Shadow
「喺下一個比賽開始前，我想畀啲嘢你哋睇。」東南西北邊說邊升到屏幕前，然後消失，不知何時起，它又變回全息影像。
隨着東南西北消失，屏幕慢慢出現影像，是一節新聞報道，時間顯示為下午二時零三分，是即時新聞。然而，新聞片段所顯示的情景，與阿希所認知的外面世界有很大落差。
「短短四個鐘，外面變哂天？好似世界末日咁嘅，發生咩事？」不只阿希，連錢先生也十分吃驚。
「短短四個鐘，個病毒爆得咁犀利？因為咁所以先要閂咗個天幕？」錢先生半信半疑，於是命令阿滔︰「你幫我出去確認吓，放心，你已經免疫哂所有病毒，百毒不侵，可以隨便出去。」
於是阿滔便乖乖離開包廂，可是工作人員以外面危險為由，不准許他步出包廂，擾攘一番後還是無工而回。錢先生將整件事看在眼裏，感到事有蹊蹺，於是訛稱想去洗手間，豈料工作人員指着包廂一角說︰「嗰面有道暗門，入面有洗手間。」
「睇嚟係要徹底困住我哋呢班富豪，呢場比賽睇嚟唔係咁簡單，背後究竟有咩目的？」錢先生帶着懷疑走進洗手間，一邊佯裝解手，一邊查看有沒有其他出口或窗口。
「喺呢四個鐘裏面，外面世界已經天翻地覆，世紀病毒徹底爆發，感染人數激增，估計十個鐘內，全球嘅人都會受感染。」東南西北作為旁白，以磁性的聲音說︰「只有可以留低喺度嘅人先會無事。」
新聞報道的畫面都是在高空以無人機拍攝，畫面所見只有兩種人︰一種是不停咳嗽的人；另一種是躺在地上，已經斷氣的人。
「人間煉獄」大概是阿希此刻想得出能夠用來形容外面世界最貼切的四個字。記者盡可能地用言語來描述所看到的畫面，但說着說着，她開始咳嗽，而且越咳越嚴重，連帶畫面背後也傳來咳嗽聲，無人機的畫面亦搖晃起來。咳嗽聲成為了交響樂，此起彼落，氣勢磅礡；漸漸咳嗽聲減少了，由交響樂變成了催眠曲，單調乏味，了無生氣；最後只餘下零星的咳嗽聲，催眠曲變成了安魂曲，遺憾怨恨，驟然消逝，無人機亦同時墜落，畫面也到此為止。
「啱啱嘅畫面係現場直播，亦都係場館外正在發生緊嘅事，基本上只要一離開呢度就會受感染。大家唔想死，就要努力爭勝，只有最出色嘅勝利者先有資格生存落去。」東南西北鼓勵參賽者道︰「攞出你哋嘅爭勝心，攞出你哋嘅本能，攞出你哋嘅潛能，燃燒自己，為生存而戰，為我哋貢獻一場精神絕倫嘅比賽！」
畫面中斷後，阿希將目光投向錢先生和阿滔所在的包廂，錢先生剛好從洗手間出來，也焦急地尋找阿希的身影，很快，他倆的目光對上了。
由於距離很遠，面部表情和聲音都傳達不到任何訊息，他們只能靠誇張的身體語言表達自己，但對方能否理解就靠運氣了。
錢先生先指外面，然後雙手放在眼睛上方作了觀看的手勢，最後交叉雙臂。
「出面……睇……唔得……」阿希邊看邊自言自語，然後組織出一句完整的說話︰「睇唔到出面！即係出面究竟係咪真係變成咁，喺呢度嘅我哋係唔知，只可以聽佢哋講。」
「接住落嚟，會有兩個鐘嘅時間畀你哋休息同食飯，四點十五分再喺返呢度集合，遲咗就唔好怪我唔客氣。」東南西北說完，圍着邊線的玻璃幕牆緩緩降下，參賽者紛紛跑到觀眾席上尋找自己的代表富豪。
「成件事好怪，」錢先生開口第一句便說︰「工作人員唔畀我哋離開包廂，連洗手間入面都係一個密室，加上呢度乜網絡都無，完全係想我哋與世隔絕。」
「嗰班輸咗嘅人，連同佢哋嘅富豪，真係只係被清除記憶咁簡單？我覺得係謀殺先真。」阿希也分享自己的想法，不忘問阿滔︰「成件事你點睇？」
一直沉默的阿滔先望向錢先生，錢先生也說︰「係囉，你都發表吓。」
聽到錢先生的說話，阿滔便說︰「根據我嘅觀察，我覺得呢度好奇怪，唔畀我哋睇到外面好唔合理，加上我感覺到温度、濕度都同一開始有啲唔同，我懷疑我哋已經唔再喺地面。」
阿希聽到阿滔的猜測感到非常震驚，忍不住讚嘆道︰「嘩！識咗你咁耐都唔知你咁勁，連温度同濕度都感受到。聽你咁講又講得通，所以先唔想畀人睇到外面，廢事有恐慌。」
「會唔會呢度就係末日城堡？」阿希大膽猜測。
錢先生搖搖頭，實牙實齒地說︰「呢個規模一定唔係，但可能係去緊末日城堡嘅路上。」
阿希十分驚訝，但亦無可奈何，只有接受現實，努力勝出比賽，反正他最後的目的是要見到親生哥哥，中間過程完全不重要。
此時，工作人員端上了豐富的午餐，錢先生、阿滔和阿希立即大快朵頤，畢竟要先吃飽才有氣力作戰。
席間，錢先生問了阿希一個問題︰「點解你對自己咁無信心？」
被這突如其來的一問，阿希有點手足無措，雙頰和雙耳通紅，一臉尷尬，把嘴巴塞得滿滿的，期望用漫長的咀嚼時間來緩解這個他不想憶起的答案。然而，錢先生並沒有放過他，以誠懇的眼神定睛看着他，期待他的回答，一旁的阿滔也只顧着吃，沒有為阿希打圓場的想法。
「係咩原因令到你咁？」錢先生追問︰「我哋而家坐埋同一條船，我都希望我哋可以贏，所以我想幫你加大贏面。」
阿希眼見不能迴避，而且錢先生所言亦有道理，於是便把自己的童年陰影和盤托出︰「喺我讀小學五年班之前，我係一個好有自信同外向、老師問問題會舉手爭住答嘅人，但有一次，我答完之後，個老師講咗一句『嘩！乜你把聲咁老牛』之後，我就意識到佢係話我把聲唔好聽，從此我就收埋自己，無哂自信，唔再舉手，變到好摺。」
「唉！說話嘅威力真係大，」錢先生聽完後慨嘆︰「『言者無心，聽者有意』，一句隨口嘅說話就改變咗一個細路仔嘅一生。」
阿希低垂着頭，默默吃飯。錢先生嘗試從聲音入手，把有自信的阿希找回來，於是說︰「其實你把聲幾低沉幾磁性，係好聽㗎喎，個老師唔識貨啫；同埋你呢種超人嘅觀察力，我做人咁耐淨係遇過三個人有，你係第四個，幾咁罕有，只要善用就一定成功。」
「唔駛氹我，自己知自己事，我會盡力。」已經吃飽的阿希說完便起身離坐，仔細檢查包廂每一吋地方，看看有沒有甚麼機關，可是始終徒勞無功。
「而家對今次比賽有多咗認知，或者我哋可以制定啲戰術同計劃先。」錢先生邊擦嘴邊說︰「雖然未知接住落嚟會係咩比賽，但係未雨綢繆好啲。」
的確，有計劃有戰術會安心點，加上阿希的臨場應變，絕對會事半功倍。
阿希認同之後，錢先生便分析︰「目前已經知嘅係，一，籌碼好重要，之後會用得着；二，尚餘參賽者有十六個；三，東南西北每次都會暗示獲勝條件。」
「但啲籌碼我為咗保命，已經丟哂出嚟畀其他人執。」阿希心有餘悸地說。
錢先生也目睹這一幕，他安慰阿希說︰「籌碼重要但唔係必要，如果之後有機會賺返就最好，無嘅就努力比賽，贏到開巷就得。」
「知道。」阿希乖巧地回答，並提議道︰「十六個人唔知會比啲乜，但我認為未去到最後爭冠階段嘅話，都係排喺中間名次穩陣，『槍打出頭鳥』，最勁會被人針，最廢會被淘汰。」
「正有此意，你同我諗嘢都幾接近。」錢先生高興地搭着阿希膊頭。
「另外，我記得你話過呢個組織之前都有搞過其他實驗、比賽，具體係有啲咩？我想知多啲，可能會揾到端倪。」
錢先生從口袋拿出手提電話，不看也知信號為零。他平靜地對阿希交說︰「啲資料我放哂上雲端，但而家上唔到網，所以得物無所用，我淨係記得少少，捉伊因、埋舟同killer，其他唔記得。」
「個人同團體都有，鬥智同鬥力都有，咁好難捉佢路。」阿希眉頭緊鎖，聽完後更加混亂。
此時，鮮有說話的阿滔插嘴道︰「跟住應該係捉棋。」
錢先生和阿希同時跟着阿滔指的方向望去，發現球場變了一個巨大的飛行棋棋盤，標誌性的紅、黃、藍、綠四色有規律地分佈在指地的格內，而部份格上面更有不同的圖案，分別是金錢、遊戲機、問號以及爆炸。
「飛行棋？」阿希興奮地說︰「好耐無玩過，飛行棋無咩戰術可言，睇點擲骰同疊棋，大家公平鬥運氣。」
「唔會咁簡單，擲骰都有技巧，真正嘅『骰魔』係可以控制點數；再講，你睇吓格仔上面啲圖案，雖則唔知代表啲乜，但直覺嚟講，最少爆炸係要避開。」錢先生凝視着球場上的棋盤仔細研究。
「你估係一人一隻色，定一人一隻棋？」阿希並未對圖案展現出很大的興趣，反而更着重比賽的形式︰「唔知今次飛行棋有咩規則，會唔會又有原創呢？」
「你好似好興奮咁，不過我覺得唔會淨係玩棋咁簡單，而且佢仲特登預早畀全部人知係玩飛行棋，一定唔會咁簡單。」錢先生對接下來的比賽持懷疑態度。
「咁你有咩意見，應該有咩策略？」阿希突然又認真起來。
「正常飛行棋係鬥快四架機返終點，咁啱啱嘅排中間計劃就作廢，一定要拎到第一，唔係就輸。」錢先生咬着大姆指思考着對策，一會後續說︰「關鍵一定係盡快起機，同埋啲有圖案嘅格仔，一定要避得就避。」
「嗯，知道。」阿希回答同時望向場內大鐘，時間飛逝，不知不覺已經來到四時十分，阿希告辭說︰「時間差唔多，我落返去先，遲咗取消資格就唔抵。」說完後他一溜煙跑走了。
四時十五分，玻璃幕牆準時升起，十六位參賽者齊集在東南西北面前，等待它的指示。
同時，阿希留意到很微小的光暗變化，雖然場館內依舊燈火通明，但天幕頂總感覺變得暗了，就像太陽被巨大的陰影遮蓋了一樣。
「如果本身已經喺地底應該唔會咁，唔通而家先開始落地底？定其實一直都無落地底，只係阿滔嘅錯覺？」阿希越想越不明白，越不明白就越想找出真相。
「歡迎咁多位準時返到嚟，無人遲到需要淘汰，因為如果真係有，咁接住落嚟嘅比賽我都幾頭痕。」東南西北於棋盤中間說︰「誠如你哋所見，嚟緊嘅比賽係飛行棋，大家一定都有玩過，放心，規則同一般飛行棋一樣，無唔同。」
「真係一樣？咁簡單？純靠運？」阿希心中有一連串的問號。
「飛行棋有四隻色，每隻色有四隻棋，一共係十六隻棋，聰明嘅你哋應該已經知道你哋每人都係一隻棋，所以呢次比賽既係合作，亦係個人賽。」東南西北的說話有點矛盾，一時間令人聽不明白。
「合作，即係要最快令到四隻棋都去哂終點；個人，即係鬥快去到終點，第一個有十個籌碼，第二個有七個，第三個有四個，第四個有一個。而晉級嘅只有一隻色四個人，究竟點運用你哋嘅每一步，令到自己隻色贏同時自己又第一個到終點呢？嘻嘻……」東南西北發出狡猾的笑聲，但它的說話成功誘發出參賽者的利己之心。
「遊戲規則好簡單，同一般飛行棋一樣，參賽者擲到雙數可以起機，擲到六可以再擲，連續擲到三次六就返大陸；可以疊棋行，但被人食就一次過死哂。比較特別嘅係唔同格仔上嘅圖案，每個圖案都有唔同用處。金錢就係賺錢機會，但同時都伴隨住蝕錢嘅風險，踩中嘅人可以自訂籌碼，然後抽卡，可能係翻倍，亦有可能係沒收；遊戲機係隻棋喺棋盤行緊嘅人都一定要參加嘅遊戲，可能係個人戰，亦有可能係團體戰，勝者有籌碼，敗者扣籌碼，至於數目多寡就隨機；問號係機會，除咗完成咗嘅人，其他全部人都會受影響，包括未起機嘅人；爆炸係意外，第一次踩中會隨機炸一格，第二次踩中會隨機炸兩格，如此類推，被炸中嘅就要返機場再嚟過。」東南西北一口氣把規則介紹完，但參賽者認真聽的寥寥無幾。
「分組係根據籌碼多少，順序一、二、三、四咁報數，我哋已經分好咗，擲骰都係跟住呢個順序。」東南西北說完，屏幕便顯示出四色的人員，阿希作為籌碼最少的人，被分到綠色，而且是最後擲骰的一個。
「咁就可以好好觀察，雖然控制唔到骰嘅點數，但睇咗前面十五個人玩之後，唔多唔少都會總結到啲嘢出嚟，應該可以制定到啲策略。」阿希心裏想，他對這場比賽充滿信心。
「順帶一提，每位擲完骰，係可以控制你哋色嘅棋行，並唔係只控制自己，點行先對團隊最有利，又或者點行先對自己最有利，諗團隊定諗自己，閣下自理喇，嘻嘻……」東南西北奸險地笑着說。
聽到這段話之後，阿希心裏不禁「嘖」了一聲，因為經它這樣一說，原本無自私想法的人也難免會產生利己的念頭，這樣一來，要成為第一組完成棋局晉級的難度就會幾何級數上升。
東南西北一下子收起笑聲，變得嚴肅起來︰「而家根據分組，大家去返屬於自己顏色嘅停機坪準備開始比賽，比賽會喺四點半正式開始，而家仲有大約七分鐘，畀機會你哋認識吓大家，傾吓戰術、策略，一陣比賽開始，我相信你哋無咁多時間去商量。」
分組名單如下︰
紅色
拉斯特
密他飛卜艾珠
群巴之頭
亞星爾戴
黃色
軟微
紋骨甲
博彭三世
瑪爾沃斯基
藍色
江長
易路登威
華沙
達偉英二
綠色
遜馬亞里
金歌谷
雅萊歐
李友希
從籌碼多寡來看，紅色必定會成為眾矢之的，而綠色則威脅最少，只要保持低調，互相合作，以團隊為重，留到最後，隨時有機會獲勝。
阿希看着分組圖想得出神，以致隊友的叫喚也聽不到，直到雅萊歐──一位美國藉五十多歲的高大女士──拍他才回神。
「我相信大家都知我哋呢組人嘅處境，我哋係最弱嗰方，但呢個反而係我哋嘅優勢，只要大家夠無私、以大局為重，我相信晉級嘅必定係我哋！」遜馬亞里──印度籍，留了一臉大鬍子令自己看起來更成熟，是一個二十出頭的睿智小子──言簡意賅，將綠色的優劣勢一語道破，再指明方向並加以鼓舞，一時之間，綠色人人都士氣高昂，誓要得到第一並晉級。
除了來自北韓、身型嬌小的金歌谷，她聽到遜馬亞里的說話後雖然也放下了戒心，但始終還有一些保留，未將所有想法說出來，這與她的成長背景離不開關係。
而另一方面，作為大熱門的紅色，他們的成員卻貌合神離、各懷鬼胎。作為此刻首富的拉斯特迅速發現了問題，他心知這組人在心理上盡佔優勢，而且極具好勝心，當所有人也是對手，並沒有合作的想法，這極不利於此次比賽，很容易最終被翻盤，所以他選擇了逐一擊破，私下跟各組員協商，達致表面上的合作。
至於黃組，軟微站出來，提出了一組又一組的數據，例如擲骰擲到雙數的概率、飛行棋黃色的勝率、擲骰的期望值等，她越說越興奮，然而她的隊友一句也聽不明白，各自為接下來的比賽作準備，形同一盤散沙。
最後藍組，這組看上去戰鬥力最強，除了達偉英二之外，其餘三人也高大威猛、強壯如牛。他們之間沒有交流，眼裏只有自己，並沒有團隊的概念，可以想像得到，他們最終會因為內鬨而落敗。
「仲有一分鐘。」東南西北高聲宣告。
「你啱啱諗咩諗到咁出神？」雅萊歐小聲問阿希。
阿希對於她突如其來的一問感到錯愕，腦袋未運作得來，無任何修飾便說︰「我諗起以前細個玩飛行棋嘅往事，永遠起唔到機同永遠返唔到終點，同埋……」
「同埋？」看到阿希欲言又止，雅萊歐忍不住追問。
「同埋係我一家人嘅共同回憶，但佢哋死嘅死，失蹤嘅失蹤，我今次嚟參賽都係想揾返失蹤嘅阿哥，但係係呢啲比賽嘅項目樣樣都令我諗返起細個嘅開心回憶，東南西北好似專登針對我咁。」阿希笑中帶淚地說。
「喔，唔好意思，提起你嘅傷心事。」雅萊歐感到非常抱歉。
「唔緊要，只要贏到比賽就會揾到我阿哥，聽講佢而家變咗呢個組織嘅一份子，比賽到而家，我有時甚至懷疑係佢負責呢個比賽。」阿希破涕為笑。
而此番說話，同時亦被遜馬亞里聽到，他沒有搭話，只露出了一個耐人尋味的表情。
時間來到四時半，東南西北準時宣佈飛行棋比賽開始，一粒巨大的骰子由棋盤中間升起。骰子大概有半個人高，要擲的話一定要用雙手拋。
看到巨大骰子後，在場的十六個參賽者均想着同一件事︰「如果力度同角度控制得好，要控制點數都唔係無可能。」
「比賽開始！」隨着東南西北簡潔有力的宣佈，一場鬥智鬥力、既漫長又嚴峻的比賽終於揭開序幕。
