咗幾個有機會嘅人，send晒畀你哋，你哋睇吓。」田雞也沾沾自喜地道。
「一於捉晒返去問話先再算。」鐘仔說。
此時，一直無發言的劉sir終於開聲制止：「唔駛，呢度都無一個係兇手。」
阿查也附和道：「無錯，我都係咁覺得，睇佢哋啲留言都係只敢惡作劇嘅鍵盤戰士，真正兇手先無咁易留痕跡。」
「揾落賽螃蟹嗰個，佢機會最大。」劉sir下令，四眼及田雞立即行動。
「我擔心真鍾生，鐘仔，你提醒吓佢穩陣」阿查擔憂地提醒。
「無必要，兇手隨時就係等緊呢個機會勾線去揾佢真身，唔駛通知佢。」鐘仔斷言拒絕。
「劉sir！」阿查轉為向劉sir求助，希望能以上司的身份命令他，豈料還是遭到拒絕。
「今次指揮係鐘仔，佢話點做就點做，況且佢都有佢嘅道理。」劉sir像卸責般將決定權交到鐘仔手上，阿查無可奈何，自己也找不到鍾先生，只好聽令行事。
「鈴……鈴……」辦公室的電話無預警地響起，阿查習慣性地接聽：「警……啊，有咩事？」
「鍾生，二號線有電話揾你。」秘書温柔的聲音安撫了阿查煩亂急躁的心。
阿查接駁到二號線，未待他開腔，對方就說：「我手上有你個仔嘅秘密，唔想我公開令佢身敗名裂嘅話，今晚一點喺你屋企樓下等。」
阿查本想套取更加多情報，可是對方話畢便掛線，阿查只好將剛才僅有的一句跟大伙報告，但卻將最重要的「你個仔嘅秘密」收起。
「Yes！呢招果然掂，兇手終於中咗圈套，今晚佢插翼都難飛。」鐘仔興奮地說。
