1. 敗仗

「你直接叫我英文名就得,Eve。」
我打量緊學校新嚟嘅阿Sir, 24歲,普通身材普通樣,不過唯一一樣野好吸引我。
佢怕怕醜醜,好容易面紅。

我會經常幻想,如果自己主動誘惑呢班怕羞又慢熱內向,同時又有少少毒撚性格嘅男仔,結果會變成點,呢班人係咪唔夠膽對我出手,到頭來可能淨係換咗句「Eve同學請自重」,希望佢唔係咁普通嘅懦夫。

由佢前日入嚟呢間學校到做,我已經無時無刻咁觀察緊佢一言一行。今年課中史,學校就係請咗佢嚟教,巧合地,我嘅elective都有揀修中史。

我絕對唔想成為啲好pure好cute好charm嘅女學生去引起佢注意。相反,每次叫我答問題嘅時候,我只會用一種好冷靜嘅態度去應對,我從來都唔會喺佢面前笑。冇錯,我就係要扮成好憂鬱,好冷靜嘅女學生,咁先可以突圍而出。

我希望佢可以漸漸留意到我嘅不尋常,再主動問我生活上係咪遇到有啲咩困難同難題,點解成日都咁悶悶不樂,唔開心可以搵我傾吓計。
但唔好意思,已經過咗三個星期,以上我所講嘅從來都冇出現過。

「呢條友真係唔識㗎喎⋯⋯過左成幾個星期都留意到你嘅異況。」
同我講呢句野嘅人係阿布,我同佢雖然唔係無所不談嘅關係,但係正正就因為我哋知道對方諗緊乜,所以通常都係無需多講只需做,係呀,佢得閒就會幫我做功課,佢都係好仔嚟,但我對佢呢啲外向型男孩完全冇興趣。

「過多幾日啦,過多幾日佢唔行動嘅就到我行動啦。」

「今次你又諗住玩咩花招?」

「普普通通試水溫,小試牛刀一下囉。」

如你所料,就算過咗幾日,我同佢嘅互動都係靜過水。

冇計,睇嚟都係要用嗰招。

「下堂記得交功課,好啦,各位再見。」

我等晒全部人走,成個課室得返我同佢,佢見我好耐都冇行動,主動行過黎問我一句。

「Eve,今日…今日上堂嘅嘢你都明㗎可?」

我冇回答佢任何野,只係俾咗一個好簡單嘅表情佢。
就係咩都冇做,抬頭望住佢喊,一滴…兩滴.…

如我所願,佢真係手足無措,打算喺褲袋拎紙巾俾我,點知冇帶。

呢個時候,我梗係要故作堅強咁忍住眼淚,因為呢一步先至係令佢更加心痛同情我嘅昇華階段。

但係我冇諗過,佢同我想像中嘅反應出入好大。正常嘅成年男人(狗公?)都應該會即刻攬住你,問你有咩事。

「咪再喊,我真係趕住收工,搵唔到紙巾俾你,呢度$5,你去樓下部機有賣。」

話口未完,佢放低咗$5就拎埋啲書走咗出課室。個$5仲要唔係$5銀,而係一蚊一蚊一蚊四個五毫子,孤寒到死…

我冇諗過咁都輸,成個感覺好似你諗住打大佬,覺得自己齊晒裝備,第一關應該輕鬆秒殺垃圾小怪,但點知你竟然係比小怪反殺。

我第一次輸得咁冇面。