一早想寫篇分享講吓農夫好耐，但小弟懶同埋驚自己文筆唔多好。點解會聽農夫，又係因為我家姐鐘意聽，聽吓聽吓自己又OK接受，依家等小弟由第一隻大碟月下思開始評吓農夫嘅音樂。
《月下思》
C君同6永未搞農夫之前，係system map嘅主音，主要玩nu metal為主，不過小弟對前期system map所知甚少，最近壹週刊有農夫訪問，佢哋講當時indie時期嘅辛酸(佔嘅片幅極少)。
有師兄知道多啲嘅可以喺度分享吓，農夫未紅時，係三人組合，有女成員Gigi，音樂大亨隻碟已經離隊，比較可惜。FAMA農夫頌係農夫佢哋自我介紹，訴說自己組合音樂理想，最標誌性一句「農夫呢幾個人無乜大志」。呢隻碟嘅check 2 da sea尤如FAMA農夫頌國際版，搵埋東南亞有名rapper一齊合作，大家分享自己點解做rapper。港人自講批判當時香港社會生態，Rap詞聽到人想移民。菩提本無樹探討hip hop本質，同埋香港rap同hip hop未來走向，寫得幾有意思。
有首咳，係農夫兩個人玩beatbox，夾埋落街無錢買麵包歌詞，玩得相當有型。成隻碟有首最兒童不宜嘅歌，係最緊要扯旗。講男人最唔想講嘅話題︰性無能 ，rap詞寫得抵死同尖酸。no. 10000係成隻碟最沉重嘅一首歌，講一位邊緣青年墮胎，最後guitar solo 帶動到人嘅情緒。成隻碟相對農夫後期大碟係較為hardcore，可惜之後為咗打入主流樂壇呢隻碟嘅風格基本上無哂。
推介︰fama農夫頌、咳、菩提本無樹、no. 10000
《鄭永芝》
同女vocal gigi合作嘅最後一隻專輯，其實得十七年華gigi先有份參與，可能理念不合或者覺得無可能紅到走咗。跟隊唔該充滿玩味，有段農夫兩人扮周杰倫唱腔相當過癮，首歌講籃球場眾生相，多了份嘻笑怒罵。teen power奧運會同跟隊唔該玩得更加盡，過馬路、搭地鐵變成體育項目，偷渡變咗三項鐵人。農夫係你老死同陳奐仁合作，rap詞主旨係同人做朋友唔駛咁多規範，陳奐仁把vocal嘅詞可算係成首歌神來之筆。
十七年華風格上同前一隻碟no. 10000相類似，借少女輕生嘅新聞，批判傳媒同香港人善忘。Rap詞講個少女俾老豆性侵犯但係無人信佢，最後自尋短見，之後同類型歌曲買少見少。
菩提本無異同LMF嘅MC仁合作，相當有火花，係菩提本無樹續集。
成隻EP風格同之前月下思已經大大不同，變得pop咗。額外提提跟隊唔該remix版有陳冠希獻聲，成首歌差唔多rap詞由頭錄過。
推介︰跟隊唔該、teen power奧運會、農夫係你老死、十七年華
《音樂大亨》
應該係農夫佢哋最成功嘅大碟，音樂元素相對前兩隻專輯而言係豐富咗。有folk嘅愛似林一峰，偏jazz風格嘅big band編曲全城盡慶(其實樂器電腦整出嚟)。metal嘅i love you bandz，456wing首歌sample咗陳百強首喝采。仲有首同俾人摑幾廿巴嘅王浩信合作嘅Baby Boy，rap詞裡王浩信同農夫三個人一齊俾女人玩。
農夫係你老死喺呢隻大碟係重新錄音，比鄭永芝嘅版本嚟得神秘。編曲加埋Beatbox，vocal變咗第二位女人唱。陳展毅歌尤如之前十七年華、no. 10000嘅灰色調子，不過歌詞相對變得正面同積極。走先係C君懷念佢嘅亡父，感情真摯，難得唔係rap係唱。再見fanz係送俾農夫fans，當時農夫覺得佢哋無出頭天寫到好sad(點知依家真係好似歌詞咁唔再出碟)。
成隻大碟風格變得令主流大眾更容易接受，銷情當時好到不得了，好似Beyond出嘅《秘密警察》要轉風格先有人理…
推介︰456wing、陳展毅歌、全城盡慶、愛似林一峰
《風生水起》
呢隻大碟水準同《音樂大亨》比係無咁好，而呢隻大碟開始農夫亦都開始紅起嚟。溫故知新係將之前農夫啲歌重新mix埋一齊嘅串燒歌(係無月下思嘅歌)，fans聽到應該會好感動，或者會有人覺得喺度呃鐘。風生水起搵麥玲玲一齊rap，rap詞麻麻地似玩綽頭多。而八無禁忌相對風生水起較為精彩，串盡娛樂圈同埋八卦雜誌寫得就寫，編曲出奇地係粵劇feel。學海無涯同日出而作，rap出打工仔同學生哥心聲，日出而作個feel令人諗起Radiohead No surprises(其實兩者係唔同)。十年人事算係港人自講嘅續集，特別搵埋陶傑feat.，歌詞講沙士、金融風暴，仲有懷念羅文、張國榮、梅姐03年逝世，同時有對香港前景嘅憂慮同埋現況嘅無奈。
全民皆估依家聽番，似係諷刺當時香港羊群效應，因為呢首歌出咗之後，嚟個金融海嘯。樂而忘返又同之前456wing玩致敬，今次Sampling羅文首激光中，盡情娛樂卻不能令自己快樂。肉麻無罪係成隻碟唯一一首情歌，陸永唱冧歌算有一手，rap寫得幾肉麻吓。
錯中復習將之前首最緊要扯旗重新編曲同填詞，玩番之前音樂大亨DJ Galaxy's Dictionary。最後有首志雲悶局，聽完笑到癡線。
推介︰八無禁忌、學海無涯、日出而作、十年人事、樂而忘返
《富甲天下》
唔駛講，最差大碟！農夫有講過08定09年係佢哋最懶嘅一年，可能咁樣成隻碟rap詞寫得好Hea…
富甲天下係金融海嘯後仍然逆境自強，u jump i jump同值到爆有少少交行貨feel。無問題反而係成隻大碟rap詞最好嘅歌，警醒香港人對社會上發生嘅問題別再視而不見。呢隻大碟又係有情歌，水準最好嘅係歡天喜地，歌詞同唱都係相當窩心，編曲係食軟雪糕嘅莊冬昕，正正常常之下幾耐聽。話太普通係國語加廣東話rap詞，我就麻麻地…
run cmd編曲中國風，略嫌太擦鞋。答案有三個同臭朋友係小弟呢隻碟最唔鐘意嘅歌，臭朋友寫得無聊，答案有三個真係好似農夫所講，格硬塞多一首歌入隻大碟。最後隻demo錄音雖然粗糙，但係農夫佢哋唱得好狂野，整隻碟呢首歌最驚喜。
推介︰無問題、歡天喜地、....
《o'fama》
呢隻大碟可以話係農夫回勇之作，搵咗外國音樂人作曲。i believe u can fly rap詞少見狠辣，鬧盡人嘅虛偽，比《月下思》大碟任何一首歌更狠！
眠眠rap詞香港人聽完係會心微笑，平時生活太多嘢忙，無時間瞓。信不信由你借當時兩單新聞道盡世間荒謬，同對香港社會嘅不信任。dream girl未遇到理想情人到找到之後嘅夢醒，略嫌旋律重復無太大變化，就算有陳冠希都救唔番首歌。24對人生嘅反思，農夫寫嘅詞開始成熟。窮得只剩錢，一個失落打工仔同露宿者訴說生活辛酸。娛樂圈殺人事件講娛樂圈制度點樣扼殺人嘅靈魂，只顧著名氣同金錢…
點題歌o'fama對樂壇幫過農夫嘅人致謝詞，後段真係好呃鐘feel。成隻碟水準好過之前富甲天下同風生水起，不過超越唔到《月下思》。
推介︰i believe u can fly、24、信不信由你
《奇蹟》
農夫喺CMD最後一隻大碟，之後同DJ tommy離開CMD。陸永、C君各自一隻CD，講C君隻CD先，偉大航道係大人講俾小朋友成長經歷。吹摯友發生喺酒吧有趣嘅小插曲，同方大同合作。方大同不斷唱「不太熟」(似係C君認錯人)，C君不斷吐苦水，效果唔錯。good people講普遍人對自己細路講一套做一套，越聽越唏噓。rap along song，歌詞講農夫依然堅持自己嘅音樂理想。
陸永隻碟略遜於C君隻碟。我要打多支道盡成長時青春一去不復返。寂寞是最無敵，中國風編曲。韓國勁舞權k pop style好似陸永話齋，打入韓國女生市場，歌詞寫得抵死。
愛 不愛我，王苑之唱得幾似王菲，陸永喺首歌訴說被一名女子玩弄感情(陸永話佢首詞諗好耐，王苑之反而五分鐘寫完首曲)。
光行紀陰謀論滿天飛，普遍人未必受落。問題兒童，以小孩角度點出成人社會種種荒謬。點題歌奇蹟搵埋黃秋生合作，首歌講乜，家人永遠對自己最好。
推介︰偉大航道、吹摯友、rap along song、愛 不愛我、問題兒童
《雙囍臨門》
成隻碟農夫包辦曲詞，mastering喺美國STERLING SOUND(其實無必要咁做，音效同之前香港做Mastering嘅大碟無太大分野)。
重新找到你少有唔rap，唱歌咁樣唱，唔錯嘅嘗試。複製人道出社會制度不容許有獨立思考嘅人，將每個人變成一個個「複製人」。hi auntie引用高登文化，作詞麻麻有少少hea。有型仕dj tommy有份編曲，turntable玩得型。
雙囍臨門結婚擺酒本末倒置，鬧埋玩新郎新娘文化，聽完令人哭笑不得。狼狗羊串盡樂壇將音樂人作品左改右改嘅荒謬，農夫喺首歌扮mc jin、LMF、24味同周杰倫。你的志願講要重拾兒時志願，後段編曲加埋小提琴同埋農夫啲朋友講兒時志願。最後首同伴rap詞向哥哥首stand up致敬，係送俾送俾農夫fans嘅歌。
推介︰重新找到你、複製人、同伴
暫時係咁多，最後兩隻碟我未聽…
註︰幅圖嚟自《富甲天下》大碟
