專家的威力
專家訪問的報導出街後，在社會上引起了巨大迴響，社會各界人士對此有不同的反應。
環保團體第一個發聲譴責這件事，認為用環保作為殺人的藉口是人神共憤的行為，重申環保的重要性，但不應該用如此極端的方法去傳達訊息。
商家們則乘此熱潮趕快推出抱怒舜週邊產品，由護膚品到食物飲品無孔不入，沒有買不到，只有你想不到，一時間全城都看到不同商家眼中的抱怒舜樣貌，由形象凶殘到可愛得意都有。
有先見之明的人甚至已經用抱怒舜的名字、形象來駐冊商標、版權，等待商家出資購買或控告對方侵權領賠償。
本身善忘的市民，因為這鋪天蓋地的宣傳，都開始認識抱怒舜的都市傳說，使得支持或反對的人幾何級數上升，造成了社會的對立及分裂，衝突增加，犯罪率上升，社會充斥着不安氣氛。
+x+x+x+x+x+x+x+x+x+x
「大家為Faith鼓掌！」在細小的studio內，總編輯詹爺對大伙說：「恭喜佢成為我哋Fact Check第一個破萬views嘅記者。」
Faith尷尬地說：「咪玩我喇總編，我哋先得三個人，講到以為有幾十人咁，而且都只係得萬幾views，距離我哋目標仲差好遠。」
「你唔好睇少呢萬幾views，為我哋增加咗10k followers㗎，絕對係一個里程碑。」集攝影、校對、排版於一身的雜務OK哥說。
「我哋大大話話都搞咗幾年，而家先有一千個followers，一定要再努力啲去跑新聞，做得pro就自然有人識欣賞，要將最真實嘅事實呈現喺市民面前。」Faith眼神堅定、滿懷信念地說。
「That's right，所以我哋三個先咁夾。」詹爺左右手分別摟着Faith和OK哥的頸說：「之前嗰啲奇怪嘢終於離我哋而去，以後就係我哋嘅天下！」
「喔噢！」這已經是今天第三千五百零九次響了，是有新留言的提示。至今為止，留言內容主要分三類：擔心自身安危，討論如何自保；支持抱怒舜行使「正義」，視其為偶像並深深崇拜牠；反對殺人行為，認為要將牠繩之於法。
「我認為要繼續調查報導、乘勝追擊。教授畀咗個好方向我，我覺得要調查三個死者背景，揾出抱怒舜揀佢哋嘅背後邏輯，再推測下一個目標，然後跟住佢，等抱怒舜出現。」Faith幹勁十足，詹爺和OK哥也贊成且全力支持。
「死喇，而家成身好似有好多蟻咬咁，好耐無呢種感覺，好有火！我會揾返之前啲針問，你哋記住唔好揾之前啲同事或者行家，呢單嘢我哋要獨家做，發圍睇呢鋪。」詹爺意志高昂，重拾三十年前入行時的那團火。
「有noise當然好，不過引致社會咁大迴響，甚至引起咁多衝突，真係好咩？做傳媒係咪應該要有返啲道德、承擔教育市民嘅責任呢？」Faith眼看社會正發生的事而獨自反思。
+x+x+x+x+x+x+x+x+x+x
「阿旻，你今次錯晒喇，有無睇Fact Check？你仲話係個兇手用都市傳說嚟殺人，根本個兇手就係都市傳說本身，專家都係咁講㗎。」在早會上，同學揶揄阿旻道。
「我有睇，但嗰個係民俗學家唔係犯罪學家，只係單案目前發放嘅資訊同都市傳說似所以佢先話係，佢都無睇過單案嘅其他資料，好明顯係傳媒控制輿論。」阿旻堅持立場反駁道。
「一定係怪物，人根本唔可以咁樣殺人，我信專家，佢係權威，一定唔會錯。」同學對專家深信不疑。
「唉，你呢個權威性人格，可唔可以拎返啲批判性思考出嚟？讀咁多書就係教你要識獨立思考，而唔係盲從。」阿旻雙手攤開道。
「你先係呀，成日要標奇立異，為反而反。」同學反白眼說。
「咁我有無錯先咁耐以嚟？你講、你講！」阿旻以手指攻擊同學的笑穴。
「喂呀！快啲停手，好痕呀！」同學以雙手阻擋，並扭動身體迴避。
兩人一直打鬧，嬉笑聲使得一直置身事外的稀愛也忍不住偷看了眼，敏銳的阿旻注意到後，打算把她也拉進來。
「稀愛，你話，呢個世界邊有怪物，都市傳說都係啲人迷信、揾唔到科學解釋而作出嚟呃細路啫，單案一定係人為。」阿旻停下手，轉身問。
稀愛面對突如其來的問題，差點人設崩壞開口回答，幸好說話到口唇邊時理智上線，硬生生把話吞回肚內，又別過臉望向窗外。
然而，她的內心已經回答了阿旻。
Fact Check的報導，稀愛很早便看完了，連同其他與案件相關的不同傳媒的報導，她都已經全部看過，她的評語都很一致──垃圾傳媒。
每間傳媒都嘩眾取寵，報導與事實不符的臆測，而不是基於事實去陳述，肆意渲染血腥，刻意製造社會恐慌，加大社會矛盾，使得人人對立，社會不再平靜安穩。
然而，這也不能全怪罪於傳媒，畢竟是顧客主導的市場，顧客喜歡看甚麼，傳媒自然便報導甚麼。可是，造成這局面，傳媒也責無旁貸，因為顧客的胃口都是傳媒養出來的，可以說目前的傳媒生態正是雙方互相影響之下的產物，亦正正就是稀愛痛恨這個社會的原因。
「呢個世界真係太多嘢要整頓。」稀愛緊握雙拳、憤世嫉俗地想。
「稀愛，你認為兇手下個目標會係邊個？」阿旻鍥而不捨地向稀愛搭話。
稀愛回望了一眼，還是沒有回答。
「點解你咁鍾意撩佢嘅？明明佢都唔理人。」同學不解地問阿旻。
阿旻一面理所當然地回應：「梗係問佢喇，佢咁叻，見解一定好獨到，近朱者赤，我好想知天才嘅諗法，學佢點思考，喺佢身上一定有好多啟發。」
直到上課的鐘聲響起，稀愛都沒有搭理過阿旻，以及其他的同學。這只是稀愛的又一個平凡上課日，她的心思從來都不在學校上，身為學生的她，靈魂和思緒很早便已經飄到連環凶殺案上。
+x+x+x+x+x+x+x+x+x+x
「搞X錯！記招都開埋，啲記者仲係亂咁寫，怪咩物？成件事越描越黑，我哋警隊仲有威信嘅？」警務處處長大發雷霆。
「都唔係全部咁寫嘅，你睇吓呢份，『破除迷信 警方誓破連環凶殺案』，仲有呢份，『開埠以來最大挑戰 處長：兩星期破案！ 』，呢兩份都正路。」副處長立即舉例，希望能平息處長怒火。
「幾十個唔同傳媒，咪就係得呢兩個正路啲，其他都嘩眾取寵，下次淨係畀呢兩個問嘢。」處長怒髮衝冠，比之前有過之而無不及。
「我建議喺我哋嘅social media每日都出post跟蹤報導呢單嘢嘅最新發展。」公共關係科madam提議：「一方面可以推吓我哋嘅social media，等多啲人follow；另一方面又可以控制資訊嘅流通，唔會有失控嘅情況。」
處長想了一想，認為這亡羊補牢的方法效果極微，但卻是現在唯一可做的事，故此批准了。除此以外，他同時要求透過大眾傳媒幫忙澄清，因為這樣會顯得更中立。
「處長，除咗揾傳媒，不如揾埋KOL，佢哋嘅影響力唔會比傳媒差。可以想像到嚟緊會有更多KOL出嚟蹭熱度講呢件案，揾定呢班人幫手出片，隨時可以改變輿論。」公共關係科madam再提議。
「交畀你去處理，我而家要去揾局長同特首報告。」處長拋下最後一句話便離開。
「你諗住揾邊啲KOL？」副處長坐在處長座位問。
「我本身有幾個相熟，而且平時都係比較中立，唔係擺明撐警撐政府嗰啲，我諗呢啲效果會好啲。」公共關係科madam說：「而本身親我哋嗰啲我都會揾埋，咁就萬無一失。」
副處長點頭稱讚，然後便讓公共關係科madam離開，好讓自己能獨享短暫的「處長時刻」。
+x+x+x+x+x+x+x+x+x+x
「而家狗屎垃圾都話自己係專家，出嚟亂噏廿四唔駛負責，搞到啲市民信以為真，自己嚇自己製造恐慌，最後埋單嘅都係我哋。」鐘仔埋怨道。
「唔好咁多怨氣，我哋職責係盡快破案，其他嘅嘢唔到我哋理，破咗案啲人就唔會記得嗰啲謠言。」劉sir召集他的隊員：「全世界去會議室開會，係時候交功課。」
會議室內，每個組員都向劉sir報告自己的調查結果，可是都沒有甚麼新的發現，只有劉sir和阿查有新方向，於是全部人便專注在這新方向中。
「我哋懷疑後巷唔係第一案發現場。」阿查說：「因為喺現場真係乜蛛絲馬跡都無，於是我同劉sir再睇埋死者最後現身嘅地方，發現咗啲嘢。」
阿查拿出做了不同標記的地圖，續說：「我哋發現死者最後現身嘅地方同屍體被發現嘅地方，車程要半個鐘左右，但驗屍官話佢哋嘅死亡時間同屍體發現時間接近一樣，即係十幾分鐘就去到半個鐘車程嘅地方。」
「十幾分鐘去半個鐘車程之外嘅地方，十足推理小說嗰啲不可能犯罪咁，啱晒你喇，阿查。」四眼調侃道。
「係囉阿查，平時你睇咁多，一個定有類似嘅，有咩方法可以做到？」飛機問。
這可考起了阿查，他摸着後腦苦惱起來，對着地圖完全沒有頭緒。
「點計都好，好彩到全部綠燈，由落車點到屍體發現嘅地方，車程快極都要廿五分鐘，無可能十幾分鐘就到，仲要唔係揸車……」阿查口中唸唸有詞。
田雞看着地圖，打趣地問：「你點知車程要半個鐘？你試過？」
阿查搖頭，向田雞展示手機地圖上的駕車預計時間，怎料田雞一看到便笑了。
「喂，揸開車都知唔好用呢個地圖，用佢出事㗎，大把新聞都報過。」田雞拿出自己的手機操弄一番後放到阿查面前說：「用呢個喇，你睇吓，條路線都有啲唔同，二十分鐘就到。」
此時老大也插嘴道：「你睇吓呢條路，十分鐘唔駛就到。」老大指出的是一條非車行的小路，路線簡單直接，不用繞一大段路，小隊的人都因而得到了全新的啟發。
「係喎，老大你真係突破盲腸，點解我咁都無諗過？」阿查佩服之餘，不忘找另外兩宗案件的地圖查看，發現全都是十分鐘內便能步行前往。
「四眼同田雞一組去第一條路，飛機同老大一組去第二條路，鐘仔同阿查同埋我一組去第三條路，我哋要揾呢三條路嘅cctv，一定要捉到個兇手。」劉sir立即下令道。
眾人分頭行事，親自行一次三條路，除了測試時間之外，也看看沿途有沒有閉路電視。
「點解唔講埋賈子嘅睇法畀班手足知？」路上，阿查不解地問劉sir。
「雖然佢講嘅嘢好make sense，亦都完美咁解答晒我哋目前遇到嘅問題，但佢全部都建基於兇手係怪物而唔係人上面，試問我哋又點可以採用？外界嘅人只會認為係我哋辦事不力，所以亂作故仔嫁禍畀唔存在嘅事物。怪物作案呢啲咁異想天開嘅想法，畀班手足知道，影響到大家嘅判斷，咁就真係唔駛旨意破案。」劉sir解釋道。
阿查死心不息再問：「咁我哋唔提怪物，當係我哋自己諗到嗰啲問題嘅答案，提出嚟大家再諗點樣實行到呢？」
「我哋係真人警察唔係卡通片偵探，我哋係基於事實證據去拉人，而唔係胡亂揣測完再去證明自己啱，唔好睇完啲卡通片就當真！」劉sir語氣明顯加重，阿查意識到不應再糾纏在這問題上，最少目前情況是這樣。
