是咁的，啱啱見到Facebook「當年今日」提示，睇返自己當年做FYP時寫嘅呢篇文，有血有肉，簡直係時代悲歌。適逢眼見師弟妹近日做FYP做到叫晒春，所以整理一下，重新公開發佈：
又踏入四月時份，有時候，有啲嘢，要做過畢業論文先明。
FYP，全名係Final Year Project，我當年可以揀寫或唔寫，但由你選擇寫嗰刻，命運就認定咗你係一個勇敢嘅人。
點解要揀寫FYP? 因為巴閉？英雄主義？疊馬？全部錯晒，而係騙徒手法層出不窮，「試下啦」、「唔做過點知自己得唔得呢」云云，漸漸發覺其實中伏。就好似入到大學就要食canteen咁，好難食好難食，其實你都唔知點解要食，但你活喺呢個環境，為咗生存，點都要硬吞。
做得FYP嘅，我地都係朋友。得閒就問下對方做成點，唔得閒都要問下對方做成點，返宿舍做論文、返屋企做論文、食飯做論文、開口埋口每一句都係做論文，就好似平時同人講「得閒飲茶」咁，差在未約埋去cafe de coral book位食住高級西餐做論文。做FYP嘅人，有邊個未試過閉關趕字數？有邊個未試過精神壓力晚晚瞓得唔好？
喺campus入面，一知道對方都有揀做論文嘅話，唔洗多講，我地都係被時代選中嘅角色，我地係同路人。如果你去咗exchange但又揀寫畢業論文，我地係知己。我final year第一學期九月去咗exchange，一直冇諗過開始，亦都冇做過，接近一月返香港，二月先敢搵老師，三月先定到題目，邊個做論文嘅exchange唔係咁？住宿舍遊走喺campus仲刺激過俄羅斯練膽大法，好怕撞正指導老師，但日日都必定會經過N次department辦公室，每過一次冇事就覺得自己係幸運之神眷顧嘅小孩，每行一次都覺得自己就係一部成長小說。
曾經有成個exchange period畀我做，但係我冇去珍惜，到冇咗嘅時候先至後悔莫及，塵世間最痛苦莫過於此。如果個天可以俾機會我番轉頭嘅話，我會同佢講我唔做，如果係都要喺呢份嘢加上一個期限，我希望係一萬年。所以話做過FYP先知，原來自己潛能咁大，咁能大，短短時間，匯聚數年功力，經過千錘百煉，貫注於一點毫毛之上，寫出嚟嘅係大腦同雙手交配後嘅愛情結晶品，想像一下，印完篇論文，拎上手新鮮滾熱辣準備繳交，路過嘅戰友會同你講「恭喜晒，幾多字？」就好似同你講緊「恭喜晒，仔定女？」一樣，都係經歷過陣痛之後，捧住自己親生骨肉嘅喜悅。逃避FYP嘅學生，我唔會話佢地係懦夫，只會話：佢地嘅人生都係唔完整嘅。
「條路自己揀，仆街唔好喊」，做FYP嘅知己，我地迎面而過，互相對望，輕輕點頭，乜撚都唔洗講。
四月時份，春暖花開。奼紫嫣紅平常事，grad唔grad到冇人知。
=================
香港人，撐本地潮文。
由社長執筆，當寫blog咁，不論生活小品、身土家國，乜嘢都寫下，希望「既寫潮文，亦寫瞧聞」，閒來無事9up兩句，
請支持並like《潮文社》專頁：https://www.fb.me/9.Literature/
