我可以肯定，全世界最令人討厭既係出木杉英才。
我個花名叫做大雄，因為我讀書又屎、運動又廢、個樣又生得衰，屋企仲要冇咩錢，同多啦A夢入面既大雄係一模一樣，唯獨是我冇黎自未來既機械貓幫手。每日番學，我都活係欺凌、嘲笑既生活入面，同學睇我唔起，老師更加睇我唔起，就連我最心愛既女仔，佢連眼尾都冇望過我。全班入面每一個同學都成為欺凌者，但唯獨係外號出木杉既男班長，佢冇恰過我，反而事事為我著想，功課唔識、冇錢食飯、想做運動都係得佢會理下我。每班上咁多人入面，我最討厭既就係佢，因為佢係一個冇破綻既天才。
胖虎係一個惡霸，佢既世界就只有武力，唔會讀書，唔會講道理。面對呢種拳頭話事既體格強壯型惡霸，我可以做既就只有反抗、被同化或者接受施暴。反抗佢，我一定唔會夠佢打，所以我唔會反抗，我連試都唔會試。被同化成為施暴者，老老實實我又做唔出，因為我都有人性，到最後我只可以日日比佢發洩，日日比佢打獲金。
比佢打完之後，我仲有一招絕招叫做阿Q精神，真係人人都岩用。胖虎依種人頭大無腦，只係識用拳頭，我作為知識份子，斯文有禮唔會同佢計較。佢只係識得恰我依種文人，一畢業佢就知死，我睇下佢可以惡得幾耐，有朝一日我一定會報仇!如果佢冇左拳頭，佢一定惡唔出樣，呢種垃圾我唔使同佢斤斤計較，比佢打下咪算，反而出到去，佢就一定比人打番轉頭，我都無謂出手教精佢。
小夫係一個富二代，完完全全唔會睇得起人，一番到學校就只係識溝女，就連老師都怕左佢。係小夫既世界就只有錢，所有野都係用錢去衝量。溝女?我有錢佢就會自己求我同佢上床。未做功課?我比錢叫同學幫我做。比老師罰?我叫阿媽同校長投訴，出年唔捐錢比學校。你話佢生得唔夠高?佢可以企係一疊疊一千蚊紙上面同你講野，高過姚明都冇問題，因為佢大把錢。
次次比佢串完我死窮鬼之後，我都會用番一招絕招，就係阿Q精神。小夫依種人根本就係一個垃圾，佢有錢都係因為屋企人叻咋，完完全全唔關佢事。如果佢唔係有老豆照住，佢比我更加垃圾!我肯定佢好快就會敗哂老豆副身家，我第時就會叻過佢。錢?我唔希罕，我唔係金錢既奴隸，我唔中意錢，錢夠用就得，唔需要多。我不停安慰自己錢呢樣野，我唔太需要，我最驕傲既地方係成功靠自己而唔係父幹。
但出木杉英材呢?中產家庭，細細個就教學生彈琴搵錢，成績全班第一，有良好品格，連動夠叻，生得夠靚仔。我同佢無任何既牙齒印，我真係諗唔到有咩野理佢去討厭佢，但我心入面真係好討厭佢，但我真係搵唔到一個籍口，搵唔到一個佢既缺點。係唔係佢完美得太有問題呢?
其實人都係一種自私自利，心胸狹窄既生物，憎人富貴厭人貧。但往往人唔係完美既所以你見到任何一個比你叻既人，或者對你唔住既人，你都會想講佢是非，想抹黑佢。當然大部份人唔係完美，所以你往往可以搵到佢既缺點，之後再加以批評，安慰自己做得比佢好。講完依班人既壞話，個心都會舒服小小。好似人地女神唔中意你，唔想理你，或者比好人卡你，你就會話人地睇你唔起，話人地係臭錢，係公廁，但呢個世上邊有咁多臭雞?
但唯獨係幫過你既人，佢對你好好，而且好受人歡迎，成功過你，完成冇缺點，依個人往往係你生命中最討厭既人。或者你會唔認，或者你冇一種好強烈既感覺，但當佢慢慢咁幫你，對你更加好既時候，你心入面就會討厭佢，只要一有機會就想佢死，至少起碼唔會幫佢。
所以每個人心入面，最討厭既人，其實係完美既出木杉。因為你唔想有人活得比你好，活得比你好唔係問題，你冇地方發洩攻擊佢先係問題。所以槍打出頭鳥，唔想死得不明不白既真係要小心身邊人。唔係人人都好似大雄咁天真，心入面嬲下果個事事幫你，為你著想果個出木杉就算。
