「我想問吓你，到底香港仲剩番啲乜嘢？」這個問題已在我心裡存在很久，到了林鄭母語論一出，自己實在忍不住要問問眼前的友人阿兆。他右手手指托起眼鏡，眼神帶點猶疑。這個問題一時三刻難以解答嗎？
「好難講，仲有一國兩制啩？另外，我哋仲可以講廣東話，聽廣東歌。阿頌，不如你講吓自己點睇，唔好得我講。」他望著我回應道，但是其答案我不太滿意。
「一國兩制？依家香港就嚟變一國一制！高鐵九月就嚟開，高鐵站範圍好似變咗中國內地領土，實行內地法例！嗰班議員就係咁樣當年將香港一塊土地割讓俾上面大陸，無聽過我哋意見！都唔算無聽過，我老豆仲話對香港係好事，增進就業機會！我心諗，都癡鳩線嘅，屌！」聽到一國兩制，我猶如被人觸怒似的，激動的向著阿兆叫道。我將眼前友人嚇得呆若木雞，才知道自己言行過火了。
「唉！高鐵，即使我哋再搞一次遊行，有人絕食抗議，政府照樣格硬通過！今日生癌嗰條友，叫馬主席，講乜嘢一地兩檢！佢話班反對嘅議員咪鬼阻住個地球轉，條契弟憑乜代表全球人？計我話，馬主席同背後中國政府先係阻住地球轉！又話直接可以從香港直達大陸，依家又話去到廣州又要另外買飛，真係當我哋香港人戇鳩夾白痴！」阿兆對著我吐苦水，我無奈苦笑回應。
「阻著地球轉，係呀係呀。以前成日話後生仔係社會嘅棟樑，依家想拆鬼咗佢。點知道老一輩裁培我哋，只係想我哋好似隻狗咁聽聽話話。要求少少正常嘢，班老嘢就起哂鋼！雙普選，撤回831決定…唔識點講！嗰次革命，一嘢睇穿邊個係走狗，邊個先係正常…」我一邊說著，一邊拿著啤酒罐。將啤酒灌進喉嚨，使我感到一陣昏厥。
「講吓第二樣嘢，我依家先知道香港母語唔係廣東話。政府仲引用…唔係香港人嘅教授寫嘅垃圾論文！屌！講嗰位特首同教育局局長係香港人嚟。呢兩個人，為咗名利將自己尊嚴賣咗俾習大大！我發覺自己之前講嘅嘢同依家講嘅有少少自相矛盾，一國兩制就嚟玩完，廣東話可能無得再講…」阿兆拿著啤酒嘆氣。
「有議員問林鄭母語係乜嘢，佢話唔答啲咁無聊嘅問題！真係笑咗！原來母語係一樣咁無聊嘅嘢。佢哋為咗推行普通話，矮化廣東話已經做到咁核突嘅地步。死啦，我有啲想嘔…」突然感到一陣反胃，我快步奔向廁所。於那裡發洩所有不快後，我回到客廳與阿兆對酒當歌。
「我諗起之前套戲十年，唔識講普通話嘅人生存空間越嚟越細！的士佬唔識普通話唔俾去某啲地區載客，仲要望住個仔被逼講普通話。有個議員話套戲係危言聳聽…議員講嘅說話越嚟越唔可信。另外，搶手機嗰位許生被人拉咗！」阿兆突然提起早前搶去政府人員手提電話的許議員，提起那位泛民議員，實在…不予置評。
「嗰個…之前講殺無赦嗰位何生到依家都無事，而呢位許生就咁俾警察拉咗！民建聯原來真係有免死金牌！之前蔣麗芸搶咗長毛鳥籠都無俾人拉，結果條八婆到依家仲做緊議員，而長毛就俾人DQ！世界變囉！」我掩著面對著阿兆說著。
「喺依家呢個世道，做正常人係無運行架！要識去投共，就會平步青雲。不過我就唔識出賣自己尊嚴，所以咪好似你咁喺度鳩吓鳩吓！仲有，廣東歌越嚟越無新意！嚟嚟去去都係嗰幾味…」阿兆將話題轉到廣東歌，令我不知所措。
「廣東歌？見住醫神新歌唔再係廣東歌，我就知道廣東歌正式接埋！都唔算接埋嘅，我另外一個friend話香港indie仲有正嘢！我依家淨係聽歐美樂隊舊歌…」我對著阿兆表達對廣東歌的失望之情。
「以前廣東歌好勁架，八十年代紅到去韓國！以前韓國仲係未開發，點會估到依家佢哋過咗我哋頭，依家班香港妹妹仔聽K-Pop聽到上腦。投咗共嘅Alan好似喺八十年代尾去日本紅白唱愛念，點解依家香港廣東歌同文化咁折墮？個個人一聽到香港出品，就耍手擰頭？」阿兆搖著頭，帶著哭音說著。
「唔知點解…講開又講，香港依家好少純正港產片。個個電影人為咗搵錢，走去拍大陸爛片，或者係合拍片！大陸爛片我就唔鬼睇嘅，合拍片？赤道真係睇到我要爆粗，乜鬼嘢ending嚟！仲要作狀過寒戰！如果合拍片套套都係咁嘅衰款，不如咪鬼拍！」我右手大力拍打木桌怒叫著，看來我真的醉了。
「港產片仲有正嘢嘅，我去攞酒！聽日好似禮拜日，可以狂飲！」阿兆走去廚房。
「香港，究竟仲剩底乜嘢？唔好諗啦，今朝有酒今朝醉，飲呀！」我將眼前餘下的啤酒一飲而盡。
