真正嘅朋友，係就算幾忙都會抽時間出嚟見個面、食個飯
即使，只係短短相聚一兩個鐘

對於有啲人，你約佢出一次街、又或者食一餐飯都要等到佛誕
就算真係等到佛誕嗰日…佢都未必應約..隨時放你飛機
或者係對方心中，你都唔係咁重要姐～

相反係一班好朋友、知己，就算時間好難夾都好，但大家都會好樂意見面
就好似上星期六咁，本身大家都無預到會食晚飯
只係，一切都剛剛好

「有咩搞呀今晚？」
通常一班好Fd子嘅朋友，都會有個小圈子whatsapp Group
人數可能都係小貓3、4隻，但入面肯定都係無所不談嘅八公八婆
「今日收早，應該無嘢做」
呢一個時候，另一個「八婆」又咁岩輸入中

「喂衰嘢！我都係喎！」

「喂，咁不如今晚出嚟食飯啦！」
雖然，都預咗佢地唔會秒覆，但都好過已讀不回

隔咗半個鐘
「唉頂！岩岩公司打嚟話要返去搞少少嘢！等唔等我！？」
「咩公司嚟架！放假都要人返去！」
「唔好理佢啦！」
「叫佢自己搞啦！！！」
我地做損友嘅角色就係專講埋呢啲無建設性嘅說話
反正，我地就係咁
「放心啦！我應該九點前搞掂～」

等，寂寞到夜深。

雖然我地四個最後出到嚟食嘢已經係十點半，仲要我地三個等到變左非洲饑民咁..
不過當見到面，大家都好自然咁笑咗出嚟~

或者自從大家返工之後，都唔會好似讀中學嗰陣成日見面
但反而正正因為少見，就會更加珍惜相處時刻

你又笑吓我，我又串吓你
講講吓中學gap gap嘢又轉左韓國channel

我: 「我覺得《來自太陽的你》同《猩猩的後裔》都好睇~」
「唉你收皮啦！」
「蝦蝦蝦！食蝦啦你ha」
呃頂..枱面又真係有隻蝦！

就係咁，兩個鐘好快就過咗
走之前都不忘自拍一張，劃上句號。
之後，大家都各自道別歸家～

或者，朋友相處並唔係在乎時間長短、地方遠近
因為真正嘅朋友，傾幾耐、邊到傾都一樣咁開心滿足

大家嘅朋友仔，又容唔容易約呢？
隨傳隨到，又有幾多個？

P.S 好慘~
其中一個朋友無睇太陽，話題完全被忽視haha

ig:hottofuzai
fb:熱豆腐仔