*愛情沒有科學根據,結論純粹只供參考
(可能你會愈睇愈嬲,甚至已經問候緊我,你扮咩情聖呀?你識條鐵咩!)
如果有呢種感覺,實屬正常,無需奇怪

「我地未拍拖個陣,佢都唔係咁既」
曾經好多女仔埋怨,自從佢同個男仔一齊之後,對方就好明顯無以前咁上心,感覺上變得無咁愛鍚自己,就連脾氣同鬧交都多左,感慨對方變左好多
曾經亦有好多男仔解釋,自從佢追左個女仔得手之後,明顯自己係無放咁多心機落去,因為覺得對方成日發脾氣,唔識體諒自己,已經無乜心情再去打理。
男仔仲補多一句「個考試都PASS左啦,我仲點會溫書呀」

其實,雙方都無錯,一切只係週期性問題

個男仔之所以咁講,因為每對情侶拍拖戀愛前,總會有一段考核期
只要追求者做足功課,考核期間個考官唔肥你既
咁就代表你PASS,可以升級做情侶

所以係未到手之前,男仔通常都會出盡全力,表現自己最好一面
反之到手之後,一切都會轉變
呢個現象,我稱為「戀愛週期」

世界上,萬物之間好多都存在住一個週期。
經濟上有經濟週期
化學上有元素週期
女人上有月經週期
情侶,亦都有一個戀愛週期。

然而大家都知道,愛情一D都唔科學,並無得用一條方程式去計算
同時,亦無人可以預測同控制結果..
即時現今科技一日千里,但對於愛情仍然束手無策
但作為一個理科人(姐係咩Phy,Chem,Bio咁樣),我唔小心咁用左XY軸去表示一個戀愛週期,相信大家中學時候都見過唔少

簡單黎講
X軸代表時間(月份做單位)
Y軸代表愛情濃度

正常情況下,男仔好多時比起女仔係會更容易鍾意一個人

基本上對方樣靚身材正,加多少少鄰家女孩既親切感,我地就會演化成一隻狗

衝呀!!!!

當然,唔排除女仔都會咁做,但相信男仔既比例仍然係會壟斷市埸
所以,當一個男仔對一個女仔有興趣,佢地既愛情濃度係隨時都可以維持高水平

然而,你都可能話如果個女仔都對個男仔有興趣呢

噢,如果佢地真係一見鍾情,一拍即合,一觸即發既話,咁大家可以早D休息
因為佢地既線將會重複覆蓋對方,無週期性既出現,
已經打得火熱纏綿,分唔出邊個疊邊個

不過,係多數既情況黎講
戀愛既萌芽,大多都係一方最先有興趣主動接近另一半
而呢個角色,大都係男仔主導

講番個週期表
你話男仔要追人,咁佢地長期維持高水平都可以理解,
可能你會奇怪咁點解女仔開始係一條「波浪線」既?
面對異性既主動接觸,好多時都會令女仔有少女回春既感覺,嗅到戀愛氣味

姐係點?
心大心細,坐立不安,係差在未係到數花瓣

「佢好似好好人咁喎,成日都陪我」
「死啦,佢係咪對我意思呢?」

呢個時候既女仔,情緒極度飄忽,就好似波濤洶湧既海浪一樣,起伏不定
係呢個追求發情期,我稱為STAGE 1

直到時間慢慢過去,雙方開始有更進一步了解
男仔出盡法寶,又約去睇戲食飯,又請佢去迪迪尼玩,真係ALL-IN OR NOTHING
當然,男仔選擇左ALL-IN 啦

呢個時候,個女仔都開始感受到男仔既誠意,亦都開始有少少好感
體內既愛情濃度就慢慢上升

但你可能已經見到點解男仔既愛情濃度會有少少下跌既?
咁當然啦,佢見做左咁多野,等左咁耐,個女仔都好似無乜反應,自然有少少心灰..

不過唔緊要架,比多少少耐性就得架啦!
加油呀!

因為考核期間,最忌心浮氣燥,行差踏錯

如是者每日繼續強勁既攻勢,開始搞到個女仔頭暈暈咁
行街、睇戲、食飯、送禮物、比驚喜、傾電話、包接送,係基本
至於有咩後著同大技未出,每個人當然都唔同啦,相信佢都唔會話你聽

秘密黎架嘛!

成唔成功就係睇呢招架啦!

最後當雙方濃度愈黎愈接近相交點之際,姐係俗稱既「intersection point」,就係佢地拍拖之時
呢個充滿曖昧味道既階段,稱為STAGE TWO

然而,之後既發展大家都顯而易見。
一個升,一個跌
就解釋到點解個女仔會怨個男仔變左

其實,都係預料之內

對於愛情,個女仔初初可能無乜感覺,但當個女仔愈係投入呢段感情,愛情濃度亦會隨之上升,自然會對另一半要求提高
希望對方可以為將來打算,積極D、成熟D,同埋錫自己多D
可惜,呢一種「好心」,並唔係個個男仔都接受

男方會覺得另一半開始煩住自己,乜鬼大小事都要管,要順佢意思
同時,大部份男仔都鍾意新鮮感
熱戀期過後,就開始再想出去睇下個花花世界,識下囡囡咁

無事既無事既,正常既正常既
始終,「花花世界太過美」嘛
不知不覺,對呢段關係既愛情濃度亦會隨之下跌..

的確,男性同女性既愛情態度有少少極端
往後既週期,我地無辦法去睇,因為係要靠情侶互相去編制

文章內容,你可能覺得好多都中,又或者全部都係廢UP
但萬物世事就係咁,好多野唔經唔覺其實都有一個週期定律
大部份既人都好似跟住呢個週期走,所以係開頭提到既男女問題
其中好多都係預計之內,只係睇你點樣去解決

但咁係咪姐係無得救?
咁又唔係既..
因為愛情,始終無法用常理解釋。
一切一切,就只能用自己方法去感受、去磨合,同你既情侶慢慢相處遷就

*以上係一段順利追求,最後成功一齊既情侶作分析
當然唔排除有好多人唔PASS個考試,又或者追求者中途太灰而跳船離開個D就無得講

結論即係…
呃…唔重要既.. 最重要係你既另一半願意一齊同你編制你地既戀愛週期
P.S 爆字數 2000字作文

ig:hottofuzai
fb:熱豆腐仔