06 擁抱
地點：海濱
時間：12:40am
散場嘅人潮陸續散去，浠文仍然企喺P入口。佢好攰，軟弱無力咁挨住圍欄。
時間已到凌晨，浠文好似仲未有返屋企嘅意慾，仲一直喺度等緊林sir。
呢一刻，林sir除咗加倍自責之外，更加唔放心佢自己一個人。特別巴士線尾班車都已經開走咗，浠文住咁遠，點返屋企？
佢過唔到自己嘅良心，於是拖住沉重嘅腳步行過去。
佢好驚行過去之後，所有嘢都會變，尤其佢同浠文之間嘅關係。佢提住自己，要謹守防線。而家，佢只係一個，喺深夜見到學生一個人喺街，走過去關心學生嘅老師，謹此而已。
林sir外表冷靜，但其實內心已經激動到手震。佢停喺浠文面前，有好多嘢想講，但係壓力令佢咩都講唔出。
浠文冇理到自己喊到面紅耳熱好醜樣，佢一見到林sir，就會不自覺、慣常咁露出笑容嚟迎接林sir，就算聲音有啲沙啞，就算帶住顫抖：「你終於嚟喇？等咗你好耐喇。我仲以為⋯⋯你⋯⋯唔會嚟⋯⋯」浠文嘅笑容唔到兩秒，再次崩潰，將呢幾個鐘嘅疲憊、委屈，一次過爆發出嚟。
林sir見住佢狼狽、崩潰嘅樣，心痛已到極限。一直被壓抑住嘅愛意，喺呢一刻徹底決堤。 佢冇講嘢，踏前一步，不顧一切咁，將喊到歇斯底里嘅浠文，緊緊抱入懷裡。佢合埋眼，強忍住心痛引發嘅鼻酸同淚水。
專業嘅冷淡，最終變成溫暖嘅懷抱。
但係呢個擁抱，只限今晚。
——
（完）
