佢哋三個，係我呢世人最珍惜嘅人：兄弟、好朋友、女朋友。一世人儲得齊呢三個印花，仲要呢三個人同時都係大家嘅好朋友，夫復何求？只係我從來都無諗過有一日，會係由自己親手徹底瓦解呢個四人幫 。

軒仔係嗰種連赴刑場受死都會早到15分鐘嘅乖乖仔。如果睇唔出佢其實已經畢咗業好多年，你會以為佢係一個以連年衛冕「最佳操行獎」為目標嘅好學生。

「你……上次咪set咗VPN可以免費睇歐聯嘅？借你部手機俾我丫，我想跟住set呀。」我當佢好似係我親細佬咁。佢平時做咩都驚驚青青、甩頭甩尾，唔吓吓睇住佢我個心就唔安落。

「密碼2173，你自己搞啦，我出去幫阿Cat買定外賣先，啲女人真係煩到死。」

比起以前三日一小嗌，我同阿Cat嘅感情無錯係一年比一年好 。但係隨住時間過去，越一齊得耐，就越覺得硬係爭咁一份對住情人應有嘅激情。我唔係無睇過啲咩中女語錄，我知愛情最後一定會變親情，問題係我先至廿幾歲，咁就一世，甘心咩？

有時我都唔明，究竟自己喺到想要啲乜。係體溫？溫柔？心電感應？我講唔出。

「你同阿Cat又嗌交呀？你唔係又身痕呀嘛？」呢次唔係我三年入面第一次起異心。久唔久，我就會好似煙癮發作咁，希望喺其他人嘅身上 —— 或者身體上 —— 搵到最後一塊拼圖。

「唉，你呢啲A0生物唔會明架喇，破咗處先再教訓我啦你。」軒仔對眼應該係生喺頭殼頂，咁多年嚟連一個女仔都睇唔上。

「咁唔係下下鍾意親都可以喺埋一齊嘅……我豬肉佬又何嘗唔想做一個偉大嘅舞蹈家呢？」

我真係笑唔出。踏破鐵鞋，終於俾我遇到，偏偏係一個最唔應該嘅人……原來鍾意一個人，係同中雀屎一樣咁防不勝防。

＊＊＊＊＊＊＊＊＊＊＊＊

一個人講咗第一次大話，無論之後點樣修補，都只會係徒勞無功，因為佢已經再無資格講「我從來都唔會呃你」呢句嘢。

上個星期四，阿聲好夜先收工，佢話返自己屋企近啲所以無返嚟瞓。所以我正式第一次，試用軒仔偷偷哋幫我喺阿聲手機裝嗰個叫「Boyfriend Tracker」嘅app，諗住查吓佢而家喺邊。

等緊部電話更新佢嘅GPS嗰短短幾秒，我已經手心冒汗……而結果係 —— 「中環－蘭桂坊」。

同好多女人一樣，當發現男人可能有第三者嗰陣，都會絞盡腦汁為佢開脫。嗰一刻我諗過，呢個app會唔會其實唔準呢？會唔會佢真係喺屋企呢？

好彩，通常女人重蹈覆轍百零二百次之後就會醒覺：有無咁橋，全香港一千平方公里咁大，個GPS就偏偏定咗喺中環嘅呢條街呀？

既然佢做初一，亦唔可以怪我狠心。

感謝科技太發達，人腦根本無辦法記住唔同帳號用唔同嘅密碼 。趁阿聲唔喺屋企，我打開咗佢部電腦，輸入2173 2173，輕易就解咗鎖。由文件、相，到甚至乎電腦程式，成部電腦可以睇嘅嘢我都幾乎睇晒，但就係咩都搵唔到。跟住，我打開咗佢YouTube嘅閱覽紀錄。

大部分影片紀錄都係MV。阿聲習慣喺屋企就會用YouTube聽歌。當我碌到去上個月嘅紀錄，發現佢連續睇咗十幾二十條拿破崙蛋糕嘅教學影片，但我同佢一向都唔好甜嘢架喎？睇返日子，啱啱好就係入伙派對嗰晚。

亦即係，珊珊問我哋點解食完飯無準備甜品，佢好想食拿破崙蛋糕嘅同一晚。

部電腦嘅瀏覽器，有其中一個分頁停留咗喺淘寶。佢嘅購物紀錄入面，除咗啲運動褲、水樽、襪之外，仲有一套米白撞藍色嘅雙人床床單。之前我哋入伙揀床單床褥，佢完全無關心過。況且我哋都已經有幾套啦，佢仲買嚟做咩呢？

我查吓呢件貨嘅收件人同地址，竟然係珊珊屋企。

女人就係咁，係都要呃吓自己先甘心。我嘗試為呢一系列嘅不尋常事件搵個合理解釋：朋友都可以整蛋糕佢食架姐？床單可以係順便集運慳運費架……咁，性感內衣呢？

不過謎底好快已經解開。第二晚趁阿聲去咗沖涼，我拎咗佢嘅八達通，連接讀卡器，查吓佢上星期四究竟係咪真係收工之後返咗屋企瞓。佢由公司返自己屋企，理論上係行15分鐘就會到，咁短距離亦無咩小巴、巴士可以搭。但係八達通紀錄就顯示，佢嗰晚放工同第二朝曾經搭過城巴同香港鐵路。

我個腦入面已經自動為呢項紀錄想像出最完美嘅路線：搭去金鐘站，轉城巴90B去海怡半島 —— 珊珊嘅屋企。

嗰晚之後，我無再搵到其他蛛絲馬跡。其實呢個Boyfriend Tracker嘅app，淨係可以睇到通話紀錄、SMS內容、GPS定位等等，但呢個年代根本無咩人仲會打電話或者用SMS。

每一日，我只可以不停諗住佢兩個喺我背後究竟做緊乜嘢，會唔會而家阿聲喺佢揀嘅床單上面，同珊珊卿卿我我緊？除咗亂諗，我咩都做唔到，又唔想咁快就打草驚蛇嘅話，否則阿聲唔會認，亦唔洗旨意佢會改。

或者無證據都好嘅，咁我就唔洗怕攤牌之後，阿聲最後揀嗰個，唔係我……

我爭啲就以為，自己嚟到呢步就輸咗。

（待續）

【B612按：只連載四集！希望大家share吓啦！怕miss咗追故嘅記得like埋我個FB page呀！:)】

網絡作家b612 – facebook專頁：http://www.facebook.com/b612lpp

（鍾意睇嘅請你去俾個like，支持吓我繼續寫嘢吖！:)）

「倘若有一個人對一朵花情有獨鍾，而那朵花在浩瀚的星河中，僅此一朵。那麼，他只要仰望繁星點點，就心滿意足了。於是他喃喃自語：『我的花就在星河的某個角落』可是，這花一旦被羊吃掉了，瞬間，所有星星也將隨之黯淡無光。那你也認為這不重要嗎？」