如果你無睇過《壹號皇庭》……你走啦，我唔想搞大佢。

嗱我知你想講咩架，套劇係大台拍架嘛？但二十年前嘅大台，同今時今日真係不可同日而喻。當時大台好多劇，尤其係講專業人士嗰類，即係咩《妙手仁心》、《刑事偵緝檔案》、《鑑證實錄》同《法證先鋒》，曾經令到幾多人乖乖哋返屋企食飯，就係為咗坐定定睇電視。當然仲有好多其他種類啦，咩《西遊記》、《封神榜》、《聊齋》、《流金歲月》，好多都仲令人津津樂道，不過下次再講。

仲係電視精嘅年代，我嘅年齡都（應該）只係得單位數。嗰陣一放學就嗱嗱臨做晒功課等食飯，因為之後成晚要由唔記得幾多點開始睇電視，一路睇到做完《真情》。好記得每一晚熄電視，婆婆都會講句：「個電視開咁耐會爆炸架！」講係咁講，咪又係繼續睇，佢是唔會錯過任何一集《真情》的，因為佢每次見到Maymay出場都要鬧爆佢，直到嗰節廣告做完。Maymay折墮食泥個幕，佢足足講左個幾月，開口埋口就話「抵個賤女人食泥啦，啱架喇！」。

講返《壹號皇庭》。我絕對相信八十後呢一代，對律師呢個職業嘅認識都係來自呢套劇，同時亦令當時無數小朋友立志大個要做律師，可以喺法庭上面好型咁嗌「法官大人，Objection！」。可能又因為呢套劇係咁播啲經典英文歌啦，咩《Dreaming of You》呀咁，當時大台嚟講算係幾少見架，所以當堂成套劇嘅層次又提升咗幾級，懶係勁咁。當然，人大了你會發現做律師完全唔係呢回事，邊有咁戲劇化丫，起碼無人會叫個官做「法官大人」先，但呢套劇絕對係經典之中嘅經典。

查返資料先知，原來我最記得個輯已經係第五輯《壹號皇庭》，有陳慧珊同吳啟華，而唔係陳秀雯個代。值得一提，我對蔣志光最深印象嘅角色唔係來自《真情》嘅阿福，而係佢喺《壹號皇座》做大律師。其實佢演技真係好好，律師又得，斬叉燒又得，可惜之後都無咩見到佢做啲好有發揮嘅角色。呢套神劇，仲唔知點解無啦啦會有鄭秀文、王菲同蘇永康，係咪真係經典到啲重量級明星都要嚟玩吓呢？

而家聽返《壹號皇庭》嗰首以色士風演奏嘅主題曲，個腦都會有個法庭上雙方律師舌劍唇槍嘅畫面。我自此之後好鍾意睇啲犯案、查案類嘅電影劇集、書呀，甚至新聞，硬係有鋪癮咁。

唔信？Click入去：https://www.youtube.com/watch?v=w0-Yj3yRH2s 聽一聽啦，我相當肯定咩回憶呀、六師弟呀嗰啲，都一定全部返晒嚟呀！