是咁的,早排我喺中大嘅X衡書院,嗌咗個兩餸飯,咁其中一味就係西檸雞。你知啦,煮西檸雞好考功夫的,又要炸好個皮又要調好個汁,不能太甜亦不可太酸,一啲都唔簡單,所以我把心一橫決定試試佢。

落完單後梗係滿心歡喜,準備大快朵頤,點知走去櫃台拎菜一睇,長知識了,原來呢味餸就係餐牌上嘅「西檸雞寶」(如圖,實拍)。喂,「麥樂雞餐」基本盤都六件啦大佬,呢度先得三件,個皮仲要淋patpat。麥樂雞配絲苗白米係咩風味?咩玩法?何必呢?如果食「咖哩薯仔炆雞飯」,咁係咪即係麥樂雞+炸薯條+咖哩汁撈白飯?或者你話:「喂啊哥,『雞寶』多數都係泛指麥樂雞之類嘅雞塊啦。」但我又點估到可以crossover西檸汁咁創新呀師兄,大預言家咩,叫「西檸麥樂雞」大家易明少少唔好咩。

講真,成日見到中大學生話要喺校園起麥當勞,一時反對一時爭取乜乜乜我真係得啖笑。爭咩吖,去善can吖笨,一個雙拼碟頭飯已經滿足到你基本要求,雙餸選擇建議如下:1) 西檸雞、2) 粟米;飲可樂。如此配搭,同「麥樂雞餐」薯條轉粟米飲汽水嘅性質一樣,仲多碗頂級白飯,都咪話唔fat fat。

若果咁樣係西檸雞,咁麥當勞都可以推出中國菜式───「西檸雞餐」。將甜酸醬換成西檸醬,自助自蘸,每次一點醬就變西檸雞,唔點醬就係麥樂雞,如果點一半,就可以喺同一舊雞肉上面,試晒中西方兩道名菜,真正一雞兩味,滋味無窮,幾嘆呀!

資深食家口舌更為刁鑽,建議可問收銀姐姐拎包鹽,灑少少喺嫩雞之上,咁又可以變成「鹽焗雞餐」,一菜三食、齒頰留香,廣東人做雞的方法何其多。

=================
香港人,撐本地潮文。
由社長執筆,當寫blog咁,不論生活小品、身土家國,乜嘢都寫下,希望「既寫潮文,亦寫瞧聞」,閒來無事9up兩句,
請支持並like《潮文社》專頁:https://www.fb.me/9.Literature/