果一晚令我畢生難忘，作為一個平時一路都係坐地鐵嘅路痴，果日唔知點解，心血來潮，我拖住我曾經暗戀過嘅女神由旺角跑到太子，終於跑到去女神有間長房嘅酒店門口，去到門口之後，我先發現自己濕曬，個額頭同對手，我地對望咗幾秒，呢幾秒，我地達成共識，覺得今晚都係走唔到，所以，我決定跟佢上，房！
應該係上年八月，我同ex分手之後的第二個月，原本以為我會好唔捨得，但當我發現咗呢個世外桃源，結果唔使兩月我已經喺Heymandi 度識咗個叫幼師，記得我當時心情好差，只係想搵個人聽我呻，當時八個題目，八個人，其他個七個五花八門，咩求飯腳純吹水招SP/FWB，幾乎你講得出嘅都有，不過， 萬綠叢中一點紅，一個再荒謬嘅失樂園，都總有幾個戴住面具嘅偽正常人，而Tracy就係其中一個。
我呢次沉船，真係要多謝夕爺，我嘅標題用咗《似是故人來》入面兩句好有哲理嘅詞「三餐一宿，也共一雙 到底會是誰？」無記錯，呢句野，我都用咗三日，差啲我就想，放低我嘅道德底線，直接了當咁打「有無絲可以救下火，我唔想燒咗間屋」，正當我內心不斷掙扎嘅時候，比我遇到佢 ，亦都係因為咁，最終理性戰勝淫邪，我亦將呢個改題計劃擱置咗
Tracy條題叫「23絲長傾」，我膽粗粗㩒落去，個十秒鐘嘅等待，感覺上比我當年等DSE放榜更加漫長，等到第五秒，佢終於accept咗⋯⋯⋯呢下大鑊啦，玩咗三日第一次成功match到，個種興奮可想而知，為咗掩飾我緊張嘅情緒，我用左個行到仆街嘅開埸白
「hi ，點解你會accept 我既」
「下，無啊，我見你句野好有意思，似乎係一個正常人，所以咪accept 你lol，唔係你以為係咩原因。」
「不如我地轉app傾啦，好唔好，呢度好多廣告。」
「好阿。」
我聽到佢咁講，心情好矛盾，一方面 ，我為自己得到正常人認證而興奮，加上佢好似好主動咁，但又因為佢同我嘅目標唔一樣而有少少失落，但當時我實在揾唔到另一個可以同我傾訴嘅對象，我用咗一晚嘅時間同佢講關於我以前嘅情史，佢好似都唔抗拒，仲不停安慰我，令已經好耐無同女仔傾計嘅我，心如鹿撞，以為同佢繼續傾落去就會出pool成功，點知竟然係惡夢嘅開始⋯⋯
識咗佢第二日開始，我同Tracy開始交流生活趣事，佢又會間唔中 send 自己 唔同細路嘅合照比我睇，令我覺得自己同佢嘅距離拉近咗好多⋯⋯原因係自問都幾鐘意小朋友，不過呢，自己知自己事，作為一個自己都養唔掂嘅死廢青，唔好話無另一半，即使有，想喺香港有下一代嘅成本實在太高啦，所以細路呢d嘢同蓮花一樣「可遠觀而不可褻玩焉」，我同佢識咗三日之後，我終於忍唔住想了解佢多少少「係呢，你係做乜架，好似好鐘意小朋友咁。」「我？我做playgroup老師架，呢個細路平時好百厭架，不過你唔好傳張相出去喎，我怕d家長唔鍾意，會投訴我架。」見到呢一句，我突然覺得一個鍾意同小朋友嘅女仔應該唔壞得去邊嘅，反正又搵唔到第二個住，不如試下比個機會大家進一步相處下，點解我會咁急，一句講哂，好dry，我空虛；我寂寞；我涷。
然後，我就回咗句「下，點會咁架。」 當我以為佢會好似前兩日咁秒回的嘅時候，我就進入漫長嘅等待，由朝早十一點半，等到夜晚七點半，中間我忍唔住，揾咗佢兩次，內容都係d好行嘅問候，結果，要到第二朝先send張九唔撘八嘅指甲相比我，同我講話好靚，想去整返次，我一開頭都無為意，而佢亦都越覆越疏，當我對呢段關係開始有少少動搖嘅時候，Tracy每晚又會差唔多食飯時間又會吹兩句，保持住我對佢嘅幻想。
點解Tracy會咁得我心， 原因係佢同其他女仔真係好唔同，以前我識親果d女仔，even 係我女朋友都好，都係嗯、哦、 吓嘅專家，但Tracy 對我真係好上心，成日一回就一大段，雖然成日都九唔搭八，但對我黎講，有個咁肯覆我嘅女仔，我已經覺得真係不得了啦，第一次有被愛嘅感覺⋯⋯
「係呢，平時你有咩興趣架，我平時就鍾意周圍走，四圍去下旅行，最近就同屋企人去完馬拉返黎，食咗好多榴連。」
「我，我好宅，平時都好痴家，唔係成日出街果啲黎，平時都係煲下劇、睇吓戲之類。」
如是者，我哋就係咁正正常常咁傾咗幾日⋯⋯
到咗第五日，佢開始露出孤狸尾，但當時我都係仲未醒嘅，「你有冇興趣一齊做下facial relax 下 ar，我一個女仔人家，我好驚自己一個上去啊，有你陪我會有多少少安全感」
佢應該係第一個主動約我嘅女仔，而且「安全感」呢三個字對我黎講殺傷力大過我愛你，當時真係蠢得好交關， 真係太純情，仲未覺得有咩問題，雖然啲對白都開始怪怪地，正常一個女仔去做facial 點會驚，直頭出哂水添啦，點解會想一個未見過嘅男仔陪佢去做呢，不過，果一刻，我己經不能夠理性思考，我覆咗佢一句「你幾時得閒先？」
隔咗幾個鐘，佢終於覆我，話下個禮拜二晚約我喺旺角兆萬等，初初我都好興奮，我大大話話都有差唔多兩年無同女仔單獨出街啦⋯⋯果個禮拜六，係我兩年黎第一次自己走去salon 剪頭髪，又剪埋指甲，原來一個男人，身邊只要多個女朋友就會有返少少推動力啦。
為咗準備得更加充足，我禮拜日忍唔住打咗個電話比大佬Jack ，想佢過返兩招比我，始終，作為一個畢業之後無乜返過工嘅細佬仔，睇書多過見人，唔請教下軍師，真係死咗都唔知咩事⋯⋯
星期日下晝，我地約咗喺平日去開果間放題度食晏，我比佢睇咗呢幾日同Tracy之間嘅對話，讀心理嘅阿Jack 即刻就睇穿呢個係一個騙局，但我因為已經沉沉地，覺得佢眼紅我終於有女埋身，所以，我開始轉移話題，但呢個兄弟認真唔話得，一手搶咗我個電話，喺我嘅見證下開始同Tracy展開激情對話⋯⋯
「hello,做緊咩呢？」
今次Tracy竟然只係隔咗十分鐘就覆返我啦，話自己準備帶媽媽去做facial⋯⋯阿Jack即刻話
「你睇下，佢嘅生活，除咗facial就乜都無。」
「吓。邊係呢，佢之前有同我講佢好鍾意小朋友，宣家仲帶媽媽去做facial, 真係好孝順，簡直就係一個沉船嘅好對象。」
「你唔好呃我啦，我無錢買療程架啦，你放過我啦，我滑過白姐姐，正過Ali, 唔使做facial架啦，不如我sell 返你啦。」
「我宜家試緊一樣嘢，如果佢睇完呢句嘢都仲有心機同你傾，咁你星期三咪去同佢食飯囉，我唔阻住你，如果唔係，下次gethering，你負責埋單，點睇？」「無問題，我接受你挑戰。」
結果一直自稱Tracy嘅佢，接近秒回，係一段十秒嘅錄音，因為今次係佢第一次開金口，我急不及待咁開黎聽，結果，實在令我太失望啦⋯⋯一竟然聽到把老牛聲「唔好咁燥啦，星期三你咪知係咪呃你囉，然後，我又覺得佢好似講得幾有道理，所以我仍然無打算放佢飛機，仲覺得Jack哥仔阻住我識女仔⋯⋯
「都話咗佢無呃我架啦，你又唔信⋯⋯」
「我果日要返工，做唔到你back up架啦，你星期三自己去睇下條女咩料，唔對路記住三十六計走為上著，千祈唔好硬食，你知你架啦，耳仔軟到一個點，比人哄兩哄就唔記得自己姓乜。」
點知由個晚開始，Tracy 開始覆得比之前更加快，又會不時噓寒問暖，仲會關心下我嘅財政狀況，都唔好話唔佢唔關心我，直頭可以做埋我女朋友，終於比我等到星期三啦，今次應該係我今個月第一次出街，我怕自己會遲到，明明約咗下晝三點見，我十二點幾就已經出咗門口，喺朗豪坊，我地約咗係地庫間太平洋咖啡等，我飲咗兩個鐘咖啡，睇埋鄺神本《愛你，若只如如初見》之後，我都開始幻想我同Tracy 嘅無限可能，就係我諗到入哂神嘅時候，電話終於響啦，Tracy 打黎話佢差唔多到啦，我個心跳得越黎越快，到底佢係咩樣嘅呢⋯⋯
過咗唔夠五分鐘，我見到一個拎住Gucci手袋，傾緊電話而又熟悉嘅背影，我行上前，拍一拍佢膊頭，正打算開口問，喂，你係咪Tracy ?
佢轉身個一刻，我呆咗，我口震震咁同佢講
「嗯，唔好意思，我諗唔係咁適合，我走先。」
唔係因為佢索，唔係因為佢肥，但我見到佢，除咗拔足狂奔，我諗唔到其他辦法，至少當刻，我仲未識去面對呢個我初中時代曾經暗戀過嘅女神Icy ，十年無見，竟然喺呢啲場合重遇，佢投身美容行業，我怕我走遲半步，我會耳仔軟，心靈受創不特止，荷包仲會重傷⋯⋯但有時上帝就係要比少少考驗你⋯⋯⋯
唔知係我平日太少做運動，跑得唔夠快定根本唔想走，結果比佢追兩追，我就停低咗⋯⋯
「喂，Tony哥，做咩見到我就調頭走， 咁耐無見，坐低飲杯野吹下水都得掛⋯⋯」
比佢追多兩追，我又衰心軟停低咗，女神真係女神，就算係那些年嘅女神都仍然有抹唔走嘅倩影，結果，為咗補償當年嘅遺憾，決定同佢食餐飯，開始一步步咁跌入佢預先安排嘅陷阱度⋯⋯我記得以前讀書果陣，佢最鍾意食香口嘢。
「係呢。咁多年無見，你係咪仲鍾意食越南春卷，不如今晚食越南嘢？」「好啊， 我都好耐無食過。」
我地最後去咗食間叫地鐵軌嘅越南嘢⋯⋯我地行到最盡，坐喺最邊邊個張二人抬。
為咗避免佢一言堂，開始反客為主撩佢講野
「其實點解當年你死都唔肯接受我嘅？」
「下，你唔知我當年有男朋友架咩？」
「下，我當時追咗你三年，你真係一秒都無考慮過我？」
我開始同佢追憶前塵往事，想主導返個話語權，點知，Icy道行比我高，一聽到我問佢嘅情史⋯⋯佢又順住我嘅思路進攻⋯⋯
「我當年無選擇同你一齊，就係因為你皮膚唔好，太多暗瘡，我實在頂唔順，如果你當時皮膚好少少，可能結果會好唔同。」
「下，竟然係咁，咁你覺得我宜家好唔好少少，如果比你揀多次，你會唔會揀我？其實係咪當年買嘅早餐，唔啱你胃口？」
「唔知呢，哈哈，如果你係富二代，我都會考慮下，所以你可以考慮上吓啲投資課程，將你嘅資產增值，你都想的地以後嘅生活過得好，唔使為三餐煩架。」
下，以後，我地會有以後，我忽然間雙眼發光，心諗今次掂啦，估唔到緣份咁奇秒，十幾年後，我終於有機會等到佢啦。
不過，我嘗試壓抑自己興𡚒嘅心情，轉移話題，「不如唔好淨係講我啦，講吓你呀，讀書果陣，大家都覺得你會好早結婚，最後點解令我地跌曬眼鏡嘅，又點解會入咗呢行⋯⋯」可能係太耐冇見，又實在太耐冇人同我傾過計，我忍唔住，問咗佢一堆問題⋯⋯⋯
「係呀，以前同Louis一齊係好開心，但去到差唔多要出嚟做嘢，廿三、四歲，開始覺得要搵個人結婚，為將來打算下，但又覺得Louis 住公屋無家底，最重要係冇向上流嘅機會，所以大家就協議分手，同佢分手之後，我開始覺得靠男人其實真心無保障，但我又想搵多少少錢咪入咗呢行，雖然辛苦，壓力都大，但真係搵到錢⋯⋯」
聽完Icy一堆大道理之後，其實我有少少心動，因為我地有一層熟悉的陌生人嘅關係，我真係想幫佢又幫吓自己，不過，我見碗河粉都食到差唔多啦，我決定遲啲先再算，始終我都只不過係一個空心老棺，銀包好多時都只係得張五百蚊應急錢，所以我都無辦法應承佢啲乜⋯⋯
「你再諗下啦，我哋二人同行有折喎，我好想去啊，大家咁friend 你當陪下我啦～」
「我宜家咩環境，你都應該有眼見架，Icy，你等我諗多陣先啦」
「埋單吖，唔該。」
當我地準備走嘅時候，電話彈咗一連串notification出嚟「港鐵宣佈，旺角、太子站內由於發生嚴重事故，將於短時間內關閉。」「港鐵宣佈旺角、太子站，今日提早關閉。」
呢個時候，Icy比咗個幾好嘅提議
「睇嚟今晚都係走唔到架啦，我喺附近間酒店有間長房，不如今晚去我度留一晚，聽朝睇吓咩環境再走。」
我聽到Icy咁講，簡直捉咗我呢隻老鼠入米缸，但我都仲蓋掩得住個種男人嘅慾望⋯⋯
「行到出去睇吓點先算啦，走到我就走。」
點知行到出彌敦道，勢色唔對，無任何裝備嘅我即刻拖住Icy，有路就走，終於喺槍林彈雨下，我哋平安到達喺太子嘅酒店，去到酒店門口，Icy好體貼咁拎張Tempo出嚟幫我抹汗，果一刻世界好似停頓咗，我個心即刻融咗⋯⋯忽然間好想快啲上房添⋯⋯⋯
可能係因為平時睇得太多AV，又太心急，我以為我同Icy上到房會有一番翻雨覆雲，當我以為我地可以再續前緣既時候，原來先係惡夢嘅開始⋯⋯
上到房，坐咗唔夠十分鐘，Icy入咗洗手間打咗個電話，我隔住門隠約聽到佢話「搞咗成晚，條友好似冇乜機會落搭喎⋯⋯」
又過咗一陣，門鐘突然響
「喂，Tony，我去緊廁所，頭先啱啱叫咗人送水黎，你幫手開一開門啦」
我不疑有詐，一開門，見到兩個彪型大漢，我都反應唔切⋯⋯佢哋已經跳咗入嚟，一閂門，我已經比佢哋㩒咗喺地下，左一拳右一拳打到我面腫口腫，牙都就甩⋯⋯⋯⋯
「𡃁仔，敬酒唔飲飲罰酒下嘛，等你玩嘢玩得咁開心，Icy，比份報名表格個傻仔簽。」
「精精地你同我快啲簽，唔係我哋繼續打，你今晚都唔使旨意走架啦。」
就係咁，當我以為由旺角跑到太子，可以安全保命既時候，當我真心以為我同Icy仲有機會可以一齊嘅時候，佢照頭淋咗一盆冰水⋯⋯⋯最後我成身震晒，喺間房度簽咗張價值十萬嘅「賣身契」⋯⋯簽完之後，我就比佢哋掉咗出門口⋯⋯
我忽然之間記起，若干年前，我搵師傅大批過，當時就話我廿八歳有一個大劫，曾經，我好努力去避，結果，我都係避唔過，我望住走廊既玻璃，對面街個廣告牌同我入房之前一樣，不過，我已經狼狽到極點，我唔知自己可以去邊度，為咗保命，我喺酒店大堂坐咗成晚，我無走到，因為我唔知點去面對我屋企人，又，因為玻璃門出面嘅世界太亂啦，我驚，唯有唔喺街周圍走，而當時嘅我實在太迷惘啦，我只能夠自己一個人呆坐喺大堂，諗咗成晚， 其實我只係同其他男人一樣衰咸濕姐，點解⋯⋯點解我付出得比其他人多，但係得到嘅往往永遠都比付出嘅少，經過一晚嘅沉澱，天光嘅時候，已經九月一號啦，我見出面回復平靜，我自己一個行返落地鐵站撘車返屋企，個一日同平時一樣，除咗我參加咗個我用唔著嘅療程之外，其實同八月三十一號無任何分別，我忽然記起《大象席地而坐》入面有一句對白，
「每個時代的日常都差不多，稍微不同。你不用為這些事困惑，所有人過一段時間就全都明白了。」
雖然生活平淡如水，日日都差唔多，雖然一人一把口，一人一個真相，但當大家都努力去追尋嘅時候，真相同真愛一樣，總有一日會搵到嘅，在乎我地肯唔肯去堅持⋯⋯
終於返到屋企，或者我好快就要受靶啦，但唔緊要，訓返覺好嘅，比咩都重要。
