實不相瞞，井型屋其實係鎮魂塔

多重真相

我回頭一看，正是游氏兄弟，他們在走廊入口處伸出半個頭向我們招手。

「估唔到佢哋仲夠膽出現，佢哋明明係……奇怪，佢哋明明係啲咩呢？」我的記憶力開始受損，逐漸忘記事情。

「我哋快啲過去先。」Tracy想也沒有多想便跑了過去。

我下意識抓緊她的手，雖然我忘記了，但我總覺得他們並非好人。

「你哋快啲過嚟，班鬼就到。」游瑞棠着急的說。

「唔好，佢哋好鬼祟，一睇就知唔係好人，我硬係覺得佢哋唔知想做啲咩。」我進一步阻止Tracy。

「阿曉，你會保護我㗎嘛。」Tracy甜蜜的笑說︰「我哋去咗先，再講，對付兩個總比對付一大班容易。」

她所說不無道理，一於放手一搏，先避過這一劫再算。

「阿曉小兄弟，好耐無見。」游氏兄弟熱烈歡迎我，但我卻一臉嫌棄推開他們。

「我唔係同你哋呢啲殺人兇手好熟，唔好黐埋嚟搲friend。」我冷漠的說。

「靜少少。」Tracy邊聽着外面的動靜邊命令道，果然強勢的Tracy最對味。

此時那班鬼已經到達二十四樓並大肆搜索，游瑞慈輕聲說︰「放心，呢度好安全，電錶房呢度平時都鎖住，佢哋唔會留意。」

果然，那班鬼搜索一輪，找不到我們後便離開，我也終於鬆了一口氣，可以全心全意應付游氏兄弟。

「你兩隻狼點解會喺度？」我雖然記憶開始模糊，但隱約還記得他們是狼。

「其實我哋都係無辜，我哋都係被佢哋呃咗。」游瑞慈可憐的說。

「啊？」Tracy有點詫異。

「當時我哋都好亂，細佬又呆咗無哂反應，佢哋班人又不斷話係我細佬做嘅，仲話間屋係我嘅，其他人無鎖匙入去，所以只有細佬先落到手，就算上到法庭個官都只會判細佬有罪，之後佢哋就畀咗個建議我，然後就係阿曉小兄弟你所知嘅故事。」游瑞棠咬牙切齒的說。

「又反轉？咁邊個先係真兇？」我頭也大了，每人也有一個自己的版本，每個版本也聽似合理，我也開始分不出誰是誰非了，只不過，認識了游氏兄弟後，之前那段影片中我以為是游瑞棠的人，現在看起來，更像是游瑞慈。

「廿四萬、老煙徐同大王狗三個先係真正兇手！」游瑞棠肯定的說。

「佢都知，你問佢就知真相！」游瑞慈指着Tracy說。

「喺我眼入面，你哋全部都係兇手！凡係無出手阻止嘅人都係幫兇，所以我唔理邊個落手邊個和議邊個煽動，你哋全部都係！」Tracy激動地說，這畫面十分罕有，不單我，連游氏兄弟也被嚇了一跳。

我還未回過神，Tracy便拉着我的衣服離開這狹小的電錶房。

「我哋返咗去人間先，最起碼班鬼嚟唔到，我哋會安全啲。」我提議道。

可是Tracy搖頭說︰「而家仲未可以返去，要等夜啲，我哋仲要喺度留多陣。」

我們去到二四零四室，在裏面等的，正是刁小姐和萬先生、王先生和徐先生，還有被五花大綁的廖先生。

「我就估成日流流長，你哋一定會返嚟，果然不出我所料，守株待兔係有用。」刁小姐自信的對眾人說。

「我老婆果然係最醒，好彩我娶到你。」萬先生毫不吝嗇在人前讚美自己的太太。

「好喇，夠喇，唔好放閃住，快啲封咗佢，等我哋可以無後顧之憂。」徐先生沒好氣的道。

「大細游，你哋仲唔郁手？你就唔怕我哋公開你細佬嘅秘密咩？」王先生朝我們身後喊話。

被綁的廖先生不停掙扎和發出嘈音，試圖拯救我們，可都是白費氣力，而身後的游氏兄弟則正在猶疑，究竟是甚麼事要令他們如此猶疑呢？如果是說真兇的話，他們人都已經死了，也沒有所謂吧！如果是甚麼秘密的話，人已死，秘密甚麼的也沒有意義，還要顧慮甚麼？

「你兩個，仲有咩好猶疑，梗係幫我哋喇，仲想被佢哋耍幾多次先夠？」我嘗試招攬他們與我們共同抗敵︰「只要我哋打低佢哋，咁佢口中講嘅嘢都一樣唔會出現，駛乜怕佢？」

可能是我的鼓舞奏效，也可能是單純他們不想再受擺布，游氏兄弟決心跟我們一起打倒眼前的敵人。四對四，各三男一女，絕對公平。

我一馬當先站在最前，拿着他們唯一忌憚的頸繩在揮舞，他們節節後退，被我們逼到出露台。

「快啲救咗廖生先。」我邊牽制他們邊說，同時伸手關上露台門，並用綁廖先生的繩把門牢牢綁好，將他們困在露台。

「天真！」徐先生怒吼一聲，化作黑煙穿過露台門來到我們面前，一手緊握游瑞慈的頸，奸笑說︰「如果一個活人喺鎮魂塔入面過身，唔知會點呢？」

語畢便施施然將他帶到井邊，中間游瑞棠、Tracy和廖先生雖然極力阻止，可惜化作煙的他根本無實體，他們全都撲空。

「手！拉佢隻手，佢而家得捉住游瑞慈隻手先係實體！」我大膽猜測。

游瑞棠用盡吃奶的力奮力一躍，終於在最後一刻救下他的弟弟。然而，由於我們都把注意力放在徐先生那面，露台門這邊已經在無聲無息中被王先生打開了。

當我察覺到的時候，萬先生已經將我壓在地上，雙手被他的關節技緊鎖，動彈不得。

「你哋同我哋對抗只有死路一條，兩個活人三隻新鬼，點會鬥得贏我哋？我哋食硬你呀！」萬先生以志在必得的態度說。

兩個活人？活人在鎮魂塔過身？游瑞慈的秘密？我明白了，我終於明白為何游瑞慈墮樓後會沒有屍體，原來他根本沒有死，只是進入了鎮魂塔，是游瑞棠救了他。

那麼說，「王」根本未有恢復所有記憶，但Tracy卻說自己已經知道一切，即是她根本不是「王」，一切也都如我所料，刁小姐才是作惡多端的「王」！

「阿曉！」、「阿曉小兄弟！」Tracy、廖先生和游氏兄弟同時喊道。

「你哋想救返佢好簡單，只要『王』過嚟同佢交換就得。」刁小姐提出交換條件。

「唔駛理佢，我哋無人係『王』，你先係『王』，你哋快啲走，唔駛理我。」我大聲說，免得Tracy為了救我而白白犧牲，胡亂承認自己是「王」。

「我係『王』？你係咪搞緊笑？」刁小姐聽到後哭笑不得。

「你唔係『王』先係搞笑，我有大把證據證明你係，萬生、徐生、王生，你哋都唔好再受佢迷惑中佢計，佢先係殺你哋，將你哋囚禁喺鎮魂塔嘅罪魁禍首！」我趁機破壞他們的信任，令他們互相猜疑、心生矛盾，唯有這樣，我們才有一線生機。

「呢個係我人生入面聽過最好笑嘅笑話，你亂噏都要有個譜，無憑無據，你話你係玉皇大帝都得，哈哈哈哈，參見玉帝，哈哈哈哈。」刁小姐調侃道。

「你人生真係悲哀，得咁短，連笑話都無聽過幾個，不過聽我講完之後，你就唔會笑得出！」我厲聲道︰「首先，江叔遺書正常只得我、Tracy同我屋企人知，點解你會知？仲要知埋入面係寫咗啲乜，不特止，仲不斷引導我去認同Tracy就係『王』，我諗除咗寫遺書嘅人之外，無人會咁清楚，所以遺書係你捏造！」

刁小姐聽到我的指控後，非但沒有慌張，還氣定神閒的說︰「仲以為你要講啲乜，原來係咁喳，封遺書我睇過，當然知內容，肥江死咗之後，間屋再無人住，驅靈網無咗，我哋當然可以自由出入，見過好正常。」

的確，還有這個設定，我的自信被重擊了一下，但我依然故作鎮定，再提出第二項指控︰「你提到我同學Nicole，你竟然知佢失咗蹤，仲知道佢畀隻點樣嘅背後靈殺咗，你唔係『王』點會知得咁仔細？仲要係秒答。」

我對這項指控十分有信心，豈料刁小姐依然從容應對︰「鬼界唔同人界，我哋啲嘢好公開，甚至有殺人榜，大家會吹噓最近殺咗咩人、殺咗幾多人、點殺，只要稍為打聽吓就會知，不過你作為人係唔知咁多陰間嘢。」

我立即望向廖先生和游瑞棠，他們均故意躲避我的眼神，看來這也是真。

「仲有，我未認輸㗎，」我繼續提出新證據︰「你話Tracy係『王』，佢每殺一隻狼就會恢復一部份記憶，但而家游瑞慈都未死，咁佢又點會恢復哂所有記憶？但Tracy就已經話佢知哂成件事，如果佢真係『王』，又點會知？」

「曉啊曉，我仲以為你好醒，原來你都係豬頭炳。」刁小姐嘆息道︰「佢話自己知道哂，但其實佢連自己係咪真係知道哂都唔知，你又無求證過，佢講你就信？」

我被她說得啞口無言，不管她說的是事實還是狡辯，聽後也不覺得有破綻，難道Tracy真的是「王」？不，我不能被她影響，這正正是她的目的，我不能中計。

「如果佢真係『王』，咁江叔同你都一定唔會死，你識佢咁耐，點會唔知佢份人係點？由我一直以嚟嘅調查得知，同你之前講嘅完全相反，所有街坊都對梁紫茵讚不絕口，無一個係彈，除咗王太，不過佢係狼嘅家屬，證供唔可靠。而一直被你屈係『王』嘅Tracy都從來無殘忍嘅一面，亦都感覺唔到任何殺氣，如果你所講嘅屬實，佢應該係兇殘成性，但事實完全唔係，佢點會係『王』？」既然我無法成功指證刁小姐是「王」，唯有轉另一個方法，證明Tracy不是「王」。

「知人口面不知心，你咁輕易就信人，絕對唔係一件好事。」刁小姐搖頭說。

「你講得啱，我竟然咁簡單就信你，真係太天真，不過你哋都係！」我乘勢對其餘三狼說︰「其實你哋咁多隻狼被所謂嘅『王』殺死，就無可疑嘅地方咩？你哋都識佢本人，你哋真係覺得佢本人會咁做？當然你哋未必記得生前嘅嘢，但死後嘅嘢總會記得啩？會唔會係你哋一死咗，被困咗喺鎮魂塔之後，就有一隻『好心鬼』埋嚟洗你哋腦，目的就係要抹黑梁紫茵，再利用你哋去達成佢嘅目的、滿足佢嘅私慾？再講，萬生係刁小姐冥婚嘅老公，佢哋私底下再有咩計劃你哋又知咩？可能最終你哋都係棋子喳！」

我的一番話，令到萬先生、徐先生和王先生猶疑了，看來我蒙對了，他們真的受過唆擺，果然忘記生前的事這個設定是有bug的。

他們三人對望了一眼，然後同時望向刁小姐，以眼神問道︰「個細路講嘅嘢係咪真？你真係呃我哋？」

刁小姐終於有點慌亂，她連忙為自己辯護道︰「喂喂喂，你哋唔係咁都信呀？好明顯佢就係亂噏一通。我作為唯一親眼見住你哋被『王』殺死再困住喺度嘅證人，點解要呃你哋先？事實係『王』聽信啲街坊饞言，以為真係你哋做，所以先揾你哋報仇，你哋做咗游氏兄弟替死鬼。而將呢啲謊言傳畀『王』嘅，就係歷代受委託嘅調查員，好彩得阿曉幫你哋查個水落石出，先還你哋一個清白，游氏兄弟先無得再苟且偷生。而呢啲調查員都因為殘暴嘅『王』而全部都被跳樓困哂喺度，所以阿曉，其實我都係想救你喳，點解你仲要誤會我？」最後她還是把話題帶到我身上，裝作一個好人。

「你唔好再扮，我唔同佢哋幾個，我係唔會上當！雖然唔知點解你要一而再，再而三咁屈Tracy，但無論點，我都信佢係清白無辜嘅！」我再次堅定重申我的立場。

「廖生，」此時，我想起他臨終前的遺言，於是問︰「你臨死前話個組織復活人，又咩報仇一齊住，最後仲提咗游瑞棠個名，其實係想講咩？」

廖先生聽到我突然問他，也沒有心理準備，但還是盡力回答︰「我都唔係好記得，但你咁樣講一講，我好似又有返少少印象，好似有個組織有能力復活人，個復活人要報仇，游瑞棠……我唔係好記得，可能佢就係復活人？佢殺咗其他人報仇？」

「喂，山草藥呀？噏得就噏！我先唔係咩復活人，亦都無殺人，我哋係被佢哋三個誤導，以為自己殺咗人。話時話，你個黐脷筋做咩講嘢咁流利？好奇怪喎，計我話係你先係幕後黑手，已經一早諗好哂個故仔，所以講得咁流利。」游瑞棠連忙否認，並加以反擊。

「我無，我都唔知點解咁流利。」廖先生也驚奇。

「因為你已經死咗，所以以前在生時嘅病痛、缺陷都會無哂。」刁小姐解釋道。

「Tracy，」此時我想起了她說自己已經知道一切，於是問︰「你所知道嘅係點？而家我哋每人都有一個版本，唔知邊個先係真。」

「……」Tracy有口難言、面有難色，一句話也沒有說。

現場每人也各執一詞，無人能判斷事情的真偽，也紛紛指控對方說謊，但慶幸的是，三狼因為我的話而心生嫌隙，互相猜忌，逐漸貌合神離，看來他們的合作並非牢不可破。

「既然而家大家都理性討論緊，不如放開我，等大家可以舒舒服服咁傾。」我試探萬先生，想不到他竟然立即鬆開我，還充滿歉意的道歉，連刁小姐也傻眼了。

「老公，你做咩放咗佢？」刁小姐問道。

「我唔係你隻棋，我做嘢唔駛你教！」萬先生終於振夫綱，把刁小姐嚇到退後了一步。