唔知大家有冇試過行行下路仆街？
唔知大家有冇試過比老師捉訓覺？
唔知大家有冇試過喺架𨋢到唱歌比鄰居見到？

我相信，無論係一個幾成功嘅人，年青時總會柒過。
可能出醜於人前嘅感覺好難受，可能你心底裏好唔想比身邊嘅人恥笑...
但係無論如何都好，請珍惜從前「敢柒肯柒」嘅時光。

由周星馳去到100毛，佢哋所演繹嘅嘢點解直至依家都為人津津樂道？
就係因為佢哋能夠引起無數人對從前柒事嘅回憶，令大家對從前嘅經歷會心微笑。
將本書放喺大髀下面，測驗時好似騎馬咁吉下吉下偷睇。

原本想攞本中文書出貓，點知攞咗中史書。
攞PSP返學同朋友聯機打Monster Hunter，點知訓導主任經過，一次過沒收晒。

呢啲柒事，無論過左幾多年，只要一班中學同學聚埋一齊，就會知道冇人唔記得。
你問我記唔記得中六班長係邊個？唔記得。
但係你問我記唔記得中三邊個喺Sing Con上台唱《忐忑》，諗都唔洗諗就答到你。
人生中遇上咁多人，絕大部分人只係自己生命中嘅過客，但係你總記得成日柒嘅人。
你記得佢，唔係因為記得佢做過啲咩，而係因為記得自己中學時期有一段曾經傻過癲過嘅回憶，而呢段回憶入面有佢。

要面對返當年嘅柒事係好難好難，正如有啲人永遠睇睇下關家姐就會打晒冷震。
但係只有知道自己之前點樣柒法，先可以學識點樣唔再柒。

其實柒，又有咩好怕喎！
柒咪又係失敗嘅一種，企得番起身就得架啦。
只要你最後成功咗，人哋只會當你嘅失敗係達至成功嘅階梯，唔會再係失敗。
到時候，又邊有人夠膽話你柒呢？

講真，年青時柒得最多嘅人，喺長大後反而最懂得成功之道。
香港社會而家已經唔再渴求有能力有幹勁嘅人，而係面皮厚夠大膽嘅人。
有能力嘅人好多，但係願意犧牲嘅人太少。
更重要嘅係，佢哋比所有人都更加珍惜成功嘅感覺，同時所有人都珍惜有佢哋呢班好同事。