有人話毒男嘅生活好孤獨，但係呢份孤獨正正就係令自己特登留意身邊嘅人與事嘅動力。

深夜嘅麥當勞係一個晚歸者聚腳嘅地方，有啱啱落更嘅巴士司機，有打躉咗成日嘅老人，有玩樂以後臨急醫肚嘅後生仔，有製作生日驚喜嘅一班女學生，當然仲有我呢個毒男啦。

唔同人身處同一屋簷下，但係存在嘅目的同願望真係好唔同。職員希望顧客可以盡快離去，令自己可以早啲收鋪。女學生們希望呢間麥當勞可以繼續營業，好讓自己完成手上嘅「64摺玫瑰」。巴士司機狼吞虎嚥，壓榨食飯時間以換取更寶貴嘅睡眠時間。老人對時間根本冇概念，今夜關門聽朝又開門，聽日又係嘆冷氣過日辰嘅日子，馬照跑舞照跳。

忽然相遇一個兩年冇見嘅小學同學，言談之際發現佢都係一隻未來嘅it狗，傾得更為興起，唔小心又講到滔滔不絕，唔記得留意時間。

零時零分，麥當勞準時閂燈。女學生們抱怨自己嘅玫瑰整唔切，巴士司機匆匆回家，老人施施然離去，我同友人亦揮手作別。

深夜嘅麥當勞依舊盛載著無數晚歸嘅香港人，然而深夜嘅麥當勞究竟係賣薯條漢堡包定係賣蕃薯菜肉包，根本冇人會理會。

因為大家都只係想要一個暫時落腳停一停嘅補給站，僅此而已。

//我知已走到盡頭
為何還要擔憂
這世界也不是我的地頭
就當我在宇宙飄流//

#如果深夜嘅麥當勞係香港
#香港喺好多人眼中只係一個落難時嘅落腳點