「鈴……鈴……」

一聽到電話鈴聲,瞓喺梳化上嘅我就猛然醒過嚟,然後坐返起身,再一次要重新整理自己嘅思維。

但個頭仲隱隱作痛,可能係因為尋晚飲得太多酒。

見到枱面上擺滿曬飲完嘅啤酒同埋食完嘅杯麵,喺咁凌亂嘅環境之中我依然可以搵返部電話出嚟,因為早已經習慣呢種咁樣嘅生活模式。

可惜一直以嚟都只係習慣唔到一樣嘢,就係再收唔到佢嘅whatsapp,冇佢打電話嚟嘈醒我,更加再冇辦法聽到佢把聲。

打畀我嘅人…唔係佢…明知唔會係佢…

就算唔聽都冇所謂…

我頹然就瞓返喺張梳化度,不過見到時間已經差唔多要返工,而自己身上又有一大陣嘅酒味,於是都施施然咁起返身行去廁所沖咗個涼,然後就換件衫返公司做嘢。

寧願繼續用工作麻醉自己…

作為一個文員仔,返到去公司做嘅嘢不外乎都係打下文件,打發下時間咁,有時打完文件嘅時候,老細又未畀嘢我做之前,我嘅身體又會不自覺咁做返嗰啲嘢…

上facebook喺搜尋嗰一個位置輸入一個熟識嘅人名,睇下搵唔搵到嗰一個人;或者碌下手機睇下ig,睇下佢最近嘅近況係點。

只不過呢兩個方法都係冇咩用,我始終都係同佢有一段距離,一段冇辦法修補或者拉近得到嘅距離。

而我嘅腦袋就好似一盒錄影帶咁,成日都會自動咁將嗰啲畫面浮現返喺眼前…有人話呢種叫做分手後遺症…

嗰陣時同女朋友會成日一齊行街睇戲食飯,到咗夜晚我就會送佢返屋企,然後一齊拖住手咁行過一段路…

「喂,肥豬,你知唔知呀?我啱啱整咗個女神榜,不過第一名唔係你喎。」我故意挑逗咁話。

「哼!咁你去搵你女神啦,唔好搵我喇。」眼前嘅女仔立即一面不屑咁樣反擊我話。

「吓,我咪搵咗佢囉,佢係我隔離咋嘛。」我故作玄虛對住佢講。

「你頭先又話我唔係第一名嘅?」令到佢深感疑惑。

「你的確只係女神榜嘅第二名…因為第一名係…笑緊嘅你。」我微笑住講。

「哼!衰人!一啲都唔好笑囉。」佢雖然咁講,但係嘴角好明顯就喺度偷笑緊,女仔果然都係口不對心。

「唔好笑你又偷偷地笑?」我用另一隻手去搣佢肥嘟嘟嘅面豬登。

「笑你傻咋,白痴!」見到佢兩邊面頰嘅紅暈愈嚟愈明顯,滿面通紅,就證明咗我氹女朋友真係有一手。

而不自不覺間就已經行到去佢屋企門口…

人喺熱戀期係會好奇怪,每當送到對方去到屋企門口嘅時候,都總係會覺得依依不捨,好想陪多對方一陣,哪怕只係幾秒鐘,都只係想見多對方一面。

「不如…我哋去公園坐陣先啦。」我提議話。

「好呀,見你係咋。」而佢都答應。

跟住我哋就繼續拖住手咁樣行到一個寂靜無人嘅公園,靜靜咁坐喺長凳上,喺冇人騷擾之下,享受住呢一段兩人相處嘅快樂時光。

而隻肥豬嘅手依然緊緊咁拖實住我,佢慢慢瞓落我嘅膊頭上,彼此之間喺嗰一刻唔需要講任何嘢,都已經覺得好自在,好舒服。

「肥豬…如果我哋第日滿頭白髮都可以咁簡單咁生活就好啦。」

但我咁講完之後…佢好似冇咩反應,原來佢喺我膊頭上瞓著咗。

睇嚟仲瞓得好甜,搞到我都唔忍心叫醒佢…

於是我就趁佢唔為意錫咗佢一啖…清楚感受得到佢嘴唇上嘅味道…

只係經過咗三年,當時嗰種味道係係甜?酸?苦?辣?我都漸漸忘記咗。

我拎起枱面支青島,飲落去…係淡淡嘅苦澀味。

跟住就攞部手提電腦出嚟一邊聽住歌,一邊寫小說…

總會有一首歌你會覺得好有共鳴,然後就會自自然然不斷重覆咁樣聽…

我將手放喺鍵盤上,開始用一字一句慢慢拼湊出一個畫面。

而方皓玟嘅《分手總約在雨天》……又再度奏起。

我已經不可以 跟你做朋友
連人生 都迷失

失去咗你三年,我就頹足三年,明知同你嘅關係冇可能再修補,同你嘅往事都已經成為歷史,偏偏我就唔肯忘記你,寧願一直沉淪喺傷痛回憶之中。

努力愛一個人 都不夠
一時的享受 能熱暖多久

我明明好愛好愛你…我明明拖實咗你隻手…你溫暖嘅手所傳嚟我手上嘅暖意,甚至直到依一刻仍然未冷卻,但點解……

最美好的一切 請你別硏究
誰值得 不值得

中五嗰年,我終於鼓起勇氣同你表白,你當時喊住答應嘅模樣我仲歷歷在目…一齊咗之後,試過放學拖住手行下街,因為唔夠錢而食同一個飯,仲記得嗰陣我扮減肥叫你食多啲…其實係驚你唔夠飽……

愛你不需理由 我卻知
錯過後哪可回頭

同你經歷咗六個冬天…我依然好記得自己當初點解會鍾意你,但到咗依一刻就算你知道又如何…如果我哋可以重頭嚟過就好啦…如果有如果就好啦……

曾聽說雨天總要放手 總要分手

點解…到咗最後我哋都係要分手收場…

曾跟你約定下個淡季 浪漫旅遊

點解…我冇早啲兌現承諾帶你去環遊世界…

明日看雨點灑到滿天 總會掛念

點解…呢三年嚟我成日都會諗返起你…

我會隱藏我淚線

點解…我連喊出嚟都唔識㗎……

拼湊完嗰畫面出嚟,我發現枱面支青島已經飲完,於是就行去雪櫃度攞多幾支出嚟,之後一口氣飲咗五支再瞓落梳化度,真係好想搞到自己醉醺醺,然後一覺瞓醒乜都唔使諗。

就算我明知道咩叫做“一醉解千愁,酒醒愁還在”

好想醉…但醉唔到…

瞓喺梳化上,我又不自覺咁拎起部手機,打開whatsapp搵返嗰個熟悉嘅名字,然後一隻字一隻字咁樣打出嚟……

「其實我哋有冇可能一齊返?三年呢個精神折磨令我好辛苦,如果重新開始,我唔會再令你唔開心,對唔住……」

我心入面好清楚係冇可能㗎……

跟住我又慢慢剷返呢段說話……

到咗最後我都冇將段嘢send出去。

原來…忘記一個人係咁困難。

「哈哈哈哈……哈…哈…哈……」我傻笑起嚟,突然感覺到有一股淚意喺眼內湧出嚟…我終於都忍唔住喊咗出嚟…

估唔到過咗三年,原來我仲未忘記你。


如果鍾意就畀個like我個page啦。
Facebook page:https://www.facebook.com/SiuYuk.Dream/?ref=ts&fref=ts
可以睇埋bomba條片,都係以呢條片借鑑嚟寫:
https://www.facebook.com/BOMBA.VDO/videos/1141557822595052/?hc_ref=PAGES_TIMELINE
當然唔少得仲要聽埋呢首歌。
方皓玟《分手總約在雨天》:https://www.youtube.com/watch?v=peLvKOPWq1E