俗語有話，風水佬呃你十年八年，其實髮型師都不遑多讓。小朋友總有些少中二病情懷，覺得陰長長咁會型啲，短毛就係薯，不過大部分髮型師一次又一次破壞每個童年男仔嘅夢想。
基本上，我對剪髮舖都係有童年陰影的。十歲八歲之前，都係由老母帶去剪髮，對於點剪完全冇話事權，去到後嚟有得自己出去剪喇，基本上次次都中伏。一入到去，師傅會問：「點剪呀？」
「er……可以碎少少，然後側面同我鏟些少，盡量唔好剪太短，上面呢度輕輕修下好喇，呢度偷薄啲啲。」
「Ok，冇問題。」
咁你知啦，剪嗰下要除眼鏡的，所以佢一路剪，你冇得一路監察住，啱唔啱心水都睇唔清楚。
最後係點？大家都估到啦就係短到痴線，你本身覺得好型棍子嘅頭髮(事實上唔型)，一下子被剃到光禿禿，情況就好似一個男人瞓醒被人發現抆晒腳毛咁，咩霸氣都冇晒。
年少氣盛當然唔服，覺得只係呢間出事。之後去試第二間，同樣叫佢唔好剪太短，結果又係短到媽叉咁，如是者第三間、第四間、第五間都係一樣，神探如我，開始嘗試推敲到底呢個世界發生嘅咩事，到底點解不幸之神次次都選中我？點解佢地好似永遠都聽唔明咩叫「唔好剪太短」呢？後來我諗通咗，呢啲應該係佢地行內術語嚟，「唔好剪短」=「剪短」；「少少」=「多多」等等。終於有一次，我抱住當代實驗主義下嘅科學精神，一坐低，乜廢話都唔講，連師傅都未開口我已經話：「剪短、修多多」。剪到咁上下帶番副眼鏡一睇，我頂你個肺，短都唔緊要啦仲要齊修葺葺，係變咗陸軍裝呀！真係解放軍嗰隻！記得嗰陣番到學校同學都走嚟問我係咪想做軍人，我心諗都on99，陸軍裝就係軍人，咁飛機頭係咪做飛機師？
更可怕嘅係，呀媽每次都覺得我剪得唔夠短，認為細路仔愈短愈好，清清爽爽唔洗煩，所以千祈唔好俾啲老母做髮型師，二合為一就世界末日喇，到時全街都變晒光頭和尚look。
如果話「永遠不要相信共產黨」，不如話「永遠不要相信髮型師會聽你叫唔好剪太短」，人地話十個男人九個滾，我就話十個髮型師，十個剪短啲，飛髮師傅真係小朋友嘅敵人……
頭盔：純粹童年記趣，絕非批評理髮行業，雖然大個咗之後仍然會剪到我好短。
=================
香港人，撐潮文。
由社長執筆，當寫blog咁乜都寫下，希望「既寫潮文，亦寫瞧聞」，閒來無事9up兩句，
請支持並like《潮文社》專頁：https://www.fb.me/9.Literature/
