情 cing4
慶 hing3
餑 but6
兔 tou3
傻 so4
////// 2 Apr 2024
粵拼
慶 hing3
兔 tou3
撥 but6
傻 so4
情 cing4
一年一度嘅復活節，係兔仔界普天同慶 (hing3) 嘅大日子。
白雪雪嘅復活兔 (tou3) 整好咗十粒復活蛋，準備送畀最好嘅朋友。佢雙手攞住一盤復活蛋，高高興興咁走出樹洞。
點知前路滿佈雜草，行都行唔到。咁諗住用手撥 (but6) 開啲草啦，點知隻手一揈，成盤復活蛋前仆後繼、一仆一碌咁碌晒落地，仲要向四方八面碌走晒。
「呀！弊喇！」
當復活兔雞手鴨腳咁去執返啲蛋嘅時候，突然喺佢面前，出現咗一個暗黑版復活兔。隻暗黑版又高大，全身都係黑鼆鼆嘅長毛，又冇梳毛、又打晒撠，睇見到心寒加身痕。嚇到復活兔呆咗喺度，唔敢亂咁郁。
暗黑兔手上攞住咗三粒色彩繽紛嘅復活蛋，復活兔見到，口窒窒咁講：「呃⋯⋯唔該⋯⋯畀返我⋯⋯」
「啲蛋係你架？」暗黑兔嘅聲音好低沉，好得人驚。
「係呀⋯⋯麻煩你⋯⋯畀返我⋯⋯」復活兔真係嚇到傻 (so4) 咗，唔知點算好。
「我喺地下度執到㗎咋喎，你點証明係你嘅？」
「呃，我⋯⋯啱啱跌⋯⋯」復活兔驚驚青青咁雙手捧住個盤：「我原本有十粒，執返七粒，仲爭三粒。」
「咁係証明唔到係你㗎喎。」
復活兔無言以對。
「証明唔到係你嘅，咁即係我㗎喇。」暗黑兔嘴角微微向上，露出一個奸笑。
就係咁，隻暗黑兔就轉身，帶埋三粒復活蛋離開。
復活兔覺得好無奈，眼白白睇住三粒蛋，就咁比人攞走咗，又唔敢追上前同佢理論。無情情 (cing4) 比人拎走咗本來屬於自己嘅嘢，真係好委屈、好唔開心。
—------
故事去到呢度，梗係未完。睇埋個後續：
復活兔心諗：「無咗三粒點算好，唔可以整蠱晒全部人添⋯⋯」
暗黑兔返到屋企，打開三粒復活蛋，香噴噴嘅朱古力味撲鼻而來，忍唔住狼吞虎嚥咁食咗落肚。唔過十分鐘，暗黑兔個頭又痛，個肚仲嘰哩咕嚕咁叫。最後，成個復活假都要攬住個廁所過喇。
—------
故事教訓（請自選一個或多個）：
「唔好搶人嘢食，否則食幾多屙幾多。」
「兔仔唔可以食朱古力，會中毒。」
「再純潔嘅外表，心地唔好都會做壞事，要小心提防提防。」
