由細到大，因為筆者外貌唔太討好，加上同人地想法與別不同，所以好多時都會被稱呼為毒撚。筆者係到要先旨聲明，唔係人人想法與別不同就會比人叫做毒撚，通常被人叫做毒撚都有兩大原因。
第一，你個樣真係好毒，內向。你的樣子如何你的命運也必如何，當筆者個樣生得毒，加上性格又唔識同人地溝通，自然就被稱呼為毒撚。你中意自己一個人?呢d叫做毒撚!你既想法與別不同?怪人!你中意睇書?自閉!如果係依d活動係一個高大的靚仔中意呢?所有野都會唔同哂!依個靚仔係一個自由獨立的浪子，佢好有主見，好有學識。
第二，你既想法最後做唔到咩成果出黎。世界係行緊效益主義論，最重要就係成效。香港係笑貧不笑娼既社會，有錢就係大哂，冇人得閒理你所謂既理想!係網上留個言，比個like去支持你，當然冇問題，但到我有實際行動?就會有千萬個籍口。當一個毒撚有特別既目標同埋興趣果時，如果佢做唔到咩野成果，最後都會淪為笑柄。「你做咩諗既咁奇怪架!」「你做依d野有咩用啊?」。
當一個人做既野唔可以迎合大眾口味果時，佢就會被人叫做毒撚!因為冇人了解依一班人，冇人想去了解依一班人，冇人有興趣去了解依一班人。毒撚依個字，最容易用黎形容依班人。
你有冷門興趣?你一定係毒撚黎!係毒撚先會中意依d野!好似中意去博物館睇展覽，就會有人話「咁毒撚，成日掛住死讀者，好悶啊!」，你中意玩搖搖，你中意玩手指滑板?咩你咁毒架，玩埋依d咁既野，係毒撚先會玩架!其實點解我既興趣係要大路野呢?依家係我既興趣定係你地既興趣呢?作為一個人，係唔係連有自己既興趣都要比人叫做毒撚呢?
你中意享受一個人既時光?你唔好咁毒啦，可唔可以合群小小啊你?成日都自己一個人。人大個人，好自然唔想再就呢個，就果個，好想享受一個人既時光。放假最緊要就係令自己放鬆，人人放鬆方法都唔同，有人中意約哂成班朋友去吹水，去玩。有人中意自己一個係屋企聽音樂，有人中意自己一個去旅行，想點就點。但往往換黎既下場就係「毒撚你唔好咁撚毒啦，成日自己一個人!」。人生番工番學已經夠辛苦，如果連放假都要迎合社會，咁人生又有咩意義?點解自己一個人就係錯，就要被人笑呢?
你一心一意為朋友，你唔好咁on9啦，你唔好咁真心膠。好多時朋友之間都會開玩笑，但一定會有人比較上心，呢班人唔會係你相識好耐既朋友，佢地大部份只係識左你冇耐，但人地都係想交個心出黎同你做朋友，維繫關係，但偏偏有時會比人覺得佢地煩。當一個人太過重視新相識既朋友，或者聽到有咩事就好緊張朋友既人，佢地會比人笑為真心膠。通常真心膠既都係毒撚，佢地會被人笑唔識交際，唔識分真假，佢地會比人笑佢地因為冇朋友所以太重視，太得閒身邊既朋友。唔知由幾時開始，真心膠，為朋友付出已經成為毒撚。
你想寫文章?有冇人睇架?一個post有幾多個like啊?原來你冇人睇架?又唔係出名!好心你唔好咁毒啦，成日掛住係到寫文。筆者人世入面，寫文就係興趣，可惜文筆太差，一直冇咩人睇，但一日用左唔少時間去寫文。變左要放棄唔少活動，回報同付出完全唔成正比，就算比人話冇人睇，垃圾都好，筆者都冇放棄，我寧願比人話係死毒撚，唔出街，都要堅持自己做既野。
有時我會諗，社會上要既唔係堅持自己既人，唔係一個好人，唔係一個有與別不同既普通人。社會上係要一個識得投機既人，要好活躍，人地做咩佢就做咩，最緊要唔好離群，失去自己唔緊要，最重要係融入朋友!
但今日既筆者，仍然唔想因為融入社會而改變自己與生俱來既性格。我冇去害人，我冇搞到人地唔開心，我有能力係社會生存，點解我都要改變自己去遷就呢個社會?就係因為比人笑毒撚?人地笑你毒撚唔緊要，最重要係你知道自己冇錯!今日筆者想寄語自己，同時想寄語被嘲笑為毒撚既讀者，你地要為自己而緊持。
中意動漫冇錯，中意cosplay冇錯，中意畫動漫都冇錯，中意自己一個人更加冇錯!因為毒撚唔係罪，被人笑你地毒撚唔係問題，係冇啦啦成日笑你地果班人先有問題，唔需要因為人地既說話而傷心難過。
只要唔係殺人、放火、強姦、傷害別人、令到人地唔開心既話，職業無分貴賤，興趣無分貴賤，性格都係無分貴賤。
