「阿維，我覺得你個人好陌生啊，完全唔係我以前識既阿維。」各位有拍過拖既巴絲打，都好可能聽過依句說話，包括筆者。我認為依句野的確係難聽過粗口，仲難聽過話你係中國人一樣，但偏偏情侶之間，嘈交時最中意都係講依句說話。話一個人好陌生，唔係因為岩岩同佢識左冇耐或者完全唔識佢，而係在於發現一個識左好耐既人有一種原來你唔知既性格或者行為，令你覺得好陌生，我都可以稱之為期望落差。呢種落差唔係在於拍拖前後既細節轉變，好似以前出街要食西餐，而家就日日茶餐，或者以前就執到成個周柏豪，依家就成日唔打扮，好似grad din毒撚咁出街。呢種落差係在於你永遠都估唔到對方會係咁既人，同時你係討厭依種性格，或者接受唔到。好似你知道男朋友其實係富二代，但扮窮去考驗你果時，你唔會傷心，反而係好開心原來佢咁有錢。
可惜事實上呢個世界冇咁多有錢人扮窮人既例子，有都未必到在座各位份，因為這個機會不是屬於你的。我要講既只係幾個大家或者會遇到既依個問題既起因。
第一，如果你女朋友有睇過你既文章或者藝術作品，佢地第一個反應都唔會贊你叻，反而心中有一種陌生感。如果閣下既作品係大受歡迎，咁你可以暫時飛左幾一段，因為女方第一個反應一定係話你叻仔。但如果閣下既作品同我一樣係一d都唔出名既話，加上女朋友會細讀你既作品，咁佢第一個反應可能就會覺得好陌生。文字最特別既地方係你可以用其他人既角度同埋其他人既意考方式去寫，唔一定係要第一身經歷過，你可以話自己係食家，可以話自己係黑社會大佬，但真人可能只係一個毒撚。但往往因為你係網上面打既野，而令到女朋友會胡思亂想，唔知道你心入面點諗，唔知道你係唔係做緊戲，唔知道真實既你到底係點樣，呢個時候佢就會覺得你好陌生。
第二，如果你同女朋友係由大學開始識既，咁投身社會之後，大家既價值觀或者唔同。大學你可以話係一個小型社會既縮影，但另一方面大學都可以係一個比你避世4年既安樂窩。你可以話大學之間既男女關係不知所謂，係淫亂同埋咸濕，但另一方面大學之間男女既感情都冇咁現實，或者大家都係學生，大家家庭水平差唔多就得，唔使日日煩買樓同埋搵工，愛情自然少左現實既成份。但係好景不常，當大家畢左業之後，見識多左，個人都會現實左，而男方往往係追求理想既一方。男方想自由，男方希望完成自己既目標，佢唔想樣樣既都係錢行先，當佢既夢想達成唔到既時候，會比人話天真，但當夢想達成時，就會為人稱讚，可惜大部份都係前者。女人畢業之後，只要個樣正常都一定有唔少事業有成既人去追求，佢地既條件一定比無家底既freshgrad仔好，呢個時候唔少女方都一定會心動，開始想自己既男朋友為未來打算，努力搵錢，有一個穩定家庭，唔再好似大學果時陪男朋友追夢。男朋友會話「你好陌生，你唔係我以前識既女朋友，之後就下刪一萬字。」
第三，如果你同女朋友係long d，就算日日skype都會有距離感，之後就引伸出陌生兩個字。當對方身處異地，由其係男仔，無論佢有幾愛女朋友，日日都抽時間出黎同佢skype都到，都好難避過女人天生既猜忌性。因為佢永遠都會想像當你唔係佢身邊既時候，你會做緊咩野，係唔係溝緊其他女呢?係唔係同其他女上緊床呢?久唔久之，當你人在異地，有小小轉變既時候，佢都會認為你係好陌生，因為佢見你唔到，佢唔知你點解要轉變。點解你會去打羽毛球既?你係香港都唔會打架喎!點解你會染頭既?你平時係香港都唔會染架喎!但答案只係因為男方心血來潮想轉變下自己，畢竟去到外地如果冇轉變，咁去黎有咩野用?
陌生兩個字最大原因可能就係建基於猜疑同埋不了解，作為對方既伴侶，唔多唔少都要係佢既身邊支持佢，比佢知道你既轉變唔一定係壞事，你既變成點都好，都係咁愛你既另一半，陌生只係暫時性，真正既你依然係好愛佢，當然殺人放火傷害人既就除外啦。但點都祝各位唔好比另一半話你係一個好陌生既人。
