凶 hung1
啾 zau1
洛 lok6
空 hung1 / hung3
////// 6 Feb 2024
粵拼：
樂lok6
周zau1
空hung1
哄hung3
最近好黑仔，聽人講可以掟彩虹轉運。於是，我就去咗歡樂(lok6) 天地，唱咗五百個代幣掟彩虹，轉一轉運氣。
已經掟咗四百九十九個，仲係一個奬都冇，掟到我傻吓傻吓。而且，仲引嚟咗唔少路人嘅目光，睇住我係咁掟、係咁掟，係咁掟錢落海。
俗語都有話：「睇人乜乜最開心」啲錢唔係佢嘅，梗係睇得開心又愉快啦。
有賭未為輸，最後一個代幣喇。我以抛物線嘅最佳角度同力度，將代幣向上拋出去。代幣去到最高點，然後跌落嚟，竟然掟中彩虹最高榮譽嘅藍獎上面。
周(zau1) 圍嘅人啲視線突然都集中喺我個代幣上面，全部人都睇住個代幣喺藍色範圍上面轉呀轉、轉呀轉。個代幣企直愈轉愈快，然後再打平愈轉愈慢。
哇呀！我就中喇！我就中喇！
代幣停喺藍色上面，我隱約見佢嘅周圍都散發出藍色嘅光！完美無瑕咁係個藍色範圍入面！
媽呀！我得咗喇！我得咗喇！
「各位等陣，藍色砸底界。」呀哥哥仔做嘢做到得返個空(hung1)殼，講嘢都冇晒靈魂，語氣平過太平洋。佢拎住個掃，用隻角指住我個代幣，喺側邊打撗郁郁吓咁：「要唔要影相？」
「咩砸界呀？我中呀！」我哄(hung3) 埋去睇真啲，真係中咗喎：「梗係要影！」
影咗相出黎，個代幣⋯⋯真係砸中條底界⋯⋯
「有冇問題？冇就掃喇。」空殼哥哥仔一啲同情心都冇。
傷心欲絕嘅我望住個代幣，喺最接近中獎嘅距離，無情咁比人掃走咗。但係我嘅黑仔運，並冇跟一齊掃走，仍然跟住我。
掟彩虹轉運？信嗰個正傻仔！
—- 白話文翻譯 —-
倒霉的我相信擲彩虹可以改變運程，於是擲了五百個代幣，結果一個也沒中。
是誰說「擲彩虹能變運程」的？哼！傻的才會相信。
