鐵華戰歌，曲終人散。
人人有唔同感受。有人覺得套嘢臨尾暴走爛尾，但係我覺得最後匆匆而過，反而係精髓所在。
「一舉成名很難，身敗名裂太易。」
第一季，鐵華團一步步由宇宙老鼠變成左右大局嘅革命騎士團，帶著火星人嘅希望殺入地球，改變僵化政治格局。革命少女成為議會新希望，鐵華團搖身一變成為無數人崇拜嘅超新星。
第二季，鐵華團一步步由正統軍事組織變回人人喊打嘅叛亂分子，就算係火星人都唔再支持呢班「革命騎士」，容讓「代表政權」嘅號角喺火星肆意設置殺局誅殺團長，鐵華團再180度轉變成為大眾口中嘅「魔鬼」。
面對強權嘅全方位抹黑同打壓，只要你係打破緊「制度嘅正確性」，一個唔覺意就會被排擠於社會認同之外。「禁武」呢一個超越現有武力嘅武器出現唔代表鐵華團同垃圾朱古力必然會輸，然而當強權成功令到主流民意當呢班人係「叛亂武裝分子」，而唔係「革命義士」，鐵華團則敗局已定。
所以，我唔覺得最後嘅劇情需要形容得詳細，亦都唔覺得係爛尾，因為呢個世界就係咁，用四十集時間建立嘅勢力，只要你不容於強權之內，而強權願意不計代價，十集就可以徹底摧毀你。
「若有變革之意念，必先有犧牲的覺悟。」
綜觀兩季，無論係有心定係無意，鐵華團嘅存在意義都係鋪條路俾革命少女上位。第二季佢哋曾經以為可以靠自己打出一片天，可以由做棋子變成棋手之一，然而眼界同身份局限咗佢哋嘅未來，一次又一次嘅錯判令到佢哋嘅能量不斷消耗，直至光華散盡。
鐵華團喺呢套動漫入面永遠都只係被利用嘅棋子，命運從來都唔係掌握喺佢哋手中。佢哋所謂嘅「決定」，從來都唔係自願嘅抉擇，而係「由棋子變成棋手」呢個大目標下不斷為勢所迫嘅折衷。去到最後鐵華團所有人根本唔需要諗自己行緊條咩路，因為強權已經不由佢哋選擇。
事實上宇宙老鼠呢個身份令到佢哋除咗依附權貴做打手之外無第二條路，當你想打破呢個分身賦予嘅宿命，你必須要有犧牲嘅覺悟。邊有「真革命」係唔洗死人？尤其係跟著啲豬隊友，想唔奶嘢都難啦......
「革命如花般絢爛奪目，卻又如花般迅速凋謝。」
無論係《鐵血的孤兒》定係現實，最後走出枱面收穫成果嘅勝利者永遠背後都係伴隨著無數鮮血同dirtywork。馬丁路德金背後有Malcom X，聖雄甘地背後有一大堆民族武裝，孫中山背後都有黃花崗七十二烈士。而喺《鐵血的孤兒》入面，革命少女後面就係鐵華團同迪瓦茲，一手武力一手經濟，將革命少女推上火星聯盟領導人。
革命表面係浪漫主義，內裡係遍地鮮血及冷靜計算。《鐵血的孤兒》做完五十集之後，背後最大嘅得益者必然係迪瓦茲。掌控一個半獨立嘅木星，加上一個掌控火星嘅盟友，無論做啲咩都已經落入不敗之地。「革命如花般絢爛奪目，卻又如花般迅速凋謝。」革命係剎那嘅手段，而利益同結果先係長遠成功嘅關鍵。無論係抗爭定係革命，最重要都只係有明確目標+達成目標。
「或許宿命真的不可逆，但懂知命才能得樂天。」
無論係死於戰場，定係死於其他人手上，三日月同昭弘最終都搵到自己魂歸何處，為自己所愛嘅人同事而戰死。
知道自己為啲咩而死，將光芒燃燒殆盡而死，我覺得咁樣已經係一種幸福，總比有啲人庸碌一生鬱鬱而終，來得乾脆、精彩。
「哪裡是我們的歸宿？」
無論世界變成點樣，「家」永遠係我們的歸宿。
