面見處長
「處長，負責單case嘅劉sir到咗。」內線傳來秘書的聲音。
「入嚟。」處長簡潔地說。
「Good morning，sir！」劉sir帶同阿查和鐘仔一起進內，阿頂已經在房內。
「阿劉，我電話咪講得好清楚叫你自己嚟，做咩帶埋兩個細嘅？」阿頂在劉sir耳邊輕聲質問。
「Sir，本身我哋成team負責單case，你淨係見我一個都已經好難完整報告晒所有嘢畀你哋知，而家我都只係帶同我一齊見到個犯嘅兩個手足，我認為佢哋都可以一齊傾，對單case都有幫助，sir！」劉sir選擇大聲且正式地回應。
處長笑笑口道：「唔緊要，喺得呢間房入面都係伙記，都係自己友，反正佢哋都見到個犯，一齊傾都好，我最鍾意集思廣益。」
「一哥果然廣納百川，咁你哋兩個都一齊傾喇。」阿頂奉承道。
「Thank you，sir！只要我哋知都會如實作答。」阿查和鐘仔異口同聲地說。
「Sir，咁我就唔客氣。點解會揾飛虎嚟support琴晚嗰追捕行動？係咪連處長你心入面都認為兇手係怪物，sir？」想不到劉sir搶先發問，而且是如此一針見血的問題，阿查和鐘仔不禁暗自佩服他。
「阿劉，pro啲，未定罪都只係suspect，唔係兇手，你唔好加咁多個人主觀情感落去睇單案先，呢個係辦案大忌。」阿頂在處長面前扮得正經八百：「再講，因為一哥都重視單case，所以先揾警隊精英去支援你哋。」
處長點頭看着阿頂，露出欣賞的微笑，但房內卻莫名地充滿了寒意。善於察言觀色的阿頂明顯也感覺得到異樣，於是識趣地補上一句：「Sorry，sir！我擅自將啱啱嘅對話內容講咗出嚟，希望你唔好介意。」
看到阿頂為自己鋪了下台階，處長頓時變得寬容，不打算追究，而且更借機幫自己樹立仁慈、精明、包容、關愛下屬的美好形像：「大家都係自己人，有咩唔講得？我知要兩星期破案一定令你哋壓力好大，但希望你哋記住，呢場仗唔係只屬於你哋team，而係屬於成個警隊，所以我先派飛虎去支援你哋，希望可以速戰速決。」
劉sir明顯不接受這一套說法，他繼續說：「既然處長你講到係成個警隊嘅事，咁可唔可以都分享你手頭上有嘅情報畀我哋？等我知點解要派飛虎咁大陣仗。啱啱我哋就親眼見到個兇手，覺得無必要咁勞師動眾，你咁樣做反而會引起公眾恐慌，sir！」阿查和鐘仔在旁看到劉sir處處針對處長，不禁捏一把冷汗。
「阿劉，唔好咁失禮！」阿頂試圖阻止劉sir的倔強：「一哥咪解釋得好清楚，速戰速決，以免夜長夢多。一哥考量嘅唔只係破案，而係要盡快破案，啱唔啱呀一哥？」阿頂為免再次尷尬，所以最後將答題權交到處長身上。
處長滿意地猛點頭，然後又問：「咁唔派飛虎，你覺得派咩人幫你手會好啲？」
劉sir再次重申：「Sir，我嘅問題係有兩個，唔係只係講飛虎，仲有係想你分享埋你手上令你覺得要出動到飛虎嘅情報，sir！」
「阿劉……」阿頂還未說完，處長便笑着說：「兄弟，我好欣賞你對單case嘅執着，但我手頭上有嘅情報都係你哋畀我嘅，無其他特別，我只係想盡快捉到個犯先出動飛虎，不如你講我知你想我點配合你。」
「停晒所有你用緊嘅技倆，低調丟淡佢，社會唔需要更大嘅恐慌，兇手亦唔需要呢啲助燃劑，放手交畀我哋去做就夠，sir！」劉sir強硬地說。
「哈哈！」處長大笑起來：「有意思有意思，而家成個社會都傳緊係怪物犯案，國際間輿論已經話我哋辦事不力，為咗維持治安良好嘅虛假形像就將啲罪行推晒畀一隻唔存在嘅怪物，大家都當笑話咁睇我哋，我哋警隊已經柒出國際，我唔想因為咁嘅事而被國際認識，但你叫我唔好理呢件事，你係咪有更好嘅方法？」
面對處長的暗箭，劉sir絲毫沒有退縮，繼續理直氣壯道：「人係好善忘，而且只要捉到真兇，就唔會有人再笑，而且笑嘅人仲會覺得自己先係柒嗰個。我同處長你一樣，都唔想最安全城市呢個頭銜被褫奪，所以先更加要做實事捉真兇，而唔係同啲人口水戰爭論係人定妖，sir！」
處長繼續笑笑口道：「咁用你方法去做到而家，單case進展成點？」
「我哋已經成功預測到兇手嘅下個目標，甚至追捕過，」劉sir自豪地說：「下次我哋有信心會捉到佢，sir！」
未待處長回應，在旁的阿頂忍不住責難：「捉唔到即係無用喇，無用就唔好喺度空口講白話！乖乖地跟一哥方法去做，唔好再用自己嗰套唔work嘅方法嘥時間！」
「唔駛咁勞氣嘅張仔，又唔一定只得我套方法先work，我都話我最鍾意就係集思廣益，或者我哋可以一齊討論吓，睇吓有咩可以改善。」處長始終掛着笑容：「照你預測，兇手下個目標係邊個？等我可以安排多啲人手幫你。」
劉sir一臉嚴肅、肯定地吐出三個字：「未知，sir！」
處長對此答案並無感到不滿，保持和顏悅色地說：「咁你知道之後記得同我報告，之後再傾吓點樣部署，咁樣做應該無問題喇？」
「Yes，sir！Thank you，sir！」劉sir繼續板着臉說：「如果無其他事咁我同啲兄弟走先，我哋仲要返去整理返啲資料同檢討今次行動，sir！」
處長沒有加以阻撓，劉sir三人離去後，房內只餘下處長和阿頂。此時處長臉口一轉，憤怒地對阿頂說：「你呢個乜嘢伙記嚟？雖然你事先講咗，而且都好落力護佢，但真係估唔到咁無大無細，見到我都咁唔識做，要當眾落我面？呢單case你幫我求其揾個藉口轉第二個負責，之後順便揾個理由將佢發配邊疆，我唔想再見到佢！」
「請息怒吖一哥，阿劉份人係倔強硬頸啲，但佢真係好做得嘢，之前嘅老師綁架案、金庫械劫案都係佢破。佢嘅經驗同建議對單case好有幫助，畀多次機會佢，下次我會控制好佢。」阿頂為朋友盡力護航。
縱使阿頂不斷讚賞劉sir，但處長依然怒氣難消：「佢咁唔識做人，只會連累你，唔好話我無提過你，遲啲你升咗佢一定會畀鑊杰嘅你嘆。你而家要保佢，無問題，但我會另組一班fit馬去跟呢單case。如果佢快過呢班fit馬破到案捉到兇手嘅，咁就留佢喺度，否則就唔好怪我調佢去守水塘。」
「Thank you，sir！佢一定唔會令你失望。」阿頂道謝後便離開，處長亦立即找了副處長商討「fit馬」人選。
+x+x+x+x+x+x+x+x+x+x
「劉sir，啱啱你好型，我正式宣布你係我偶像。」鐘仔在車上回味着剛才的舌劍唇槍。
「真係估唔到阿頂咁擦鞋，我對佢好失望。」阿查感到難以置信。
然而，劉sir沒有回應他們，只是安靜地坐在車上，亦沒有開車的打算。
「呠、呠……」直到一個熟悉的身影出現，劉sir才響咹下車。
這個身影不是別人，正是阿頂。劉sir和他說了數句話後便摟在一起，歡笑聲大得穿過車門，傳到阿查和鐘仔耳裏。一會後，劉sir便回來並駕車回警署。
「其實啱啱我哋係夾埋，」劉sir主動開腔解釋：「阿頂知我唔鍾意搞關係實瀨嘢，所以佢就幫我抹屎忽，佢並唔係你哋講咁衰。」
阿查和鐘仔知道自己誤會後都尷尬得說不出話，不過劉sir接着說的話更令他倆氣得說不出話來：「阿頂啱啱話，處長會成立專案小組嚟跟呢單case，同我哋鬥快破案。」
「吓？」阿查和鐘仔同時驚訝地說：「原來處長先係老狐狸，估唔到佢咁信我哋唔過。」
劉sir沒有任何情緒波動，就像早已知曉處長的詭計一般，淡淡地對兩人說：「我哋按返自己節奏做就得，唔駛理人哋。」
然而，阿查卻有另一個想法：「我哋一直跟開，資料又最齊，對單case實係最熟，點可能輸畀班臨時拉呼嘅雜牌軍？為啖氣又好，為面子都好，我哋一定要贏！」
「認同！搞到我而家都熱血埋一份！」鐘仔也鬥志旺盛。
距離處長宣布破案的死線尚餘九日，面對即將到來的競爭，阿查和鐘仔人上緊發條，誓要搶先破案。
+x+x+x+x+x+x+x+x+x+x
「處長，大鑊喇！」副處長掛線後立即驚惶失色：「上面出手喇，封鎖咗成座山，我哋啲人入唔到去搜證。」
處長聽到後大驚，呼吸加速、瞳孔擴張，緊張得不知如何是好，他喝掉整杯涼了的咖啡，但還是冷靜不到，他擔心的是中央嫌他辦事不力，怪罪下來的話，他快要到手的長俸便「凍過水」。
果不其然，下一秒，處長的直線電話便響起，致電來的是保安局局長。
「而家單case中央會直接take over，你全力配合就得，understand？」局長直接下令，處長無法拒絕，縱使他有一籃子的想法。
「呢件事你知就得，其他人唔需要知，唔好畀其他人阻到阿爺做嘢，你仲有年幾就咬長糧，你明㗎喇。」局長以幾近威脅的語氣說完便掛斷了電話，留下滿頭大汗的處長獨自處理這爛攤子。
「處長，咁而家點算？我哋啱啱話組建嘅調查小組仲繼唔繼續？」副處長也將問題拋回給處長。
處長苦思了一會，笑笑口道：「我哋一於將計就計，當阿爺班人就係我哋嘅調查小組，反正條友都肯定講咗畀班散仔知。」
副處長立即拍馬屁：「處長英明。」
