04 放手

地點：課室（考試完結）
時間：11:45am

學生交卷後，極速收拾文具，興奮咁放學。浠文特登喺同學未走晒嘅時候，走去林sir面前大大聲講：「林sir，我有嘢問。」

林sir作為一個老師，呢一招，令到佢唔可以無視浠文。

佢借執拾為名，退後咗兩步，將佢哋嘅距離拉返開：「係，咩事呢？」

「你等一等，等我拎出嚟先。」浠文放咗個書包喺枱面，打開，喺入面搵嘢。但係佢搵咗好耐都搵唔到，甚至倒晒書包入面嘅嘢出嚟搵，皺住眉：「點解唔見咗嘅⋯⋯？」

林sir耐心咁等到課室得返佢兩個，佢先同浠文講：「呢位同學，老師嘅時間好寶貴⋯⋯」

「呀！」浠文終於喺一本記事簿入面搵到兩張演唱會飛，興奮咁遞咗一張畀林sir：「你睇吓～我買到呀！」

喺半年前，佢曾經喺班上面分享過，自己搶咗一朝都搶唔到YOA嘅演唱會飛，然後講笑咁講，演唱會嗰日要喺海濱圍欄出面紮營偷聽。

林sir見到係YOA嘅演唱會飛，佢真係好感動，望住浠文，唔知講咩好：「你⋯⋯」

「唔係黃牛嚟㗎，係我爸爸做嘢嗰度可以攞到飛。」浠文笑得好天真：「我哋一齊去吖！好唔好？」

林sir真係好心動，但係，佢知道佢應該做咩，決定要拒絕浠文：「我唔會去。」

「點解呀？你唔係超級Fans嚟咩？YOA喎，唔通我記錯咗？」浠文雖然打定輸數，但佢親耳聽到呢個回應嘅時候，真係好失望、好唔開心。

「你記錯咗。」林sir捉實疊試卷，同自己講要堅定：「放學喇，我要開會。」

浠文忍受唔到林sir次次都咁樣走咗去，今次佢拉住林sir隻手，死死拉實唔放：「一齊睇吖⋯⋯好唔好⋯⋯？」

林sir手掌心入面，係浠文細細隻嘅手，好軟柔、好脆弱，好似大力少少都會整痛佢咁。佢完全唔敢擰轉頭望佢哋握住嘅手，但嗰股熾熱嘅溫度，已經由掌心走遍全身。

儘管如此，佢都提住自己，必須狠下心腸，如果唔係，只會兩敗俱傷。

佢將浠文嘅手指，逐隻逐隻放開。

放手，離開，一句說話都冇留低。

——