從前，喺一個好大好大嘅星球上，南北兩端各有一個國家，彼此互不相連。南方只有男性，北方就只有女性，所以南北兩國無可能獨自生存。
要生存就要繁衍，但係由於兩國之間有著一個個活火山，令聯繫充滿困難。兩個國家唯一接觸嘅途徑，就係一年一度七月嘅相親大會。
喺嗰個月火山爆發次數較少，計算路程時間後，被選中嘅男女會有七日時間結識、相戀、性行為，直至懷孕。
拍拖變成救國救民嘅任務，夫妻結合成為維持和平嘅唯一工具，男方一切求愛步驟都係先計劃清楚，女方只要稍有好感就會欣然接受。
咁樣嘅愛情唔需要醞釀，一來就互相纏綿，一去就廝守一生，男女間沒有感情，互相幾乎冇了解嘅過程，你又點睇？
聽聽下好似唔係好對路？係呀，因為愛情從來係重視過程多於結果。
咩叫愛情？愛情係人與人之間強烈嘅依戀同親近，要依戀要親近，首先要有嘅係對對方足夠嘅信任及認知。
你會覺得七日之間做晒情侶拍拖咁多個步驟，甚至扑埋嘢太快，係因為你唔夠時間睇清楚果個人究竟係一個點樣嘅人。
但係你又有冇諗過，咁樣嘅盲婚啞嫁分分鐘比而家嘅男女關係來得純粹、簡單？
故事中嘅男女只係對彼此缺少理解，然而去到今日，女方會選擇唔去了解，要男方遷就自己果一套。
一個男生鍾意砌高達好正常，一個月買返一兩隻MG返嚟砌唔出奇吖，跟住就比女朋友鬧自己掛住砌模型唔理佢，用多咗少少錢買噴漆又比人話貪玩唔儲錢買樓。
講真，首期一球嘢，噴漆一舊水，有得比架咩？不過你永遠唔會同佢拗。
因為喺呢啲時候，平時金錢至上嘅港女會突然講心唔講金，spin咗件事去「模型同我邊個重要啲」呢個世界級邏輯到，根本冇得駁！
一個男生鍾意打機更加正常，放工之後同朋友打返盤LOL先沖涼訓覺簡直係沙漠中嘅綠洲。
相信好多男朋友都試過推推下最後一座塔果陣無啦啦比女朋友急call，要人即刻做啲乜乜乜，經過內心不斷嘅掙扎，最後say晒sorry走場跑出門口搵女朋友。
因為你知道，你女朋友係唔會明白果座塔嘅意義，喺佢哋眼中，衣褲鞋襪先係有生命，識郁識出招嘅遊戲人物反而係一堆數字。
但係佢哋唔會明白，一場遊戲包含嘅唔單止係遊戲本身，更加係一段段一世都記得嘅友誼。
咁樣走場法，唔乞人憎就奇啦......
一段愛情嘅開始，象徵著兩條原本毫不相干嘅平行線開始有intersection points，生活中原本一大部分時間由自己過變成一齊過，本身就係要學識點樣「走入彼此嘅世界」而互相尊重。
事實上，有intersection points嘅周圍仍然係無重疊，無論男女仍然需要過自己嘅生活，女朋友永遠唔係生活中嘅全部。
但係唔知由幾時開始，男朋友需要為女朋友改變自己，成為女朋友心目中嘅理想男人，將自己嘅生活變成對方想要嘅生活，而唔係大家互相學習點樣鬆弛有度、了解對方。
然而，好多港女就係咁自我中心，覺得男方做得自己男朋友，就需要放棄自己嘅世界，完全成為女方世界嘅一部份。
呢啲唔係叫尊重，係叫霸道，而現實從來都唔係言情小說，唔係每一個男人都欣然接受女方嘅霸道。
點解張曦雯(Pearl Tonight果個靚女)可以因為直播打機而比咁多巴打追捧？
唔係因為佢係華姐冠軍，都唔係因為佢打機比其他女性叻，而係因為有一個經常喺鎂光燈下生活嘅女明星好滿足咁做緊啲本應只有男人先鐘意嘅嘢。
喺而家女尊男卑嘅時代，呢種「終於有個女人明白我嘅快樂」嘅感覺係好難得。
覺得班巴打好誇張？一個高貴有學識再加鬼妹性格嘅華姐冠軍，無數光環放喺佢身上，但係直至到佢而家一連幾晚打恐怖game，打打下比喪屍嚇到瘋狂爆粗，我哋先發現原來自己同華姐冠軍嘅距離未必係我哋想像咁遠，原來我呢個毒撚同高高在上嘅女神可以係同一個世界嘅人。
男人喺講擇偶要求果陣緊係有咁大吹咁大啦，但係去到最後往往娶咗一個唔靚唔有錢嘅女人。
講真，每一個男人，都只係想要一個明白自己做緊乜嘅女人。
做女人嘅，明白點解佢鍾意玩呢樣玩果樣，明白點解佢會有唔同嘅價值觀，明白點解佢會深深地愛上你。
諗通咗，好多嘢都好容易解釋架咋！
