中學六年與大學四年，當中唔少讀者一定係學生生涯入面搵到一位好老師，佢會主動關心你，幫助你，或者會信任你。一個好老師對學生既成長有著舉足輕重的影響，學生會以老師為目標，至少都會係學生生涯留底美好回憶。但往往呢位好老師絕大部份都係黎自中學，咁係唔係代表大學冇咩好老師呢?絕對唔係，只係學生好難同大學既老師建立關係。
所謂關係就係雙向既，一段好既關係往往要由雙方去維繫，但中學同大學唔同既地方就係主動性。中學黎講，主科老師一星期起碼對住學生六個鐘，如果課外活動老師既話，雖然佢地對住你既時間可能比較少，但係佢地勝在少學生，要記住幾個學生唔係咩難事。中學老師往往會係做主動既一個，一黎佢都要同學生打好關係先可以係學校立足，二黎係佢同學生做朋友，咁教起書或者做活動上黎都容易d。最重要既係中學老師會同學生就著同一個目標而奮鬥。當你地考文憑試既時候，佢地為你緊張，怕你地有野唔識，又怕你地番到屋企唔會溫書，又怕你地唔知前途會係點。學生係呢個咁傍惶既時候，佢更加需要一個可以安慰佢，為佢排難解紛既同輩或者前輩，一個好老師正正擔當住呢個角色。一個係學生心目中既好老師就會主動解答你問題，見你上堂唔留心就會捉你傾下計，話下你。當時既你，可能會覺得佢好煩，好傻，成日改佢地花名，同學私底下傾計果時都會叫花名而唔係加個陳sir、李sir。但人大個左，畢左業之後，就知道佢地對你好幾上心，對你有幾好，佢地唔會好似你同事咁自私，唔會好似你上司無理批評你。
而大學老師同學生既關係呢?往往都係學生要做主動既一方。大學黎講，一個老師一星期對住學生只有兩至三個鐘，仲要可能佢一個學期教幾科，每科有過百位學生，試問佢點會咁容易主動去關心學生?或者係話佢關心唔哂咁多人。而大學老師都係好繁忙，佢地教書只係職業既其中一部份，最重要都係做研究。係大學入面教書叻唔叻根本唔重要，最重要係所謂既學術成就，只要你既論文夠勁夠爆，你就可以做教授。但係老師用哂時間去關心每個學生呢?就算每一個比佢教過既學生將來做律師、醫生都好，佢只要冇學術成就，咁就一世，係一世冇得升職。試問大學老師仲點會有咁好動力去關心每一個學生。加上大學生已經係成年人，老師已經冇左義務去主動關心你地，大學老師最重要係教書而唔係關心你既人格發展。當然，學生主動同老師進行交流，老師都會願意去同你傾談，但試問有幾多個學生會咁做呢?如果有問題既學生會主動同人地傾談，咁佢就唔會收收埋埋咁多問題，因為佢地唔識點去開口。
大學老師同學生就係多左一層隔膜，學生長大左，膽都大左，見識同時多左，佢地會知道大學既教授係要有好高既學術成就先有今日既地位，學生無疑對住佢地都會有小小尊敬既距離。而中學老師大部份都係讀完大學就出黎教書，佢地同學生既距離往往都比較小，學生心入面都唔會覺得佢地係高不可攀，係佢地面前唔會覺得自己好渺小，所以建立關係都會比較容易。
但我主要目的係想講，讀者要好好珍惜每一位會關心學生既大學老師。無論你係咩野途徑去認識依位老師都好，請你都要感謝佢抽空同你傾下計。可能佢會係你既畢業論文指導老師，可能佢會係面試既老師，可能佢會係一位特別記得你既老師。依班老師佢地唔係唔想去關心你，而係佢地對於中學生同大學生既認知有所不同，大學生求知識，可以情感獨立，中學生求全人發展，要有良師好好支持。老師唔係唔想關心你地，而係佢根本冇時間去關心你地，大學老師畢竟都要升職，而佢地成績既因素唔係學生，而係論文，佢地用做論文既時間關心你地，就證明左佢係一個真心幫助學生既老師。
當然，作為學生既我地都會有責任，我地問老師有冇同學生建立關係，好好關心我地既時候，我地都應該問下自己有冇好好維繫同老師既關係，而唔係主動坐係到就有老師過黎幫你，畢竟老師唔識讀心術，你唔出聲，佢唔會知你係到諗咩野。
以上只係一個文科仔既意見，或者你身邊既老師係好好好衰，或者你大學老師係好好好好，往往都因人而異，但至少我既環境會係咁。
