02 冷淡

地點：教員室門外
時間：小息 10:30am

浠文對住教員室嘅廣播咪：「老師早晨，唔該我想搵視藝科林sir。」

喺教員室入面嘅林sir聽到浠文把聲，心裡面沉咗一下。尋日就咁掉低咗佢喺課室，今日，到底要點樣面對佢？

原本佢想繼續逃避，扮唔喺位就算。但係佢再聽到多一次「老師早晨，唔該我想搵視藝科林sir，交功課」嘅時候，嗰把聲音無形中吸引住佢。

林sir深吸一口氣，硬住頭皮走向門口，喺門上面嘅小窗口見到浠文。浠文一見到佢嘅身影，即刻露出毫無防備又可愛嘅笑容，就好似平日咁，永遠都開開心心嘅小女孩。

小女孩，林sir意識到浠文只係一個小女孩，即刻將眼神移開，唔敢再望住佢。

門打開，浠文雙眼發光。佢每一次見到林sir，都會好開心。今日都一樣，見到林sir之後，尋日嘅委屈一掃而空：「林sir，我收齊晒啲草圖喇，科長叫我拎落嚟畀你。」

林sir接過功課，注意力放喺疊功課上面，數數有冇交齊，冷淡回應：「下次叫科長自己嚟交畀我。」

「但係我想見到你。」浠文上前一步，聲音細到只得佢哋兩個人聽到。

林sir扮聽唔到，抱住厚厚嘅功課，可以令佢暫時壓住同掩飾內心嘅不安：「呢度齊喇，唔該晒。」講完之後，頭也不回走返入教員室。

浠文只能夠好似尋日咁，望住林sir嘅背影消失。

冷冰冰嘅門，將兩個人狠狠咁隔開。

喺人來人往嘅走廊，浠文緩緩抬手，用指尖輕輕摸摸下唇。嗰度，似乎仲殘留住尋日失控嘅溫度。呢個心動嘅觸感，佢永遠都唔會忘記。

不過，佢哋嘅距離，並冇因為親吻而近咗。

——