漫漫長夜…

我坐係碼頭欄杆上面,微微海風不斷吹向我既臉龐,個種感覺唔但只好舒服,更令人身心可以平靜落嚟

本來應該係可以靜落嚟…應該係…

「嗚…嗚…」

但係坐係身邊既一個女仔就係到狂喊,嘈到根本冇得享受依種感覺

「唔好喊啦…咩野事呀?」

我拋出一句見到人喊而公式既慰問,顯然地我都只係冇幾耐之前收到依個喊緊既女仔電話,趕過嚟陪佢,仲係完全搞唔清楚咩情況

「嗚…嗚…」

咁通常都要等個女仔喊多兩喊,我再哄下佢先會講發生咩事,對我嚟講依種事已經好有經驗

「我失戀呀!!!!!!!嗚…」身邊依個女仔先係大叫一聲,然後用佢個對楚楚可憐既雙眼望住我喊。

「哦,原來係咁」聽到依個消息既我毫不意外,因為又唔係第一次聽到,於是我用一貫溫柔既語氣安慰道：「你仲有我丫嘛 」

「有你陪住我又有咩用喎…你又唔係我男朋友」

「吓…」諗落又係既…眼前既女仔五官清秀,身材苗條,係一個典型既女神,想必好多人都想做佢男朋友,但我就完全冇諗過,因為我好清楚我同依個女仔既關係冇可能去得到情侶般個種既親密,我只係想一直默默守護係佢身邊,一個欄杆身位…就好足夠。

「睇住你唔俾你跳海囉,哈哈」當我講完哈哈之後,空氣都好似凝固咗咁。

「嗚…」

好明顯個女仔聽到我依個爛到冇得再爛既爛gag,又喊返起嚟

如果係咁…唯有出殺手鐧啦

我望住身邊依個淨係識得喊既女仔,趁海風吹過嚟我地依邊既一刻,我同時輕輕將手放係佢既頭上…

「唔好喊啦,再喊就唔靚㗎啦」

果然咁樣一講,個女仔就立即收哂聲冇喊,因為以我認識既佢,靚係重要過世界上每一樣野。

「唔喊咪唔喊囉…」講完之後,仲俾我留意到佢嘴角微微向上移,露出一個淺笑。

而哄返佢後,我地兩個就繼續靜靜坐係欄杆上面,被海風吹著,漫無目的咁等待時間流逝,真係好舒服,好輕鬆…

「喂!欄杆上面唔俾人坐㗎!」就係不遠處一個好肥既保安員大聲說道。

「嘩…傻妹我地快啲走先」我立即捉住身邊女仔隻手,帶住佢係咁跑。

雖然唔知道個肥佬保安有冇追上嚟

但我地都好似啲TBB膠劇咁不停跑

其實我好清楚

可能直到我死既一日

我都會一直保護身邊拖實我隻手既依個女仔

不求回報永遠去疼愛去住佢

雖然我冇可能做佢既男朋友

但係我都唔會俾人去呃佢既感情

因為…佢係我最重要既人

唯一既親人…

一個好蠢既妹妹

而我就係無論發生咩事都會陪伴住佢既

一個好蠢既哥哥。

---完---

Facebook page：https://www.facebook.com/蘇小鈺-1726077634318196/