唔知幾時開始，連講句嘢都要諗過度過。
whatsapp gp打句嘢，要諗點樣加emoji可以令到語氣更加友善。
facebook打句status，要諗自己講嘅嘢會唔會唔小心得罪人。
同人傾project傾event，要諗下可以點樣兜圈兜到大家覺得成件事可行有得做。

越嚟越覺得好多說話都唔可以直腸直肚，總覺得所有嘢經過包裝之後會容易啲入口。
為咗避免不必要嘅麻煩同猜測，就會樣樣嘢都嘗試唔直接講，要借啲意指桑罵槐，要懶係嘢加啲emoji同sticker。
講真，你估大家見到你喺whatsapp gp入面單單打打會sense唔到？你估啲心心emoji笑喊emoji可以遮蓋到你心入面嘅不滿？
當大家都明白發生緊咩事嘅時候，其實所謂包裝所謂柔和語氣都係冇意思，只係大家見到無人出聲，咪由得呢個狀態繼續run落去囉。

成件事就係好似「地鐵關愛座攻防戰」咁，全卡嘅人個個你眼望我眼，個個俾啲畸形道德觀規範住，搞到冇人敢坐關愛座。
直至到有一個人唔理三七廿一坐落去嘅時候，其他人就仆住坐第二個關愛座。
講到尾，一個群體入面，好多時都係玩緊「口不對心我最勁」，口裏一直說著不，直至到有人爆咗個煲為止。

打句正經嘢唔加emoji，而家分分鐘俾人問「你係咪嬲咗」，係咪好諷刺？

喺社交網絡打一句status，抽一抽水，估唔到有人對號入座，感覺到被傷害，之後就會好似生咗瘋狗症咁起勢鬧。
但係有冇諗過人哋根本唔係講緊你，只係自己對號入座？
喺連登出下膠post笑下啲補習名師，估唔到補習名師會講到有班打手針對佢想搞死佢，出篇千字文澄清。
但係又有冇諗過人哋根本唔係想做你，只係想食下花生抽下水？

急需解決嘅重要嘢就扮唔知玩縮骨，抽水玩膠嘅無聊嘢就有咁大煲咁大，正常咩？
講真，溝通都係求舒服姐，想講句嘢都要左諗右諗想過度過先出得口，講完之後又可能會得罪人嘅，講多兩講都無心機再出聲啦。
而家個社會係有一班吹毛求疵而本末倒置嘅人存在，以唔得罪人為目標，視他人言語為人生。
一句講晒，即係將自己嘅人生變成為他人而活。
咁樣嘅人生，你想唔想要？

講真，點解要為咗care人哋感受而唔做自己？
你嘅facebook account同人生都係你自己嘅。

無論你係咩人，都絕對應該講自己想講嘅嘢。
就算係689，佢都喺facebook出啲全世界比嬲嬲嘅post啦。
只要開心同無愧於心，又有咩所謂？

有啲文字確實係會不經不覺傷害人，但係冇可能要求其他人都明白你。
但係因為驚會得失他人而唔講出口，係咪就係對自己對件事好？
曲唔曲抽水唔抽水唔係你可以決定，係睇果個受眾覺得句嘢係咪真係曲同抽水。
你永遠冇得期望所有人都係跟住你諗法走，都冇得令到全世界都鍾意你唔針對你。

學農夫首歌講：
其實你嚟到呢個世界
係一個安排
你會比你想像中更加偉大

所以，咪諗咁多啦。
想講就講，最多咪俾人屌下，屌屌下就慣架喇。
最緊要係做自己，做一個忠於自己嘅人。