「岩岩有條好樣衰既女同我表白啊!」阿強好驚咁打過黎。
「唔係掛!做咩唔可以發展下，反正你都係a0，出pool等依家啦，佢性格都唔錯，可以試試喎!」我回道。
「唔得既，你都知點解啦，我同佢冇可能架!」阿強回道。
如果有一個你認為條件好差既人同朋友表白，好多人第一個反應就係心中竊笑，之後四圍同朋友講，當係一個笑話。或者係報以一個明知故問既問題，問下當時人點解唔可以接受佢，明顯大家都知道咩原因，因為你的樣子如何，你的命運也必如何。
每對男女或者係情侶都會經過相識，曖昧，好似既會係表白，否則就係留下遺憾，好似那些年一樣。成為情侶就會熱戀，慢慢轉向平淡，到最後就會結或者分。每對男女最愛既都會係曖昧同埋熱戀，但表白先係成為情侶既關鍵。絛數情侶因為雙方收埋情感冇勇於表白，而令戀情告終，最後人生留下遺憾。扒白需要勇氣，因為表白者要承受失敗同失去關係既風險。
但我地係到苦惱點樣同對方表白，或者怯懦緊會失敗既同時，我地有冇諗過條件差既表白者，需要比我地有更大同更多既勇氣?樣衰同埋肥係與生俱來，但因為依d條件，就會令佢地成世冇拖拍，但唔代表佢地冇表白既權利。因為佢地只係想分享內心最真實感受。作為旁人既我地，唔應該笑，更加冇資格去笑，因為表白係每個人既權利。
被表白者呢?好心就收下把口!唔好係到掛住笑。因為被表白者可以拒絕同佢拍拖，但無權利踐踏對方對你既愛意，唔好去奚落對方。筆者都係一把賤咀，但最憎人地周圍同人地講，周圍去笑人，話人地唔自量。愛情世界或者係好璋實，或者係一個弱肉強食既世界，但絕對唔可以或者唔應該去扼殺人地對愛情既信心，因為人心其實遠比我地想得脆弱。
有時候一個大話，好比一隻係冬天送黎既暖蛋，佢可以溫暖人心，令到佢地唔好咁凍，對愛情依然有一絲絲既信心。我地只需要行多一步就得。係笑人地既同時，有冇諗過會傷害到人地?人地又冇得罪你，點解要比你笑?最慘既係，笑既大部份都係旁觀者，當事人大部份都唔會點笑，但呢班唔關事既，就成日加把咀埋黎，仲要周圍唱。如果佢地依然覺得自己冇錯，咁我相信佢地已經同民建聯冇分別，同樣係咁無恥。
表白者唔使灰心，因為你地冇錯，你地有權利去咁做。錯不在你地，因為愛情係冇分對錯，只要唔傷害到別人，你就冇錯。筆者好欣賞佢地勇敢去愛，唔怕失敗同埋世俗既眼光，將自己一直放係心底既心願表達出黎。縱使結果係傷心既，係不如意既，但都起碼唔使再帶著遺憾去過日子。
愛情唔係靚仔同埋美女既專利，愛情係屬於每一個人。我唔會係到誇下海口話條件差既人終有一日會搵到真愛，但我可以講既係，佢地唔需要為中意一個人而感到唔好意思，而感到內疚，因為你地冇錯。
希望讀者遇到咁既情況，唔好再加油加醋，因為當事人都未出聲，我地邊有資格出聲?可以有勇氣表白，係一種福份，因為你仲有氣有力，而你心愛既人仲生存係世上，一切安好，縱使得唔到佢既人，都可以係遠處祝福佢。被表白既人，你都好有福氣，因為證明你有一定既吸引力，證明有人係遠處默默咁守護你。
