我叫做岑晉晴,或者大家可以叫我做晴晴,相信你哋都認識我係邊個,冇錯!我就係周太,即係前NBA球星周柏豪嘅老婆。

我估你哋都對我點解會得到柏豪BB嘅芳心而一頭霧水㗎喇,其實成件事就係一個平平無奇嘅鄰家女孩喺命運嘅安排之下遇上佢最愛嘅偶像,就宛如一般韓劇入面浪漫嘅邂逅,男女主角亦迅速陷入熱戀當中,造就咗一段動人心弦嘅愛情故事,只係估唔到呢個女主角居然係我,一切一切都要由我之前講起……

話說我喺好耐之前就已經係柏豪BB嘅忠實fans,而佢每一次出show我都會去睇佢表演,嗰陣嘅我作為fans,只係覺得單純付出,畀柏豪感受到我對佢濃濃嘅愛意,咁我就已經心滿意足㗎喇,畢竟佢貴為巨星,又打過NBA,而我就只係一個好普通嘅女仔,又點敢痴心妄想得到佢嘅愛呢?

但本來應該得韓劇先會出現嘅情節,偏偏呢個現實生活中卻出現咗……

有一次佢喺紅館開演唱會,咁我就當然一早霸定最前嘅位,拎住一個「周柏豪我愛你」嘅牌fing嚟fing去,等柏豪一邊唱歌嘅時候都感受到啲fans係幾咁支持佢。

當佢唱唱下準備過嚟握手嘅時候,我就知道機會嚟喇飛雲!我立即九秒九衝埋去諗住可以一親芳澤,點知就畀身後一班人推下推下推到我失咗平衡,唔小心跌咗落地下。

「哎呀!」

可能就係因為我呢下叫聲,柏豪居然留意到我跌親,仲馬上無視班保安,好型咁跳落台扶起我。

「小姐,你冇事吖嘛?」

「嗯……冇……冇……事……」

柏豪竟然面對面慰問我,令我嘅心跳都不斷加快,可以同自己最深愛嘅人有咁親密嘅接觸,嗰一刻我覺得人生已經再冇任何遺憾。

短短嘅三十秒,就足以令我更加愛佢。

可惜應該唔會再有下文……

但柏豪佢改變咗我呢個諗法。

柏豪慢慢靠近我嘅耳邊,然後細細聲咁同我講:「一陣完咗場show,喺後門等我,我揸車嚟接你。」

我嗰陣真係以為自己幻聽或者發緊夢,柏豪又有啲咩可能會揸車接我,一定係我傻咗。

但我依然照佢吩咐,嚟到後門等佢,而身邊亦有一大班女fans喺度苦苦守候緊。

過咗冇耐,就見到柏豪佢居然大搖大擺咁揸住一架紅色林寶堅尼出嚟……

「喂,頭先跌親嗰個,快啲上車啦。」

「吓……」但一時之間我都反應唔切。

「快啦。」

見到身後嗰班女fans如同喪屍一樣洶湧成群咁沖緊過嚟,我就覺得絕對唔可以再畀歷史重演,好似喺演唱會上面咁樣畀人推跌㗎啦。

「哦。」

於是我都拔足狂奔即刻跑上車。

「柏豪BB唔好走呀!」而嗰班女fans就喺度大叫。

我同柏豪就好似walking dead入面嘅主角喺度逃避喪屍咁。

只見佢一舉手一投足,瞬間踩盡油門直路狂奔,揮揮衣袖不帶走一片雲彩。

喺車上播住鄭伊健嘅《極速》,而我同柏豪都一語不發,只係四處兜風。

頭搖又尾擺 飄移境界
不想醒覺只想感覺被放大
憤怒瓦解 萬人膜拜 讚頌我的偉大

頭搖又尾擺 飛翔境界
不想一世只想一秒被放大
看後鏡中 便能愉快 你漸變小我強大

誰敢來表態

估唔到兜兜下風,柏豪已經帶我行哂成個香港,原本嘅漫漫長夜都經已消失,開始見到日出,最後佢帶咗我嚟到山頂。

「你叫咩名?」柏豪開口問我先。

「我叫岑……」

但我仲未講完就已經畀佢突如其來深深嘅一吻暖暖咁貼住我嘅嘴唇,將我嘅心都溶化咗。

「點解……」

柏豪先撥一撥佢蓬鬆嘅頭髮,然後情不自禁咁講:「因為喺呢短短嘅六個鐘,算係今日我思緒最安穩嘅時間,我眼前嘅臉龐,係我今日見過最美好嘅東西,而你今日著地嘅嗰一聲,係聽過最美好嘅聲音。」

「但係我又唔靚,我驚我襯你唔起……」

「點會呢?」 柏豪含情默默咁望住我講:「原來人生覺得最爛嘅事情,也未必係最糟,因為最糟嘅,可能一直就喺眼前而未曾發現,又或者根本就係自己,我諗我搵到了答案。」

「柏豪,估到你咁愛我……」

「我愛你,嫁畀我喇。」

「嗯……好呀……」

最後我忍唔住流下咗幸福嘅眼淚。

自此之後我就成為咗周太,同柏豪BB就好似童話故事入面嘅白馬王子同公主一樣好幸福咁樣生活落去。

其實呢個故事係想話畀大家知,如果你遇到一個以為冇可能一齊嘅人咁你就大錯特錯啦,千祈唔好咁快就妄下判斷,呢個世界上冇人係會一開始就注定冇可能一齊,可能到最後你都會得到你最深愛嘅人。

我同柏豪就是成功的例子。

希望各位都早日搵到自己鍾意嘅人啦。


Facebook page:https://www.facebook.com/蘇小鈺-1726077634318196/