05 執著

地點：海濱
時間：7:00pm

「我喺P入口等你，不見不散。」

林sir嘅電話，傳嚟浠文嘅短訊。一字一句，都直接擊中林sir心中要害。

喺M入口嘅林sir，腳步不自覺走向P入口，懷住複雜嘅心情，見到浠文，左顧右盼咁等自己。

好多一對對嘅情侶，一班班嘅朋友咁入場，浠文得自己一個人，拎住兩張飛，心急如焚咁等待唔知會唔會出現嘅林sir。

「你係咪未到？入緊場喇。」

「聽講好多周邊都賣晒喇，你想要咩？」

「差唔到入晒去喇，你喺邊度？」

「就嚟開場喇，不過唔緊要，遲到都可以入㗎～」

觀眾已經入晒場咁濟，場外只得零星遲到嘅人、路人，同埋一直都企喺原位嘅浠文。

「我仲等緊你。」

「你係咪唔會嚟？」

浠文傳完呢個訊息之後，望住手上面嗰張無人認領嘅飛，眼淚不受控咁跌落嚟。佢抹一抹面，索一索鼻，不時都周圍望，仍然希望林sir會出現喺自己面前。

浠文一個人企咗成晚，海風將佢嘅頭髮都吹亂晒。平時整齊企理嘅浠文，完全冇閒情逸致打理亂晒嘅頭髮。佢由希望，等到絕望，再等到眼淚都就快流乾。

陪住佢嘅，除咗由場內傳出嚟嘅微弱音樂聲，仲有喺遠處陪佢罰企嘅林sir。

浠文嘅每一個短訊，電話每一次沉重嘅震動，都好似一鎚一鎚，重重咁擊中林sir嘅心。

林sir痛心嘅，唔係入唔到場聽偶像嘅演唱會，而係眼前呢個遙不可及嘅小女孩，喺自己嘅無情拒絕之下，一次又一次咁受傷。

林sir好想衝過去抱住喊緊嘅佢，好想去同佢講「對唔住」。

不過，林sir冇呢個勇氣，去衝過呢個唔夠五十米嘅距離。

——