次次阿聲有嘢唔開心，佢都唔會講啲咩，淨係會買幾罐啤酒、薯片，有時仲會買兩隻DVD，失驚無神走上我屋企，漫無目的咁吹吓水，飲晒啲酒佢就自己會走架喇。不過佢唔想講嘅，我亦唔會問咩事。都咁大個人啦，唔係咩都想同人講、同人分享嘅。

當我半夜兩點見到佢拎住一打青島，喺我屋企門口出現，我就知道今次非同小可。

我二話不說，喺衣櫃拎咗套佢嘅舊睡衣遞俾佢，再將客廳張梳化床換上新嘅床單。

「嘩，咁耐之前嘅波衫你都仲有keep嘅？」佢唔需要知道，其實唔止波衫，就連佢以前用過嘅護腕、風褸、一支筆都好，我都有留低。

當年去完台灣環島遊返嚟，阿聲搬離宿舍，剩低我一個人面對住嗰堆好似會識呼吸嘅死物，同埋阿聲無處不在嘅影子。當時我決定將所有嘢都打包封箱，爭在未貼上封條，企圖封印住呢個潘朵拉盒子入面嘅洪水猛獸。

「我係你以前同房喎，點會唔知你有潔癖呀？擺定一套喺到，等你有一日離家出走咪有用囉。」阿聲聽完我咁講，突然定眼望住我，有啲語重深長咁講咗一句：

「如果所有嘢可以返返去以前讀大學嗰陣咁，你話幾好。我係話，去台灣環島之前。」

有好多年嘅時間，我都唔敢再諗起當年台灣嘅事，甚至唔敢再踏足呢個國家。我時不時都會諗，到底我前世做錯咗啲乜嘢，今世先會咁樣整惑我呢？

作為一個男仔，天生唔鍾意做運動係咪一種死罪？女仔又點解一定要鍾意著裙？呢啲咁嘅性別定型甚至歧視，年中到底害咗幾多人？如果你話一個人食煙 、飲酒、啪丸係唔啱，起碼佢都仲有改變嘅機會，可以控制自己可以戒。但鍾唔鍾意一個人，唔到我話事。

要為一啲我根本無辦法控制嘅事而受罪一生，公平咩？

望住阿聲，我好無奈咁講出自己嘅委屈：「我根本無迫過你，當年係你自己避開我，堅持一定要搬走。」直到而家，我都唔敢喺阿聲面前飲酒，因為我怕又會好似上次喺台灣咁酒後亂性，忍唔住伸手攬實阿聲，搞到當年朋友都做唔成。

我知唔係每個人都會選擇面對現實。好似阿聲咁，佢就從來都唔肯面對自己心入面嘅感受，莫講話係佢壓我上面嗰陣，身體出現嘅本能反應。

「你明唔明呀？我唔想做你嗰種人呀！」從阿聲嘅眼神，我睇得出佢嘅鄙視。「嗰種人」？佢覺得我唔係正常人咩？

其實說話，可以比一把刀更加傷人。

＊＊＊＊＊＊＊＊＊＊＊＊

一路偷聽住佢哋嘅對話，我好後悔點解要偷偷哋喺軒仔部電話裝埋呢個app。嚟到呢個地步，我連扮無事發生過嘅機會都無。

我終於醒起上次食飯當晚，話想食拿破崙蛋糕嘅，其實唔止珊珊一個。而且，咁啱上個月就係軒仔生日。

而家就可以順便解釋埋，點解阿聲嘅信用卡月結單有一單五千幾蚊嘅簽帳紀錄。以佢哋嘅交情，一個Dunhill銀包又算得係乜嘢。阿聲連一條手鍊都無送過俾我。

愛情呢回事，真係好撲朔迷離。你愛他他愛他……明明每一個人都無做錯，但結局居然可以錯到一塌糊塗。

我以為只要努力，一直等，就會等到同阿聲細水長流嘅一日。但原來，佢想要嘅風景入面根本無我。

望住四幅牆，我有少少慶幸自己仲未投資太多青春同感情落呢個新入伙嘅屋企。忽然間，我想FaceTime珊珊，我諗，佢會係呢一刻最能夠開解到我嘅人。

（完）

【B612按：大結局了！感謝大家追故！記得like埋我個FB page追其他故呀！:)】

B612專頁：http://www.facebook.com/b612lpp