細細個睇小丸子果時，最令我印象深刻既就係櫻桃家既生常生活，因為往往同自己既屋企有好大出入，所以特別新鮮同埋好奇。由其是係小丸子同埋爺爺既生活點滴，我會諗自己可唔可以日日都見到阿爺?我又可唔可以同阿爺住?阿爺佢身體健唔健康，係唔係行得走得呢?究竟我要幾好彩先至有一個好似同小丸子關係咁好既爺爺呢?或者人大個左會認為阿爺咁樣對個孫係一種溺愛，但對於一個由細到大都感受唔到爺愛既人黎講，呢套卡通片為我既童年對阿爺既幻想，填補上一點點既色彩。小丸子呢套卡通片，帶比我對阿爺有幾個幻想。

第一，我希望阿爺會係一個識字又好文彩既人。係卡通片入面爺爺得閒冇事就會寫番幾句詩，初初睇會唔知佢係到做咩，但係小朋友對於中文既興趣往往就由身邊人所影響。我會諗如果我阿爺成日係我身邊作詩句比我睇，或者我已經受佢影響，成為一個中文系既學生。阿爺有文彩既，自然講野都會有道理，視野都會闊小小，更加唔存在唔識字就去投保皇黨既問題，至少起碼我大個左之後同阿爺都有共通話題，就算冇話題都唔使因為投邊個候選人而嘈交。曾幾何時我阿爺都係一個老師，成日教我老豆做人道理，就好似小丸子阿爺咁，可惜既係當我懂事之後，佢已經唔似卡通片一樣，可以行得走得，周圍去，同孫仔孫女遊山玩水，呢個都係我第二個都阿爺既幻想。

第二，我希望阿爺會係一個老左都身體健康既人。作為一個老人家，最希望當然係退休之後有番d精神寄託，可以行得走得唔使煩到屋企人。而我一直都好希望自己既爺爺係我細細個果時會陪我玩，陪我出街買野，或者當屋企人要番工唔得閒果時就同我出去遠d既地方旅行。仲好記得小丸子點樣成日叫阿爺買野比佢，阿爺又點樣滿足小丸子既要求，你可以話係溺愛，但適當既愛都係一種幸福。老人家老左難免會認唔到身邊既人，要自己一個人住係老人院入面，日日對住自己既院友，得過時過節可以出去玩下，正正因為佢地行動唔方便，令佢地同家人見面既機會都冇。好多既小朋友因為咁樣，而好難見到爺爺，更唔好話建立進一步關係。

第三，我希望阿爺會係一個全心全意錫自己孫仔既人。呢種錫唔一定係要溺愛，反而係一種心靈上既愛護。小丸子既阿爺事無大小都為小丸子操心，孫女想買件靚靚小小既衫去派對，唔想著姐姐既舊衫，阿爺就會立即買比小丸子。當小丸子有勞作要做，但係佢唔識點做既時候，爺爺就會挺身而出，為小丸子出謀獻策。因為我遲出世，現代既香港人又好小同阿爺住埋，所以當我懂事之後，見到佢地既機會真係少之有少，同佢地其實真係冇咩感情可言。同樣地，阿爺都好難話好似小丸子入面既爺爺咁全心全意去錫孫女，畢竟大家既距離都已經遠左。

但我地係唔係只識得苛求而唔知道尊重同埋孝順?係睇依套日本卡通片，見到小丸子點樣任性地對爺爺同埋阿爺點樣滿足孫女要求既同時，大家又知唔知日本係一個好敬重老人家既社會?我唔係要求大家對住班摧毀香港前途既老人家都要強顏歡笑，我只係想大家關心下身邊既老人家。雖然我做唔到一個被爺爺錫既孫仔，但希望自己可以比老人家感受下做小丸子爺爺，有朝一日比自己孫女錫既感覺。